متّانین رئوایت 20
20
ائشچئلر مثلی
1«دوغرودان دا گؤیون پادشاهلیغی باغ صاحئبی اولان بئر آداما بنزهر کی، سحر تِزدن دوروب، اوزوم باغی اوچون ائشچی توتماغا چیخدی. 2ائشچئلر ائنن گونی بئر دئنارا راضیلاشیب، اولاری اوزوم باغینا گؤندَردی. 3سحرچاغی ساعات دوقّوزا یاخین چیخیب، آیری ائشچئلری میداندا گؤردی کی، ائشسئز دوروبلار. 4اولارا ددی: ”سئز ده منئم اوزوم باغیما گدئن و حاقّیز هر نه اولسا ورهرم.“ 5اولار دا گتدئلر. گوندوز ناهارچاغی ساعات اونائکئیه یاخین و ناهاردان سورا ساعات اوچه یاخین گئنه چیخیب بله الهدی. 6آخشامچاغی ساعات بِشه یاخین چیخیب، ائشسئز دوران آیری ائشچئلری گؤردی و اولارا ددی: ”نه اوچون بوردا بوتون گون آوارا دوروبسوز؟“ 7اولار اونا ددئلر: ”چونکی هچ کئم بئزی ائشه گؤتورمهیئب.“ اولارا ددی: ”سئز ده منئم باغیما گدئن.“ 8آخشامچاغی باغ صاحئبی اؤز ناظئرئنه ددی: ”ائشچئلری چاغیر و آخیرکیلاردان باشلاییب، اوّلکیلره کئمی موزدلرئنی ور.“ 9ساعات بِشه یاخین ائشه گلنلر، هر بئری بئر دئنار آلدیلار. 10اونا گؤره ده، اوّلکیلر اله دوشوندولر کی، لاپ چوخ آلاجاقلار. آمّا اولارین دا هر بئری بئر دئنار آلدی. 11آلاندان سورا، باغ صاحئبئنه شئکایت الهیئب، ددئلر: 12”بو آخیردا گلنلر آنجاق بئر ساعات ائشلهدئلر، آمّا سن اولاری بئز ائنن کی، گونون آغیرلیق و ائستیلئیئنی چکمئشئک، بئر توتدون.“ 13آمّا باغ صاحئبی جاواب ورئب، اولارین بئرئنه ددی: ”دوستوم! من سنه حاقسیزلیق الهمئرم. مگر سن من ائنن بئر دئنارا راضیلاشمادین؟ 14موزدونی آل، گت. ائستهیئرم کی، بو آخیرکیلارا دا سنه وردئیئم قدر ورَم. 15آیا ائختئیاریم یوخدور کی، اؤز مالیم ائنان نه ائستهدئیئمی الهیم؟ آیا سن منئم سخاوتلی اولدوغوما پاخیلّیق الهیئرسن؟“ 16بله ده آخیرکیلار اوّل و اوّلکیلر آخیرکی اولاجاقلار.»
عئسا گئنه اؤز اؤلومونی خبر ورئر
17عئسا اورشلئم شهرئنه ساری یولا دوشَنده اونائکی شاگئردی بئر قیراغا آپاریب، اولارا ددی: 18«باخین، بئز اورشلئمه گدئرئک و ائنسان اوغلی باش کاهئنلر و تؤورات موعلّئملری الئنه ورئلهجک. اولار اونی اؤلومه محکوم الهیئب، 19قیرییهودئلرئن اَلئنه تسلئم اِلئیهجکلر کی اولار اونی مسخره الهسئنلر، شالّاق ائنان ووروب، چارمیخا چکسئنلر. آمّا او، اوچونجی گون دئرئلهجک.»
بئر آنانین ائستهیی
20او زامان، زِبِدِی اوغوللارینین آناسی، اوغوللاری ائنن عئسانین یانینا گلئب، سجده الهدی و ددی کی، اوندان بئر خاهئشی وار. 21عئسا اونا ددی: «نه ائستهیئرسن؟» آرواد اونا ددی: «امر اله کی، منئم بو ائکی اوغلوم سنئن پادشاهلیغیندا بئری صاغیندا و بئری ده سولوندا اوتورسون.» 22آمّا عئسا جاواب ورئب ددی: «سئز نه ائستهدئیئزی بئلمئرسئز. مگر ائچهجهیئم پئیالادن ائچه بئلرسئز؟» اولار ددئلر: «الئیه بئلرئک.» 23عئسا اولارا ددی: «ائچهجهیئم پئیالادن ائچهجکسئز؛ آمّا صاغیمدا، یا دا سولومدا اوتورماغا ائجازه ورمک منئم اَلئمده دیئل. آتام بو یرلری موعیّن آداملار اوچون حاضیرلاییب.»
24اون شاگئرد، بونی اشئدن واخت، ائکی قارداشا حئرصلندئلر. 25آمّا عئسا اولاری یانینا چاغیریب ددی: «بئلئرسئز کی، قیرییهودئلرئن حاکئملری اولارا آغالیق الهیئرلر و ریئسلری اولارین اوستونه حاکئمئیّت سورورلر. 26آمّا سئزئن آرازدا بله اولمامالیدیر. آرازدا بؤیوک اولماق ائستهین هر کس، او بئرئلرئن نؤکری اولسون 27و آرازدا بئرئنجی اولماق ائستهین، او بئرئلرئن قولی اولسون. 28چونکی حتّا ائنسان اوغلی دا، اونا خئدمت اولونماق اوچون گلمهدی. او گلدی کی، خئدمت الهسئن و جانینی چوخ آداملارین یولوندا فدا الهسئن.»
ائکی کورون گؤزلری آچیلیر
29ارئحا شهرئندن چیخاندا بؤیوک بئر جاماعات عئسانین دالیسیجا گتدی. 30یول قیراغیندا اوتوران ائکی کور، عئسانین کچدئیئنی اشئدن واخت، باغیردیلار: «آغا، ای داوود اوغلی! بئزه یازیغین گلسئن.» 31جاماعات اولارا آجیقلانیب، ساکئت الهمهیه اَللَشدئلر. آمّا اولار لاپ بَرک قیشقیریردیلار: «آغا، ای داوود اوغلی! بئزه یازیغین گلسئن.» 32عئسا دایاندی و او ائکی آدامی چاغیریب ددی: «مندن نه ائستهیئرسئز کی، سئزه الهیئم؟» 33اولار اونا ددئلر: «آغا، گؤزلرئمئز آچیلسین.» 34عئسانین اولارا اورهیی یاندی، گؤزلرئنه ال سورتدی؛ او آندا اولارین گؤزلری آچیلدی و عئسانین دالیسیجا گتدئلر.
Currently Selected:
متّانین رئوایت 20: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
