لوقا روایت 9
9
عئسا اونائکی حوارئنی گؤندَرئر
1عئسا اونائکی شاگئردئنی اؤز یانینا چاغیریب، اولارا قووّت و قودرت وردی کی بوتون ائبلئس روحلاری قووسونلار و ناخوشلوقلارا شفا ورسئنلر. 2اولاری گؤندَردی کی، تارینین پادشاهلیغینی اعلان الهیئب، ناخوشلارا شفا ورسئنلر. 3عئسا اولارا ددی: «یول اوچون هچ بئر شی گؤتورمهیئن؛ نه اَل آغاجی، نه توربا، نه چؤرک، نه پول، نه ده بئر کؤینکدن آرتیق. 4هانسی اِوه گئره سئز، او یِردن چیخاناجاق اوردا قالین. 5هاردا سئزی قبول الهمهسهلر، او شهردن چیخاندا، آیاقلاریزین توزونی چیرپین کی، اولارین ضئدّئنه بئر شهادت اولسون.» 6اولار دا، یولا دوشوب، کنددَن کنده گَزئردئلر و هر یِرده، تارینین پادشاهلیغینین خوش خبرئنی اعلان الهیئب، ناخوشلارا شفا ورئردئلر.
7حاکئم هئرود، بو اولان ائشلرئن هامیسینی اِشئدئب، گئج اولموشدی. چونکی بعضی آداملار دیئردئلر کی عئسا اله یحیادیر کی اؤلولردن دئرئلئب. 8بعضی آداملار دا دیئردئلر؛ ائلیا پیغمبر ظوهور الهیئب و قالانی دا دیئردی کی، قدئم پیغمبرلردن، بئری دئرئلئب. 9هئرود حاکئم ددی: «یحیانین باشینی من اؤزوم کَسدئردئم، بس بو آدام کئمدئر کی، اونون حاقّیندا بو شیلری اِشئدئرم؟» و اَللَشئردی کی عئسانی گؤره.
عئسا بشمئن نفره یمک ورئر
10حوارئلر قاییدیب، گؤردوکلری ائشلرئن هامیسینی عئسایا نقل الهدئلر. عئسا دا اولاری اؤزی ائنن گؤتوروب، بِیتصِیدا آدیندا بئر شهره آپاردی. 11جاماعات بونی بئلن واخت اونون دالیسیجا گتدی. عئسا دا اولاری قبول الهدی و تارینین پادشاهلیغی حاقّیندا اولار ائنان دانیشیب، شفایا مؤحتاج اولان آداملاری شفا وردی.
12گون باتان چاغی، عئسانین اونائکی شاگئردی اونون یانینا گلئب، ددئلر: «جاماعاتی مورخّص اِلَه کی، اطرافدا اولان کندلَر و اَکئنلره گدئب اؤزلری اوچون یمک و یِر تاپسینلار، چونکی بورا چؤللوکدی.» 13آمّا عئسا شاگئردلَره ددی: «سئز اولارا یِمک ورئن.» اولار جاواب وردئلر: «بئزئم بِش چؤرک و ائکی بالیقدان آرتیق بئر شیئمئز یوخدور. مگر کی اؤزوموز گدئب، بوتون بو خالق اوچون چؤرک آلاق.» 14چونکی اولار بشمئن کئشئیه یاخین ائدئلر. عئسا اؤز شاگئردلرئنه ددی: «اولاری اَلّی-اَلّی، دستهلَرده اوتوردون.» 15شاگئردلر ده بله الهیئب، هامینی اوتورتدولار. 16عئسا بِش چؤرک ائنن، ائکی بالیغی گؤتوردی، گؤیه باخیب، چؤرکلری و بالیقلاری برکت وردی. اوندان سورا چؤرکلری بؤلوب شاگئردلرئنه وردی کی، جاماعاتین قاباغینا قویسونلار. 17هامی ییئب دویدی و آرتیق قالان تئکهلردَن، اونائکی سبد دولدورولدی.
پطروس دئله گَتئرئر کی عئسا اله مسئحدئر
18بئر گون عئسا تک باشینا بئر یِرده دوعا الهیئردی، شاگئردلری ده اونونان ائدئلر. عئسا اولاردان سوروشدی: «خالق دیئر من کئمم؟» 19شاگئردلر جاواب ورئب، ددئلر: «بعضئلری دیئرلر تعمئد ورن یحیا، بعضئلری ده دیئرلر ائلیا پیغمبر. بعضئلری ده دیئرلر کی، قدئم پیغمبرلردن بئری دئرئلئب.» 20عئسا اولاردان سوروشدی: «آمّا سئز دیئرسئز من کئمَم؟» پطروس جاواب ورئب، ددی: «سن تارینین وعده ورئلن مسئحیسن.»
21عئسا اولارا چوخ جئدّی قدغن الهیئب، امر الهدی کی، بونی هچ کئمه دِمهسئنلر. 22و ددی کی، «گرک ائنسان اوغلی، چوخ عذابلار چَکسئن و آغساقّاللار و معبدئن باش کاهئنلری و تؤورات موعلّئملری طرفئندن ردّ اولونوب، اؤلدورولسون و اوچونجی گونده دئرئلسئن.»
23اوندان سورا عئسا اولارین هامیسینا ددی: «هر کئم ائستهسه منئم دالیمجا گله، گرک اؤزونی ائنکار اِلئیه و هر گون چارمیخینی گؤتوروب، منئم دالیمجا گله. 24چونکی هر کئم جانینی قورتارماق ائستهسه، اونی اَلدَن ورهجک. آمّا هر کئم منئم اوچون اؤز جانیندان کِچسه، اونی قورتاراجاق. 25چونکی آدام اوچون نه فایداسی وار کی، بوتون دونیانی اَله گتئره، آمّا اؤز جانینی اَلدَن وره یا دا اونا ضرر وورا. 26بونا گؤره کئم مندن و منئم سؤزلرئمدن اوتانسا، ائنسان اوغلی دا اؤزونون جلالیندا، گؤیده کی آتاسینین جلالیندا و موقدّس ملکلر ائنن گلن زامان، او آدامدان اوتاناجاق. 27آمّا دوغروسونی سئزه دیئرم کی، بوردا دورانلاردان بعضئسی وار کی، تارینین پادشاهلیغینی گؤرمهیئنجه، اؤلومی دادمایاجاقلار.»
عئسانین ظاهئری دَیئشئلئر
28بو سؤزلری دئیندن سَکّئز گون سورا، عئسا، پطروسی، یوحنّانی و یعقوبی گؤتوروب، داغا گتدی کی دوعا اِلئیه. 29دوعا الهین زامان، اوزی دیئشئلدی و پالتاری آغ-آبّاغ اولوب، پاریلدادی. 30بئردن، ائکی کئشی گؤروندی کی عئسا ائنن صؤحبت الهیئردئلر. او ائکی کئشی موسا پیغمبر ائنن، ائلیا پیغمبر ائدئلر. 31اولار جلال ائچئنده ظاهئر اولوب، عئسانین چیخیشی باره ده کی اونون رحلتی ائنن، عنقرئب اورشلئم شهرئنده اولاجاق ائدی، دانیشیردیلار. 32پطروس و اونونان اولانلارین، گؤزلرئنی یوخی باسمیشدی. آمّا یوخولاری قاچاندان سورا، عئسانین جلالینی و اونونان دوران او ائکی کئشئنی گؤردولر. 33او ائکی کئشی عئسانین یانیندان آیریلاندا، پطروس عئسایا ددی: «اوستاد، بوردا اولماغیمیز نه یاخشی اولدی! قوی بوردا اوچ چادیر قوراق؛ بئری سنه، بئری موسا پیغمبره، بئری ده ائلیا پیغمبر اوچون.» پطروس نه دِدئیئنی، بئلمئردی. 34حله پطروس بو سؤزلری دیئردی کی، بئر بولود گلئب، اولارین اوستونه کؤلگه سالدی. بولود اولارین اطرافینی آلان واخت شاگئردلر قورخدولار. 35و بولوددان بئر سس گلدی کی دیئردی: «بو منئم اوغلومدور، منئم سِچدئیئم، اونون سؤزونه قولاق آسین.» 36بو سَسئن کَسئلدئیی واخت، اولار عئسانی تک گؤردولر. او شاگئردلر، گؤردوکلری شیلری، او گونلَرده اؤز یانلاریندا ساخلاییب، هچ کسه بئر سؤز دمهدئلر.
ائبلئس روحا توتولموش اوغلانین شفاسی
37او گونون صاباحی اولار داغدان اِنَن زامان، بؤیوک بئر جاماعات عئسانین پئشوازینا چیخدی. 38بئردن جاماعات ائچئندن، بئر کئشی قیشقیریب ددی: «اوستاد، سنه یالواریرام، اوغلوما نظر اِلَه، چونکی منئم بئری_بئردانه بالامدیر. 39بئر روح اونی توتور، او دا بئردن بئره، باغیرماغا باشلاییر. روح اونی اله تئترهدئر کی اوشاغین آغزی کؤپوکلهنئر و اونی قووّتدن سالیب، زور ائنان اوندان آیریلیر. 40سنئن شاگئردلرئنه یالواردیم کی، او روحی اوندان قووسونلار، آمّا اولار باشارا بئلمهدئلر.» 41عئسا جاواب ورئب ددی: «ای ائمانسیز و ترسه نسئل! نه واختاجاق گرک سئز ائنن اولوب، سئزه دؤزَم؟! اوغلونی بورایا گتئر.» 42اوشاق عئسانین یانینا گلن واخت، ائبلئس روح اونی یِره چیرپیب، چوبالاتدی. آمّا عئسا خبئث روحا آجیقلاندی و اوشاغا شفا ورئب آتاسینا قایتاردی. 43هامی تارینین عظمتئنه مات قالدیلار.
آمّا اله بو حالدا کی، اولارین هامیسی عئسانین الهدئیی بوتون ائشلره، حیران قالمیشدیلار، او، اؤز شاگئردلرئنه ددی: 44«بو سؤزلرئم قولاقلاریزدا قالسین؛ بو تزلئکده ائنسان اوغلی ائنسانلارین اَلئنه تسلئم اولوناجاق.» 45آمّا اولار بو سؤزی آنلامادیلار و بو سؤز، اولاردان گئزلی قالدی کی، اونی باشا دوشمهسئنلر. بو بارهده، عئسادان سوروشماغا دا قورخوردولار.
لاپ بؤیوک کئمدئر
46شاگئردلرئن آراسیندا، بله بئر بحث دوشدی کی، اولاردان هانسی لاپ بؤیوکدور؟ 47آمّا عئسا کی اولارین اورَکلرئندهکی، فئکئری بئلئردی، کؤرپه بئر اوشاغی گؤتوروب یانیندا اوتورتدی 48و اولارا ددی: «هر کئم بو اوشاغی منئم آدیمدا قبول الهسه، منی قبول الهمئش و هر کئم منی قبول الهسه، منی گؤندَرهنی قبول الهمئش اولور. چونکی سئزئن آرازدا لاپ کئچئک کئم اولسا، اِله لاپ بؤیوک اودور.»
49یوحنّا ددی: «اوستاد، بئرئنی گؤردوک کی، سنئن آدیندا ائبلئس روحلاری آداملاردان قوووردی و بئز اَللشدئک کی اونا مانع اولاق چونکی بئز ائنن دِیئلدی.» 50آمّا عئسا اونا ددی: «اونون قاباغینی آلمایین. چونکی سئز ائنن ضئدّ اولمایان، سئز ائنندئر.»
سامئرهلئلر عئسانی ائستهمئرلر
51عئسانین، گؤیه آلیناجاغی گونلر یاخینلاشاندا، او تصمئم توتوب اورشلئم شهرئنه ساری یولا دوشدی. 52عئسا اؤزوندن قاباق اِلچئلری گؤندردی. اولار، عئسا اوچون تداروک گؤرمک نئیّتی ائنن، سامئره منطقهسئنئن بئر کَندئنه گتدئلَر. 53آمّا اورانین خالقی اونی قبول الهمهدئلر، چونکی اونون اورشلئمه ساری گتمهیی بئلئنئردی. 54عئسانین شاگئردلری یعقوب و یوحنّا بونی گؤرنده ددئلر: «آغا! ائستهیئرسن دئیک کی، گؤیدن اود یاغیب، اولاری محو الهسئن؟» 55آمّا عئسا دؤنوب اولارا آجیقلانیب ددی: «سئز هانسی روحدان اولدوغوزی بئلمئرسئز؟ 56چونکی ائنسان اوغلی گلمهیئب کی، خالقین جانینی محو الهسئن. گلئب کی، اولاری قورتارسین.» و اولار آیری بئر کنده گتدئلر.
عئسانین دالیسیجا گتمهیئن باهاسی
57اولار یولدا گدن واخت، بئر نفر عئسایا ددی: «هارا گِدهسن، من سنئن دالینجا گَلهرَم.» 58عئسا اونا ددی: «تولکولرئن یوواسی، گؤی قوشلارینین دا یوواسی وار، آمّا ائنسان اوغلونون، باشینی دایاماغا دا بئر یِری یوخدور.» 59عئسا آیری بئر آداما ددی: «منئم دالیمجا گل.» آمّا او جاواب وردی: «آغا، قوی اوّل گدئم، آتام اؤلَنده اونی باسدیریم سورا گلئم.» 60عئسا او آداما بله ددی: «قوی اؤلولر، اؤز اؤلولرئنی باسدیرسینلار. آمّا سن گِت تارینین پادشاهلیغینی اعلان اِله.» 61آیری بئر آدام دا ددی: «آغا! سنئن دالینجا گلهجهیم، آمّا قوی اوّل گدئم اِوئمده اولانلار ائنان وئداعلاشیم.» 62عئسا اونا ددی: «او آدام کی، یِری شوخوملاماغا باشلاسا، دؤنوب دالینا باخسا، تارینین پادشاهلیغینا یاراشماز.»
Currently Selected:
لوقا روایت 9: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
