لوقا روایت 10
10
عئسا یِتمئش شاگئردی گؤندَرئر
1بوندان سورا، رب عئسا آیریدان یِتمئش نفر ده شاگئردلردن سِچدی و اولاری ائکی-ائکی، اؤزوندن قاباق، او شهرلَر و یِرلَره کی، اؤزی ائستهیئردی گِده گؤندَردی. 2اولارا ددی: «محصول چوخدور، آمّا ائشچئلر آزدیر. اونا گؤره ده، محصولون صاحئبئنه، یالوارین کی، محصولونی ییغماق اوچون، ائشچئلر گؤندَرسئن. 3گِدئن، باخین من سئزی قوزولار کئمی، قوردلار آراسینا گؤندَرئرم. 4اؤزوز ائنن نه پول کئسهسی گؤتورون، نه توربا، نه ده باشماق. یولدا دا، هچ کس ائنن سالاملاشمایین. 5هانسی اِوه گئرهسئز، اوّل دیئن: ”بو اِوده صولح و سالاماتلیق اولسون.“ 6اگر اوردا صولح و سالاماتلیق سِوَن بئر آدام اولسا، سالامیزین برکتی اونون اوستونده قالاجاق. اولماسا، سالامیزین برکتی اؤزوزه قاییداجاق. 7اله او اِوده قالین. اولار سئزه هر نه ورسهلر، ییئن و ائچئن، چونکی ائشچی اؤز موزدونه لایئقدئر. اِودن اِوه گزمهیئن. 8بئر شهره گئردئیئز زامان، اگر سئزی قبول الهسهلر، قاباغیزا نه قویسلار، یِیئن. 9اوردا اولان ناخوشلارا شفا ورئن و اولارا دیئن کی، ”تارینین پادشاهلیغی سئزه یاخینلاشیب.“ 10آمّا هر واخت گئردئیئز بئر شهر ده، سئزی قبول الهمهسهلر، او شهرئن کوچهلَرئنه گدئب دیئن: 11”حتّا شهرئزدن آیاقلاریمیزا اوتوران توزی دا، سئزئن ضئدّئزه چیرپیریق. آمّا بونی بئلئن کی، تارینین پادشاهلیغی سئزه یاخینلاشیب.“ 12سئزه دیئرم کی، قئیامت گونی سودومون حالی او شهرئن حالیندان لاپ آسان اولاجاق.
13«وای سئزئن حالیزا، ای خورازئن شهری! وای سئزئن حالیزا، ای بِیتصِیدا شهری! چونکی سئزده اولان مؤجوزهلر، صور و صِیدا شهرلرئنده اولسایدی، اولارین خالقی چوخدان پالازا بورونردئلر و کول ائچئنده اوتوروب، تؤوبه الهیردئلر. 14آمّا قئیامت گونی، صور و صئدونون حالی، سئزئنکئندن لاپ آسان اولاجاق. 15و سن، ای کَفَرناحوم، ائستهیئردئن گؤیه قدر قالخاسان؟ اؤلولر عالمئنه قَدر، اِندئرئلهجَکسن.»
16سئزه قولاق آسان، منه قولاق آسیر و سئزی ردّ الهین، منی ردّ الهیئر؛ و منی ردّ الهین، منی گؤندَرهنی ردّ الهیئر.»
17او یِتمئش شاگئرد، شادلیق ائنان قاییدیب، ددئلر: «آغا! حتّا ائبلئس روحلار دا سنئن آدیندا، بئزدن ائطاعت الهیئرلر.» 18عئسا اولارا ددی: «شیطانی گؤردوم کی، گؤیدن ائلدیریم کئمی دوشدی. 19باخین، من سئزه قودرت ورمئشم کی، ائلانلاری، عقربلری و دوشمنئن بوتون قووّتئنی، آیاق آلتیندا اَزهسئز و هچ بئر شی سئزه ضرر وورمایاجاق. 20آمّا بوندان سِوئنمهیئن کی، روحلار سئزدن ائطاعت الهیئرلر. بوندان سِوئنئن کی، سئزئن آدلاریز گؤیده یازیلیب.»
21او آندا، عئسا تارینین موقدّس روحوندا شادلیق الهدی و ددی: «آتا، گؤیون و یِرئن ربّی! سنه شوکور الهیئرم کی، بو شیلری، آغیلّیلاردان و بئلَنلَردن گئزلَدئب و اولاری کئچئک اوشاقلارا آشکار الهیئبسن. بَلی، آتا! چونکی سنئن لوطف دولی ائرادن، بله ائدی. 22هر شی گؤیدکی آتام طرفئندن منه تاپشیریلیب. اوغولون کئم اولدوغونی آتادان باشقا هچ کئم بئلمز. آتانین کئم اولدوغونی دا هچ کئم بئلمز مگر اوغول، و او آداملار کی، اوغول اولاری سچئب کی اونی اولارا آشکار الهسئن.»
23اوندان سورا عئسا شاگئردلرئنه ساری دؤنوب، اولارا آیریدا ددی: «خوش او گؤزلرئن حالینا کی، سئز گؤرن شیلری گؤرورلر. 24چونکی سئزه دیئرم کی؛ چوخ پیغمبرلر و پادشاهلار سئزئن گؤردویوز شیلری گؤرمک آرزوسوندا ائدئلر و گؤرمهدئلر. سئزئن اِشئتدئیئز شیلری، اِشئتمک آرزوسوندا ائدئلر و اِشئتمهدئلر.»
یاخشی سامئرهلی مثلی
25بئر گون شرئعت عالئملرئندن بئری قالخیب، عئسانی ائمتاحان الهمک اوچون اونا ددی: «اوستاد! نه الهیئم کی، ابدی حیاتی مئراث آلیم؟» 26عئسا اونا ددی: «تؤورات دا نه یازیلیب؟ اوندان نه آنلاییرسان؟» 27شرئعت عالئمی عئسانین جاوابیندا ددی: «رب تارینی بوتون اورهیئندن، بوتون جانیندان، بوتون قووّتئندن و بوتون فئکرئندن سِو و قونشونی دا اؤزون کئمی سِو.» 28عئسا اونا ددی: «دوز جاواب وردئن. بو ائشی گؤر کی، یاشایاجاقسان.»
29آمّا او عالئم کی ائستهیئردی اؤزونی حاقلی گؤرسده، عئسایا ددی: «منئم قونشوم کئمدئر؟» 30عئسا دا بله جاواب وردی: «بئر کئشی اورشلئم شهرئندن ارئحا شهرئنه گِدن واخت، یول کَسَنلرئن اَلئنه دوشدی. اولار اونی سویوب، دؤیدولر و یاریجان حالدا، بوراخیب گتدئلر. 31تصادوفَن معبدئن بئر کاهئنی، او یولدان کِچئردی. کاهئن او آدامی گؤرن واخت، یولون او تایینا کِچدی و گتدی. 32اله بوجور بئر لاوی ده کی، معبدئن خادئمی ائدی، او یِره چاتیب آدامی گؤرن واخت، یولون او تایینا کِچدی و گتدی. 33آمّا او یولدا سَفَره چیخان بئر سامئرهلی، اونون یانینا یتئشدی و او کئشئنی گؤرن واخت، اونا اورهیی یاندی. 34او سامئره لی اونون یانینا گدئب، اونون یارالارینا یاغ ائنان شراب تؤکوب، باغلادی. اوندان سورا اونی اؤز اِششَهیئنه مئندئرئب، بئر مهمانخانایا گَتئردی و اونا یتئشدی. 35او گونون صاباحی، ائکی دئنار چیخارتدی و مهمانخاناچییا ورئب ددی: ”بو کئشئیه یاخشی یِتئش. نه قدر آرتیق خرج الهسن ده، قاییداندا سنه وِرهرَم.“ 36ائندی سنئن نظرئنه گؤره، بو اوچ نفردن هانسی، یول کَسَنلرئن اَلئنه دوشَن کئشئیه بئر قونشودور؟» 37او عالئم ددی: «او آدام کی، اونا رحم الهدی.» عئسا دا اونا ددی: «گِت، سن ده بله اِله.»
مارتا و مریمئن اِوئنده
38عئسا، شاگئردلری ائنن یولدا گِدنده، بئر کنده گئردی. اوردا مارتا آدیندا بئر آرواد، عئسانی اؤز اِوئنه دعوت الهدی. 39مارتانین مریم آدیندا بئر باجیسی وارائدی. مریم رب عئسانین آیاقلارینین یانیندا اوتوروب، اونون تعلئملرئنه قولاق آسیردی. 40آمّا مارتا کی ائشئن چوخلوغوندان مشغول ائدی عئسانین یانینا گلئب، اونا ددی: «آغا، باجیمین، منی بو قدر ائشئن ائچئنده تک قویماسی، سنی ناراحات الهمئر؟ اونا ده کی، منه کؤمک الهسئن.» 41آمّا رب عئسا اونا جاواب ورئب ددی: «مارتا، مارتا، سن چوخ شیلر اوچون اوزولوب و نئگاران اولورسان. 42آمّا فقط بئر شی لازیمدیر. مریم او یاخشی پایی سِچئب کی اوندان آلینمایاجاق.»
Currently Selected:
لوقا روایت 10: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
