لوقا روایت 8
8
اَکئنچی مثلی
1اوندان سورا عئسا شهردن شهره و کنددن کنده گَزئب، تارینین پادشاهلیغینین خوش خبرئنی اعلان الهیئردی. اونائکی شاگئرد ده، اونونان ائدئلر. 2بعضی آروادلار دا کی خبئث روحلاردان و ناخوشلوقلاردان صاغالمیشدیلار عئسا ائنن ائدئلر: مریم آدیندا بئر آرواد کی، اونا مجدللی دِیئلئردی و اوندان، یِدّی ائبلئس روح، اِشئیه چیخمیشدی، 3یوآنّا خوزانین آروادی، خوزا دا هئرود حاکئمئن ناظئری ائدی، سوزانّا و بئر چوخ آیری آروادلار. بو آروادلار اؤز وارلاری ائنن عئسا و شاگئردلرئنه خئدمت الهیئردئلر.
4او زامان کی، خالق هر شهردن، عئسانی گؤرمهیه گَلئردئلر و بؤیوک بئر جاماعات ییغیلدی، عئسا اولارا بئر مثل نقل الهیئب ددی: 5«بئر اَکئنچی، توخوم سَپمهیه چؤله چیخدی. توخومی سَپن زامان، توخوملاردان بعضئسی، یول اوستونه دوشوب، آیاق آلتیندا پایمال اولدی و گؤیون قوشلاری اولاری یِدئلر. 6توخوملارین بعضئسی داشلیغا دوشوب، بئتَن واختدا قورودی، چونکی روطوبَتی یوخ ائدی. 7توخوملارین بعضئسی تئکانلار آراسینا دوشدی. تئکانلار اولار ائنان برابر، بؤیویوب، اولاری بوغدولار. 8توخوملارین بعضئسی یاخشی تورپاغا دوشدی و بئتئب یوز قات آرتیق، ثَمَره وِردی.» عئسا بولاری دئیندن سورا، اوجا سَس ائنن ددی: «هر کئمئن اِشئتمهیه قولاغی وار اِشئتسئن!»
9او واخت کی شاگئردلر، بو مثلئن معناسینی عئسادان سوروشدولار. 10عئسا ددی: «تارینین پادشاهلیغینین سئرّلَرئنئن آنلاماسی، سئزه وِرئلئب،آمّا آیری آداملارا، مَثللَرائنن دِیئلئر کی،
گؤردوکلری حالدا، گؤرمهسئنلر
اِشئتدئکلَری حالدا، آنلاماسینلار.
11مثلئن معناسی بودور: توخوم، تارینین کلامیدیر. 12یول اوستونه دوشَن توخوملار اولاردیلار کی، تارینین کلامینی اِشئدئرلَر؛ سورا ائبلئس گَلئب، کلامی اولارین اورهیئندن اوغورلاییر، اولمایا کی ائنانیب قورتارسینلار. 13داشلیغا دوشَن توخوملار، او آداملاردیلار کی، تارینین کلامینی اِشئدَن واخت، شادلیق ائنان اونی قبول الهیئرلر، آمّا کؤکلری اولمادیغینا گؤره، بئر آز مودّت ائمان گتئرئرلر، ائمتاحان زامانی گَلَنده ده، ائماندان دؤنورلَر. 14تئکانلار آراسینا دوشَن توخوملار، او آداملاردیلار کی، تارینین کلامینی اِشئدئرلَر، آمّا گِده-گِده، نئگارانلیقلار، دونیا مالی و حیاتین لذّتلری ائچئنده، بوغولوب، ثَمَره وِرمئرلر. 15آمّا یاخشی تورپاغا دوشَن توخوملار، او آداملاردیلار کی تارینین کلامینی اِشئدئرلر، اونی صاف و یاخشی اورَک ائنن، بَرک ساخلاییب، صبرائنن، ثَمَره وِرئرلر.
لامپا چیراغین مثلی
16هچ کس، چیراق یاندیریب، اونی قاب ائنان اؤرتمز یا دا تخت آلتینا قویماز. چیراغی چیراقدانا قویار کی، ائچهری گئرنلر ائشیغی گؤرسونلر. 17چونکی گئزلئن هچ بئر شِی یوخدور کی، بلّی اولماسین؛ و هچ اؤرتولی بئر شی ده، یوخدور کی، بئلئنئب، آشکارا چیخماسین. 18بونا گؤره ده، نه جور اِشئتدیئزه دئقّت الهیئن؛ چونکی هر کئمده واردیر، اونا لاپ چوخ ورئلهجک. آمّا هر کئمده اولماسا، حتّا اَلئنده اولانی دا کی، گومان الهیئر وار، اوندان آلیناجاق.»
عئسانین آناسی و قارداشلاری
19اله بو واخت عئسانین آناسی و قارداشلاری، اونون یانینا گلدئلر، آمّا جاماعاتین چوخلوغوندان، عئسایا یاخینلاشا بئلمهدئلَر. 20عئسایا خبر ورئب، ددئلر: «آنان ائنان قارداشلارین اِشئکده دوروب، سنی گؤرمک ائستهیئرلَر.» 21آمّا عئسا جاواب وردی: «منئم آنام و قارداشلاریم، اولاردیلار کی، تارینین کلامینی اِشئدئب، اونا عمل الهیئرلر.»
عئسا کولهیی یاتیردیر
22بئر گون عئسا اؤز شاگئردلری ائنن، بئر قاییغا مئنئب اولارا ددی: «گلئن گؤلون او تایینا کِچک.» اولار دا یولا دوشدولر. 23قاییق سو اوزونده گِدَن واخت، عئسا یوخویا گتدی. بئردن گؤلده چوخ شئدّتلی بئر کولک باشلادی اله کی، قاییق سودان دولوردی. اولار خطره دوشموشدولَر. 24شاگئردلر عئسانین یانینا گتدئلر و اونی اویادیب ددئلر: «اوستاد! اوستاد! آز قالیب آرادان گِدک!» عئسا اویاندی، یِله و سویون تلاطومونه، آجیقلاندی. کولک یاتدی و آراملیق دوشدی. 25عئسا اولارا ددی: «ائمانیز هاردادیر؟!» شاگئردلر قورخوب و حیرت ائچئنده، بئربئرلرئنه دیئردئلر: «بو کئمدئر کی حتّا، یِله ده، سویا دا امر الهیئر، اولار دا اوندان ائطاعت الهیئرلر؟»
عئسا ائبلئس روحا توتولموش بئر آداما شفا ورئر
26اوندان سورا اولار گؤلون او تایینا، جدهرئلرئن منطقهسئه کی جلئل وئلایئنئن موقابئلئنده ائدی گلدئلر. 27عئسا قاییقدان ساحئله اِننده، او شهرئن اهلئندن، ائبلئس روحا اسئر اولموش بئر کئشئیه راست گلدی. بو آدام، اوزون زامان ائدی کی، نه پالتار گیئردی، نه اِوده یاشاییردی. او قبئرلر آراسیندا قالیردی. 28او آدام، عئسانی گؤرن زامان، باغیریب، اونون آیاقلارینین قاباغیندا، یِره دوشدی و اوجا سَس ائنن ددی: «ای تاعالا تارینین اوغلی عئسا، من ائنن نه ائشئن وار؟ سنه یالواریرام، منه عذاب ورمه!» 29چونکی عئسا او خبئث روحا امر الهمئشدی کی، بو آدامدان اِشئیه چیخسین. او خبئث روح، دَفهلرائنن او کئشئنی توتموشدی. او آدامی زنجئرلر و کونده لر ائنن باغلاییب، باشینا موحافئظ قویموشدولار. آمّا او گئنه ده، زنجئرلَری قیریردی و ائبلئس روح طرفئندن، چؤللَره آپاریلیردی. 30عئسا اوندان سوروشدی: «آدین نهدئر؟» جاواب وردی: «قوشون.» چونکی، اونون ائچئنه چوخلی ائبلئس روحلار گئرمئشدی. 31ائبلئس روحلار عئسایا یالواردیلار کی، اولارا جهنّمه گتمهیه امر الهمهسئن.
32او یاخینلیقدا، داغدا بؤیوک بئر دونوز سوروسی یمک یِیئردئلر. ائبلئس روحلار عئسایا یالواردیلار کی، اولارا ائجازه ورسئن دونوزلارین ائچئنه گئرسئنلر. عئسا دا ائجازه وردی. 33او واخت ائبلئس روحلار او آدامدان اِشئیه چیخیب دونوزلارین ائچئنه گئردئلر. دونوز سوروسی ده، داغی اوزی آشاغی قاچدیلار و گؤله آتیلیب بوغولدولار.
34دونوز چوبانلاری باشورن شیلری گؤرن واخت قاچیب، بو خبری شَهرده و کَندده یایدیلار. 35او واخت خالق اولوب-کِچنلری گؤرمک اوچون اِشئیه چیخیب، عئسانین یانینا گلدئلر و گؤردولر کی، ائچئندن ائبلئس روحلار چیخان او کئشی، پالتار گیئنئب، عاغیللانمیش، عئسانین آیاقلارینین یانیندا اوتوروب. بونی گؤرنلر قورخدولار. 36بو شیلری گؤرن آداملار، ائبلئس روحا اسئر اولموش کئشئنئن، نه جور شفا تاپدیغینی خالقا نقل الهدئلر. 37او زامان جدهره منطقهسئئن بوتون خالقی، عئسادان ائستهدئلر کی، اولارین یانیندان گِتسئن، چونکی اولارین جانینا بؤیوک بئر قورخی دوشموشدی. عئسا دا قاییغا مئنئب، قاییتدی. 38او کئشی کی اوندان، ائبلئس روحلار چیخمیشدی، عئسایا یالواردی کی، اونونان گده، آمّا عئسا اونی یولا سالیب، ددی: 39«اؤز اِوئنه دؤن و تارینین سنه نه الهدئکلرئنی، اعلان اِله.» او کئشی ده گدئب، عئسانین اونون اوچون الهدئکلرئنی، بوتون شَهرده اعلان الهدی.
صاغالان آرواد و دئرئلن قیز
40عئسا قاییداندا، جاماعات اونون پئشوازینا چیخدیلار، چونکی هامی عئسانین یولونی گؤزلهیئردئلر. 41اله بو واخت، یایروس آدیندا بئر کئشی کی، یهودئلرئن عئبادتگاهینین، ریئسی ائدی، گلئب عئسانین آیاقلارینا دوشوب، عئسایا یالواردی کی اونون اِوئنه گتسئن. 42چونکی، اونائکی یاشلاریندا اولان بئری-بئردانه قیزی، اؤلوم حالیندا ائدی.
اوندا کی عئسا یولدا ائدی، خالق اونی هر یاندان سیخیشدیردیلار. 43او جاماعاتین آراسیندا بئر آرواد وار ائدی کی، اونائکی ائل ائدی، اونون قان آخماسی کسئلمهمئشدی. آرواد بوتون وار-یوخونی طبئبلره خرج الهمئشدی آمّا هچ کس، اونی صاغالدا بئلمهمئشدی. 44آرواد عئسانین دالیسیجا گلئب، اونون پالتارینین اَتهیئنه اَلئن ووردی. اله او آندا، آروادین قان آخماسی کسئلدی. 45عئسا سوروشدی: «منه کئم اَل ووردی؟» هامی ائنکار اِله دی، پطروس ددی: «اوستاد، جاماعات سنی هر یاندان دؤره له یئب، سیخیشدیریر.» 46آمّا عئسا ددی: «منه بئر نفر اَل ووردی، چونکی بئلدئم کی مندن بئر قووّت چیخدی.» 47آرواد، گئزلی قالا بئلمهدئیئنی گؤرنده، تئترهیه-تئترهیه گلئب، عئسانین آیاقلارینا دوشدی و بوتون خالقین حوضوروندا اعلان الهدی کی، نهیه گؤره اونا اَل ووروب و او آندا، نه جور شفا تاپیب. 48عئسا اونا ددی: «قیز، ائمانین سنی شفا ورئب، صاغ-سالامات گِت.»
49عئسا حله دانیشیردی کی عئبادتگاهین ریئسی، یایروسون اِوئندن بئر آدام گلئب، ددی: «قیزین اؤلدی، آرتیق اوستادا زحمت ورمه.» 50آمّا عئسا بونی اِشئدنده یایروسا ددی: «قورخما، آنجاق ائمانین اولسون، قیزین صاغالاجاق.» 51یایروسون اِوئنه گئردئیی واخت، عئسا قویمادی هچ کئم، پطروس، یوحنّا، یعقوب، و اوشاغین آتا-آناسیندان باشقا، اونونان ائچری گئره. 52هامی، قیز اوچون اوخشاما دیئب، آغلاییردیلار آمّا عئسا ددی: «آغلامایین، چونکی او اؤلمهیئب، آنجاق یاتیب.» 53اولار قیزین اؤلدویونی بئلدئکلری اوچون، عئسایا گولدولر. 54آمّا عئسا قیزین اَلئندن توتوب، ددی: «اوشاق، قالخ!» 55قیزین روحی قاییتدی. قیز او آندا آیاغا قالخدی. عئسا امر الهدی کی، اونا یِمک ورسئنلر. 56قیزین آتا-آناسی تعجّوبدن مات قالمیشدیلار آمّا عئسا اولارا تاپشیردی کی، بو اولان ائشئن حاقّیندا هچ کسه دانیشماسینلار.
Currently Selected:
لوقا روایت 8: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
