لوقا روایت 7
7
عئسا روملی افسرئن قولونی شفا ورئر
1عئسا بو سؤزلرئن هامیسینی خالقا دیئب قورتاراندان سورا، کَفَرناحوم شهرئنه گئردی. 2بئر روملی اَفسر اوردا ائدی کی اونون چوخ عزئز بئر قولی وار ائدی. قول ناخوش اولوب، اؤلوم حالیندا ائدی. 3او روملی افسر، عئسانین حاقّیندا اِشئدن زامان، یهودئلرئن بعضی آغساقّاللارینی، عئسانین یانینا گؤندَردی کی، اوندان ائستهسئنلر، گلئب او افسرئن قولونی شفا ورسئن. 4اولار دا عئسانین یانینا گلدئلر و عئسایا چوخ یالواریب، ددئلر: «بو کئشی لایئقدئر کی، سن اونا بو لوطفی اِلئیهسَن. 5چونکی او بئزئم مئلتئمئزی چوخ سِوئر و بو اله او آدامدیر کی عئبادتگاهیمیزی، بئزئم اوچون تئکدی.» 6عئسا دا اولار ائنان گِتدی. اونون اِوئنه یاخینلاشدیغی زامان، او روملی افسر، اؤز دوستلارینی، عئسانین یانینا گؤندَردی کی، اونا دِسئنلَر: «آغا، زحمت چَکمه؛ چونکی من لایئق دِیئلم، منئم دامیمین آلتینا گلهسن. 7بونا گؤرَه ده، اؤزومی لایئق گؤرمهدئم کی، سنئن یانینا گلم. آمّا سن بئر کلمه دِه کی، قولوم صاغالسین. 8چونکی من اؤزوم ده، بئرئنئن اَلئنئن آلتیندا اولان مأمورام، اَلئمئن آلتیندا دا سربازلار وار. بئرئنه دیئرم ”گِت“ گِدئر، او بئرئنَه دیئرم ”گَل“ گلئر و قولوما دا دیئرم”بونی اِله“ او دا الهیئر.» 9عئسا بونی اِشئدن واخت، حیران قالدی و دؤنوب دالیسیجا گلَن، جاماعاتا ددی: «سئزه دِیئرم کی حتّا، ائسرایئل خالقینین آراسیندا دا، بله بئر ائمانا راست گلمَهمئشم.» 10گؤندَرئلمئش آداملار، اِوه قاییتدیقلاری زامان، گؤردولَر کی او ناخوش قول، صاغالیب.
عئسا دول بئر آروادین اوغلونی دئرئلدئر
11آز بئر مودّتدن سورا، عئسا نایئن آدیندا، بئر شهره گِتدی. شاگئردلری و بؤیوک بئر جاماعات دا اونونان گِدئردئلر. 12شهرئن دروازاسینا یاخینلاشاندا،گؤردی کی بئر جنازهنی کی دول بئر آروادین، بئری-بئردانه اوغلی ائدی آپاریرلار. او شهر اَهلئندن، بؤیوک بئر جاماعات دا او آرواد ائنان ائدئلر. 13رب عئسا، او آروادی گؤرن واخت، اونا اورهیی یانیب، ددی: «آغلاما.» 14سورا یاخینلاشیب، اَلئنی، تابوتون اوستونه قویدی. تابوتی آپاران آداملار دایاندیلار. عئسا ددی: «جاوان، سنه دیئرم، قالخ!» 15اؤلی دوروب اوتوردی و دانیشماغا باشلادی. عئسا اونی، آناسینا تاپشیردی. 16بوتون خالقین جانینا قورخی دوشدی و تارییا حمد الهیئب، دیئردئلر: «آرامیزدا، بؤیوک بئر پیغمبر ظوهور الهیئب» و «تاری اؤز خالقینین کؤمهیئنه گلئب.» 17عئسانین بو ائشی نئن خبری، بوتون یهودئیه وئلایتئنده و اطرافدا اولان منطقهنئن هر یِرئنده، یاییلدی.
یحیانین گؤندردئکلری
18یحیانین شاگئردلری، بو ائشلرئن هامیسینی یحیایا خبر وِردئلر. یحیا دا 19شاگئردلرئندن ائکئسئنی چاغیریب، اولاری بو پیغام ائنان رب عئسانین یانینا گؤندَردی کی، اوندان سوروشسونلار: «او کی گرک گله سَنسَن، یوخسا آیری بئرئنئن یولونی گؤزلهیک؟» 20یحیانین او ائکی شاگئردی عئسانین یانینا گلئب ددئلر: «تعمئد ورن یحیا، بئزی سنئن یانینا گؤندَرئب کی، سندن سوروشاق: ” او کی گرک گله سَنسَن، یوخسا آیری بئرئنئن یولونی گؤزلهیک؟“» 21اِله او واخت عئسا، بئر چوخ آداملاری ناخوشلوقلاردان، مرضلردن و خبئث روحلاردان شفا وردی؛ کور اولان آداملارین بئر چوخونون، گؤزلرئنی ده آچدی. 22عئسا یحیانین گؤندردئکلرئنه جاواب وردی: «گِدئن،گؤردویوز و اِشئتدئیئز شیلری یحیایا دِیئن کی کورلار گؤرورلر، چولاقلار یِرئیئرلَر، جوذاملیلار شفا تاپیرلار، کارلار اِشئدئرلَر، اؤلولَر دئرئلئرلَر، فاغیرلارا دا خوش خبر، وِرئرلر. 23بختور او آدام کی، منئم بارهمده شک الهمئیه.»
24یحیانین اِلچئلری گدندن سورا، عئسا یحیانین حاقّیندا، جاماعاتا دانیشماغا باشلاییب ددی: «سئز چؤله نهیی گؤرمهیه گتدئز؟ بئر قامیشی کی یِل اَلئنده اَسئر؟ 25بس نهیی گؤرمهیه گتدئز؟ ظرئف پالتار گیئنمئش بئر کئشئنی گؤرمهیه؟ باخین، اعیانی پالتارلار گیئنئب، دَبدبه ائنن یاشایان آداملار، پادشاهلار سارایلاریندادیلار! 26بس کئمی گؤرمهیه گِتدئز؟ بئر پیغمبری گؤرمهیه؟ بلی، سئزه دیئرم کی، یحیا بئر پیغمبردن ده بؤیوکدور. 27یحیا، اله او آدامدیر کی، مَلاکی پیغمبرئن کئتابیندا اونون حاقّیندا یازیلیب:
”ائندی، سنئن قاباغیندا اؤز الچئمی گؤندَرئرم.
او سندن قاباق سنئن یولونی حاضیرلایاجاق.“
28سئزه دیئرم، تعمئد ورن یحیادان بؤیوک، هچ بئر آدام آنادان دوغولماییب. آمّا تارینین پادشاهلیغیندا، لاپ کئچئک اولان آدام، یحیادان بؤیوکدور.»
29اوندا کی، بوتون خالق، حتّا باج ییغانلار عئسانین ددئکلرئنی اِشئتدئلر، اعلان الهدئلر کی تاری عادئلدئر، چونکی یحیانین اَلئندن تعمئد قوسلی آلمیشدیلار. 30آمّا فرئسی فئرقهسئنئن عالئملری و شرئعت عالئملری، تارینین اولار حاقّیندا اولان، هدفئنی ردّ الهدئلر. چونکی یحیانین اَلئندن تعمئد آلمامیشدیلار.
31عئسا ددی: «بو نسلئن آداملارینی، نهیه بَنزَهدئم؟ اولار نهیه بَنزهیئرلر؟ 32اولار میدانلاردا اوتوران، اوشاقلارا بَنزهیئرلر کی بئربئرلرئنی چاغیریب، دیئرلر:
”بئز سئزئن اوچون نی چالدیق، سئز اوینامادیز.
سئزئن اوچون نوحه اوخودوق، آغلامادیز.“
33چونکی تعمئد ورن یحیا، گلئب کی، نه چؤرک یِیئر، نه ده شراب ائچئر و سئز دیئرسئز: ”اوندا ائبلئس روح وار.“ 34ائنسان اوغلی گلئب کی، هم ییئر، هم ده ائچئر و سئز دیئرسئز: ”باخ، قارینقولی و شراب ائچَن بئر آدامدیر، باج ییغانلارین و گوناهکارلارین دوستیدیر!“ 35آمّا بئر حئکمتئن دوز اولوب اولماماسینی، اونون نتئجهسی گؤرسهدر.»
عئسا و گوناهکار آرواد
36فرئسئلردن بئری، عئسادان دعوت الهدی کی، اولار ائنان یمک یِسئن. عئسا دا فرئسئنئن اِوئنه گِدئب، سوفره باشیندا اوتوردی. 37او شهرده، گوناهکار بئر آرواد یاشاییردی. اوندا کی اِشئتدی عئسا، او فرئسئنئن اِوئنده سوفره باشیندا اوتوروب، مرمر قابدا، دولی بئر عطئرلی یاغ اؤزی ائنن گتئرئب، 38آغلایا-آغلایا عئسانین دالیندا، اونون آیاقلارینین یانیندا، دوردی. آرواد عئسانین آیاقلارینی گؤزیاشلاری ائنن ائسلادیب، ساچلاری ائنن قورولادی، آیاقلارینی اؤپوب، عطئرلی یاغی اونون آیاقلارینا سورتدی. 39عئسانی اِوئنه قوناق الهین فرئسی، بونی گؤرن واخت، اؤز-اؤزونه ددی: «بو کئشی اگر دوغرودان بئر پیغمبر اولسایدی، اونا اَلئنی ووران آروادین، کئم اولدوغونی و نه جور بئر آرواد اولدوغونی بئلَردی. چونکی بو، گوناهکار بئر آرواددیر.» 40عئسا او فرئسئیه ددی: «شمعون! سنه دِمَهلی بئر سؤزوم وار.» او دا ددی: «بویور، اوستاد.» 41عئسا ددی: «بئر نفرئن، ائکی آدامدان آلاجاقی وار ائدی؛ بئرئندن بِش یوز دئنار، او بئرئسئندن ده، اَلّی دئنار. 42چونکی او ائکی آدامین بورجلارینی وِرمهیه، هچ بئر شیلری یوخ ائدی، هر ائکی سئنئن ده بورجون باغیشلادی. ائندی ده گؤروم او ائکی آدامدان هانسی اونی چوختر سِوهجک؟» 43شمعون جاواب وردی: «گومان الهیئرم، او کی چوختر بورجی وار ائدی و باغیشلاندی.» عئسا ددی: «دوز حؤکم الهدئن.» 44اوندان سورا عئسا آروادا ساری دؤنوب، شمعونا ددی: «بو آروادی گؤرورسن؟ من سنئن اِوئنه گَلدئم، سن آیاقلاریمی یوماق اوچون سو گتئرمهدئن. آمّا بو آرواد، منئم آیاقلاریمی گؤز یاشلاری ائنن یویوب، ساچلاری ائنن قوروتدی. 45سن منی اؤپمَهدئن. آمّا بو آرواد، من گلندن بَری، آیاقلاریمی اؤپمکدن، دورماییب. 46سن منئم باشیما یاغ، سورتمهدئن. آمّا بو آرواد، آیاقلاریما عطئرلی یاغ سورتدی. 47بونا گؤره ده، سنه دیئرم: بو آروادین گوناهلاری کی چوخدور دا باغیشلانیب چونکی چوخ سِوگی گؤرسَتدی، آمّا او کی آز باغیشلانمیش، آز دا سِوَر.» 48عئسا آروادا ددی: «سنئن گوناهلارین باغیشلاندی.» 49سوفره باشیندا اوتوران آداملار، اؤز آرالاریندا دیئردئلر: «بو کئمدئر کی حتّا، گوناهلاری دا باغیشلاییر؟!» 50عئسا او آروادا ددی: «ائمانین سنی قورتارمیش. صاغ-سالامات گت.»
Currently Selected:
لوقا روایت 7: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
