لوقا روایت 4
4
عئسانین ائمتاحان اولونماسی
1عئسا تارینین موقدّس روحوندان دولی، اوردون چاییندان قاییتدی و تارینین روحی طرفئندن چؤله آپاریلدی. 2او، قیرخ گون ائبلئس طرفئندن ائمتاحان اولوندی. عئسا او گونلرده هچ بئر شی یِمهدی. او گونلرئن آخیریندا، آج ائدی. 3ائبلئس اونا ددی: «اگر سن تارینین اوغلوسان، امر اِله کی، بو داش چؤرهیه دؤنسون.» 4عئسا اونون جاوابیندا ددی: «تؤورات کئتابیندا یازیلیب کی، آدام، آنجاق چؤرک ائنن یاشاماز.»
5ائبلئس عئسانی اوجا بئر یِره آپاریب، بئر آندا دونیانین بوتون پادشاهلیقلارینی اونا گؤرسدئب 6ددی: «بوتون بو قودرتی و اولارین جلالینی سنه وِرهرم؛ چونکی بو منه تاپشیریلیب و من هر کئمه ائستهسَم، اونا وِرهرَم. 7بونا گؤره، اگر سن منی پرستئش اِلئیهسن، بولارین هامیسی سنئن اولاجاق.» 8عئسا جاواب ورئب ددی: «تؤورات کئتابیندا یازیلیب کی:
"رب تارینی پرستئش اله
و فقط اونا، قوللوق اِله."»
9ائبلئس، عئسانی اورشلئم شهرئنه آپاردی و اونی معبدئن لاپ اوجا یِرئنه قویوب، اونا ددی: «اگر سن تارینین اوغلوسان، اؤزونی بوردان آشاغی آت. 10چونکی داوودون زبور کئتابیندا یازیلیب:
”او، سنئن حاقّیندا ملکلرئنه امر الئیهجک کی،
سنی حئفظ الهسئنلر.“
11و ”اولار سنی اَللَری اوستونده گؤتورهجکلر،
اولمایا کی، آیاغین بئر داشا دَیسئن.“»
12عئسا جاوابیندا اونا ددی: «تؤورات دا دِیئلئب کی، رب تارینی ائمتاحان الهمه.» 13ائبلئس بو ائمتاحانلارین هامیسینی قورتاراندان سورا، بئر آیری فورصت تاپاناجاق عئسانین یانیندان آیریلدی.
عئسا خئدمتئنی باشلاییر
14عئسا تارینین روحونون قووّتئنده، جَلئل وئلایتئنه قاییتدی. اونون خبری دؤره اطراف یِرلرئن هامیسیندا یاییلدی. 15عئسا، اولارین عئبادتگاهلاریندا، تعلئم ورئردی، هامی دا اونی تعرئفلهیئردی.
ناصئره خالقی عئسانی رد الهیئرلر
16عئسا بؤیودویی یِر، ناصئره شهرئنه گلدی. او اؤز رسمئنه گؤره، یهودئلرئن موقدّس شنبه گونونده، عئبادتگاها گئردی و تارینین کلامینی اوخوماق اوچون آیاغا قالخدی. 17اونا اِشَعیا پیغمبرئن طوماری ورئلدی. طوماری آچیب، بو سؤزلر یازیلان یِری تاپدی کی، بویورور:
18«ربّئن روحی اوستومدهدئر؛
چونکی او منی تعیئن الهیئب کی،
یوخسوللارا خوش خبری اعلان الهیم.
منی گؤندَرئب کی، اسئرلَره آزاد اولاجاقلارینی،
کورلارا گؤزلرئنئن آچیلاجاغینی اعلان الهیم،
مظلوملاری دا خئلاص الهیم،
19و ربّئن لوطف ائلئنی، اعلان الهیم.»
20عئسا طوماری باغلادی و عئبادتگاهین خئدمتچیسئنه ورئب اوتوردی. عئبادتگاه دا اولانلارین هامیسینین گؤزی، اوندا ائدی. 21عئسا اولارا دانیشماغا باشلاییب ددی: «بو گون بو موقدّس یازی، اِشئتدئیئز واخت یرئنه یتئشدی.» 22هامی عئسانین حاقّیندا یاخشی سؤزلر دیئب، اونون آغزیندان چیخان لوطفلی سؤزلره حیران قالمیشدیلار. اولار دیئردئلر: «مگر بو، یوسئفئن اوغلی دِیئل؟» 23عئسا اولارا ددی: «اَلبتّه کی سئز بو مثلی منه دئیهجکسئز، ”ای طبئب، اؤزونی شفا ور! کفرناحوم شهرئنده الهدئیئن ائشلری، اِشئتدئیئمئز کئمی بوردا، اؤز وطنئنده ده اِله!“» 24و ددی: «دوغروسونی سئزه دیئرم، هچ بئر پیغمبر اؤز وطنئنده قبول اولماز. 25حقئقتی سئزه دیئرم کی، ائلیا پیغمبرئن زامانیندا او واخت کی، گؤیلر اوچ ائل، آلتی آی باغلانیب اؤلکهنئن هامیسیندا بؤیوک بئر قحطی اولدی، ائسرایئلده بئر چوخ دول آرواد وار ائدی. 26آمّا ائلیا پیغمبر اولارین هچ بئرئنئن یانینا گؤندَرئلمهدی، فقط صِئدون منطقهسئئن ضارِپتا شهرئنده اولان دول آروادین یانینا گؤندرئلدی. 27اِلئشع پیغمبرئن زامانیندا دا ائسرایئلده چوخ جوذاملی وار ائدی، آمّا اولاردان هچ بئری شفا تاپمادی، مگر سورئیهلی نَعمان. 28عئبادتگاه دا اولانلارین هامیسی، بو سؤزلری اِشئدن واخت حئرصلَندئلر. 29اولار قالخیب عئسانی شهردن چیخاردیب، او داغین تئنئنه آپاردیلار کی، شهرلری اونون اوستونده بئنا اولموشدی، اله کی عئسانی اوردان آشاغی آتسینلار. 30آمّا عئسا اولارین آراسیندان کِچئب گتدی.
عئسا ائبلئس روحا توتولموش بئر آدامی شفا ورئر
31عئسا جلئل وئلایتئنئن کفرناحوم، شهرئنه گلدی. او شنبه گونلرئنده اولارا تعلئم ورئردی. 32اولار اونون تعلئمئندن مات قالمیشدیلار، چونکی اونون سؤزونده قودرت وارائدی. 33عئبادتگاه دا ائبلئس روحا توتولموش بئر کئشی وارائدی کی، خبئث بئر روح اونی اسئر الهمئشدی. او اوجا سس ائنن باغیردی: 34«ای ناصئرهلی عئسا، بئز ائنن نه ائشئن وار؟ بئزی هلاک الهمک اوچون گلئبسن؟ سنئن کئم اولدوغونی بئلئرَم؛ سن تارینین موقدّسیسن!» 35آمّا عئسا اونا آجیقلانیب ددی: «ساکئت اول، بو آدامدان چیخ!» او ائبلئس روح، کئشئنی اورتادا یِره چیرپیب، اونا هچ بئر ضرر ورمهدن اوندان اِشئیه چیخدی. 36هامی تعجّوب الهیئب، بئربئرلرئنه دیئردئلر: «بو نه جور بئر کلامدیر؟! خبئث روحلارا قودرت و قووّت ائنن امر الهیئر، اولار دا آداملاردان اِشئیه چیخیرلار.» 37عئسانین شؤهرتی اطرافدا اولان منطقهلرئن هامیسیندا یاییلدی.
عئسا چوخ آداملاری شفا وِرئر
38عئسا قالخیب عئبادتگاهدان چیخدی و شمعونون اِوئنه گلدی. شمعونون قایناناسی ناخوش ائدی و اونون چوخ قیزدیرماسی وار ائدی. اولار او آروادین حاقّیندا، عئسایا یالواردیلار. 39عئسا آروادین باشی اوستونده دوروب، قیزدیرمایا آجیقلاندی. آروادین قیزدیرماسی، کَسئلدی و او آندا، قالخیب اولارا خئدمت الهدی.
40گون باتان واختدا، او آداملارین هامیسی کی، جوربهجور ناخوشلوقلارا دوچار اولان ناخوشلاری وار ائدی، اولاری عئسانین یانینا گتئردئلر. او دا، اَللرئنی اولارین هر بئرئنئن اوستونه قویوب، اولارا شفا وردی. 41اولارین چوخلاریندان، ائبلئس روحلار اِشئیه چیخیب، باغیریردیلار: «سن تارینین اوغلوسان!» آمّا عئسا اولارا آجیقلانیب، دانیشماغا ائجازه وِرمئردی. چونکی اولار بئلئردئلر کی، عئسا وعده ورئلن مسئحدئر.
عئسا عئبادتگاهلاردا تعلئم ورئر
42سحر آچیلاندا، عئسا چیخیب خلوت بئر یِره گتدی؛ خالق اونی آختاریردی. اولار عئسا اولان یِره گلدئکلری واخت، اَللَشدئلر کی، اونون گِتمه سئنه مانع اولسونلار، 43آمّا عئسا اولارا ددی: «من گرک تارینین پادشاهلیغینین خوش خبرئنی، آیری شَهرلره ده یِتئرم. چونکی من بونون اوچون گؤندَرئلمئشم.» 44و یهودئیه وئلایتئنئن عئبادتگاهلاریندا تعلئم ورئردی.
Currently Selected:
لوقا روایت 4: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
