لوقا روایت 5
5
اوّلکی شاگئردلر
1بئر گون عئسا جِنئسارِت گؤلونون قیراغیندا دورموشدی. جاماعات دا، تارینین کلامینی اِشئتمک اوچون عئسانین اطرافینا ییغیلیب، اونی سیخیشدیریردیلار. 2عئسا گؤلون قیراغیندا ائکی قاییق گؤردی کی؛ بالیقچیلار قاییقلاردان چیخیب، تورلارینی یویوردولار. 3قاییقلارین بئرئنه مئندی. بو قاییق شمعونون ائدی. عئسا اوندان ائستهدی کی، ساحئلدن بئر آز اوزاقلاشسین. و اوتوروب، قاییغین ائچئندن خالقا تعلئم وردی. 4عئسا سؤزونی قورتاراندان سورا شمعونا ددی: «درئن یِره سور، و بالیق توتماق اوچون تورلاریزی سویا آتین.» 5شمعون جاوابیندا اونا ددی: «اوستاد! بوتون گجه اَللَشدئک، هچ بئر شی توتا بئلمهدئک. آمّا سنئن سؤزونه گؤره، تورلاری آتاجاغام.» 6بو ائشی گؤرن زامان چوخلی بالیق توتدولار؛ او قدر کی، آز قالمیشدی تورلاری ییرتیلسین. 7او بئری قاییقدا اولان شرئکلرئنه ائشاره الهدئلر کی، گلئب اولارا کؤمَک الهسئنلر. اولار دا گلئب هر ائکی قاییغی بالیق ائنان دولدوردولار، اوجور کی، قاییقلار باتماغا باشلادیلار. 8شمعون پطروس، بونی گؤرن زامان عئسانین آیاقلارینا دوشوب ددی: «یارب، مندن اوزاقلاش، چونکی من گوناهکار بئر کئشئیَم.» 9چونکی شمعون و اونونان اولانلارین هامیسی توتدوقلاری بالیقلار اوچون، مات قالمیشدیلار. 10زِبِدی نئن اوغوللاری، یعقوب ائنان یوحنّا دا کی، شمعونون شرئکلری ائدئلر، اِله بو حالدا ائدئلر. عئسا شمعونا ددی: «قورخما! بوندان سورا ائنسانلاری توتاجاقسان.» 11اولار قاییقلارینی ساحئله چَکدئلَر و هر شیی آتیب عئسانین دالیسیجا، گتدئلر.
عئسا جوذاملی بئر آدامی شفا ورئر
12عئسا شهرلرئن بئرئنده اولاندا، بئر کئشی اونون یانینا گلدی کی، هر یانینی جوذام توتموشدی. کئشی عئسانی گؤرن واخت، اوزی-اوسته یِره دوشوب، یالواردی: «یارب، اگر ائستیهسن، منی شفا ورهبئلرسن.» 13عئسا اَلئنی اوزاتدی و اونون اوستونه قویوب ددی: «ائستهیئرم، شفا تاپ.» او آندا، آدام جوذامدان شفا تاپدی. 14عئسا اونا تاپشیردی کی، هچ کئمه بئر سؤز دمهسئن، آمّا اونا ددی: «گت اؤزونی معبدئن کاهئنئنه گؤرسد و شفا تاپدیغین اوچون موسا پیغمبرئن بویوردوغی کئمی، قوربان تقدئم اِله کی، اولارا شهادت اولسون.» 15آمّا عئسانین حاقّیندا خبر، لاپ چوخ یاییلدی؛ بؤیوک جاماعاتلار اونون سؤزونی اِشئتمک و اؤز ناخوشلوقلاریندان شفا تاپماق اوچون اونون یانینا ییغیلیردیلار. 16آمّا عئسا چوخ واختلار خلوت یِرلره گدئب، دوعا الهیئردی.
بئر ائفلئجئن شفاسی
17عئسانین تعلئم وردئیی گونلرئن بئرئنده، فرئسی فئرقهسئنئن عالئملری و دئن عالئملری اوردا اوتورموشدولار. اولار جلئل و یهودئیه وئلایتلرئنئن کندلرئنئن هامیسیندان و اورشلئم شهرئندن گلمئشدئلر. ربّئن قووّتی ناخوشلاری شفا ورمک اوچون عئسا ائنن ائدی. 18بو آرادا، بئر نچه کئشی، ائفلئج بئر آدامی، یِرئنئن ائچئنده گتئرئردئلر. اولار اَللشئردئلر کی، اونی ائچهری گتئرئب عئسانین قاباغیندا یِره قویسونلار. 19آمّا جاماعاتین چوخلوغونا گؤره، ائچهری گئرمهیه یول تاپمادیلار، اونا گؤره ده اِوئن دامینا چیخدیلار و دامین سوفاللاری آراسیندان، او ائفلئجی یِری ائنن اورتایا، عئسانین قاباغینا اندئردئلر. 20عئسا اولارین ائمانینی گؤرنده ددی: «کئشی، گوناهلارین باغیشلاندی.» 21تؤورات موعلّئملری و فرئسئلر اؤزلری ائنن بله فئکئرلشئردئلر: «بو آدام کئمدئر کی، بله کوفر دانیشیر؟! واحئد تاریدان باشقا کئم گوناهلاری باغیشلایا بئلر؟!» 22عئسا اولارین نه فئکئر الهدئکلرئنی بئلئب، اولارا جاواب وردی: «نه اوچون اورَکلرئزده بله فئکئرلر الهیئرسئز؟! 23هانسینین دمهیی آسانتردئر؛ ”سنئن گوناهلارین باغیشلاندی“ دمک، یوخسا ”قالخ، یِری!“ دِمک؟! 24آمّا اونا گؤره کی، بئلهسئز ائنسان اوغلونون، یِر اوزونده گوناهلاری باغیشلاماغا قودرتی وار…» او ائفلئج آداما ددی: «سنه دیئرم، قالخ، یِرئنی گؤتور و اِوه گت!» 25او آندا، ائفلئج آدام اولارین گؤزونون قاباغیندا قالخیب، اوستونده یاتدیغی یِرئنی گؤتوردی و تارییا حمد اِلئیه-اِلئیه اِوئنه گتدی. 26هامی حیرتده قالیب، تارییا حمد الهیئردئلر و اوجور کی اولارین جانلارینی قورخی بوروموشدی، دیئردئلر: «بو گون قرئبه ائشلر گؤردوک!»
عئسا لاوئنی چاغیریر
27بوندان سورا، عئسا اِشئیه چیخیب، لاوی آدیندا، باج ییغان بئر آدامی گؤردی کی، باجخانا دکهسئنده اوتورموشدی. اونا ددی: «دالیمجا گل!» 28لاوی ده، هر شیی بوراخیب آیاغا قالخدی و اونون دالیسیجا گِتدی.
29لاوی اؤز اِوئنده عئسا اوچون، بؤیوک بئر قوناقلیق وِردی. سوفره باشیندا، اولار ائنان بئر چوخ باج ییغانلار و آیری آداملار دا وار ائدی. 30فرئسئلر و اولارین فئرقهسئندن اولان بئر دسته تؤورات موعلّئملری، عئسانین شاگئردلرئنه دِیئنئب ددئلر: «نه اوچون باج ییغانلار و گوناهکار آداملار ائنان ییئب-ائچئرسئز؟!» 31عئسا جاواب ورئب اولارا ددی: «صاغ آداملار یوخ، ناخوش آداملار طبئبه مؤحتاجدیلار. 32من گلمئشم کی، صالح آداملاری یوخ، گوناهکار آداملاری تؤوبهیه چاغیرام.»
اوروج حاقّیندا سؤال
33اولار عئسایا ددئلر: «یحیانین شاگئردلری تِز-تِز اوروج توتوب، دوعا الهیئرلر. فرئسئلرئن شاگئردلری ده بله الهیئرلر. آمّا سنئن شاگئردلرئن ییئب-ائچئرلر.» 34عئسا اولارا ددی: «مگر بَی، توی قوناقلارینین یانیندا اولاناجاق، قوناقلارا اوروج توتدورا بئلَرسئز؟ 35اله گونلر گلهجک کی، بَی اولارین اَلئندن آلینسین. او زامان اولار، او گونلرده اوروج توتاجاقلار.» 36اولارا بئر مثل ده ددی: «هچ کس تَزه پالتاردان بئر تئکه قوپاردیب، کؤهنه پالتارا یاماق وورماز. بله الهسه، هم تَزه پالتار ییرتیلار، هم ده تَزه پالتاردان آلینان پارچا کؤهنه پالتارا یاراشماز. 37هچ کس ده، تَزه شرابی، کؤهنه تولوقلارا دولدورماز. بله الهسه، تَزه شراب تولوقلاری پارتلادار؛ هم اؤزی تؤکولر، هم ده تولوقلار آرادان گدر. 38تَزه شرابی، گرک تَزه تولوقلارا دولدوراسان. 39هچ کئم، کؤهنه شرابی ائچندَن سورا، تَزه شرابی ائستهمز. چونکی دئیَر: ”کؤهنهسی یاخشیدیر.“»
Currently Selected:
لوقا روایت 5: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
