لوقا روایت 20
20
عئسانین صلاحئیّتی
1گونلرئن بئرئنده کی عئسا معبدده خالقا تعلئم ورئب، ائنجئلئن خوش خبرئنی اعلان الهیئردی. معبدئن باش کاهئنلری، تؤورات موعلّئملری، آغساقّاللار ائنان بئرلئکده عئسانین یانینا گلدئلر. 2و اونا ددئلر: «بئزه ده گؤرَک، سن بو ائشلری نه حاق ائنان الهیئرسن؟ بو قودرتی سنه کئم ورئب؟» 3عئسا جاوابیندا اولارا ددی: «منئم ده سئزدن بئر سوآلیم وار. منه دیئن؛ 4یحیانین تعمئد قوسلی تاری طرفئندن ائدی، یوخسا ائنساندان؟» 5اولار اؤز آرالاریندا فئکئرلهشئب دیئردئلر: «اگر ”تاریدان“ دِسَک، او دئیهجک؛ ”نه اوچون اونا ائنانمادیز؟“ 6آمّا اگر ”ائنساندان“ دِسَک، بوتون خالق بئزی اؤلومه جک داشا باساجاق. چونکی خالق یحیانین پیغمبر اولدوغونا ائنانیر.» 7اولار جاواب وردئلر: «هاردان اولدوغونی بئلمئرئک؟» 8عئسا اولارا ددی: «من ده سئزه دِمئرَم کی، بو ائشلری نه حاق ائنان گؤرورَم.»
شرور باغبانلارین مثلی
9سورا عئسا خالقا بِله بئر مثل ددی: «بئر آدام اوزوم باغی اَکدی و باغی باغبانلارا ائجارهیه ورئب، اوزون بئر مودّت اوچون اؤزگه بئر مملکته گتدی. 10محصول زامانی باغبانلارین یانینا بئر قول گؤندَردی کی، باغین میوه سئندن اونون پایینی وِرسئنلر. آمّا باغبانلار قولی دؤیوب اَلی-بوش قایتاردیلار. 11باغ صاحئبی گئنه آیری بئر قول گؤندَردی؛ آمّا اونی دا دؤیوب تحقئر الهدئلر و اَلی-بوش قایتاردیلار. 12اوچونجی قولی دا گؤندَردی؛ اولار اونی دا یارالاییب اشئیه آتدیلار.
13او زامان باغین صاحئبی ددی: ”نه الهیئم؟ اؤز عزئز اوغلومی گؤندَره جه یم. بلکی اونا حؤرمت اِلئیه لر.“ 14آمّا باغبانلار اونی گؤرن واخت، آرالاریندا بله ددئلر: ”وارئث بودور! گلئن اونی اؤلدورَک کی، مئراث بئزَه قالسین.“ 15باغبانلار اونی اوزوم باغیندان اِشئیه آتیب اؤلدوردولر.
ائندی اوزوم باغینین صاحئبی اولارا نه اِلئیه جک؟ 16او گلهجک، او باغبانلاری هلاک الهیئب، اوزوم باغینی اؤزگه باغبانلارا ورهجک.» بونی اِشئدَن خالق ددی: «اصلا بله اولماز.» 17آمّا عئسا اولارا گؤز دئکئب ددی: «بس بو موقدّس یازینین معناسی نه دئر کی دیئر؟
”بنّالارین ردّ اِله دئکلری داش،
بئنانین اصلی داشی اولوب.“
18بو داشین اوستونه ییخیلان هر کس پارچالاناجاق و بو داش کئمئن اوستونه دوشسه، اونی اَزهجَک.» 19تؤورات موعلّئملری و باش کاهئنلر بئر یول آختاردیلار کی، اِله او آندا عئسانی توتسونلار. چونکی باشا دوشدولر کی، عئسا بو مثلی اولارین بارهسئنده دیئب، آمّا خالقدان قورخدولار.
روم پادشاهی قیصره باج ورمک
20اولار عئسانی گودوردولر، بئر نِچه جاسوس دا کی، اؤزلرئنی صادئق آداملار کئمی گؤرسدئردئلر عئسانین یانینا گؤندَردئلر کی، اونی اؤز سؤزلری ائنن گئره سالیب، بوجور والئنئن محکمه سئنه تسلئم الئیه لر. 21اولار عئسادان سوروشدولار: «اوستاد! بئز بئلئرئک کی، سن دوغری اولانی دیئب، تعلئم ورئرسن و آداملارین آراسیندا فرق قویمورسان. آنجاق تارینین یولونی دوزلئک ائنن اؤیرَدئرسن. 22روم، ائمپراطورینا خراج ورمک بئزه جائزدئر یا یوخ؟» 23آمّا عئسا اولارین حئیلهسئنی باشا دوشوب ددی: 24«منه بئر دئنار گؤرسهدئن؛ اونون اوستونده اولان شَکئل و آد کئمئندئر؟» اولار جاواب وردئلر: «ائمپراطورون.» 25عئسا اولارا ددی: «او زامان ائمپراطورون مالینی ائمپراطورا، تارینین مالینی دا تارییا ورئن.» 26اولار خالقین حوضوروندا عئسانی سؤز اوستونده توتا بئلمهدئلر. آمّا عئسانین جاوابیندان حیران اولوب سَسلرئنی کسدئلر.
اؤلولردن دئرئلمه حاقّیندا سوآل
27اوندان سورا صادوقی فئرقه سئنئن عالئملرئندن بعضئسی عئسانین یانینا گلدئلر. صادوقئلر اؤلولرئن دئرئلمه سئنی ائنکار الهیئردئلر. 28اولار عئسادان سوروشدولار: «اوستاد! موسا پیغمبر بئزئم اوچون یازیب کی، اگر بئر کئشئنئن اِولی قارداشی اؤلسه و اونون اوشاغی اولماسا، گرک صاغ قالان قارداش اونون دول آروادینی آلیب، اؤلن قارداشینا نسئل قویا. 29ائندی، یِدّی قارداش وارائدی؛ بئرئنجئسی بئر آرواد آلدی و اوشاقسیز اؤلدی. 30اوندان سورا ائکئنجئسی؛ 31و اوچونجوسی ده او آروادی آلدی؛ و اِله بوجور یِدّی قارداشین دا اوشاقلاری اولماییب اؤلدولر. 32هامیسیندان سورا آرواد دا اؤلدی. 33بونا گؤره اؤلولر دئرئلَنده او آرواد اولاردان هانسینین آروادی اولاجاق؟ چونکی او، یِدّی سئنئن ده آروادی اولوب.»
34عئسا جاوابیندا اولارا ددی: «بو زمانه نئن ائنسانلاری آرواد آلیرلار و اَره گدئرلر؛ 35آمّا او آداملار کی او دونیایا یتئشمهیه و اؤلولردن دئرئلمهیه لایئقدئلر، نه اِولهنَرلَر، نه ده اَره گِدَرلر. 36چونکی اولار آرتیق اؤله بئلمزلر، اونا گؤره کی ملکلر ائنن بئردئلر. اولار اؤلومدن دئرئلدئکلرئنه گؤره، تارینین اوغوللاریدیلار. 37آمّا اؤلولرئن دئرئلدئیئنی حتّا موسا پیغمبر ده، آلوولانان بوتا حاقّینداکی روایتده، گؤرسه دئر.اوردا کی ربّی، ائبراهئمئن تاریسی، ائسحاقین تاریسی، و یعقوبون تاریسی چاغیریر. 38تاری اؤلولرئن تاریسی یوخ، دئرئلرئن تاریسیدیر. چونکی اونون یانیندا هامی دئریدئر.» 39او واخت تؤورات موعلّئملرئنئن بعضئسی ددئلر: «اوستاد! گؤزل ددئن.» 40اولار آرتیق عئسادان بئر شی سوروشماغا جورعت اِله مهدئلر.
مسئح کئمئن اوغلودور
41عئسا اولارا ددی: «نجه دئیه بئلئرلر کی، مسئح داوود پادشاهین اوغلودور؟ 42چونکی، داوود پادشاه اؤزی، مزمورلار کئتابیندا بله دیئر:
رب منئم ربّئمه ددی:
صاغیمدا اوتور،
43او زاماناجاق کی، من دوشمنلرئنی آیاقلارینین آلتینا سالام.
44داوود پادشاه اونی رب چاغیردیغینا گؤره، او، نه جور داوودون اوغلی اولار؟!»
45بوتون خالق بو سؤزلره قولاق آسان واخت، عئسا اؤز شاگئردلرئنه ددی: 46«تؤورات موعلّئملرئندن اؤزوزی گؤزلهیئن. اولار، اوزون عَبالاردا گَزمهیی، میدانلاردا سالام آلماغی، عئبادتگاهلاردا باش کورسولری و قوناقلیقلاردا یوخاری یِرلرده اوتورماغی سِوئرلر. 47اولار بئر یاندان دول آروادلارین اِولرئنی اودورلار و او بئری یاندان اؤزلرئنی گؤرسدمک اوچون، اوزون-اوزون دوعالار الهیئرلر. بو آداملارین جزاسی لاپ چوخ آغیر اولاجاق.»
Currently Selected:
لوقا روایت 20: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
