لوقا روایت 21
21
دول آروادین هدئیّهسی
1عئسا باخیب، وارلی آداملاری گؤردی کی، معبدئن هدئیّه صاندیغینا هدئیّهلرئنی آتیردیلار. 2کاسیب بئر دول آروادی دا گؤردی کی، ائکی قارا پول صاندیغا آتدی. 3عئسا ددی: «دوغروسونی سئزه دیئرم؛ بو کاسیب دول آرواد اولارین هامیسیندان چوخ پول آتدی. 4چونکی اولارین هامیسی اؤز وارلارینین چوغلوغوندان هَدئیّه وردئلر، آمّا بو آرواد کاسیبلیغینا باخماییب، کِچئنمک اوچون اَلئنده نه وارائدی، وِردی.»
آخیر زامانین علامتلری
5او واخت کی بعضی آداملار معبدئن بارهسئنده دانیشیردیلار کی نجه گؤزَل داشلار و هَدئیّهلر ائنن بَزنمئش، عئسا ددی: 6«اِله گونلر گلهجک کی، بوردا گؤردویوز شیلردن داش- داش اوسته قالمایاجاق، هر شی ییخیلاجاق.»
7اولار عئسادان سوروشدولار: «اوستاد! بو ددئکلرئن نه زامان اولاجاق؟ بو ائشلرئن باش ورمهسی واختینین یاخینلاشما علامتی نهدئر؟» 8عئسا ددی: «آییق اولون کی، یولدان چیخمایاسیز. چونکی بئر چوخلاری منئم آدیمدا گلئب دئیهجکلر ”او منم“ و ”او واخت یاخیندیر.“ اولارین دالیسیجا گتمهیئن.
9جنگلر و ائغتئشاشلار بارهده اِشئتدئیئز زامان اورهیئز اوزولمهسئن. چونکی بو ائشلر اوّل گرک یرئنه یِتئشه، آمّا آخیر زامان بو تزلئک ائنن گلمز.» 10سورا عئسا اولارا ددی: «مئلّت مئلّتئن، مملکت مملکتئن ضئدّئنه قالخاجاق؛ 11گوجلی زلزلهلر گله جک، موختلئف یِرلرده قیتلیقلار و طاعونلار اولاجاق. قورخولی حادئثهلر و گؤیدن بؤیوک علامتلر اولاجاق.
12آمّا بولارین هامیسیندان قاباق، منئم آدیما گؤره، سئزی توتوب جفا ورهجکلر، یهودئلرئن عئبادتگاهلارینا و زئندانلارا تسلئم اِلئیهجکلر، و پادشاهلار و والئلر حوضورونا آپاراجاقلار. 13بو، سئزه بئر فورصت اولاجاق کی شهادت وره سئز. 14بونا گؤره بونی یادیزدا ساخالایین کی، نجه جاواب ورمهیئز اوچون، قاباقدان فئکئر اله مئیه سئز. 15چونکی من سئزه، دانیشماغدا اِله بئر قودرت و حئکمت ورهجهیم کی، سئزه ضئدّ دورانلارین هچ بئری نه اونون قاباغیندا دورا بئلسئنلر، نه ده اونا ضئدّ چیخا بئلسئنلر. 16حتّا آتا آنالاریز، قارداشلاریز، قوحوملاریز، و دوستلاریز طرفئندن تسلئم اولوناجاقسیز و سئزلردن بعضئسئنی اؤلدوردهجکلر. 17منئم آدیما گؤره هامی سئزدن نئفرت اِلئیهجک. 18آمّا سئزئن باشیزدان بئر توک بِله دوشمهیهجک. 19دؤزوب، دایانماق ائنان جانیزی قورتاراجاقسیز.
20آمّا او واخت کی گؤردوز قوشونلار اورشلئم شهرئنی دؤره له یئبلر بئلئن کی، اورشلئم شهرئنئن وئران اولماسی واخت یاخینلاشیب. 21او واخت، یهودئیه وئلایتئنده اولانلار داغلارا قاچسینلار؛ شهرده اولانلار اوردان چیخسینلار و چؤلده اولانلار شهره گئرمهسئنلر. 22چونکی او گونلر قئصاص گونلری دئر، اله کی بوتون موقدّس یازیلار یرئنه یتئشسئن. 23او گونلرده بویلی اولانلارین و اوشاق اَمئزدئرن آروادلارین، وای حالینا! چونکی بو اؤلکه ده بؤیوک موصئبت اولاجاق و بو خالقین ضئدّئنه قَضَب گله جک. 24اولار قیلینج آغزینا دوشهجکلر، بوتون مئلّتلر آراسینا اسئر آپاریلاجاقلار و قیری یهودئلرئن واختی قورتارانا کئمی، اورشلئم شهری قیری یهودئلر طرفئندن پایمال اولاجاق.
ائنسان اوغلونون گلمهسی
25گون ده، آیدا، و اولدوزلاردا علامتلَر اولاجاق، یِر اوزونده مئلّتلَر، دَهَنزئن و شَپهلرئن گورولتوسوندن ائضطئراب ائچئنده اولاجاقلار. 26خالق قورخودان و دونیانین باشینا گلنلری گؤزلهمکدن هوشدان گِدهجکلر. چونکی گؤیلرئن قودرتلری تئترهیهجک. 27او زامان ائنسان اوغلونی گؤرهجکلر کی بولود ائچئنده قودرت و بؤیوک بئر جلال ائنان گلئر. 28بو ائشلر یِرئنه یتئشمهیه باشلایاندا، دئک دورون و باشیزی یوخاری ساخلایین، چونکی سئزئن خئلاصیز یاخیندیر.»
29عئسا اولارا بئر مثل چکدی: «انجئر آغاجینا و بوتون آغاجلارا باخین. 30یارپاق آچینجا بونی گؤرورسوز و بئلئرسئز کی، یای آرتیق یاخیندیر. 31اِله بوجور دا، سئز بو شیلرئن باش وردئیئنی گؤرنده، بئلئن کی، تارینین پادشاهلیغی یاخیندیر. 32دوغروسونی سئزه دیئرم؛ بو شیلرئن هامیسی یِرئنه یتئشمهیئنجه بو نسئل آرادان گِتمه یه جک. 33گؤی و یِر آرادان گِدهجک، آمّا منئم سؤزلرئم آرادان گِتمه یه جک.
34آمّا آییق اولون، اولمایا کی اورهیئز قارینقولولوق، کفلئلئک و بو دونیانین نئگارانلیقلاری ائنن آغیرلاشسین و او گون بئر تَله کئمی بئردن سئزی گئرفتار الهسئن. 35چونکی او گون، یِر اوزونده یاشایانلارین هامیسینین باشینا گلهجک. 36بونا گؤره ده همئشه اویاق اولون و دوعا الهیئن کی، قودرَتئز اولسون بوتون بو شیلردن کی عنقرئب باش وره جک، قاچاسیز و ائنسان اوغلونون حوضوروندا دوراسیز.»
37عئسا هر گون معبدده تعلئم ورئردی، آمّا گجهلری اوردان چیخیب، زیتون داغیندا کِچئردئردی. 38و بوتون خالق سحر تِزدن اونون سؤزلرئنی اِشئتمک اوچون، معبده اونون یانینا گلئردئلر.
Currently Selected:
لوقا روایت 21: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
