لوقا روایت 19
19
عئسا و زکّا
1عئسا ارئحا شهرئنه گئرئب، او شهرئن ائچئندن کِچئردی. 2اوردا زکّا آدیندا بئر کئشی وارائدی. زکّا باج ییغانلارین ریئسی و وارلی آدامین بئری ائدی. 3او عئسانین کئم اولدوغونی گؤرمک ائستهیئردی؛ آمّا بویی قیسا اولدوغی اوچون جاماعاتین چوخلوغوندان گؤره بئلمئردی. 4زکّا عئسانی گؤرمک اوچون قاباقا قاچیب بئر انجئر آغاجینا چیخدی، چونکی عئسا اله او تزلئکده او یولدان کِچه جک ائدی. 5عئسا او یِره چاتاندا یوخاری باخیب اونا ددی: «زکّا! تِز آشاغی دوش، چونکی بو گون من سنئن اِوئنده قالمالییام.» 6زکّا دا تِز آشاغی دوشوب، شادلیق ائنان عئسانی قبول اِلهدی. 7بونی گؤرنلرئن هامیسی دِیئنئب، دیئردئلر: «عئسا گِدئب گوناهکار بئر آدامین اِوئنده قوناق اولوب!» 8زکّا آیاغا قالخیب رب عئسایا ددی: «باخ، آغا! وار-دؤولتئمئن یاریسینی مؤحتاجلارا وِرهرَم و اگر بئرئندن حاقسیزلیق ائنان بئر شی آلمیشام، اونا دؤرد قات قایتارارام.» 9عئسا اونا ددی: «بو گون بو اِوه نئجات گلئب، اونا گؤره کی، بو آدام دا ائبراهئم پیغمبرئن نسلئندندئر. 10چونکی ائنسان اوغلی گلدی کی، ائتمئش اولانی آختاریب، نئجات ورسئن.»
قیزیل سئکه مثلی
11اولار بو شیلری اِشئدَن واخت، عئسا بئر آیری مثل چَکدی؛ او سَببدن کی، اورشلئم شهرئنه یاخین ائدی و خالق اِله گومان الهیئردی کی، تارینین پادشاهلیغی او ساعات ظاهئر اولاجاق. 12اونا گؤره عئسا ددی: «اَصئلزاده بئر آدام اوزاق مملکته گِتدی کی، اؤزی اوچون پادشاهلیق اَله گتئرئب قاییتسین. 13او قوللاریندان اون نفرئنی چاغیردی و اولارا اون قیزیل سئکه ورئب ددی: ”من گلنه کئمی بولاری ائشه سالین.“ 14آمّا اونون هموطنلری اوندان نئفرت الهیئردئلر و اونون دالیسیجا اِلچئلر گؤندَرئب ددئلر: ”ائستهمئرئک کی، بو آدام بئزه پادشاهلیق الهسئن.“ 15آدام، پادشاهلیغی اَله گتئرئب قاییداندان سورا، امر الهدی سئکه وردئیی قوللاری یانینا چاغیرسینلار کی، کئمئن نه قازاندیغینی بئلسئن. 16بئرئنجئسی گلئب ددی: ”آغا، سنئن سئکه ن اون قات قازانیب.” 17اونا ددی: ”آفرئن، یاخشی قولوم! لاپ کئچئک بئر ائشده وفالی اولدوغونا گؤره اون شهرئن حاکئملیغینی سنه ورئرم.“ 18ائکئنجئسی گلئب ددی: ”آغا! سنئن سئکه ن بِش قات قازانیب.“ 19اونا دا ددی: ”سن ده بِش شهره حاکئم اول.“ 20سورا او بئرئسی گلئب ددی: ”آغا بو دا سنئن سئکه ن، اونی دَسمالا بوکوب ساخلادیم، 21چونکی برَک آدام اولدوغون اوچون سندن قورخوردوم؛ اؤزون قویمادیغینی گؤتورَنسَن و اؤزون اَکمهدئیئنی بئچَنسَن.“ 22آغاسی اونا ددی: ”پئس قول! سنی اؤز سؤزون ائنن محکوم اِلئیه جه یم. سن کی بئلئردئن، من بَرک آدامین بئرییَم، اؤزوم قویمادیغیمی گؤتورهنَم، اؤزوم اَکمهدئیئمی بئچهنَم 23بس نه اوچون منئم پولومی صرّافلارا ورمهدئن کی، قاییتدیغیم زامان اونی منفعت ائنن آلام؟!“ 24و اوردا دورانلارا ددی: ”سئکه نی اوندان آلین و اون سئکهسی اولانا ورئن!“ 25اولار پادشاها ددئلر: ”آغا! اونون کی، اون سئکهسی وار!“ 26”پادشاه ددی: سئزه دیئرم کی، هر کئمده واردیر، اونا لاپ چوخ ورئلهجک، آمّا هر کئمده کی یوخدور، حتّا اَلئنده اولان دا اوندان آلیناجاق. 27ائندی، منئم او دوشمنلرئمی کی، ائستهمئردئلر من اولارا پادشاهلیق اله یئم بورایا گتئرئن و گؤزومون قاباغیندا قلینجدان کچئردئن!“»
عئسانین اورشلئمه گئرئشی
28عئسا، بولاری دئیندن سورا، اولاردان قاباق اورشلئم شهرئنه ساری گِتدی.
29زیتون داغیندا کی بِیت فاجی و بِیت عَنیا کندلرئنه یاخینلاشاندا عئسا شاگئردلرئندن ائکئسئنی گؤندَرئب، 30ددی: «قاباغیزدا اولان کنده گِدئن. اورایا گئردئیئز زامان باغلانمیش بئر سیپا تاپارسیز کی، ائندئیه کئمی هچ کس اونا مئنمهیئب. اونی آچیب بورایا گتئرئن. 31اگر بئری سئزدن سوروشسا، ”نه اوچون سیپانی آچیرسیز؟“، اونا بله دیئن: ” ربّئن بونا احتئیاجی وار.“» 32گؤندَرئلنلر گدئب اِله هر شیی عئسانین ددئیی کئمی تاپدیلار. 33سیپانی آچان واخت، اونون صاحئبلری اولارا ددئلر: «سیپانی نه اوچون آچیرسیز؟» 34شاگئردلر جاواب وردئلر: «ربّئن بونا احتئیاجی وار.» 35اولار سیپانی عئسانین یانینا گتئردئلر، اؤز پالتارلارینی سیپانین اوستونه سَرئب عئسانی اونا مئندئردئلر. 36عئسا یولدا گِدنده، آداملار اؤز پالتارلارینی یولا سَرئردئلَر. 37زیتون داغینین اوزی آشاغی یولونا یاخینلاشاندا، عئسانین شاگئردلرئنئن هامیسی گؤردوکلری بوتون مؤجوزهلر اوچون سِوئنئب، اوجا سَس ائنن تارییا حمد و شوکور اِله مهیه باشلاییب 38دیئردئلر:
«ربّئن آدیندا گلن پادشاه موبارک اولسون.
گؤیده صولح-سالاماتلیق و لاپ اوجالاردا جلال اولسون.»
39فرئسی فئرقهسئنئن عالئملرئندن بعضئسی جاماعاتین آراسیندان عئسایا ددئلر: «اوستاد، شاگئردلرئنه آجیقلان.» 40عئسا اولارین جاوابیندا ددی: «سئزه دیئرم کی، اگر اولار دا ساکئت اولسالار، بو داشلار دئله گلهجَکلر.»
41اورشلئم شهرئنه یاخینلاشدیغی زامان عئسا شهره باخیب اونون اوچون آغلادی. 42و ددی: «کاشکی سن، بَلی سن بو گونده، صولح-سالاماتلیغینا باعئث اولان شیلری بئلسهیدئن! آمّا بولار ائندی سنئن گؤزلرئندن گئزلیدئر. 43چونکی سنی اِله گونلر گؤزلهیئر کی، دوشمنلرئن، دؤرونده سَنگرلر قوراجاقلار و سنی دؤرهله یئب، هر یاندان سیخیشدیراجاقلار. 44سنی و ائچئندهکی اوشاقلارینی یِر ائنن بئر اِلئیه جکلر. اولار قویمایاجاقلار داش داش اوستونده قالا. چونکی تارینین سنئن کؤمهیئنه گلدئیی زامانی بئلمه دئن.»
عئسا آلیش-وِرئش اِله یَنلری معبددن قووور
45عئسا معبده گئرئب اوردا آلیش-ورئش الهینلری قووماغا باشلادی 46و اولارا ددی: «موقدّس یازیلاردا یازیلیب کی، ”منئم اِوئم دوعا اِوی اولاجاق“. آمّا سئز اونی اوغرولار یوواسینا دؤندَرئبسئز.»
47عئسا هر گون معبدده تعلئم ورئردی. معبدئن باش کاهئنلری، تؤورات موعلّئملری و خالقین بؤیوک باشلاری عئسانی هلاک اِله مهیه فورصت آختاریردیلار. 48آمّا بو ائشی نه جور الئیهجکلرئنی بئلمئردئلر. چونکی بوتون خالق ائشتئیاق ائنان اونون سؤزلرئنه قولاق آسیردی.
Currently Selected:
لوقا روایت 19: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
