لوقا روایت 2
2
عئسا مسئحئن آنادان اولماسی
1او گونلرده روم ائمپراطوری اوغوسطوسدان امر گلدی کی، روم ائمپراطورلوغوندا یاشایان خالقین هامیسی، گرک ساییلیب دفترلره کِچئلسئن. 2بو خالق ساییلماسی، اوّلکی ساییلما ائدی کی، کُرئنئیوسون سورئیه ده والی اولدوغی زاماندا، باشوردی. 3هر کس آدینی دفتره کِچئرتمک اوچون، اؤز شهرئنه گتدی. 4یوسئف ده، ناصئره شهرئندن کی جلئل وئلایتئنده ائدی چیخیب، یهودئیه وئلایتئنه، بِیتلِحِم آدیندا اولان، داوود پادشاهین شهرئنه گلدی، چونکی او داوود پادشاهین نسلئندن ائدی. 5یوسئف بویلی اولان نئشانلیسی، مریمی ده اؤزی ائنن آپاردی کی آدلارینی دفتره کِچئرتسئنلر. 6اوردا اولدوقلاری زامان مریمئن دوغما واختی یِتئشدی. 7مریم اوّلکی اوشاقینی کی اوغلان ائدی دوغدی. اونی قونداغا بلهیئب آخوردا یاتیرتدی، چونکی اولار اوچون مهمانخانادا یِر یوخ ائدی.
چوبانلار و ملکلر
8او منطقه ده چؤلده چوبانلار وار ائدئلر کی، گِجه لر سورولرئنئن کِشئیئنی چَکئردئلر. 9ربّئن بئر ملهیی اولارا ظاهئر اولدی و ربّئن جلالی اولارین اطرافینی، ائشیق ائنان دولدوردی. اولاری، بؤیوک بئر قورخی بورودی. 10ملک اولارا ددی: «قورخمایین. چونکی من سئزه بؤیوک بئر شادلیقین خوش خبرئنی گتئرمئشم کی، خالقین هامیسی اوچون اولاجاق. 11چونکی بو گون داوود پادشاهین شهرئنده، سئزئن اوچون بئر نئجات ورن دوغولدی کی، وعده ورئلن رب مسئحدئر. 12سئزه علامت بودور؛ قونداغا بَلَنمئش و آخوردا یاتمیش بئر کؤرپه تاپاجاقسیز.» 13بئردن بئره او ملک ائنن، بؤیوک بئر گؤی لشکری ملکلردن گؤروندی. اولار تارییا، حمد اِلئیه-اِلئیه دیئردئلر:
14«لاپ اوجالاردا اولان تارییا جلال،
و یِر اوزونده، او آداملار آراسیندا کی تاری اولاردان راضیدیر، صولح و سالاماتلیق اولسون.»
15ملکلر چوبانلارین یانیندان گؤیه قالخاندان سورا، چوبانلار بئربئرلرئنه ددئلر: «گلئن، بِیتلِحِم شهرئنه گِدک و ربّئن بئزه بئلدئردئیی، بو اولان واقئعهنی گؤرک.» 16چوبانلار تلهسه-تلهسه گتدئلر و مریمی، یوسئفی و آخوردا یاتمیش کؤرپهنی تاپدیلار. 17کؤرپهنی گؤرَندن سورا، بو کؤرپه حاقّیندا اولارا دِیئلن سؤزی، یایدیلار. 18چوبانلارین دانیشیقلارینی اِشئدنلرئن هامیسی، حیران قالدیلار. 19آمّا مریم بو شیلرئن هامیسینی یادیندا ساخلاییب، اورهیئنده اولارا فئکئرلهشئردی. 20چوبانلار قاییتدیلار و اِشئتدئکلری و گؤردوکلری هر شی اوچون، تارییا حمد و شوکور الهیئردئلر، چونکی اولارا دِیئلن هر شی یرئنه یِتئشمئشدی.
عئسا معبدده ربّه تقدئم اولونور
21سَکّئزئنجی گونی قورتاراندان سورا، اوشاغی ختنه الهیئب، آدینی عئسا قویدولار. اله او آد کی، اوشاق آناسینین قارنیندا، قویولمامیشدان قاباق ملک واسئطهسی ائنن ورئلمئشدی.
22موسانین شرئعتئنه گؤره، اولارین طهارت گونلری قورتاراندان سورا، یوسئف و مریم اوشاغی اورشلئم شهرئنه گتئردئلر کی، اونی ربّه تقدئم الهسئنلر. 23نجه کی، ربّئن شرئعتئنده ده، یازیلیب: «آناسینین قارنیندان، ائلک دوغولان هر اوغلان اوشاق، گرک ربّه وَقف اولونسون.» 24و ربّئن شرئعتئنده دِیئلدئیی سؤزه گؤره، «بئر جوت قومرونی و یا ائکی گؤیرچئن بالاسینی، قوربان آدیندا تقدئم الهسئنلر.»
25او زامان اورشلئمده شمعون آدیندا، صالح و دئندار بئر کئشی وار ائدی کی، ائسرایئل اوچون موعود اولان مسئحئن ظوهورونی گؤزلهیئردی؛ و تارینین موقدّس روحی اونون اوستونده ائدی. 26موقدّس روح اونا بئلدئرمئشدی کی، ربّئن مسئحئنی گؤرمدن قاباق، اؤلوم اوزونی گؤرمهیهجک. 27شمعون تارینین روحونون هئدایتی ائنن، معبده گلدی. اوندا کی، اوشاغین آتا-آناسی، کؤرپه عئسانی ائچهری گتئردئلر کی اونون حاقّیندا شرئعتئن رسمئنه گؤره عمل الهسئنلر. 28شمعون اوشاغی قوجاغینا آلدی و تارییا حمد الهیئب ددی:
29«یا رب، وردئیئن سؤزه گؤره،
ائندی بو قولونی آراملیق ائچئنده مورخّص اله.
30چونکی گؤزلرئم سنئن نئجاتینی گؤروب،
31او نئجاتی کی، بوتون خالقین حوضوروندا حاضیرلاییبسان؛
32او ائشیق کی، حقئقتی قِیری یهودئلره آشکار الهمک،
و سنئن خالقین ائسرایئله جلال ورمک اوچوندور.»
33اوشاغین آتا-آناسی عئسانین حاقّیندا دِیئلن سؤزلردن حیران قالدیلار. 34شمعون اولارا خیئر-دوعا الهیئب، اوشاغین آناسی مریمه ددی: «باخ، بو کؤرپه ائسرایئلده بئر چوخ آداملارین ییخیلیب قالخماسینا گؤره، تعیئن اولونوب. بو کؤرپه بئر علامتدئر کی اونون ضئدّئنه قالخاجاقلار، 35اله کی، چوخ آداملارین اورهیئندهکی، فئکئرلر آشکار اولسون. سنئن ده جانینی بئر قیلینج پارچالایاجاق.»
36اوردا نبئلئک الهین قوجا بئر آرواد وار ائدی کی اونون آدی آنّا ائدی. آنّا آشِر قبئلهسئندن، فَنوعئلئن قیزی ائدی. او، قیزلیغیندان سورا یِدّی ائل، اَری ائنن یاشامیشدی. 37اوندان سورا دا، هشتاد دؤرد یاشیناجاق، دول قالمیشدی. آنّا معبددن هچ واخت آیریلماییب، گجه-گوندوز دوعا و اوروج ائنان تارینی پرستئش الهیئردی. 38آنّا اِله او ساعات گلئب، تارییا شوکور الهدی و اوشاغین حاقّیندا، اورشلئمئن خئلاصینی گؤزلهین، آداملارین هامیسی ائنن دانیشدی.
39یوسئف و مریم ربّئن شرئعتئنده امر اولونان شیلرئن هامیسینی قورتاراندان سورا، اؤز شهرلری ناصئرهیه کی جلئل وئلایتئنده ائدی قاییتدیلار. 40او اوشاق بؤیویوب قووّتلهنئردی. حئکمت ائنن دولوردی و تارینین یانیندا عزئز ائدی.
عئسا معبدده
41عئسانین آتا-آناسی، هر ائل یهودئلرئن پاسخا بایرامیندا، اورشلئم شهرئنه گدئردئلر. 42عئسانین اونائکی یاشی اولاندا، بایرام رسمئنه گؤره اورشلئمه گتدئلر. 43بایرام گونلری قورتاریب اِولرئنه قاییداندا، اوغلان اوشاق عئسا، اورشلئمده قالدی. اونون آتا-آناسینین بوندان خبرلری یوخ ائدی. 44اِله گومان الهیئردئلر کی، عئسا، کاروان ائنان گلئر. بئر گونلوک یول گدندن سورا، اونی قوحوملار و تانیشلار آراسیندا آختارماغا باشلادیلار. 45اونی تاپمایان زامان آختارا-آختارا اورشلئمه قاییتدیلار. 46اوچ گوندن سورا، عئسانی معبدده تاپدیلار. او، موعلّئملرئن آراسیندا اوتورموشدی و اولارا قولاق آسیب، اولاردان سوآل سوروشوردی. 47اونون ددئکلرئنی اِشئدن آداملارین هامیسی، اونون آنلاماقیندان و جاوابلاریندان تعجّوب الهیئردئلر. 48عئسانین آتا-آناسی اونی گؤرنده مات قالدیلار. آناسی اونا ددی: «اوغول، نه اوچون بئز ائنن بوجور رفتار الهدئن؟ باخ، آتان ائنان من، چوخ نئگاران اولوب سنی آختاریردیق.» 49عئسا اولارا ددی: «منی نه اوچون آختاریردیز؟ مگر بئلمئردئز کی، من گرک آتامین اِوئنده اولام؟» 50آمّا اولار، عئسانین ددئیی سؤزی باشا دوشمهدئلر. 51سورا عئسا اولارائنان یولا دوشوب، ناصئره شهرئنه گتدی. او اولارین سؤزونه قولاق آسیردی. اونون آناسی، بو شیلرئن هامیسینی اورهیئنده ساخلاییردی.
52عئسا حئکمتده و قامتده بؤیویوردی. او، هم تاری یانیندا، هم ده آداملار یانیندا، عزئز ائدی.
Currently Selected:
لوقا روایت 2: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
