لوقا روایت 1
1
1عالئجناب تِعوفئلوس، چوخ آداملار اَللَشئبلر کی، آرامیزدا ائتّفاق دوشموش واقئعه لرئن حکایتئنی یازسینلار، 2اوجور کی، او اوّلدن گؤزلری ائنن گؤرن آداملار و تارینین کلامینین خادئملری، اولاری بئزه یِتئرئبلر. 3من ده کی، بو واقئعهلرئن هامیسینی او اوّلدن دقئق تفتئش الهدئم، اله مصلحت گؤردوم کی، اولاری ترتئب ائنن سئزه یازام 4اله کی، اؤیرندئیئز سؤزلرئن دوغری اولماسینا یقئن تاپاسیز.
تعمئد ورن یحیانین آنادان اولماسی خبری ورئلئر
5یهودئیه پادشاهی هئرود زامانیندا، زکریا آدیندا بئر کاهئن یاشاییردی کی، ابئیّا دستهسئنئن کاهئنلرئندن ائدی. کاهئنلر معبد عالئملری ائدئلر. زکریانین آروادی الئزابت، کاهئن هارونون نسلئندن ائدی. 6اولارین ائکئسی ده، تارینین یانیندا صالح آداملار ائدئلر و ربّئن بوتون حؤکملر و امرلرئنه تمام کمال عمل الهیئردئلر. 7آمّا اولارین اوشاغی یوخ ائدی، چونکی الئزابت سونسوز ائدی و ائکئسی ده قوجا ائدئلر.
8بئر گون کی، زکریانین دستهسئنئن معبدده خئدمت الهمک نؤوبتی ائدی و زکریا تارینین حوضوروندا کاهئنلئک وظئفهسئنه مشغول ائدی. 9کاهئنلئک رسمئنه گؤره ربّئن معبدئنئن قودسونا گئرمک و بوخور یاندیرماق پوشکی، زکریانین آدینا دوشدی. 10بوخور یاندیرماق ساعاتیندا، خالقین هامیسی اِشئکده دوعا الهیئردئلر. 11بئردن ربّئن بئر ملهیی بوخور قوربانگاهینین صاغ طرفئنده دوروب، زکریایا ظاهئر اولدی. 12زکریا، ملهیی گؤرَنده پرئشان اولدی و قورخی اونی بورودی. 13آمّا ملک اونا ددی: «زکریا، قورخما. چونکی دوعان موستجاب اولوب. آروادین الئزابت سنئن اوچون بئر اوغلان دوغاجاق، سن ده اونون آدینی یحیا قویاجاقسان. 14او، سنه شادلیق و خوشحاللیق گتئرهجک و اونون آنادان اولماسینا گؤره چوخ آداملار سِوئنهجکلر. 15چونکی او، ربّئن نظرئنده بؤیوک بئر آدام اولاجاق. یحیا گرک شراب یا دا عاراق ائچمهیه. حتّا او آناسینین قارنیندان تارینین موقدّس روحوندان دولی اولاجاق. 16او، ائسرایئل خالقینین چوخلارینی، رب، تاریسینا ساری دؤندَرهجک. 17او، ربّئن قاباغیندا، ائلیا پیغمبرئن روحی و قووّتی ائنن گِدهجک. اله کی، آتالارین اورَکلرئنی اوشاقلارا ساری دؤندرسئن، و یاغی لره اؤیرتسئن کی آتالاری کئمی ربّی سِوسئنلر. اله کی، رب اوچون حاضیر بئر خالق آماده الهسئن.» 18زکریا ملکدن سوروشدی: «من بونی هاردان بئلئم؟ چونکی من قوجا آدامین بئرییَم، آروادیم دا یاشلیدیر.» 19ملک جاواب وردی: «من جبرایئلم کی تارینین حوضوروندا دورورام. گؤندَرئلمئشم کی، سن ائنن دانیشیب، سنه بو خوش خبری ورَم. 20باخ، بو شیلر اولان گونه قَدر، لال اولاجاقسان و دانیشماغا قادئر اولمایاجاقسان. چونکی منئم سؤزلرئمه کی واختیندا یرئنه یتئشهجک ائنانمادین.»
21بو آرادا خالق زکریانی گؤزلهیئردئلر، و اونون بو قَدر معبدئن قودسوندا یوبانماسیندان تعجّوب الهیئردئلر. 22زکریا اِشئیه چیخاندا، اولارائنان دانیشا بئلمئردی. اولار بئلدئلر کی او، معبدئن قودسوندا بئر رؤیا گؤروب، چونکی فقط ائشاره الهیئردی، و دانیشماغا قادئر دِیئلدی. 23خئدمت الهدئیی گونلری قورتاراندان سورا، زکریا اِوئنه قاییتدی.
24او گونلردن سورا آروادی الئزابت بویلی اولوب، بِش آی اؤزونی گئزلتدی. او دیئردی: 25«رب بو ائشی منه گؤروب. او بو گونلرده منه مرحمت نظرئنی سالیب و ذلئللئیئمی خالقین آراسیندان گؤتورب.»
عئسانین آنادان اولماسی خبر ورئلئر
26الئزابتئن بویلولوغونون آلتینجی آییندا جبرایئل ملک، تاری طرفئندن، جلئل وئلایتئنده کی ناصئره شهرئنه، 27مریم آدیندا بئر باکئره قیزین یانینا گؤندرئلدی. مریم یوسئف آدیندا بئر کئشئنئن نئشانلیسی ائدی. یوسئف، داوود پادشاهین نسلئندن ائدی. 28ملک مریمئن یانینا گدئب ددی: «سالام، ای مرحمت اولونوموش! رب سن ائنن دئر.» 29آمّا مریم ملهیئن ددئیی سؤزلردن چوخ نئگاران اولوب، ائستهیئردی کی آنلایا، بو نه جور سالاملاشماقدیر. 30ملک اونا ددی: «مریم، قورخما. چونکی تارینین یانیندا مرحمت تاپیپسان. 31باخ، بویلی اولوب بئر اوغول دوغاجاقسان، و اونون آدینی عئسا قویاجاقسان. 32او، بؤیوک بئر آدام اولاجاق و حاق-تاعالانین اوغلی چاغیریلاجاق. رب تاری اونا، آتاسی داوود پادشاهین تختئنی وِرهجک. 33و او، یعقوبون نسلئنه ابده کئمی سلطنت اِلئیهجک و اونون پادشاهلیغینین آخیری اولمایاجاق.» 34مریم ملکدن سوروشدی: «بو نه جور اولا بئلر، من کی، باکئرهیم؟» 35ملک جاواب ورئب ددی: «تارینین موقدّس روحی، سنئن اوستونه نازئل اولاجاق و حاق-تاعالانین قودرتی سنه کؤلگه سالاجاق. اونون اوچون ده سنئن دوغاجاقین اوشاق، موقدّس و تارینین اوغلی دیئلهجک. 36باخ، سنئن قوحومون الئزابت ده، بو قوجا زامانیندا بئر اوغولا بویلودور. او کی، اونون حاقّیندا سونسوز دیئردئلر، ائندی آلتینجی آیینی کِچئردئر. 37چونکی تارینین یانیندا، قیری مومکون بئر شی یوخدور.» 38مریم ددی: «باخ، من ربّئن کنئزییَم. قوی منه ددئیئن کئمی اولسون.» ملک مریمئن یانیندان گتدی.
مریم الئزابتئن گؤروشویونه گدئر
39او گونلرده مریم قالخیب، تلهسه-تلهسه داغلیق بؤلگهسئنده اولان یهودئیهنئن بئر شهرئنه گتدی. 40او زکریانین اِوئنه گئرئب، الئزابته سالام وردی. 41الئزابت مریمئن سالامینی اِشئدن زامان، اوشاغی قارنیندا ترپَشدی. الئزابت تارینین موقدّس روحوندان دولوب، 42اوجا سَس ائنن ددی: «سن آروادلار آراسیندا بختورسن، قارنیندا اولان اوشاق دا بختوردئر! 43من کئمَم کی، ربّئمئن آناسی منئم یانیما گلسئن! 44چونکی سنئن سالامینین سسی قولاغیما یتئشن واخت، اوشاق قارنیمدا شادلیقدان ترپَشدی. 45خوش او آروادین حالینا کی، ائناندی ربّئن طرفئندن اونا دیئلن سؤز، یرئنه یِتئشهجک!»
مریمئن نغمهسی
46مریم ددی:
«منئم جانیم، ربّی اوجالدیر.
47و روحوم منی قورتاران تاریدا، شادلیق الهیئر.
48چونکی او، کنئزئنئن حقئر حالینا، مرحمت نظری سالیب.
بوندان سورا، نسئللرئن هامیسی منه بختور دئیهجکلر.
49چونکی او کی، قادئردئر،
منئم اوچون بؤیوک ائشلر گؤروب. اونون آدی موقَدّسدئر!
50اونون رحمتی، نسئل به نسئل،
اوندان قورخانلار و اونا حؤرمت الهینلر اوچوندور.
51او اؤز قُولی ائنن، قودرتلی ائشلر گؤرسهدئب.
او آداملاری کی اورَکلرئنده اولان فئکئرلرده مغروردورلار داغیدیب؛
52قودرتلی آداملاری تختلرئندن آشاغی چَکئب،
باشیآشاغی اولان آداملاری دا اوجالدیب.
53آج آداملاری یاخشی شیلرائنن دویوروب،
وارلی آداملاری دا اَلی-بوش قایتاریب.
54او اؤز رحمتئنی یادینا سالیب،
اؤز قولی ائسرایئله کؤمک الهیئب،
55اله اوجور کی آتالاریمیز، ائبراهئم پیغمبر و اونون نَسلئنه
وعده وردی کی، ابده کئمی بوجور الهسئن.»
56مریم اوچ آیاقدر الئزابتئن یانیندا قالدی، اوندان سورا اِوئنه قاییتدی.
تعمئد ورن یحیانین دونیایا گلمهسی
57الئزابتئن دوغوم واختی یِتئشدی و او، بئر اوغلان دوغدی. 58اونون قونشولاری و قوحوملاری اِشئتدئلر کی، رب اونا بؤیوک بئر مرحمت گؤرسهدئب و اونونان شادلیق الهدئلر.
59سَکّئزئنجی گون گلدئلر کی، اوشاغی ختنه الهسئنلر و ائستهیئردئلر کی، آتاسینین آدینا گؤره، اوشاغین آدینی زکریا قویسونلار. 60آمّا اوشاغین آناسی جاواب ورئب ددی: «یوخ! اونون آدی یحیا اولاجاق!» 61اونا ددئلر: «سنئن قوحوملارینین آراسیندا، هچ کئمئن بله بئر آدی یوخدور.» 62اولار اوشاغین آتاسیندان ائشاره ائنن سوروشدولار کی، اوشاغین آدینی نه قویماق ائستهیئر. 63زکریا بئر یازی تختهسی ائستهدی و تختهنئن اوستونده یازدی: «اونون آدی یحیادیر.» هامی حیران قالدی. 64بئردن زکریانین دئلی آچیلدی و تارییا حمد الهیئب دانیشماغا باشلادی. 65اولارین قونشولارینین هامیسینین جانینا، قورخی دوشدی. بوتون یهودئیه داغلیغیندا، خالق بو شیلرئن هامیسینین حاقّیندا دانیشیردیلار. 66و بولاری اِشئدن هر کس اؤز اورهیئنده دیئردی: «بو اوشاق، نه جور بئر آدام اولاجاق؟» چونکی ربّئن اَلی اونونان ائدی.
زکریانین نبئلئک الهمهسی
67اوشاغین آتاسی زکریا، تارینین موقدّس روحی ائنن دولدی و نبئلئک الهیئب ددی:
68«ائسرایئلئن تاریسی رب، موبارک اولسون،
چونکی اؤز خالقینین کؤمهیئنه گلئب اولاری خئلاص الهیئب.
69او اؤز قولی داوود پادشاهین نسلئندَن،
بئزئم اوچون قودرتلی بئر نئجات ورن میدانا گؤندَرئب.
70نجه کی چوخ قدئمدن،
اؤز موقدّس پیغمبرلرئنئن دئلئندن دِمئشدئر کی،
71بئزی دوشمنلرئمئزئن،
و بئزدن نئفرت الهینلرئن هامیسینین اَلئندن، قورتارسین،
72اله کی، آتالاریمیزا وعده وردئیی رحمتی گؤرسدسئن،
و اؤز موقدّس عهدئنی یادینا سالسین؛
73و او آندی کی،
آتامیز ائبراهئمه ائچدی یرئنه یِتئرسئن،
74کی بئزی دوشمنلرئمئزئن اَلئندن قورتاریب،
قادئر الهسئن کی، اونا قورخوسوز خئدمت الهیک؛
75بوتون عؤمروموزی، اونون حوضوروندا،
قدّوسئیّت و صالحلئک ائنن.
76سن ای اوشاق، حاق-تاعالانین پیغمبری چاغیریلاجاقسان.
چونکی سن ربّئن قاباغیندا گدهجکسن، اله کی اونون یوللارینی حاضیرلاییب،
77اونون خالقینا نئجات معرئفتئنی ورهسن کی،
اولار، گوناهلارینین باغیشلانماسی ائنن، نئجات تاپاجاقلار.
78تاریمیزین مرحمتئنه گؤرهدئر کی،
سحر چیخان گون، گؤیدن بئزه گلهجک،
79اله کی، قارانلیقدا و اؤلوم کؤلگهسئنده اوتورانلارا، ائشیق وِرسئن،
و بئزئم قدملرئمئزی، صولح و سالاماتلیق یولونا هئدایت الهسئن.»
80او اوشاق بؤیویوب، روحدا قووّتلهنئردی و ائسرایئل خالقینین آراسیندا ظوهور الهین گونه قدر، چؤللرده یاشاییردی.
Currently Selected:
لوقا روایت 1: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
