لوقا روایت 18
18
ائصرار اِله یَن آروادین مثلی
1عئسا اؤز شاگئردلرئنه بئر مثل چَکدی کی، گؤرسَدسئن هر زامان دوعا الهسئنلر و هچ واخت دوعا الهمکدن یورولماسینلار. 2عئسا ددی: «بئر شهرده بئر حاکئم وارائدی کی، نه تاریدان قورخاردی، نه ده آداملاردان اوتاناردی. 3اِله او شهرده بئر دول آرواد دا وارائدی کی، هِی حاکئمئن یانینا گلئب دیئردی: ”داعوا اِله دئیئم آدامدان، منئم حاقّیمی آل.“ 4حاکئم بئر مودّت اونا اعتئنا اِله مه دی، آمّا آخیردا اؤز-اؤزونه ددی: ”دوزدئر کی، من نه تاریدان قورخورام نه ده آداملاردان اوتانیرام، 5آمّا چونکی بو دول آرواد هِی منه زحمت ورئر. اونون حاقّینی آلیم کی، هِی گلئب باشیمی آغریتماسین.“» 6رب عئسا ددی: «عدالتسئز حاکئمئن نه ددئیئنی اِشئتدئز؟ 7مگر تاری اؤز سِچدئکلرئنئن دادینا کی، گجه گوندوز اونی چاغیریرلار چاتماز؟ مگر اولارا کؤمک الهمک اوچون چوخ یوبانار؟ 8سئزه دیئرم کی، اولارین دادینا تِزلئک ائنن چاتاجاق. آمّا ائنسان اوغلی، گلدئیی زامان، آیا یِر اوزونده ائمان تاپاجاق؟»
فرئسی و باج ییغان آدامین مثلی
9عئسا او آداملار اوچون کی، اؤز صالح اولدوغلارینا بِل باغلامیشدیلار و آیری آداملارا حَقارت ائنن باخیردیلار، بو مثلی چکدی: 10«ائکی نفر دوعا الهمک اوچون معبده گتدئلر؛ بئرئسی فرئسی فئرقهسئنئن بئر عالئمی و او بئرئسی باج ییغان ائدی. 11فرئسی آیاق اوسته دوروب، اؤزی ائنن بِله دوعا اِله دی: ”ای تاری! سنه شوکور اِله یئرم کی، آیری آداملار کئمی جاماعاتی چاپان، حاقسیز، زئناکار، یا دا حتّا بو باج ییغان کئمی دِیئلم. 12هفتهده ائکی دفه اوروج توتورام و تؤورات حؤکمئنه گؤره قازاندیغیمین اوندان-بئرئنی وِرئرم.“ 13آمّا او باج ییغان، اوزاقدا دوروب حتّا ائسته مئردی کی گؤزلرئنی بِله گؤیه قالخیزا. او سئنهسئنه دؤیوب دیئردی: ”ای تاری! من گوناهکارا رحم اِله.“ 14سئزه دیئرم کی، فرئسی یوخ، بو باج ییغان، صالح ساییلیب اِوئنه گتدی. چونکی هر کس اؤزونی اوجالدا آلچالاجاق، آمّا هر کس کی اؤزونی آلچالدا اوجالاجاق.»
عئسا کئچئک اوشاقلارا برکت ورئر
15حتّا کئچئک اوشاقلاری عئسانین یانینا گتئرئردئلر کی، او، اولارا اَل قویوب برکت ورسئن. شاگئردلر بونی گؤرن واخت اولارا آجیقلاندیلار. 16آمّا عئسا اولاری اؤز یانینا چاغیریب ددی: «قویون اوشاقلار منئم یانیما گلسئنلر! اولارا مانع اولمایین. چونکی تارینین پادشاهلیغی اِله بوجور آداملاریندیر. 17دوغروسونی سئزه دیئرم؛ کئم تارینین پادشاهلیغینی، بئر اوشاق کئمی قبول اِله مه سه، اورایا گئرمهیهجک.»
وارلی جاوان
18یهودئلرئن ریئسلرئندن بئری عئسادان سوروشوب ددی: «ای یاخشی اوستاد! گرک نه اِله یَم کی، ابدی حیاتی مئراث آلام؟» 19عئسا اونا ددی: «نه اوچون منی یاخشی چاغیریرسان؟ تاریدان باشقا هچ کس یاخشی دِیئل. 20تارینین حؤکملرئنی بئلئرسَن؛ زئنا اِله مه، آدام اؤلدورمه، اوغورلوق الهمه، یالاندان شهادت ورمه، آتا و آنانا حؤرمت اِله.» 21او کئشی ددی: «بولارین هامیسینا جاوانلیغیمدان عمل الهمئشم.» 22عئسا، بونی اِشئدن واخت اونا ددی: «حَله بئر شِیئن اَسکئکدئر؛ هر نهیئن واردیر، سات، یوخسوللار آراسیندا پایلا کی، گؤیده خزئنَن اولاجاق. سورا منئم دالیمجا گل.» 23آمّا او کئشی بو سؤزلری اِشئدن واخت چوخ قَمگئن اولدی چونکی چوخ وارلی ائدی. 24عئسا اونون قَمگئن اولدوغونی گؤرَنده ددی: «نه قدر چتئندئر کی وارلی اولانلار تارینین پادشاهلیغینا گئره لر! 25چونکی دَوهنئن ائینه دِشئیئندن کِچمه سی، وارلی آدامین تارینین پادشاهلیغینا گئرمهسئندن چوخ آساندیر.»
26بو سؤزلری اِشئدنلر ددئلر: «بس کئم نئجات تاپا بئلَر؟» 27او زامان عئسا ددی: «ائنسانلار اوچون قیریمومکون اولان، تاری اوچون مومکوندور.»
28پطروس ددی: «باخ، بئز اِو-اِشئیئمئزی آتیب سنئن دالینجا گلمئشئک.» 29عئسا اولارا ددی: «دوغروسونی سئزه دیئرم؛ اِله بئر آدام یوخدور کی، تارینین پادشاهلیغی اوچون اِوئنی یا دا آروادینی، قارداشلارینی یا دا آتا-آناسینی و یا اوشاقلارینی آتسین، 30و بو زاماندا لاپ چوخ عوضئنی اَله گتئرمه یئب، گله جک عصرده ده، ابدی حیاتی آلماسین.»
عئسا، اوچونجی دفعه اؤلومونی خبر ورئر
31عئسا اونائکی شاگئردئنی قیراغا چکئب اولارا ددی: «باخین، بئز اورشلئمه گِدئرئک و هر نه کی پیغمبرلر واسئطهسی ائنن ائنسان اوغلی بارهسئنده یازیلیب، یِرئنه یِتئرئلهجک. 32چونکی ائنسان اوغلونی، قیری یهودئلرئن اَلئنه تسلئم اِلئیه جکلر. اولار اونی مسخره اِلئیهجکلر و اونی تحقئر الهیئب اوزونه توپورهجکلر. 33اونا شالّاق ووروب، اؤلدورهجکلر و او اوچونجی گون، دئرئلهجک.» 34آمّا شاگئردلر بو سؤزلردن هچ بئر شی باشا دوشمهدئلر؛ بو سؤزلر اولار اوچون اؤرتولی ائدی و اولار عئسانین نه ددئیئنی آنلامادیلار.
عئسا کور بئر یولچونون گؤزلرئنی آچیر
35عئسا ارئحا شهرئنه یاخینلاشدیغی زامان، کور بئر کئشی یول قیراغیندا اوتوروب، یولچولوق اِله یئردی. 36یانیندان کِچن جاماعاتین سسئنی اِشئدَنده سوروشدی کی نه خبر دئر؟ 37اونا ددئلر: «ناصئرهلی عئسا بوردان کِچئر.» 38کور آدام قیشقیردی: «ای داوود اوغلی عئسا، منه یازیغین گلسئن.» 39قاباقدا گِدنلر اونا آجیقلانیب، ددئلر کی ساکئت اولسون. آمّا او، لاپ بَرک قیشقیردی: «داوود اوغلی، منه یازیغین گلسئن.» 40عئسا دایانیب، امر الهدی کی او کئشئنی یانینا گتئرسئنلر. کور آدام یاخینلاشاندا عئسا اوندان سوروشدی: 41«نه ائستهیئرسن کی، سنه الهیئم؟» کور آدام ددی: «آغا، گؤزلرئم گئنه گؤرسون.» 42عئسا اونا ددی: «گؤزلرئن گؤرسون. ائمانین سنی شفا وردی.» 43اله او آندا آدامین گؤزلری آچیلدی و تارییا شوکور اِلئیه-اِلئیه عئسانین دالیسیجا گتدی. بوتون خالق بونی گؤرن زامان تارییا حمد الهدئلر.
Currently Selected:
لوقا روایت 18: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
