لوقا روایت 14
14
عئسا شنبه گونونده شفا ورئر
1یهودئلرئن موقدّس شنبه گونلرئنئن بئرئنده، عئسا چؤرک یِمک اوچون فرئسی فئرقهسئنئن ریئسلرئندن بئرئنئن اِوئنه گِتدی. اولار دئقّت ائنن عئسانی گؤز آلتینا آلمیشدیلار. 2اوردا بئر کئشی وارائدی کی، بدنی سو گتئرمئشدی. 3عئسا شرئعت عالئملری و فرئسی فئرقهسئنئن عالئملرئندن سوروشدی: «آیا شنبه گونونده شفا ورمک جائزدئر یا یوخ؟» 4آمّا اولاردان هچ بئر سس چیخمادی. او واخت عئسا او کئشئنی توتوب شفا وردی و مورخّص الهدی. 5عئسا اولارا ددی: «سئزلردن کئم وار کی، اگر اوغلی یا دا اؤکوزی شنبه گونونده قویویا دوشسه، آنَن اونی چیخارتماسین؟!» 6اولار بو سؤزه جاواب وره بئلمهدئلر.
7عئسا قوناقلارین نجه یوخاری باشی سِچدئکلرئنی گؤرنده، اولارا بو مثلی ددی: 8«سنی بئر نفر توی مجلئسئنه دعوت اِله ینده، مجلئسئن یوخاری باشیندا اوتورما، اولمایا کی سندن آدلی-سانلی بئر قوناق دا دعوت اولونموش اولا 9و او آدام کی سئزئن هر ائکئزی دعوت الهیئب گلئب، سنه دئیه: ” یِرئنی بو آداما ور.“ او واخت اوتانیب، مجلئسئن لاپ آشاغی باشیندا اوتوراجاقسان. 10آمّا دعوت اولدوغون زامان، گِد مجلئسئن لاپ آشاغی باشیندا اوتور کی، مجلئس صاحئبی گلَنده، سنه دِسئن: ”دوستوم، بویور یوخاری باشا کِچ.“ او واخت سوفره باشیندا اوتورانلارین هامیسینین حوضوروندا باشی اوجا اولارسان. 11چونکی هر کس اؤزونی اوجالدا آلچالاجاق، هر کس ده کی اؤزونی آلچالدا اوجالاجاق.»
12اوندان سورا عئسا اِو صاحئبئنه ددی: «شام، یا دا قوناقلیق ورنده، اؤز دوستلارینی، قارداشلارینی، قوحوملارینی، وارلی قونشولارینی دعوت اِله مه، اولمایا کی اولار دا سنی دعوت الهیئب، سن ده بوجور ائشئنئن عوضئنی آلاسان. 13آمّا قوناقلیق وِرن واخت، یوخسوللاری، علئللری، چولاقلاری، و کورلاری دعوت اِله کی، 14بختور اولارسان. چونکی اولار سنه عوضئنی وِره بئلمئرلر و سن اؤز ائشئنئن عوضئنی صالحلر دئرئلَن گونده، آلاجاقسان.»
بؤیوک قوناقلیغین مثلی
15عئسا ائنن سوفره باشیندا اوتورانلاردان بئری بو سؤزلری اِشئدن واخت اونا ددی: «خوش او آدامین حالینا کی، تارینین پادشاهلیغیندا چؤرک یِسئن!» 16آمّا عئسا اونا ددی: «بئر کئشی، بؤیوک بئر قوناقلیق وِردی و چوخلی قوناق دعوت الهدی. 17شام واختی اولاندا، نؤکرئنی، دعوت اولان قوناقلارین یانینا گؤندَردی کی، اولارا دسئن: ”بویورون، چونکی هر شی حاضیردیر.“ 18آمّا قوناقلارین هامیسی بئر-بئر، عوذر ائستمه یه باشلادیلار. بئرئنجئسی اونا ددی: ”بئر اَکئن یِری آلمیشام، گِدئب اونا باخمالییام. سندن خاهئش اِله یئرم منی معذور سایاسان.“ 19او بئری ددی: ”بِش جوت اؤکوز آلمیشام و اولاری ائمتاحان اِله مهیه گدئرم. سندن خاهئش اِله یئرم منی معذور سایاسان.“ 20او بئرئسی ده ددی: ”من تَزه اِولَنمئشم، بونا گؤره ده گله بئلمهرم.“ 21نؤکر قاییدیب بو شیلری اؤز اربابینا چاتدیردی. او واخت اِوئن اربابی حئرصلهنئب نؤکرئنه ددی: ”تِز گت شهرئن کوچه بازارلارینا یوخسوللاری، علئللری، کورلاری و چولاقلاری بورایا گتئر.“ 22نؤکر ددی: ”آغا! اَمرئن یرئنه یِتئرئلدی، آمّا حله یِر وار.“ 23ارباب نؤکره ددی: ”گت، بوتون یوللاری و چَپَرلری آختار و خالقا ائصرار اِله گلسئنلر کی اِوئم دولسون. 24چونکی سئزه دیئرم کی، اوّل دعوت اولانلارین هچ بئری، منئم قوناقلیغیمدان دادمایاجاق.“»
شاگئرد اولماغین باهاسی
25بؤیوک بئر جاماعات عئسا ائنن گِدَنده، او دؤنوب اولارا ددی: 26«کئم اؤز آتاسیندان، آناسیندان، آرواد و اوشاقلاریندان، قارداشلار و باجیلاریندان، حتّا اؤز جانیندان، نئفرت اِله مه یئب، منئم یانیما گلسه، منئم شاگئردئم اولا بئلمَز. 27هر کئم اؤز چارمیخینی گؤتورمهیئب، دالیمجا گلمهسه، منئم شاگئردئم اولا بئلمز.
28چونکی سئزلردن کئم وار کی، بئر بورج تئکمَک ائستهینده، اوتوروب اوّل خرجئنی حساب اِله مز کی، گؤرسون آیا اونی باشا یِتئرمک اوچون، پولی وار یا یوخ؟ 29چونکی اگر بونؤورهسئنی قویوب ائشی باشا یِتئره بئلمهسه، او زامان اونی گؤرن هر کس، اونا گؤلمهیه باشلاییب، 30دئیهجک: ”بو آدام تئکمهیه باشلادی، آمّا باشا یِتئره بئلمهدی.“
31یا دا هانسی پادشاه وار کی، آیری بئر پادشاه ائنان جنگه چیخاندا، اوّل اوتوروب مصلَحتلَشمز کی، گؤرسون آیا اونمئن نفر سرباز ائنان، قادئردئر او پادشاهین قاباغینا چیخسین کی، ائیئرمی مئن سرباز ائنان، اونون اوستونه گلئر؟ 32یوخسا، دوشمن حَله اوزاقدا اولاندا، اِلچی گؤندَرئب، صولح اِله مهیئن شرطلرئنی سوروشار. 33اِلهبوجور دا، سئزلردن کئم بوتون وار-یوخوندان اَل چَکمهسه، منئم شاگئردئم اولا بئلمز.
34دوز یاخشی شیدئر؛ آمّا اگر دوز دادینی اَلدن وِرسه، اونی نه جور گئنه شور الهمک اولار؟ 35اونون نه تورپاغا فایداسی اولار، نه ده پِیئنه؛ اونی اِشئیه آتارلار. هر کئمئن اِشئتمهیه قولاغی وار اِشئتسئن.»
Currently Selected:
لوقا روایت 14: CAB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
