یوحنّا روایت 5
5
حوووضون قیراغینداکی مؤجوزه
1بوندان بئر مودّت سورا، یهودئلرئن بایراملاریندان بئری یتئشدی و عئسا اورشلئم شهرئنه گتدی. 2اورشلئمده، قویون دیئلن دروازانین یانیندا بش ایوانلی بئر حوووض وار کی، عئبرانی دئلئنده اونا «بیت حسدا» دیئرلر. 3بوردا ناخوش چوخ آداملار یاتاردیلار: کورلار، توپاللار، علئللر. اولار سویون ترپَشمهسئنی گؤزلهیردئلر، 4چونکی هردن، بئر ملک بو حوووضون ائچئنه انئب، اونی چالخالارمیش. سو چالخالاندیقدا حوووضون ائچئنه گئرن ائلک آدام بوتون ناخوشلوغوندان توختارمیش.
5اوردا بئر کئشی وار ائدی کی، اوتوز سکّئز ائل ناخوشلوق الئنده اَسئر ائدی. 6عئسا اونون اوردا یاتدیغینی گؤروب، اوزون بئر زامان ناخوشلوق چکدئیئنی آنلادی و اونا ددی: «صاغالماق ائستهیئرسن؟» 7ناخوش آدام اونا جاواب وردی: «آغا! هچ کسئم یوخدور کی، سویون چالخالاندیغی زامان، منی حوووضون ائچئنه سالسین. اؤزومی ترپهدئب چاتینجا، آیری بئر آدام مندن قاباق اؤزونی حوووضا سالیر.» 8عئسا اونا ددی: «قالخ، دؤشهیئنی گؤتور، گت.» 9ناخوش آدام او آندا صاغالدی و دؤشهیئنی گؤتوروب گتدی.
و او گون موقدّس شنبه گونی ائدی. 10اونا گؤره یهودئلرئن بؤیوک باشلاری او شفا تاپمیش آداما ددئلر: «بو گون موقدّس شنبه گونودور. سنئن اوچون جائز دیئل کی، دؤشهیئنی گؤتوروب آپاراسان.» 11شفا تاپمیش آدام اولارا ددی: «منی شفا ورن آدام ددی؛ ”دؤشهیئنی گؤتور، گت.“» 12او زامان اوندان سوروشدولار: «سنه ”دؤشهیئنی گؤتور، گت“ دئین آدام کئمدئر؟» 13شفا تاپمیش آدام عئسانین کئم اولدوغونی بئلمئردی، چونکی عئسا خالقین ائچئنده گؤزدن ائتمئشدی.
14سورا عئسا او آدامی معبدده تاپیب اونا ددی: «باخ صاغالدین. گوناهدان اَل چک کی، بوندان داها پئسی باشینا گلمه سئن.» 15او آدام گدئب یهودئلرئن بؤیوک باشلارینا خبر وردی کی، اونا شفا ورن آدام عئسادیر.
16یهودئلر، عئسانین بو ائشلری شنبه گونونده الهدئیئنه گؤره، اونا اذئیّت ورئردئلر. 17آمّا عئسا اولارا ددی: «منئم گؤیده کی آتام ائندئیه کئمی ائشلهیئر، من ده ائشلهیئرم.» 18بو سببدن یهودئلر آرتیق اونی اؤلدورمک ائستهدئلر، چونکی فقط شنبه گونونی پوزموردی، بلکی تارینی دا آتاسی خئطاب الهیئب، اؤزونی اونونان بئر الهیئردی.
تارینین اوغلونون قودرتی
19اونون اوچون عئسا یهودئلرئن بؤیوک باشلارینا بله ددی: «دوغروسونی سئزه دیئرم؛ اوغول اؤزوندن هچ بئر شی اِلئیه بئلمز، مگر او ائشلر کی، گؤیده کی آتا الهیئر و اوغول گؤرور؛ چونکی آتا نه الهیئر، اوغول دا اونی الهیئر. 20گؤیده کی آتا اوغولی سوئر و بوتون الهدئکلرئنی اونا گؤرسهدئر و بولاردان داها بؤیوک شیلر ده اوغولا گؤرسدهجک کی، سئز تعجّوبدن مات قالاجاقسیز. 21گؤیده کی آتا اؤلولری دئرئلدئب اولارا حیات وردئیی کئمی، اوغول دا ائستهدئیی آداملارا حیات ورهجک. 22چونکی آتا هچ کسه حؤکم اله مئر، اونا گؤره کی، حؤکم اله مه یی اوغولون اَلئنه ورئب کی، 23گؤیده کی آتایا حؤرمت گؤرسهدن، اوغولا دا اِله حؤرمت گؤرسدسئن. اوغولا حؤرمت گؤرسدمهین آدام، اونی گؤندَرَن آتایا دا حؤرمت گؤرسدمئر. 24دوغروسونی سئزه دیئرم؛ منئم سؤزومی اشئدئب منی گؤندَرهنه ائمان گتئرن آدامین ابدی حیاتی واردیر. او، موحاکئمه اولمایاجاق؛ اصلئنده او اؤلومدن حیاتا کچئب. 25دوغروسونی سئزه دیئرم، او واخت گلئر، اله ائندی ده گلئبدئر کی، اؤلولر تارینین اوغلونون سسئنی اشئدهجکلر و اونی اشئدنلر یاشایاجاقلار. 26چونکی آتانین اؤزونده حیاتی اولدوغی کئمی، اوغولا دا عطا الهیئب کی، اؤزونده حیاتی اولسون. 27و اونا موحاکئمه الهمک قودرتئنی ده ورئب، چونکی ائنسان اوغلودور. 28بونا تعجّوب الهمهیئن، چونکی او ساعات گلئر کی، بوتون قبئرلرده اولانلار اونون سسئنی اشئدئب 29اشئیه چیخاجاقلار؛ یاخشی عمل الهینلر یاشاماق اوچون چیخاجاقلار، پئس عمل الهینلر موحاکئمه اولونماق اوچون. 30من اؤزومدن بئر شی الئیه بئلمهرم، بلکی اشئتدئیئم کئمی حؤکم الهیئرم و منئم حؤکموم عادئل بئر حؤکمدور، چونکی اؤز ائستهدئیئمی یوخ، منی گؤندَرَن آتانین اتستهدئیئنی یرئنه یتئرمک ائستهیئرم.»
عئسانین حاقّینداکی شهادتلر
31«اگر من اؤز حاقّیمدا شهادت ورسم، شهادتئم اعتئبارسیزدیر. 32منئم حاقّیمدا شهادت ورن آیری بئری وار و من اونون شهادتئنئن اعتئبارلی اولدوغونی بئلئرم. 33سئز یحیانین یانینا آداملار گؤندَردئز، او دا حقئقت حاقّیندا شهادت وردی. 34آمّا من ائنساندان شهادت قبول اله مئرم، بلکی بولاری دیئرم کی، سئز نئجات تاپاسیز. 35یحیا یانان و ائشیقلاندیران بئر چیراق ائدی و سئز آز بئر زامان اونون ائشیغیندا شادلیق الهمک ائستهدئز. 36آمّا منئم یحیانین شهادتئندن داها اعتئبارلی بئر شهادتئم واردیر. تاماملاماق اوچون آتانین منه وردئیی او ائشلر کی، اله ائندی ده اولار ائنان مشغولام، منئم آتا طرفئندن گؤندَرئلمئش اولدوغوما شهادت ورئرلر. 37و منی گؤندَرَن گؤیده کی آتا، اؤزی منئم حاقّیمدا شهادت ورئب. سئز هچ بئر زامان نه اونون سسئنی اشئدئبسئز، نه اونون شکئلئنی گؤروبسوز، 38نه ده اونون کلامی سئزده ساکئن اولور. چونکی اونون گؤندَردئیئنه ائمان گتئرمئرسئز. 39موقدّس کئتابی تفتئش الهیئرسئز، چونکی اوندا ابدی حیاتا مالئک اولاجاغیزی دوشونورسوز. همن موقدّس کئتاب دا منئم حاقّیمدا شهادت ورئر. 40آمّا گئنه ده ائستهمئرسئز کی، منئم یانیما گلئب حیاتا صاحئب اولاسیز.
41من ائنسانلاردان جلالی قبول اله مئرم، 42آمّا سئزی تانیمیشام و بئلئرم کی، سئزده تارینین سوگئسی یوخدور. 43من آتامین آدیندا گلمئشم و سئز منی قبول اله مئرسئز. اگر اؤزگه بئری اؤز آدی ائنن گلسه، اونی قبول الهیئرسئز. 44سئز نجه ائمان گتئره بئلرسئز، سئز کی، بئربئرلرئزدن جلالی قبول الهیئرسئز، آمّا واحئد تاریدان گلن جلالی آختارمیرسیز؟! 45گومان الهمهیئن کی، تارینین حوضوروندا سئزلری موتّهم الئیهجهیم. سئزلری موتّهم الهین، اومئد باغلادیغیز موسادیر. 46چونکی اگر موسایا ائنانسایدیز، منه ده ائمان گتئرردئز. اونا گؤره کی، موسا دا منئم حاقّیمدا یازیب. 47آمّا اگر سئز اونون یازدیقلارینا ائنانمیرسیز، منئم سؤزلرئمه نجه ائناناجاقسیز؟!»
Currently Selected:
یوحنّا روایت 5: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
