یوحنّا روایت 6
6
عئسا بشمئن نفری دویورور
1بولاردان بئر مودّت سورا، عئسا جلئل و یا طئبریا گؤلونون او بئری تایینا کچدی. 2چوخ آدام اونون دالیسیجا گدئردی، چونکی ناخوش آداملارا الهدئیی مؤجوزهلری گؤرموشدولر. 3عئسا بئر داغا چیخیب شاگئردلری ائنن اوردا اوتوردی. 4یهودئلرئن مایاسیز چؤرک پاسخا بایرامی یاخین ائدی. 5عئسا گؤزلرئنی قالخیزیب، یانینا جاماعاتین گلمهسئنی گؤرنده فئلئپوسا ددی: «بولارین یمهیی اوچون هاردان چؤرک آلاق؟» 6عئسا بو سؤزی اونی ائمتاحان الهمک اوچون ددی، چونکی نه الئیهجهیئنی اؤزی یاخشی بئلئردی. 7فئلئپوس جاواب وردی: «اولارین هر بئرئسئنه بئر آز چؤرک چاتماسی اوچون، ائکییوز دئنارلیق چؤرک ده یِتئشمز.» 8شاگئردلرئندن بئری، آندریاس کی شمعون پطروسون قارداشی ائدی عئسایا ددی: 9«بوردا بئر اوغلان اوشاغی وار کی، بش آرپا چؤرک و ائکی بالیغی وار. آمّا بو قدر آدام اوچون بو، نجه یِتئشه جک؟» 10عئسا ددی: «جاماعاتی یره اوتوردون.» او یرده چوخ اوت وار ائدی. جاماعات اوتوردی و اولارین ساییسی تقرئبن بشمئن کئشی اولاردی. 11او زامان عئسا چؤرکلری گؤتوردی و شوکور الهیندن سورا، اوتورانلار آراسیندا ائستهدئکلری قدر پایلادی. بالیقلار ائنان دا بله الهدی. 12هامی ییئب دویاندان سورا، عئسا شاگئردلرئنه ددی: «آرتیق قالان تئکهلری ییغین کی، هچ بئر شی هدر اولماسین.» 13پس شاگئردلر آداملارین یدئکلرئندن آرتیق قالان بش آرپا چؤرهیئن تئکهلرئنی ییغدیلار و اونائکی زنبئل دولدی.
14جاماعات عئسانین الهدئیی بو مؤجوزهنی گؤرَنده ددئلر: «دوغرودان دا بو اِله او پیغمبردئر کی، دونیایا گلهجک ائدی.» 15اوندا کی عئسا آنلادی، اولار ائستهیئرلر زور ائنان اونی آپاریب اؤزلرئنه پادشاه الهسئنلر، اوردان چیخدی و اؤزی تک باشینا، گئنه داغا گتدی.
عئسا سو اوزونده یرئیئر
16آخشام اولاندا شاگئردلری گؤله ساری اِندئلر. 17و بئر قاییغا مئنئب گؤلون او تایینا، کفرناحوم شهرئن سمتئنه یولا دوشدولر. آرتیق قارانلیق دوشموشدی، آمّا عئسا حله اولارین یانینا گلئب چیخمامیشدی. 18گوجلی یل اسدئیئنه گؤره، گؤل کولکلی اولماغا باشلادی. 19تقرئبن بئر آغاج یول گتمئشدئلر کی، عئسانی گؤلون اوزونده یرئیئب قاییغا یاخینلاشدیغینی گؤردولر و قورخدولار. 20آمّا عئسا اولارا ددی: «قورخمایین، منم.» 21او واخت ائستهدئلر کی، عئسانی قاییغا آلسینلار و او آندا قاییق گدهجکلری یره یتئشدی.
عئسا، حیات چؤرهیی
22او گونون صاباحی گؤلون او تاییندا اولان جاماعات آنلادی کی، شاگئردلر اوردا اولان بئرجه قاییغا مئنئب گدئبلر و عئسا اولار ائنان همن قاییغا مئنئب گتمهیئب. 23بو آرادا طئبریادان آیری قاییقلار، او یرئن یاخینلیغینا گلدئلر کی، ربه شوکور الهیندن سورا چؤرک یمئشدئلر. 24جاماعات عئسا و شاگئردلرئنئن اوردا اولمادیغینی گؤرنده، قاییقلارا مئنئب اونی آختارماق اوچون کفرناحوم شهرئنه گلدئلر.
25جاماعات گؤلون او تاییندا عئسانی تاپدیلار و اونا ددئلر: «اوستاد، نه واخت بورایا گلدئن؟» 26عئسا اولارا جاواب وردی: «دوغروسونی سئزه دیئرم؛ مؤجوزهلر گؤردویوز اوچون یوخ، چؤرکلردن ییئب دویدوغوز اوچون منی آختاریرسیز. 27فانی یمک اوچون چالیشمایین بلکی او یمک اوچون چالیشین کی، ابدی حیاتا قدر قالار. او حیات ورن یمک کی، ائنسان اوغلی سئزه ورهجک. آتا تاری بونون اوچون اونا تصدئق مؤهرونی باسیب.» 28او واخت عئسادان سوروشدولار: «تارینین ائشلرئنی یرئنه یتئرمک اوچون نه اله مه لی یئک؟» 29عئسا جاواب ورئب اولارا ددی: «تارینین ائشی بودور کی، اونون گؤندَردئیی آداما ائمان گتئرهسئز.» 30اولار او زامان عئسایا ددئلر: «نه علامت گؤرسدئرسن کی، گؤروب سنه ائمان گتئرک؟ نه الهیئرسن؟ 31بئزئم آتالاریمیز چؤلده مانّا یدئلر. نجه کی، موقدّس یازیلاردا یازیلیب؛ ”یمک اوچون اولارا گؤیدن یمک وردی.“» 32عئسا اولارا ددی: «دوغروسونی سئزه دیئرم؛ موسا دیئلدی کی گؤیدن سئزه چؤرک وردی، بلکی منئم گؤیده کی آتامدیر کی، گؤیدن سئزه حقئقی چؤرهیی ورئر. 33چونکی تارینین وردئیی چؤرک اودور کی، گؤیدن اِنئر و دونیایا حیات ورئر.» 34او زامان اونا ددئلر: «آغا، بو چؤرهیی همئشه بئزه ور.» 35عئسا اولارا ددی: «حیات چؤرهیی منم. منئم یانیما گلن اصلا آج اولماز. منه ائمان گتئرن اصلا سوسوز اولماز. 36آمّا سئزه دمئشم کی، منی گؤردویوز حالدا، گئنه ائمان گتئرمئرسئز. 37گؤیده کی آتامین منه وردئیی آداملارین هامیسی منئم یانیما گلهجکلر و منئم یانیما گلنی اصلا اشئیه قوومارام. 38من گؤیدن اِنمئشم کی، اؤز ائستهدئیئمی یوخ، بلکی منی گؤندَرهنئن ائستهدئیئنی یرئنه یتئرئم. 39و منی گؤندَرهنئن ائستهدئیی بودور کی، منه وردئکلرئنئن هچ بئرئسئنی ائتئرمهیئب، بلکی آخیر گونده اولاری دئرئلدَم. 40چونکی منئم گؤیده کی آتامین ائستهدئیی بودور کی، اوغولا باخیب اونا ائمان گتئرن هر کسئن ابدی حیاتی اولسون. و من اونی آخیر گونده دئرئلدهجهیم.»
41او واخت یهودئلر، عئسانین «گؤیدن اِنَن چؤرک منم» ددئیئنه گؤره اونون بارهسئنده دیئنمیه باشلادیلار. 42اولار دیئردئلر: «مگر بو کئشی آتا-آناسینی تانیدیغیمیز یوسئفئن اوغلی عئسا دیئل؟ ائندی نجه ”گؤیدن اِنمئشم“ دیئر؟!» 43عئسا اولارا جاواب ورئب ددی: «آرازدا میریلدانمایین. 44هچ کس منئم یانیما گلهبئلمز، مگر منی گؤندَرَن آتا اونی چکئب گتئرسئن و من آخیر گونده اونی دئرئلدهجهیم. 45پیغمبرلرئن یازدیقلاریندا یازیلیب؛ ”اولارین هامیسی تاریدان اؤیرنهجکلر.“ اونا گؤره آتادان اشئدئب اؤیرهنَن هرکس منئم یانیما گلئر. 46هچ کس گؤیده کی آتانی گؤرمهیئب، مگر او کی، تاریداندیر. آتانی او گؤروبدور. 47دوغروسونی سئزه دیئرم؛ ائمان گتئرن آدامین ابدی حیاتی وار. 48حیات چؤرهیی منم. 49سئزئن آتالاریز چؤلده مانّا یدئلر، گئنه ده اؤلدولر. 50آمّا بوردا گؤیدن انمئش اِله بئر چؤرک وار کی، اوندان یئین اؤلمهیهجک. 51گؤیدن انمئش او حیات ورن چؤرک منم. بو چؤرکدن یئین هرکس ابده کئمی یاشایاجاق. بو چؤرک منئم بدنئمدئر کی، دونیایا حیات ورمک اوچون اونی ورهجهیم.»
52او زامان یهودئلر بئربئرلری ائنن دیئنمیه باشلادیلار و دیئردئلر: «بو آدام اؤز بدنئنی بئزه یمک اوچون نجه ورهبئلر؟!» 53عئسا اولارا ددی: «دوغروسونی سئزه دیئرم؛ ائنسان اوغلونون بدنئندن یمهیئنجه و اونون قانیندان ائچمهیئنجه سئزده حیات اولمایاجاق! 54منئم بدنئمدن یئین و منئم قانیمدان ائچَن آدامین ابدی حیاتی وار و من آخیر گونده اونی دئرئلدهجهیم. 55چونکی منئم بدنئم حقئقی یمک و قانیم حقئقی ائچمکدئر. 56منئم بدنئمدن یئین و قانیمدان ائچن آدام منده قالیر و من ده اوندا قالیرام. 57نجه کی، دئری آتا منی گؤندَردی و منئم حیاتیم اونا باغلیدیر، مندن یئین آدام دا منه باغلی اولماق ائنان یاشایاجاق. 58گؤیدن انمئش چؤرک بودور. آتالاریز مانّا یدئلر، و گئنه ده اؤلدولر. آمّا بو چؤرکدن یئین آدام ابده کئمی یاشایاجاق.» 59عئسا بو سؤزلری کفرناحوم شهرئنده، بئر کنئسهده تعلئم ورن حالدا ددی.
ابدی حیاتین سؤزلری
60عئسانین شاگئردلرئندن چوخلاری بولاری اِشئدنده ددئلر: «بو آغیر بئر سؤزدور، کئم اونی قبول الئیهبئلر؟!» 61عئسا شاگئردلرئنئن بو بارهده میریلدانماقلارینی بئلئب اولارا ددی: «بو سئزی ائنجئدئر؟ 62بس اگر ائنسان اوغلونون اوّلدن اولدوغی یرئنه قالخدیغینی گؤرهسئز، نجه؟ 63حیاتورن تارینین روحودور؛ جئسمدن فایدا یوخدور. من سئزه ددئیئم سؤزلر روح و حیاتدیر. 64آمّا گئنه ده بعضئلرئز ائنانمیرسیز.» چونکی عئسا کئمئن ائمانسیز اولدوغونی و کئمئن اونا خیانت الئیهجهیئنی اوّلدن بئلئردی. 65پس ددی: «اونون اوچون سئزه دمئشم کی، هچ کس منئم یانیما گلهبئلمز، مگر بو اونا آتادان ورئلمئش اولسون.»
66بو زاماندان شاگئردلردن چوخی عئسانی ترک الهیئب آرتیق اونا پِیرَو اولمادیلار. 67عئسا او اونائکی شاگئرددن سوروشدی: «یوخسا سئز ده منی ترک الهمک ائستهیئرسئز؟» 68شمعون پطروس جاواب وردی: «کئمئن یانینا گدهبئلهرئک، یارب؟ ابدی حیاتین سؤزلری سندهدئر. 69بئز ائنانمیشیق و بئلئرئک کی، سن دئری تارینین اوغلی مسئحسن.» 70عئسا اولارا ددی: «مگر سئز اونائکی نفری سچن من دیئلم؟ حال بو کی، سئزلردن بئری، ائبلئس بئر آدامدیر.» 71عئسا بو سؤزی ائسکاریوتلی شمعونون اوغلی یهودانین حاقّیندا دیئردی کی، او اونائکی شاگئرددن بئری اولاندا، عئسایا خیانت اِلئیهجکدی.
Currently Selected:
یوحنّا روایت 6: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
