یوحنّا روایت 4
4
عئسا و سامئرهلی آرواد
1فرئسئلر اِشئتدئلر کی، عئسا یحیادان داها چوخ آداملاری شاگئرد الهیئب تعمئد ورئر. 2حال بو کی، تعمئد ورن عئسا دیئلدی، اونون شاگئردلری ائدئلر. 3رب بونی بئلدئکده یهودئیه وئلایتئنی ترک الهیئب گئنه جلئل وئلایتئنه گتدی. 4او سامئره منطقهسئندن کچمهلی ائدی. 5اونون اوچون ده سامئرهنئن بئر شهرئنه کی سوخار آدیندا ائدی گلدی؛ او یرئن یاخینلیغینا کی، یعقوب پیغمبر اؤز اوغلی یوسئفه ورمئشدی. 6یعقوبون قویوسی اوردا ائدی. عئسا یولون یورغونلوغوندان بو قویونون یانیندا اوتوردی. ناهارچاغی ساعات اون ائکئیه یاخین ائدی.
7سامئرهلی بئر آرواد سو چکمک اوچون اورایا گلدی. عئسا اونا ددی: «منه سو ور، ائچئم.» 8شاگئردلری یمک آلماق اوچون شهره گتمئشدئلر. 9سامئرهلی آرواد اونا ددی: «سن یهودئسن، من سامئرهلی بئر آرواد. نجه اولور کی، سن مندن سو ائستهیئرسن؟!» چونکی یهودئلر سامئرهلئلر ائنن قاتیشمازلار. 10عئسا جاوابیندا اونا ددی: «اگر سن تارینین بخشئشئنی بئلسیدئن، اگر ”منه سو ور ائچئم“ دئیهنئن کئم اولدوغونی بئلسَیدئن، سن اوندان ائستردئن و او سنه حیات سویونی وِرَردی.» 11آرواد اونا ددی: «آغا، سو چکمک اوچون دولچا یوخوندور، قویی دا درئندئر، پس هاردان بله بئر حیات ورن سویون وار؟ 12مگر سن بو قویونی بئزه ورن آتامیز یعقوب پیغمبردن ده بؤیوکسن کی، هم اؤزی بو قویودان ائچئردی، هم ده اوغوللاری و مال-حیوانلاری؟!» 13عئسا جاواب ورئب اونا ددی: «بو سودان ائچن هر کس گئنه سوسوز اولاجاق. 14آمّا من ورن سودان هر کس ائچسه، اصلا سوسوز اولماز بلکی من ورن سو اونون ائچئنده قاینایان بئر بولاق اولار کی، اونا ابدی حیاتی ورئر.» 15آرواد اونا ددی: «آغا، بو سویی منه ور کی، سوسوز اولماییم و سو چکمک اوچون ده بورایا گلمهیئم.» 16عئسا اونا ددی: «گت، اَرئنی چاغیر و بورایا گل.» 17آرواد جاواب وردی: «اَرئم یوخدور.» عئسا اونا ددی: «اَرئم یوخدور دمکده دوغری دیئرسن. 18چونکی بش کئشئیه اَره گدئبسن و ائندی سن ائنن یاشایان آدام اَرئن دیئل. ددئیئن سؤز دوغرودور.» 19آرواد عئسایا ددی: «آغا، گؤرورَم کی، سن بئر پیغمبرسن. 20بئزئم آتالاریمیز بو داغدا عئبادت الهیئبلر،آمّا سئز یهودئلر دیئرسئز کی، عئبادت الئیهجهیئمئز مکان اورشلئمدهدئر.» 21عئسا اونا ددی: «آرواد، منه ائنان. او واخت گلئر کی، گؤیده کی آتایا نه بو داغدا نه ده اورشلئمده عئبادت الئیهجکلر. 22سئز سامئره لئلر بئلمهدئیئزی عئبادت الهیئرسئز، آمّا بئز بئلدئیئمئزی عئبادت الهیئرئک، چونکی نئجات یهود خالقینین واسئطهسی ائنن گلئر. 23آمّا او واخت گلئر، اله ائندی ده گلئبدئر کی، دوغری عئبادت اِله ینلر،گؤیده کی آتایا روحدا و حقئقتده عئبادت الئیهجکلر. گؤیده کی آتا اؤزونه بله عئبادت الهینلر آختاریر. 24تاری روحدور و اونی عئبادت الهینلر، اونا روحدا و حقئقتده عئبادت اله مه لی دئرلر.» 25آرواد اونا ددی: «بئلئرم کی، وعده ورئلن مسئح گلئر، او کی، اونا خیرئستوس یعنی تارینین سِچدئیی دیئرلر. او، گلدئیی زامان، هر شیی بئزه آچیقلایاجاق.» 26عئسا اونا ددی: «من همن اویام کی، سن ائنن دانیشیرام.»
27بو آرادا عئسانین شاگئردلری ده گلدئلر و اونی بئر آرواد ائنان دانیشماقدا گؤرنده تعجّوب الهدئلر. آمّا هچ بئرئسی «نه ائستهیئرسن؟» یا ائنکی «نه اوچون اونونان دانیشیرسان؟» سوروشمادی. 28او زامان سامئرهلی آرواد کوزهسئنی قویوب شهره قاییتدی و خالقا ددی: 29«گلئن، او آدامی گؤرون کی، گؤردویوم ائشلرئن هامیسینی منه ددی. آیا او وعده ورئلن مسئح دیئل؟!» 30خالق شهردن اشئیه چیخیب، اونون یانینا گلمهیه باشلادی.
31بو آرادا شاگئردلری اوندان خاهئش الهدئلر: «اوستاد، بئر آز چؤرک یه.» 32آمّا عئسا اولارا ددی: «منئم یمک اوچون یئیه جه یئم وار کی، سئزئن اوندان خبرئز یوخدور.» 33شاگئردلری بئربئرلرئنه ددئلر: «مگر بئر کس اونا یمک گتئرئب؟» 34عئسا اولارا ددی: «منئم یئیه جه یئم، منی گؤندَرهنئن ائستهدئیئنی یرئنه یتئرمک و اونون ائشئنی تاماملاماقدیر. 35آیا سئز دمئرسئز کی بئچئمئن گلمهسئنه حله دؤرد آی قالیر؟! سئزه دیئرم، گؤزلرئزی آچین و اَکئنلره باخین! چونکی بئچئن اوچون حاضیردیرلار. 36اَکئنچی، اله ائندی زحمت حاقّینی آلیر و محصولی ابدی حیات اوچون ییغیر، اله کی اکن و بئچَن، بئربئرلری ائنن برابر سوئنسئنلر. 37اونا گؤره ده، بو سؤز دوغرودور کی، بئری اَکَر، او بئری بئچَر. 38من سئزی زحمت چکمهدئیئز شِیئن بئچئمئنه گؤندَردئم. زحمتی اؤزگهلر چکدئلر و سئز اولارین زحمتلرئنئن منفعتئنه شرئک اولوبسوز.»
39او آروادین ددئیی سوزه گؤره کی دمئشدی: «گؤردویوم ائشلرئن هامیسینی منه ددی!» او شهردن بئر چوخ سامئرهلی عئسایا ائمان گتئردئلر. 40اونون اوچون ده سامئرهلئلر گلئب عئسایا یالواردیلار کی، اولارین یانیندا قالسین. او دا ائکی گون اولارین یانیندا قالدی 41و داها آرتیق آداملار عئسانین سؤزلرئنه گؤره اونا ائمان گتئردئلر. 42سامئرهلیلر او آروادا ددئلر: «بئزئم ائمان گتئرمهیئمئز آرتیق سنئن سؤزلرئنه گؤره دیئل. چونکی بئز اؤزوموز اشئتمئشئک و بئلئرئک کی، بو آدام دونیانین حقئقی نئجات وره نی دئر.»
عئسا جلئلده
43ائکی گوندن سورا عئسا اوردان چیخیب جلئل وئلایتئنه گتدی. 44عئسا اؤزی دمئشدی کی، بئر پیغمبرئن اؤز وطنئنده حؤرمتی اولماز. 45جلئله گلدئیی واخت، جلئللیلر اونون پئشوازینا چیخدیلار. اولار مایاسیز چؤرک بایرامیندا اونون اورشلئم شهرئنده الهدئیی بوتون ائشلری گؤرموشدولر. چونکی اولار دا بایرام اوچون اورایا گتمئشدئلر.
عئسا بئر اوغلان اوشاغینا شفا ورئر
46عئسا گئنه جلئل وئلایتئنئن قانا کندئنه، سویی شرابا دؤندَردئیی یره گلدی. اوردا پادشاهین آداملاریندان بئری وار ائدی کی، اونون اوغلی کفرناحوم شهرئنده ناخوش ائدی. 47بو آدام عئسانین یهودئیه وئلایتئندن جلئله گلدئیئنی اشئدنده، اونون یانینا گدئب اونا یالواردی کی، گلسئن و اونون اؤلوم حالیندا اولان اوغلونا شفا ورسئن. 48عئسا اونا ددی: «سئز علامتلر و مؤجوزهلر گؤرمهیئنجه ائمان گتئرمزسئز.» 49او کئشی کی پادشاهین آداملاریندان ائدی ددی: «آغا، اوغلوم اؤلمهمئش گل.» 50عئسا اونا ددی: «گت، اوغلون یاشایاجاق.» او کئشی عئسانین اونا ددئیی سؤزونه ائنانیب گتدی. 51و حله یولدا اولاندا، نؤکرلری قاباغینا چیخیب خبر وردئلر: «اوغلون دئریدئر.» 52اولاردان اوغلونون حالینین نه زامان یاخشیلاشدیغینی سوروشدی. نؤکرلر جاواب وردئلر: «دونَن، ناهارچاغی ساعات بئرده قیزدیرماسی کسئلدی.» 53او زامان اوغلانین آتاسی آنلادی کی، عئسانین اونا «اوغلون یاشایاجاقدیر» ددئیی زامان بو، باش ورئب. و اؤزی و بوتون اِو اهلی عئسایا ائمان گتئردئلر. 54بو، عئسانین ائکئنجی مؤجوزهسیدئر کی، یهودئیه دن جلئله گلدئیئندن سورا گؤرستدی.
Currently Selected:
یوحنّا روایت 4: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
