یوحنّا روایت 13
13
عئسا شاگئردلرئنئن آیاقلارینی یویور
1مایاسیز چؤرک پاسخا بایرامیندان قاباق، عئسا بئلئردی کی، بو دونیادان آیریلیب گؤیده کی آتانین یانینا گدهجهیی ساعات یتئشئب. اونون اوچون ده، دونیادا اولان اؤزونونکولری سوئب، اولاری آخیرا قدر محبّت الهدی.
2شام یئینده ائبلئس، شمعون اوغلی ائسکاریوتلی یهودانین اورهیئنه، عئسانی تسلئم الهمک فئکرئنی سالمیشدی. 3عئسا آتانین هر شیی اونون ائختئیاریندا قویدوغونی بئلئردی و تارینین یانیندان گلئب اونون یانینا گدهجهیئنی ده بئلئردی. 4عئسا یمکدن قالخدی و اوست پالتارینی چیخاردیب بئر یانا قویدی و بئر دسمال گؤتوروب بلئنه باغلادی. 5سورا لَیَنه سو تؤکوب شاگئردلرئن آیاقلارینی یوماغا و بلئنه باغلادیغی دسمال ائنان قورولاماغا باشلادی. 6عئسا، شمعون پطروسون یانینا یاخینلاشاندا او، عئسایا ددی: «یارب، منئم آیاقلاریمی سن یویورسان؟!» 7عئسا جاواب ورئب اونا ددی: «منئم نه الهدئیئمی سن ائندی بئلمزسن، آمّا سورا باشا دوشهجکسن.» 8پطروس اونا ددی: «منئم آیاقلاریمی اصلا یومایاجاقسان.» عئسا اونا ددی: «اگر سنئن آیاقلارینی یوماسام، من ائنن پایین اولماز.» 9شمعون پطروس اونا ددی: «یارب، فقط آیاقلاریمی یوخ، اللرئمی و باشیمی دا یو.» 10عئسا اونا ددی: «یویونموش آدامین فقط آیاقلارینی یوماق لازیمدیر، چونکی تامامن تمئزدئر. سئز ده تمئزسئز، آمّا هامیز یوخ.» 11چونکی عئسا اونا خیانت اله یه نی تانیییردی، اونون اوچون ده ددی؛ «هامیز تمئز دیئلسئز.»
12عئسا شاگئردلرئن آیاقلارینی یویوب اوست پالتارینی گِیَندن سورا، گئنه سوفره باشیندا اوتوردی و اولارا ددی: «آیا سئزه نه الهدئیئمی آنلادیز؟ 13سئز منی اوستاد و رب چاغیریرسیز و دوغری دا چاغیریرسیز، چونکی اویام. 14اگر من رب و اوستاد اولدوغوم حالدا سئزئن آیاقلاریزی یودوم، سئز ده گرک بئربئرئزئن آیاقلارینی یویاسیز. 15چونکی سئزه بئر نومونه وردئم کی، سئز ده منئم سئزه الهدئیئم کئمی اِلئیهسئز. 16دوغروسونی سئزه دیئرم، قول آغاسیندان بؤیوک دیئل، الچی ده اونی گؤندَرهندن بؤیوک دیئل. 17ائندی کی، بو شیلری بئلئرسئز، اگر اولارا عمل الئیهسئز، بختورسئز.»
عئسا، اونا خیانت اولاجاغینی خبر ورئر
18«هامیزین حاقّیندا دانیشمیرام. من سچدئکلرئمی تانیییرام. آمّا بو اونون اوچوندور کی، موقدّس کئتابین یازدیغی سؤز یرئنه یتئشسئن؛ ”من ائنن چؤرک یئین منه خیانت الهدی.“ 19بونی سئزه ائندئدن، حله باش ورمه مئشدن دیئرم کی، باشورن زامان منئم ”او“ اولدوغوما ائناناسیز. 20دوغروسونی سئزه دیئرم؛ هر کئم منئم گؤندَردئیئم آدامی قبول الهسه، منی قبول الهمئش و هر کئم منی قبول الهسه، منی گؤندَرهنی قبول الهمئش اولور.»
21بو سؤزلری دئیندن سورا، عئسانین روحی سیخیلدی و شهادت ورئب ددی: «دوغروسونی سئزه دیئرم کی، سئزلردن بئری منی تسلئم اِلئیهجک.» 22شاگئردلر بئربئرلرئنه باخیب حیران قالمیشدیلار کی، کئمئن حاقّیندا دانیشیر. 23شاگئردلردن بئری سوفره باشیندا عئسانین یانیندا اوتوروب اونون سئنهسئنه سؤیکنمئشدی. عئسا بو شاگئردی سوئردی. 24شمعون پطروس بو شاگئرده ائشاره الهیئب اوندان سوروشدی: «کئمئن حاقّیندا دیئر؟» 25او دا عئسایا بئر آز دا یاخینلاشیب اوندان سوروشدی: «یارب، او کئمدئر؟» 26عئسا اونا جاواب وردی: «چؤرک تئکهسئنی باتیریب کئمه ورسم، او اؤزودور.» او زامان عئسا، چؤرک تئکهسئنی باتیریب شمعون اوغلی ائسکاریوتلی یهودایا وردی. 27یهودا چؤرک تئکهسئنی آلان زامان، شیطان اونون ائچئنه گئردی. او واخت عئسا اونا ددی: «الئیهجهیئنی تز اله.» 28آمّا سوفره باشیندا اوتورانلاردان هچ کئم عئسانین بو سؤزی نه اوچون ددئیئنی آنلامادیلار. 29کئسه یهودانین یانیندا اولدوغونا گؤره بعضئلری اِله گومان الهدئلر کی، عئسا اونا دیئر: «بایرام اوچون بئزه لازیم اولان شیلری آل» یا دا «مؤحتاج آداملارا بئر شی ور.» 30یهودا تئکهنی آلاندان سورا، فورَن اشئیه چیخدی. و گجه ائدی.
پطروسون ائنکار الهمهسی
31یهودانین گتدئیئندن سورا، عئسا ددی: «ائندی ائنسان اوغلی جلال تاپیر و تاری اوغولدا جلال تاپیر. 32اگر تاری اوندا جلال تاپسا، تاری دا اوغولی اؤزونده عئزّتلندئرهجک و فورَن اونا جلال ورهجک. 33اؤولادلاریم، آرتیق قیسا بئر مودّته کئمی سئز ائنَنم. منی آختاراجاقسیز، آمّا یهودئلره ددئیئم کئمی سئزه ده ائندی دیئرم؛ گدهجهیئم یره سئز گله بئلمزسئز. 34سئزه تزه بئر امر ورئرم؛ بئربئرئزی سوئن. من سئزی سودئیئم کئمی، سئز ده گرک بئربئرئزی سوهسئز. 35اگر بئربئرئزی سوهسئز، بوندان بوتون ائنسانلار بئلرلر کی، سئز منئم شاگئردلرئمسئز.»
36شمعون پطروس اونا ددی: «یارب، سن هارایا گدئرسن؟» عئسا جاواب وردی: «منئم گدهجهیئم یره، سن ائندی دالیمجا گله بئلمزسن؛ آمّا سورا گلهجکسن.» 37پطروس اونا ددی: «یارب، نئیه ائندی دالینجا گله بئلمهرم؟ من سنئن اوچون جانیمدان کچهرم.» 38عئسا جاواب وردی: «سن منئم اوچون جانیندان کچرسن؟! دوغروسونی سنه دیئرم، خوروز بانلامامیش سن منی اوچ دفه ائنکار الئیهجکسن.
Currently Selected:
یوحنّا روایت 13: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
