یوحنّا روایت 12
12
عئسانین مسح اولونماسی
1عئسا، مایاسیز چؤرک پاسخا بایرامیندان آلتی گون قاباق، بیتعنیا کندئنه، ائلعازرئن یاشادیغی یره گلدی، اله او یره کی عئسا اونی اؤلولردن دئرئلتمئشدی. 2اوردا اونون اوچون بئر قوناقلیق وردئلر. مارتا خئدمت الهیئردی و ائلعازر عئسا ائنن سوفره باشیندا اوتورانلاردان بئری ائدی. 3مریم بئر شوشه چوخ قئیمتلی خالئص سونبول یاغینی گؤتوروب عئسانین آیاقلارینا سورتدی و ساچلاری ائنن اونون آیاقلارینی قورولادی. اِو سونبول یاغینین عطری ائنن دولدی. 4ائسکاریوتلی یهودا، عئسانین شاگئردلرئندن بئری کی، اونا خیانت الهمک نئیّتئنده ائدی، ددی: 5«نه اوچون بو یاغ اوچ یوز دئنارا ساتیلیب، مؤحتاج آداملارا ورئلمهدی؟» 6بونی مؤحتاج آداملارین قیدئنده اولدوغی اوچون دمئردی، بلکی اوغری اولدوغی اوچون دیئردی؛ کئسه یهودانین یانیندا ائدی و اونا قویولانلاردان اؤزونه ده گؤتورَردی. 7عئسا ددی: «اونونان ائشئن اولماسین! قوی اونی منئم دفنئم اوچون ساخلاسین. 8مؤحتاج آداملار همئشه آرازدا واردیرلار، آمّا من همئشه آرازدا دیئلم.»
9یهودئلردن چوخلاری عئسانین اوردا اولدوغوندان خبردار اولوب فقط عئسانی گؤرمک اوچون یوخ، اؤلولردن دئرئلتدئیی ائلعازری گؤرمک اوچون ده اورایا گلدئلر. 10اونون اوچون معبدئن باش کاهئنلری مصلحتلهشئب ائلعازری ده اؤلدورمهیه قرار قویدولار. 11چونکی اونون اوزوندن یهودئلردن چوخلاری گدئب عئسایا ائمان گتئرئردئلر.
عئسا عئزّت ائنن اورشلئمه گئرئر
12او گونون صاباحی بایراما گلن بؤیوک بئر جاماعات، عئسانین اورشلئمه گلمکده اولدوغونی اؤیرَنَنده، 13خورما خوللارینی گؤتوروب اونون پئشوازینا چیخدیلار و سسلهنئردئلر:
«هوسانّا،
ربّئن آدیندا گلن
ائسرایئلئن پادشاهی
موبارک اولسون!»
14عئسا بئر سیپا تاپیب اوستونه مئندی. نجه کی، یازیلمیشدیر:
15صحیون قیزی، قورخما.
باخ، پادشاهین گلئر.
بئر سیپایا مئنمئش گلئر.
16شاگئردلر بو شیلری اوّلجه آنلامادیلار. آمّا عئسانین جلال تاپدیغیندان سورا، بو سؤزلرئن اونون حاقّیندا یازیلدیغینی و خالقین بو شیلری اونون اوچون الهدئکلر خاطیرلادیلار.
17و عئسانین ائلعازری چاغیریب اؤلولردن دئرئلتدئیی زامان اونونان اولان خالق، بونا شهادت ورئردئلر. 18اونون اوچون ده خالق اونون پئشوازینا چیخدی. چونکی اونون گؤرستدئیی بو مؤجوزهنی اشئتدئلر. 19فرئسئلر بئربئرلرئنه ددئلر: «گؤرورسوز، الئمئزدن هچ بئر شی گلمئر. عالم اونون دالیسیجا گدئر.»
یونانئلر عئسانی گؤرمک ائسته یئرلر
20بایرامدا عئبادت اوچون اورشلئمه گلنلر آراسیندا بعضی یونانئلر ده وار ائدی. 21بو یونانئلر جلئلئن وئلایتئنئن بیت صیدا کندئندن اولان فئلئپوسا یاخینلاشیب اوندان خاهئش الهدئلر: «آغا، عئسانی گؤرمک ائستهیئرئک.» 22فئلئپوس گدئب بو مطلبی آندریاسا ددی. آندریاس و فئلئپوس دا گدئب بونی عئسایا خبر وردئلر. 23عئسا اولارا ددی: «ائنسان اوغلونون جلال تاپماق واختی یتئشدی. 24دوغروسونی سئزه دیئرم؛ بوغدانین توخومی یره دوشوب اؤلمهسه، تک قالار. آمّا اؤلسه، چوخ محصول ورَر. 25جانینی سِوَن، اونی ائتئرر. آمّا بو دونیادا جانینی سِومهین، اونی ابدی حیاتا کئمی حئفظ الهر. 26منه خئدمت الهین آدام گرک منئم دالیمجا گلسئن. من هاردا اولسام، منه خئدمت الهین ده اوردا اولاجاق. منه خئدمت الهین هر کس آتا طرفئندن عئزّت تاپاجاق.
عئسا اؤز اؤلوموندن خبر ورئر
27ائندی جانیم سیخیلیر. و نه دیئم؛ ”آتا، منی بو ساعاتدان قورتار؟!“ آمّا من اله بو ساعات اوچون گلدئم. 28آتا اؤز آدینی اوجالت.» او زامان گؤیدن بئر سس گلدی: «اوجالتدیم، گئنه ده اوجالداجاغام.» 29اوردا دوران و بونی اشئدن خالق ددی: «گؤی گورولدادی.» اؤزگه لری ددئلر: «بئر ملک اونونان دانیشیب.» 30عئسا ددی: «بو سس منئم اوچون گلمهدی، سئزئن اوچون گلدی. 31بو دونیا ائندی موحاکئمه اولونور. ائندی بو دونیانین حؤکمداری اشئیه آتیلاجاق. 32آمّا من، یردن قالخیزیلدیغیم زامان، بوتون ائنسانلاری اؤزومه چکهجهیم.» 33عئسا بو سؤزی دمکده نجه اؤلهجهیئنی بئلدئردی. 34خالق اونا ددی: «بئز شرئعتدن اؤیرنمئشئک کی، مسئح ابده کئمی قالاجاق. سن ائندی نجه دیئرسن ائنسان اوغلونون قالخیزیلماسی لازیمدیر؟! بو ائنسان اوغلی کئمدئر؟» 35عئسا اولارا ددی: «نور آز بئر زامان داها آرازدا اولاجاق. نوروز وار اولاندا گزئن، اولمایا کی قارانلیق سئزی توتسون. قارانلیقدا گزن آدام هارایا گتدئیئنی بئلمز. 36نوروز وار اولاندا نورا ائنانین کی، نورون اوغوللاری اولاسیز.»
عئسا بو سؤزلری دئیندن سورا گدئب اولاردان گئزلندی.
یهودئلرئن ائمانسیزلیقلاری
37عئسا گرچی اولارین گؤزلری قاباغیندا چوخ علامتلر گؤرستدی، اولار گئنه اونا ائمان گتئرمهدئلر کی، 38اِشَعیا پیغمبرئن خبر وردئیی سؤز یرئنه یتئشسئن؛
یارب، وردئیئمئز خبره کئم ائناندی؟
و ربّئن قودرتی کئمه گؤروندی؟
39اولار اونون اوچون اونا ائمان گتئره بئلمئردئلر چونکی، اِشَعیا باشقا بئر یرده دمئشدی؛
40تاری اولارین گؤزلرئنی کور الهدی،
اورَکلرئنی داشا دؤندَردی.
اونون اوچون ده نه گؤزلری ائنن گؤرمهیه قادئر اولدولار،
نه اورَکلری ائنن آنلاماغا،
نه ده منه طرف دؤنمهیه کی، من اولارا شفا ورئم.
41اِشَعیا بو سؤزلری ددی، چونکی ربّئن جلالینی گؤردی و اونون حاقّیندا دانیشدی.
42گئنه ده ریئسلردن چوخلاری عئسایا ائمان گتئردئلر، آمّا فرئسئلر اوزوندن ائمان گتئردئکلرئنی آچیقجا دمهدئلر. چونکی قورخوردولار کنئسهدن اشئیه سالینسینلار. 43چونکی اولار ائنساندان گلن عئزّتی تاریدان گلن عئزّتدن داها چوخ سوئردئلر.
44آمّا عئسا اوجا سس ائنن اولارا ددی: «منه ائمان گتئرن، منه یوخ، منی گؤندَرهنه ائمان گتئرئر. 45و منی گؤرَن، منی گؤندَرهنی گؤرور. 46من دونیایا نور اولان کئمی گلدئم کی، منه ائمان گتئرن هر کس قارانلیقدا قالماسین. 47سؤزلرئمی اشئدئب اولارا ائنانمایان آداما من حؤکم اله مئیهجهیم. چونکی دونیانی موحاکئمه الهمک اوچون گلمهمئشم، دونیایا نئجات ورمک اوچون گلمئشم. 48منی ردّ الهین و سؤزلرئمی قبول اله مهین آداما حؤکم الهین بئری وار؛ ددئیئم سؤزلر آخیر گونده اونا حؤکم اِلئیهجک. 49چونکی من اؤزومدن دانیشمادیم. منی گؤندَرَن آتا نه دئیهجهیئمی و نه دانیشاجاغیمی منه بویوردی. 50و من بئلئرم کی، اونون بویوردوقلاری ابدی حیاتدیر. اونون اوچون نه دانیشیرام، آتا منه ددئیی کئمی دانیشیرام.»
Currently Selected:
یوحنّا روایت 12: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
