قالاتئیالیلار 3
3
صالحلئک گتئرن ائماندیر
1سئز عاغیلسیز قالاتئیالیلار، کئم سئزی طئلسئملهدی، کئمئن گؤزلری قاباغیندا عئسا مسئح چارمیخا چکئلمئش تصوئر اولوندی؟! 2سئزدن بئلمک ائستهدئیئم آنجاق بو بئر مطلبدئر: سئز موقدّس روحی شرئعتئن عمللری ائنن آلدیز، یوخسا اشئتدئیئزه ائمان گتئرمک ائنن؟ 3آیا بو قدر عاغیلسیزسیز؟! روح ائنان باشلاییب، ائندی جئسم ائنن کامئللَشئرسئز؟ 4بو قدر اذئیّتی مگر بوش یره چکدئز؛ دوغرودان دا مگر بوش یره ائدی؟ 5بس ائندی موقدّس روحی سئزه عطا الهین و آرازدا مؤجوزهلر یارادان، بولاری شرئعتئن عمللرئنی اله دئیئز اوچون الهیئر، یوخسا اشئتدئیئزه ائمان گتئردئیئز اوچون؟ 6اِله ائبراهئم ده «تارییا ائمان گتئردی و بو اونا صالحلئک ساییلدی.»
7بله ده آرخایین اولون کی، ائبراهئمئن اوغوللاری اولاردیرلار کی، ائمان گتئرئرلر. 8موقدّس یازی دا قیرییهودئلرئن ائمانلارینا گؤره صالح ساییلدیغینی قاباقدان گؤروب، ائبراهئمه ائنجئلی موژده وردی کی، «بوتون مئلّتلر سنئن واسئطن ائنن برکت آلاجاقلار.» 9بله ده، ائمان گتئرنلر ائمان گتئرن ائبراهئم ائنن برکت آلاجاقلار.
10چونکی اولار کی شرئعتئن عمللرئنه دایانیرلار، هامیسی لعنت آلتیندادیرلار. چونکی یازیلیب: «ملعوندور هر کس کی، شرئعت کئتابیندا یازیلان بوتون شیلرده دورماییب، اولاری عمله گتئرمهسئن.» 11آیدیندیر کی، هچ کس شرئعتئن واسئطهسی ائنن تارینین حوضوروندا صالح ساییلمیر. چونکی «صالح آدام ائمان ائنان یاشایاجاق.» 12آمّا شرئعت ائماندان دیئل. عکسئنه، «اولارا عمل الهین هر کس اولار ائنان یاشایاجاق.» 13مسئح بئزئم یولوموزدا ملعون اولماق ائنان، بئزی شرئعتئن لعنتئندن آلیب، قورتاردی. چونکی یازیلیب: «داردان آسیلان هر کس ملعوندور.» 14اِله کی، ائبراهئمئن برکتی مسئح عئسادا قیرییهودئلره گلسئن و بئز ده وعدهسی ورئلمئش موقدّس روحی ائمان واسئطهسی ائنن آلاق.
شرئعت و وعده
15قارداشلار، ائنسان سایاغی دیئرم: هچ کس الئیه بئلمز ائنسان الی ائنن رسمئیّته کچمئش بئر وصئیّتی، لغو اله سئن، یا دا بئر شی اونا علاوه الهسئن. 16وعدهلر ائبراهئمه و اونون نسلئنه ورئلدی. تاری بئر چوخ آداما ائشاره اِلهمئش کئمی «سنئن نسئللرئنه» دمئر، بلکی بئرئنه ائشاره اِلهمئش کئمی «سنئن نسلئنه» دیئر کی، منظور مسئحدئر. 17بونی دمک ائستهیئرم: شرئعت کی، دؤرد یوز اوتوز ائلدن سورا گلدی، تارینین تصدئق الهدئیی قاباقکی وصئیّتی اعتئباردان سالا بئلمز، اِله کی، وعدهنی لغو الهسئن. 18چونکی اگر مئراث شرئعته باغلی اولسا، آرتیق وعدهیه باغلی دیئل؛ آمّا تاری اونی ائبراهئمه بئر وعده واسئطهسی ائنن عطا الهیئب.
19بس شرئعت نه اوچوندور؟ دیئلن نسلئن گلمهیئنه قدر کی، وعده اونا ورئلئب، شرئعت خاطالارین سببئندن ملکلر واسئطهسی ائنن بئر واسئطهچی اَلی ائنن علاوه اولونوب، ترتئب ورئلدی. 20واسئطهچی بئر طرف اوچون دیئلدئر؛ آمّا تاری بئردئر.
21بس آیا شرئعت تارینین وعدهلرئنه ضئدّدئر؟ حاشا! چونکی اگر حیات ورمهیه قادئر اولان بئر شرئعت ورئلسَیدی، اوندا صالحلئک حقئقتن شرئعته باغلی اولاردی. 22آمّا موقدّس یازی بوتون هر نهیی گوناه آلتیندا باغلادی کی، عئسا مسئحه اولان ائمانا دایانان وعده، ائمان گتئرنلره ورئلسئن.
23آمّا ائمانین گلمهسئندن قاباق، بئز شرئعتئن موحافئظهتی آلتیندا ساخلانیردیق و گلهجک ائمانین ظوهور الئیهجهیئنه قدر توتولموشدوق. 24بونا گؤره، شرئعت بئزئم موربّئمئز اولوب کی، بئزی مسئحه یتئرسئن، اِله کی، ائمان واسئطهسی ائنن صالح ساییلاق. 25آمّا ائندی او ائمان گلئب و بئز آرتیق بئر موربّئنئن الی آلتیندا دیئلئک.
تارینین اؤولادلاری
26چونکی سئز هامیز مسئح عئسایا اولان ائمان واسئطهسی ائنن تارینین اوغوللاریسیز. 27چونکی مسئحده تعمئد اولونان بوتون سئزلر، مسئحی گِیئنئبسئز. 28نه یهودی وار نه یونانلی، نه قول وار نه آزاد، نه کئشی وار نه آرواد، چونکی سئز هامیز مسئح عئسادا بئرسئز. 29و اگر سئز مسئحئنکئسئز، او زامان سئز ائبراهئمئن نسلی و وعدهیه گؤره وارئثسئز.
Currently Selected:
قالاتئیالیلار 3: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
