قالاتئیالیلار 2
2
اورشلئم شوراسی
1اون دؤرد ائلدن سورا، بارنابا ائنن بئرلئکده گئنه اورشلئمه گتدئم، تئطوسی دا اؤزوم ائنن آپاردیم. 2بئر وحیه گؤره ائدی کی، گتدئم. و اولارا قیرییهودئلر آراسیندا اعلان الهدئیئم ائنجئلی تقدئم اله دئم، آمّا بونی اعتئبارلی اولانلارا خوصوصی بئر شکئلده الهدئم کی، اولمایا بوشا قاچیب و یا قاچمیش اولام. 3حتّا یانیمدا اولان تئطوس دا، یونانلی اولان حالدا، ختنه اولونماغا مجبور اولونمادی. 4آمّا بو، گئزلئجه آرامیزا سوخولان یالانچی قارداشلار اوزوندن اولدی کی، مسئح عئسادا اولان آزادلیغیمیزی گودوردولر، اله کی، بئزی قوللوغا چکسئنلر. 5اولارا بئر ساعات دا اولسا، باش اَیئب تسلئم اولمادیق کی، ائنجئلئن حقئقتی سئزئن اوچون حئفظ اولسون.
6آمّا اعتئبارلی اولانلار - منه فرق اِله مز کی، اولار کئم ائمئشلر؛ تاری طرفدارلیق اله مز - اولار منه بئر شی آرتیرمادیلار. 7بلکی عکسئنه، گؤردولر کی قیری یهودئلره ائنجئلئن خوش خبرئنی اعلان الهمک وظئفه سی منه تاپشیریلیب، اله او جور کی یهودئلره ائنجئلئن خوش خبرئنی اعلان الهمک وظئفه سی پطروسا تاپشیریلمیشدی. 8چونکی او کی، پطروس طرئقئندن یهودئلر حوارئسی کئمی ائش گؤردی، منئم طرئقئمدن ده قیرییهودئلر حوارئسی کئمی ائشلهدی. 9و منه عطا اولونان فیضی تشخئص وِرَنده، سوتونلار ساییلان یعقوب، کئفا، و یوحنّا صاغ اللرئنی رفاقت اوچون منه و بارنابایا وردئلر کی، بئز قیرییهودئلرئن آراسینا گدک، اولار دا یهودئلرئن. 10آنجاق بئزدن ائستهدئلر کی، یوخسوللاری یاددان چیخارتمایاق؛ اِله همن شیی کی، من ده اونی الهمهیه جان آتیردیم.
پولوس پطروسی مذمّت الهیئر
11آمّا پطروس انطاکئیهیه گلنده، اونون اوزونه ضئدّ دوردوم، چونکی تقصئرلی ائدی. 12اونا گؤره کی، یعقوبون طرفئندن بعضی آداملار گلمهدن قاباق، قیرییهودئلر ائنن یمک ییئردی، آمّا اولار گلندن سورا، ختنه الهمک طرفدارلارینین قورخوسوندان دالی چکئلئب، اؤزونی اولاردان آییردی. 13آیری یهودئلر ده ائکی اوزلی لئکده اونا قوشولدولار، بله کی، حتّا بارنابا دا اولارین ائکیاوزلی لئیئنه توتولدی.
14آمّا او زامان کی، اولاری ائنجئلئن حقئقتئنه گؤره، دوزگون رفتار اله مهدئکلرئنی گؤردوم، هامینین حوضوروندا کئفایا ددئم: «اگر سن، یهودی اولان حالدا، یهودئلر کئمی یوخ، قیرییهودئلر کئمی یاشاییرسان، نجه قیرییهودئلری مجبور الهیئرسن کی، یهودئلر کئمی یاشاسینلار؟!»
15بئز آنادان اولما یهودئیئک و قیرییهودئلر آراسیندان اولان گوناهکارلار دیئلئک؛ 16آمّا بئلئرئک کی، ائنسان شرئعتئن عمللری ائنن یوخ، بلکی مسئح عئسایا اولان ائمان واسئطهسی ائنن صالح ساییلیر. حتّا بئز ده مسئح عئسایا ائناندیق کی، شرئعتئن عمللری ائنن یوخ، مسئحه اولان ائمان واسئطهسی ائنن صالح ساییلاق. چونکی شرئعتئن عمللری ائنن هچ بئر ائنسان صالح ساییلماز.
17اگر بئز، مسئحده صالح ساییلماغیمیزی آختاران حالدا، گوناهکار دا چیخساق، اوندا آیا مسئح گوناهین خئدمتچئسیدئر؟ حاشا. 18چونکی اگر من اوّلده ییخدیغیمی گئنه تئکئرم، اؤزومون تقصئرلی اولدوغومی ثابئت الهیئرم. 19چونکی من شرئعتئن واسئطهسی ائنن شرئعته اؤلدوم کی، تاری اوچون یاشاییم. 20من مسئح ائنن چارمیخا چکئلمئشم و یاشایان آرتیق من دیئلم، بلکی مسئحدئر کی، منده یاشاییر؛ و بدنده یاشادیغیم بو حیاتی، تارینین اوغلونا اولان ائمان واسئطهسی ائنن یاشاییرام کی، منی سِودی و منئم اوچون اؤزونی تسلئم الهدی. 21تارینین فیضئنی باطئل الهمئرم. چونکی اگر صالحلئک شرئعتئن واسئطهسی ائنن مومکون اولسایدی، دمهلی مسئح بوش یره اؤلدی.
Currently Selected:
قالاتئیالیلار 2: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
