اِفِسوسلولارا 4
4
موقدّس روحدا بئرلئک
1پس من کی ربّئن خاطئرئنه زئنداندایام، سئزه یالواریرام کی، اولدوغوز دعوته لایئق رفتار الئیهسئز؛ 2هر باخیمدان، باشیآشاغیلیق، حلئملئک، صبر و محبّتده بئربئرئزی تحمّول الهیئن. 3جهد الهیئن کی، روحون بئرلئیئنی صولح و سالاماتلیق باغی ائنن حئفظ الئیهسئز. 4بئر بدن و بئر روح وار، نجه کی، سئز ده دعوت اولان زامان بئر اومئده دعوت اولوندوز. 5بئر رب، بئر ائمان، بئر تعمئد، 6بئر تاری و هامینین آتاسی کی، هامینین اوستونده، هامینین واسئطهسی ائنن و هامیدادیر.
7آمّا فیض بئزئم هر بئرئمئزه مسئحئن عطاسینین اؤلچوسونه گؤره ورئلئب. 8بونون اوچون بله دیئر:
« یوخارییا قالخدیقدا،
بئر قوشون اسئری، اسئرلئیه آپاردی،
و ائنسانلارا عطالار وردی.
9ائندی بو « یوخارییا قالخدی» نه دمکدئر، مگر بو کی، او، اوّل یرئن آشاغی لارینا اِندی. 10اِنَن اله همن اودور کی، بوتون گؤیلرئن اوستونه ده قالخدی. اله کی، بوتون شیلری دولدورسون. 11و او، بعضئلری حوارئلر، بعضئلری نبئلر، بعضئلری موبشّئرلر، بعضئلری ده شبانلار و موعلّئملر تعیئن الهدی کی، 12موقدّسلر، خئدمت ائشئنی یرئنه یتئرمک اوچون سئلاحلانیب، مسئحئن بدنئنی بئنا الهسئنلر. 13او قدر کی، هامیمیز ائماندا، تاری اوغلونون معرئفتئنده بئرلئیه چاتیب، مسئحئن دولولوق قامتئنئن اؤلچوسونه قدر بؤیوموش بئر ائنسان اولاق.
14بله کی، آرتیق اوشاق اولماییب، شپهلر الئنده چالخالانمایاق و هر تعلئمئن یلی ائنن، ائنسانلارین کلکبازلیغی ائنن، آلداتان طرزلرئن حؤقّهبازلیغی ائنن یولدان آزمایاق. 15آمّا حقئقتی محبّتده دیئب هر جهتدن اونون حدّئنه جک بؤیویَک کی، بدنئن باشیدیر، یعنی مسئح. 16اونون اساسینا بوتون بدن، هر بئر بندئن کؤمهیی ائنن بئربئرئنئن یانینا قویولوب و هر عوضوون دوزگون ائشلمهسئنه گؤره، بدن بؤیویور، اله کی اؤزونی محبّت ائنن بئنا الهسئن.
نور اوشاقلاری کئمی یاشاماق
17بله ده من بونی دیئب رب ائنن بئرلئکده تصدئق الهیئرم کی، سئز آرتیق قیرییهودئلر کئمی ذهئنئن باطئللئیئنده رفتار اله مئیهسئز؛ 18اولارین دوشونجهلرئنی قارانلیق باسیب، ائچلرئنده اولان جهالت اوزوندن و اورَکلرئنئن برکلئیئندن تارینین حیاتیندان اوزاقلاشیبلار. 19اولار هر جور حسّاسلیغی ائتئرئب، اؤزلرئنی هرزه لئکه تسلئم الهیئرلر کی، هر جور نجئسلئیی طاماح ائنان یرئنه یتئرسئنلر. 20آمّا سئز مسئحی بو یولدان اؤیرنمهیئبسئز، 21اگر حقئقتن اونی اشئدئب و اوندا تعلئم ورئلئبسئز، نجه کی، حقئقت عئسادادیر. 22یعنی سئزئن قاباق نجه یاشادیغیزا باخماق ائنان، کؤهنه منئیّتی کنارا آتین کی، حئیلهنئن شهوتلری ائنن فسادا چکئلئب. 23و ذهئنلرئزئن روحوندا تزهلهنئن 24و تزه منئیّتی گیئن کی، صالحلئک، قودوسئیّت و حقئقتده تارییا موطابئق یارانیب.
25بونا گؤره، یالانی کنارا آتین؛ هر بئرئز اؤز قونشوسونا حقئقتی دسئن، چونکی بئز، بئربئرئمئزئن عوضولرئیئک. 26«قضبلَنَنده گوناه اله مهیئن.» قویمایین قضبئز یاتمامیش، گون باتسین. 27ائبلئسه هچ بئر فورصت ورمهیئن. 28اوغورلوق الهین آرتیق اوغورلوق اله مهسئن؛ عکسئنه، زحمت چکئب اؤز اَللری ائنن یاخشی ائشه مشغول اولسون، اله کی او اؤزی ده مؤحتاج اولان آداما کؤمک الهسئن.
29آغزیزدان هچ بئر یاوا سؤز چیخماسین، بلکی احتئیاجا گؤره، بئنا الهمک اوچون یاخشی سؤز دیئن کی، اشئدنلره فیض عطا الهسئن. 30تارینین موقدّس روحونی قمگئن اله مهیئن، کی نئجات گونی اوچون اونونان مؤهورلَنئبسئز. 31قوی هر جور آجیلیق، قضب، حئرصلَنمک، کوفر و تؤهمت هر جور پئس نئیّت ائنن برابر سئزدن اوزاق اولسون. 32بئربئرئزه مهرئبان و شفقتلی اولون. بئربئرئزی باغیشلایین، نجه کی، تاری دا مسئح ده سئزی باغیشلاییب.
Currently Selected:
اِفِسوسلولارا 4: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
