اِفِسوسلولارا 2
2
مسئحده دئری
1و سئز خاطالار و گوناهلاریز ائچنده اؤلموشدوز. 2بئر زامانلار اولاردا بو دونیانین گدئشئنه گؤره رفتار اله دئز؛ هاوا ریئسئنئن قودرتئنه گؤره، یعنی او روحا گؤره کی، ائندی ائطاعتسئزلئیئن اوغوللاریندا عمل الهیئر. 3اولارین آراسیندا بئر زامانلار بئز هامیمیز دا جئسمئن شهوتلرئنده یاشاماق ائنان، جئسمئن و فئکرئن هاوا-هوسلرئنی یرئنه یتئرئب، اؤزگهلر کئمی بئز ده طبئعتن قضبئن اؤولادلاری ائدئک. 4آمّا رحمتی بول اولان تاری، بئزی سودئیی بؤیوک محبّتئندن اؤتری، 5حتّا خاطالاریمیز اوزوندن اؤلی اولدوغوموز حالدا دا، بئزه مسئح ائنن برابر حیات وردی. پس سئز فیض ائنن نئجات تاپیبسیز. 6و اونونان بئزی دئرئلتدی و مسئح عئسادا اونونان بئزی گؤیده کی یرلرده اوتورتدی. 7اِله کی، گلهجک عصرلرده اؤز فیضئنئن حدسئز دؤولتلئیئنی مسئح عئسادا بئزه شفقت ائنن گؤرسدسئن. 8چونکی سئز فیض واسئطهسی ائنن ائمان یولی ائنن نئجات تاپیبسیز و بو سئزدن دیئل، بلکی تارینین عطاسیدیر. 9عمللردن دیئل کی، هچ کئم الئیه بئلمهسئن اؤزونه فخر الهسئن. 10چونکی بئز تارینین اَلئنئن صَنَتئیئک و مسئح عئسادا یاخشی عمللر اوچون یاراندیق. بو عمللری تاری قاباقجادان حاضیرلادی کی، بئز اولارا گؤره رفتار الهیک.
مسئحده بئر اولماق
11بونا گؤره سئز جئسمن قیرییهودی اولانلار کی، ائنسان اَلی ائنن «ختنه اولموشلار» طرفئندن، «ختنهسئزلر» چاغیریلیرسیز، خاطیرلایین کی، 12بئر زامانلار مسئحدن آیری، ائسرایئل هموطنلئیئندن محروم و وعدهنئن عهدلرئنه قرئب ائدئز. هچ بئر اومئدئز یوخ ائدی و دونیادا تاریسیز ائدئز. 13آمّا ائندی مسئح عئسادا، سئز کی، بئر زامانلار اوزاق ائدئز، مسئحئن قانی سببی ائنن یاخین اولدوز.
14چونکی او اؤزی بئزئم باریشیمیزدیر کی، هر ائکئسئنی یعنی یهودی و قیر یهودئنی بئر الهیئب آیریلیق دووارینی آرالیقدان ییخدی. 15و دوشمنلئیی، یعنی شرئعتده کی قایدالاری و احکاملاری باطئل الهدی، اله کی باریش قوروب اؤزونده او ائکئدن تزه بئر ائنسان یاراتسین، 16و هر ائکئسئنی تک بئر بدنده تاری ائنن باریشدیرسین، چارمیخ واسئطهسی ائنن کی اونون اوستونده دوشمنلئیی اؤلدوردی. 17او گلدی و صولح و سالاماتلیغی اوزاقدا اولان سئزلره و یاخیندا اولانلارا اعلان الهدی. 18چونکی اونون واسئطهسی ائنن ائکئمئزئن ده بئر روحدا آتانین حوضورونا یولوموز آچیقدیر.
19دمهلی بوندان بله، سئز، نه اؤزگهسئز، نه ده اجنبی. بلکی موقدّسلر ائنن برابر هموطن و تارینین عایئلهسئندنسئز. 20و حوارئلر و نبئلرئن بونؤورهسی اوستونده بئنا اولوبسوز کی، اونون بوجاق داشی مسئح عئسا اؤزودور. 21مسئح عئسادا بوتون عئمارت هماهنگ دوزولوب، ربّه عایید موقدّس بئر معبد اولماق اوچون بئنا اولور. 22و اوندا سئز ده بئرلئکده تئکئلئرسئز، اله کی تارینین روحونون واسئطهسی ائنن ساکئن اولدوغی بئر یر اولاسیز.
Currently Selected:
اِفِسوسلولارا 2: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
