کولوسلولارا 3
3
تزه منئیّتی گیئنئن
1بله ده اگر مسئح ائنن دئرئلئبسئز، یوخاریداکی شیلری آختارین، اورداکی مسئح تارینین صاغیندا اوتورور. 2فئکرئزی دونیهوی شیلرئن اوستونه یوخ، گؤیدهکی شیلرئن اوستونه قویون. 3چونکی سئز اؤلوبسوز و سئزئن حیاتیز مسئح ائنن تاریدا گئزلیدئر. 4حیاتیمیز اولان مسئح ظوهور الهینده، سئز ده اونونان بئرلئکده جلالدا ظوهور الئیهجکسئز.
5بونا گؤره، یردن اولان بدنئزئن عوضولرئنی عئفّتسئزلئیه، ناپاکلیغا، هاوا-هوسه، پئس آرزولارا، و طاماحا کی، بوتپرستلئکدئر، اؤلی گومان الهیئن. 6بو شیلره گؤره دئر کی، تارینین قضبی گلئر. 7بئر زامان سئز ده، بولاردا یاشادیغیز واخت، بولاردا یول گدئردئز. 8آمّا ائندی سئز ده اولارین هامیسینی بئر یانا قویون؛ قضبی، قیضی، کئنی، ائفتئرانی، آغزیزدان چیخان ائنجئدن سؤزلری. 9بئربئرئزه یالان دمهیئن، چونکی سئز کؤهنه منئیّتی و اونون بوتون عمللرئنی سویونوب اؤزوزدن آتیبسیز 10و تزه منئیّتی گیئنئبسئز کی، معرئفتده تزهلهنئر اله کی اونی یارادانین شکئلئنه دؤنسون، 11و بو تزه لنمکده، یونانلی، یهودی، ختنهلی، ختنهسئز، بربر، ائسکئت، قول و آزاد یوخدور، بلکی مسئح هر شی دئر و هر شیده دئر.
12بوندان اؤتری، تارینین سچئلمئش، موقدّس و عزئزلری کئمی شفقتلی، مهرئبان، باشیآشاغی، حلئم و صبئرلی بئر اورهیی گیئنئن. 13بئربئرئزی تحمّول الهیئن و بئربئرئزی عفو الهیئن. هر بئرئزئن، بئرئسئندن شئکایتی وارسا، باغیشلایین. رب سئزی باغیشلادیغی کئمی، سئز ده گرک اِله الئیهسئز. 14و بولارین هامیسیندان علاوه، محبّتی گیئنئن کی، کامئل بئرلئیئن باغیدیر.
15قویون مسئحئن صولح و سالاماتلیغی اورَکلرئزده حاکئم اولسون کی، اونون اوچون ده بئر بدنده چاغیریلدیز. و شاکئر اولون. 16قویون مسئحئن کلامی بوتون دؤولتلئیی ائنن سئزده ساکئن اولسون. بئربئرئزه بوتون حئکمت ائنن تعلئم و نصئحت ورئب، مزمورلار و ماهنیلار و روحانی نغمهلر و اورَکلرئزده شوکورلر ائنن تارییا اوخویون. 17سؤزده و عملده نه الهیئرسئز، هامیسینی رب عئسانین آدیندا الهیئن و اونون واسئطهسی ائنن آتا تارییا شوکور الهیئن.
عایئله حاقّیندا
18ای آروادلار، ربّه لایئق اولدوغی کئمی ارلرئزدن ائطاعت الهیئن. 19ای کئشئلر، آروادلاریزا محبّت الهیئن و اولار ائنان آجی رفتار اله مهیئن. 20ای اؤولادلار، هر شیده والئدینلرئزدن ائطاعت اِله یئن، چونکی بو، ربّی خوشنود الهیئر. 21ای آتالار، اؤولادلاریزی حئرصلندئرمهیئن، اولمایا کی مأیوس اولسونلار. 22ای قوللار، هر شیده یردهکی آغالاریزا موطئع اولون؛ ائنسانلاری راضی الهمک اوچون گؤزه خوش گؤرونن خئدمت ائنن یوخ، بلکی صاف اورَک ائنن و تاریدان قورخان کئمی. 23نه الهیئرسئز، جان ائنان الهیئن؛ آداملارا یوخ، ربّه. 24چونکی بونی بئلئرسئز کی، ربدن مئراث اجرئنی آلاجاقسیز. سئز رب مسئحه خئدمت الهیئرسئز. 25چونکی کئم حاقسیزلیق الهسه، الهدئیی حاقسیزلیغین عوضئنی آلاجاق، طرفدارلیق دا اصلا اولماز.
Currently Selected:
کولوسلولارا 3: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
