کولوسلولارا 4
4
موختلئف نصئحتلر
1ای آغالار، قوللاریز بارهسئنده عدالت و ائنصاف گؤرسهدئن. بئلئن کی، سئزئن ده گؤیده بئر آغاز وار.
2اؤزوزی دوعایا وقف الهیئن و اوندا شوکور ائنن اویاق اولون. 3همن حالدا بئزئم اوچون ده دوعا اِله یئن، اله کی کلام اوچون تاری بئزه بئر قاپی آچسین و مسئحئن سئرّئنی اعلان اله یئم کی، اونون خاطئرئنه ده زئندانا دوشموشم. 4دوعا اله یئن کی اونی واضح بئر شکئلده نجه کی، گرکدئر، بیان الهیئم. 5قیری مسئحئلر ائنن حئکمت ائنن رفتار الهیئب، هر واختی قَنئمت بئلئن. 6قویون سؤزوز همئشه فیضلی اولسون، دوز قاتیلمیش کئمی اولسون کی، هر کسه نجه گرک جاواب ورهجهیئزی بئلهسئز.
آخیرکی سؤزلر
7عزئز قارداش و امئن خئدمتکار و ربده همکاریمیز اولان تئخئکوس بوتون احوالیمی سئزه بئلدئرهجک. 8من اونی آنجاق بونون اوچون سئزئن یانیزا گؤندَردئم کی، سئز بئزئم احوالاتیمیزدان خبردار اولاسیز، اله کی اورهیئزه تسلّی ورسئن. 9امئن و عزئز قارداش اونسئموس دا کی، سئزدندئر، اونونان دیر. اولار سئزه بورانین بوتون احوالاتینی بئلدئرهجکلر.
10من ائنن بئرلئکده زئندانی اولان اَرئسترخوس دا سئزه سالام گؤندرئر؛ هم ده بارنابانین عمئسی اوغلی سئزه سالام گؤندرئر. قاباقدان اونون بارهسئنده سئزه سئفارئش اله مئشم کی، اگر یانیزا گلسه، اونی قبول الهیئن. 11یوستوس چاغیریلان عئسا دا سئزه سالام گؤندرئر. همکارلاریم آراسیندا تارینین پادشاهلیغی ائشئنده، آنجاق بولار کی ختنه اهلئندن یعنی یهودی دئرلر، منه تسلّی ورئبلر. 12سئزدن اولان اِپِفراس کی، اؤزونی عئسا مسئحئن قوللوغونا وقف الهیئب، سئزه سالام گؤندَرئر و هر زامان دوعالاریندا سئزئن اوچون جهد الهیئر کی، سئز تارینین بوتون ائرادهسئنده کامئل یقئن ائنن، مؤحکم دایاناسیز. 13اونون حاقّیندا شهادت ورئرم کی، سئزئن اوچون و لاودئکئیه و هئیراپولئسده اولانلار اوچون چوخ قیرتلیدئر. 14عزئز حکئم لوقا و دئماس دا سئزه سالام گؤندَرئرلر. 15لاودئکئیهده اولان قارداشلارا سالام گؤندَرئن، نئمفا و اونون اِوئنده اولان کئلئسایا دا.
16بو نامه سئزئن آرازدا اوخوندوقدان سورا، لاودئکئیهلئلرئن کئلئساسیندا دا اوخونسون. سئز ده لاودئکئیهدن گلن نامهنی اوخویون.
17آرخئپوسا دیئن: «ربده سنه تاپشیریلدیغی خئدمته دئقّت اله کی، اونی باشا چاتدیراسان.»
18من پولوس بو سالامی اؤز اَلئم ائنن یازیرام. حبسده اولدوغومی یادیزدا ساخلایین. فیض سئز ائنن اولسون.
Currently Selected:
کولوسلولارا 4: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
