حوارئلرئن ائشلری 5
5
حنانئیا و سفئره
1آمّا حنانئیا آدیندا بئر کئشی آروادی سفئره ائنن بئر مولک ساتدی 2و پولون بئر قئسمئنی آروادینین ریضاسی ائنن اؤزی اوچون ساخلاییب، قالانینی گتئردی و حوارئلرئن آیاقلاری یانینا قویدی. 3آمّا پطروس ددی: «حنانئیا، نه اوچون شیطان اورهیئنی دولدوروب کی، موقدّس روحا یالان دئیهسن و مولکون پولوندان بئر قئسمئنی ساخلایاسان؟ 4مگر ساتیلمامیشدان قاباق سنئن اؤزونون دیئلدی؟ ساتیلاندان سورا دا مگر سئنئن اؤز ائختئیاریندا دیئلدی؟ نه اوچون بو ائشی اورهیئنه سالدین؟ سن ائنسانلارا یوخ، تارییا یالان دیئبسن.»
5حنانئیا بو سؤزلری اِشئدنده یره ییخیلیب، آخیر نفسئنی چکدی و بونون خبرئنی اشئدنلرئن هامیسینی بؤیوک بئر قورخی بورودی. 6جاوانلار قالخیب، اونی کفنه بوکدولر و آپاریب باسدیردیلار.
7بو حادئثهدن تقرئبن اوچ ساعات سورا، اونون آروادی دا ائچهری گئردی، آمّا اولوب-کچنلردن بئخبر ائدی. 8پطروس اونا خئطاب الهدی: «منه ده گؤروم، مولکی اله بو قئیمته ساتدیز؟»
سفئره ددی: «بلی، بو قئیمته.»
9پطروس اونا ددی: «نه اوچون راضیلاشیبسیز کی، ربّئن روحونی ائمتاحانا چکهسئز؟ باخ، ارئنی باسدیرانلارین آیاقلاری قاپیدادیر و سنی ده اشئیه داشییاجاقلار.»
10بئردن او دا پطروسون آیاقلاری آلتینا ییخیلیب، آخیر نفسئنی چکدی. جاوانلار ائچهری گئرئب اونی اؤلموش تاپدیلار و اشئیه آپاریب، ارئنئن یانیندا باسدیردیلار. 11بوتون کئلئسایا و بو حادئثهلری اشئدنلرئن هامیسینا بؤیوک بئر قورخی دوشدی.
مؤجوزهلر و عجایئبلر
12حوارئلرئن اَللری ائنن خالق آراسیندا چوخ علامتلر و مؤجوزهلر باش ورئردی و هامیسی بئرلئکده سولیمانین ایوانیندا اولوردولار. 13آمّا خالق اولارا بؤیوک حؤرمت گؤرستدئیی حالدا، هچ کس جورعت الهمئردی کی، اولار ائنان قاریشسین. 14و گتدئکجه ربّه ائمان گتئرن کئشئلر و آروادلار چوخالیب، اولارا قوشولوردولار. 15بله کی، حتّا ناخوشلاری کوچه لره گتئرئب تختلر و دؤشکلر اوستونه قویوردولار کی، پطروس کچنده، هچ اولماسا کؤلگهسی اولارین بئرئنئن اوستونه دوشسون. 16و اورشلئمئن اطرافیندا اولان شهرلردن ده خالق گلئب ناخوشلار و خبئث روحلاردان عذاب چکنلری گتئرئردئلر و اولارین هامیسی شفا تاپیردی.
زئندانا دوشمک
17آمّا لاپ بؤیوک کاهئن و یانینداکیلارین هامیسی یعنی صادوقئلر فئرقهسی قالخدیلار و پاخیلّیقدان 18حوارئلری یاخالاییب، عومومی زئندانا سالدیلار. 19آمّا ربّئن بئر ملهیی گجه اولاندا زئندانین قاپیلارینی آچدی و اولاری اشئیه چیخاردیب ددی: 20«گدئن و معبدده دوروب بو حیات بارهسئندهکی بوتون سؤزلری خالقا دیئن.»
21اولار دا بونی اشئدندن سورا، سحر چوخ تِزدن، معبده گئرئب تعلئم ورمهیه باشلادیلار.
لاپ بؤیوک کاهئن و اطرافینداکیلار، گلدئکلری واخت، سنهدرئن مجلئسی یعنی یهود شوراسینی و ائسرایئل خالقینین آغساقّاللارینی بئر یره چاغیردیلار و زئندانا آداملار گؤندَردئلر کی، حوارئلری گتئرسئنلر. 22آمّا مأمورلار، گلدئکلری واخت، اولاری زئنداندا تاپمادیلار. پس قاییدیب خبر آپاردیلار 23و ددئلر: «زئندانخانانین قاپیلارینی دئقّت ائنن قیفیللی و کشئکچئلری ده قاپیلارین یانیندا دورموش تاپدیق. آمّا قاپیلاری آچاندا ائچهرئده هچ کئمی تاپمادیق.» 24بو زامان معبدئن کشئکچئلرئنئن ریئسی و معبدئن باش کاهئنلری بو سؤزلری اشئدن زامان، اولار حاقّیندا حیران قالدیلار کی، «بو ائشئن آخیر-عاقئبتی نه اولاجاق؟»
25آمّا بئر نفر گلئب اولارا خبر وردی: «باخین، زئندانا سالدیغیز آداملار معبدده دوروب خالقا تعلئم ورئرلر.» 26او واخت موحافئظلرئن ریئسی مأمورلار ائنان گدئب اولاری گتئردی، آمّا زور ائنان یوخ، چونکی خالقدان قورخوردولار کی، اولمایا اولاری داشا باسسینلار.
27حوارئلری گتئرندن سورا، اولاری مجلئسئن ائچئنده دوردوردولار. لاپ بؤیوک کاهئن اولاردان سوروشوب، 28ددی: «بئز سئزه جئدّی امر الهدئک کی، آرتیق بو آددا تعلئم ورمهیهسئز، آمّا سئز اورشلئمی تعلئمئز ائنن دولدوروبسوز و ائستهیئرسئز کی، بو آدامین قانینی بئزئم بوینوموزا قویاسیز.»
29پطروس و حوارئلر جاواب ورئب ددئلر: «بئز گرک ائنسانلاردان یوخ، تاریدان ائطاعت الهیک. 30آتالاریمیزین تاریسی، سئزئن چارمیخدان آسیب اؤلدوردویوز عئسانی دئرئلتدی، 31و اونی ریئس و نئجات ورن آدیندا اؤز صاغینا اوجالتدی کی، ائسرایئله تؤوبه و گوناهلارین باغیشلانماسینی عطا الهسئن. 32و بئز بو شیلرئن شاهئدلرئیئک، موقدّس روح دا. او روح کی، تاری اونی، اوندان ائطاعت الهینلره ورئب.»
33اولار بونی اِشئدنده چوخ حئرصلندئلر و ائستهدئلر کی، حوارئلری اؤلدورسونلر. 34آمّا غمالایئل آدیندا بئر فرئسی کی، شرئعت موعلّئمی ائدی و بوتون خالقین طرفئندن مؤحترم ساییلیردی، مجلئسده آیاغا قالخیب امر الهدی کی، او آداملاری قیسا بئر مودّت اوچون اشئیه چیخارتسینلار. 35اوندا مجلئس اهلئنه ددی: «ای ائسرایئللیلر! بو آداملار ائنان نه الهمک ائستهدئیئز بارهده احتئیاطلی اولون. 36چونکی بوندان بئر مودّت قاباق میدانا چیخدی کی، اؤزونی بؤیوک بئر شخصئیّت ساییردی و تقرئبن دؤرد یوز نفر ده اونا قوشولدی. اؤزی اؤلدورولدی و اونا پِیرَو اولانلارین هامیسی داغیلیب، یوخ اولدولار. 37اوندان سورا خالقین ساییلما گونلرئنده، جلئللی یهودا میدانا چیخدی و بئر چوخ آدامی اؤزی ائنن آپاردی. او دا هلاک اولدی و اونا پِیرَو اولانلارین هامیسی داغیلدیلار. 38پس ائندئکی وضعئیّت بارهسئنده سئزه دیئرم؛ بو آداملاردان اَل چکئن و اولاری بوراخین. چونکی اگر بو قصد و بو عمل ائنسانلاردان اولسا، پوزولاجاق. 39آمّا اگر تاریدان اولسا، اونی پوزماغا سئزئن گوجوز چاتماز، و حتّا تاری ائنن ساواشانلارین حالینا دا دوشه بئلرسئز.»
40اولار اونون نصئحتئنه قولاق آسیب، حوارئلری ائچهری چاغیردیلار. اولاری دؤیدوروب، اولارا امر الهدئلر کی، عئسانین آدیندا آرتیق دانیشماسینلار و سورا اولاری آزاد الهدئلر.
41بله ده اولار مجلئسئن حوضوروندان چیخیب گتدئلر و سوئنئردئلر کی، عئسانین آدی اوچون تحقئر اولونماغا لایئق گؤرونموشدولر. 42و هر گون معبدده و اِودن اِوه تعلئم ورمکدن و عئسانین مسئح اولدوغونی موژده ورمکدن ال چکمهدئلر.
Currently Selected:
حوارئلرئن ائشلری 5: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
