حوارئلرئن ائشلری 4
4
پطروس و یوحنّانین توتولماسی
1پطروس و یوحنّا خالقا دانیشان واخت، کاهئنلر، معبدئن موحافئظلرئنئن ریئسی و صادوقئلر اولارین اوستونه گلدئلر. 2اولار چوخ ائنجئمئشدئلر، چونکی پطروس و یوحنّا خالقا تعلئم ورئب، عئسانین واسئطهسی ائنن اؤلولرئن دئرئلهجهیئنی اعلان الهیئردئلر. 3پس اولاری یاخالادیلار و صاباحی گونه قدر زئندانا سالدیلار؛ چونکی آرتیق آخشام چاغی ائدی. 4آمّا کلامی اِشئدنلرئن بئر چوخی ائمان گتئردئلر؛ ائمان گتئرن کئشئلرئن ساییسی تقرئبن بشمئنه چاتدی.
5او گونون صاباحی، خالقین ریئسلری، آغساقّاللاری و تؤورات موعلّئملری اورشلئمده بئر یره ییغیلدیلار؛ 6لاپ بؤیوک کاهئن حنّا، قیافا، یحیا، ائسکندر و باش کاهئنلئک نسلئندن اولانلارین هامیسی اوردا ائدئلر. 7اولار پطروس و یوحنّانی اورتادا دوردوروب سوروشدولار کی، «سئز هانسی قووّت و یا هانسی آد ائنان بونی الهیئبسئز؟»
8او زامان پطروس موقدّس روح ائنان دولوب اولارا ددی: «ای خالقین ریئسلری و آغساقّاللاری! 9اگر بئز بو گون ناخوش آداما اولونان یاخشیلیق اوچون و نجه شفا تاپدیغی بارهده ائستئنطاق اولونوروق، 10قوی سئزئن هامیزا و بوتون ائسرایئل خالقینا معلوم اولسون کی، ناصئرهلی عئسا مسئحئن آدی ائنن بو آدام صاغ-سالامات قاباغیزدا دوروب. او کی، سئز اونی چارمیخا چکدئز، آمّا تاری اونی اؤلولردن دئرئلتدی. 11عئسا او داشدیر کی، سئز بنّالار اونی ردّ الهدئز، آمّا او، بئنانین اصلی داشی اولوب. 12آیری هچ کئمده نئجات یوخدور؛ چونکی گؤیون آلتیندا ائنسانلارا ورئلمئش آیری بئر آد یوخدور کی، اونونان نئجات تاپا بئلک.»
13اولار پطروس و یوحنّانین جسارتئنی گؤردولر و اولارین بِساواد و عاوام آداملار اولدوقلارینی بئلئب، تعجّوب الهدئلر و آنلادیلار کی، اولار دا عئسا ائنن ائدئلر. 14آمّا او شفا تاپمیش آدامین اولار ائنان دوردوغونی گؤرنده جاواب ورمهیه هچ بئر سؤزلری قالمادی. 15اولارا امر الهدئلر کی، مئلّت شوراسیندان اشئیه چیخسینلار و اؤز آرالاریندا مصلحتلهشئب، 16ددئلر: «بو آداملار ائنان نه الهیک؟ چونکی اولارین آچیق-آشکار بئر علامت گؤرستدئکلری بوتون اورشلئمده یاشایانلارا بلّیدئر و بونی ائنکار الئیه بئلمهرئک. 17آمّا بو خبرئن خالق آراسیندا داها چوخ یاییلماماسینا گؤره، گلئن اولارا ائخطار ورک کی، بو آد ائنان آرتیق هچ کسه بئر سؤز دانیشماسینلار.»
18و اولاری چاغیریب امر الهدئلر کی، عئسانین آدیندا اصلا نه دانیشسینلار، نه ده تعلئم ورسئنلر. 19آمّا پطروس و یوحنّا جاواب ورئب اولارا ددئلر: «سئز اؤزوز قضاوت الهیئن؛ آیا تارینین حوضوروندا، بو، صحئحدئر کی، بئز سئزدن تاریدان داها چوخ ائطاعت الهیک؟ 20چونکی بئز اِلئیه بئلمهرئک کی، اشئتدئکلرئمئز و گؤردوکلرئمئز شیلرئن حاقّیندا دانیشمایاق.»
21اولار پطروس و یوحنّانی داها چوخ تهدئد الهیندن سورا بوراخدیلار و اولاری جزالاندیرماق اوچون بئر بهانه تاپا بئلمهدئلر چونکی بوتون خالق باش ورمئش ائشه گؤره تارییا حمد الهیئردی. 22اونا گؤره کی، شفا تاپمیش آدامین یاشی قیرخی کچمئشدی.
ائمانلیلارین دوعاسی
23پطروس و یوحنّا آزاد اولاندان سورا، اؤز یولداشلارینین یانینا گتدئلر و باش کاهئنلر و آغساقّاللارین بوتون ددئکلرئنی اولارا خبر وردئلر. 24بونی اشئدن زامان، اولار بئرلئکده اوجا سس ائنن تارینین حوضورونا دوعا الهیئب ددئلر: «هر شیه قادئر رب! گؤیی، یری، دهنزی و بوتون اولاردا اولانلاری یارادان سنسن، 25سن موقدّس روحون واسئطهسی ائنن اؤز قولون آتامیز داوود پادشاهین آغزی ائنن ددئن:
«”نه اوچون مئلّتلر قایناشیرلار
و خالقلار باطئل فئکئرلهشئرلر؟
26دونیانین پادشاهلاری قالخیرلار،
امئرلر بئربئری ائنن
ربّئن ضئدّئنه،
و اونون مسح الهدئیئنئن ضئدّئنه مصلحتلهشئرلر؟“
27دوغرودان دا سنئن موقدّس قولون عئسا مسئحئن ضئدّئنه کی، سن اونی مسح الهیئبسن، هم هئرود، هم ده پونطئیوس پئلاط، قیرییهودئلر و ائسرایئل خالقی ائنن، بو شهرده بئرلشدئلر، 28اله کی، هر نهیی کی سنئن اَلئن و سنئن هدفئن اوّلدن موقدّر الهمئشدی یرئنه یتئرسئنلر. 29و ائندی، یارب، اولارین تهدئدلرئنه باخ و اؤز قوللارینا عئنایت اله کی، سنئن سؤزونی کامئل جسارت ائنن دانیشسینلار. 30و الئنی اوزات کی، سنئن موقدّس قولون عئسانین آدینین واسئطهسی ائنن شفا، علامتلر و عجایئبلر باش ورسئن.»
31اولارین دوعاسیندان سورا، اولدوقلاری یر لرزهیه گلدی و اولارین هامیسی موقدّس روح ائنان دولوب، تارینین سؤزونی جسارت ائنن دانیشماغا باشلادیلار.
ائمانلیلار هر شیلرئنی پایلاشیرلار
32و ائمان گتئرنلرئن جمئنئن بئر اورَک و بئر روحی وار ائدی؛ هچ بئری اؤزونون اولان هچ بئر شیی اؤزونونکی بئلمئردی، چونکی هر شی اولار اوچون هامییا عایید ائدی. 33حوارئلر بؤیوک بئر قووّت ائنن رب عئسانین دئرئلمهسئنه شهادت ورئردئلر و اولارین هامیسینین اوستونده بؤیوک بئر فیض وار ائدی. 34اولارین آرالاریندا مؤحتاج بئر آدام یوخ ائدی، اونا گؤره کی، مولکلر و اِولر صاحئبی اولانلار، اولاری ساتیردیلار و ساتیلمیش شیلرئن پولونی گتئرئب 35حوارئلرئن آیاقلارینا قویوردولار؛ و هر کسه اؤز احتئیاجینا گؤره پایلانیردی. 36یوسئف ده کی، لاوی قبئلهسئندن و قئبرئسلی ائدی و حوارئلر اونی بارنابا یعنی تشوئق اوغلی چاغیریردیلار، 37مالئک اولدوغی یری ساتدی و پولونی گتئرئب حوارئلرئن آیاقلارینین یانینا قویدی.
Currently Selected:
حوارئلرئن ائشلری 4: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
