حوارئلرئن ائشلری 6
6
یدّی نفر خئدمت اوچون
1او گونلرده کی، شاگئردلر چوخالیردیلار، یونانی دانیشان یهودئلر عئبرانئلردن شئکایت الهدئلر، چونکی گوندهلئک خیراتدا اولارین دول آروادلارینا دئقّت اولونموردی. 2اونائکی حواری، بوتون شاگئردلری چاغیریب ددئلر: «بئزه یاراشماز کی، خالقا یمک ورمک اوچون تارینین کلامینی تعلئم ورمکدن ال چکک. 3ائندی ای قارداشلار، آرازدان حاقلاریندا یاخشی شهادت اولونان، موقدّس روح و حئکمت ائنن دولی، یدّی نفر سچئن کی، بئز اولاری بو ائش اوچون تعیئن الهیک. 4آمّا بئز اؤزوموزی دوعا و تارینین کلامینین خئدمتئنه وقف الئیهجهیئک.»
5بو سؤز اورایا ییغیلانلارا خوش گؤروندی. پس ائمان و موقدّس روح ائنان دولی اولان استئفانی، فئلئپوسی، پروخوروسی، نئکانوری، تئمونی، پارمِناسی و یهود دئنئنه دؤنموش اَنطاکئیهلی نئکولاسی سچدئلر. 6بو آداملاری حوارئلرئن حوضورونا گتئردئلر، حوارئلر ده دوعا الهیندن سورا، اولارین اوستونه اللرئنی قویدولار.
7پس تارینین کلامی یاییلیردی و شاگئردلرئن ساییسی اورشلئمده بؤیوک بئر شکئلده چوخالیردی. کاهئنلردن بئر چوخی دا ائمانا موطئع اولوردولار.
استئفانین توتولماسی
8استئفان، قووّت و فیض ائنن دولی ائدی و خالق آراسیندا بؤیوک مؤجوزهلر و علامتلر گؤرسدئردی. 9آمّا ’آزادلار عئبادتگاهی‘ دیئلن عئبادتگاهدان، کرِنِیلیلردن، ائسکندرئیهلیلردن، کئلئکئیادان و آسئیادان بعضئلری قالخیب استئفان ائنان بحثه گئرئشدئلر. 10آمّا اونون سؤزونده اولان حئکمت و روح ائنان موقابئله الئیه بئلمئردئلر. 11او واخت بعضی آداملاری گئزلئجه توولادیلار کی، دسئنلر: «اونون موسا پیغمبر و تارینین ضئدّئنه کوفر دانیشدیغینی اشئتمئشئک.»
12اولار خالقی، آغساقّاللاری و تؤورات موعلّئملرئنی قیزیشدیردیلار و استئفانی یاخالاییب توتدولار و مجلئسه آپاردیلار. 13و یالانچی شاهئدلر ده قاباغا چیخارتدیلار کی، ددئلر: «بو آدام بو موقدّس یرئن و شرئعتئن ضئدّئنه کوفر دانیشماقدان ال چکمئر. 14چونکی بئز اوندان اشئتدئک کی، دیئردی: ”ناصئرهلی عئسا بو یری خارابا قویاجاق و موسا پیغمبرئن بئزه وردئیی رسملری دیئشدئرهجک.“» 15مجلئسده اوتورانلارین هامیسی اونا گؤز دئکمئشدی و اونون اوزونی بئر ملک اوزی کئمی گؤروردولر.
Currently Selected:
حوارئلرئن ائشلری 6: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
