حوارئلرئن ائشلری 3
3
چولاق آدامین شفاسی
1بئر گون ناهاردان سورا ساعات اوچده کی دوعا واختی ائدی، پطروس ائنان یوحنّا بئرلئکده معبده گدئردئلر. 2بئر آنادان دوغما چولاق، معبدئن ’گؤزل دروازا‘ دیئلن دروازاسینا گتئرئلئردی. اولار اونی هر گون اورایا قویوردولار کی، معبده گئرنلردن صدقه ییغسین. 3او زامان کی، بو آدام پطروس و یوحنّانی معبده گئرمک حالیندا گؤردی، اولاردان صدقه ائستهدی. 4پطروس ائنان یوحنّا اونا دئقّت ائنن باخدیلار و پطروس ددی: «بئزه باخ!» 5آدام اولاردان بئر شی آلماق اومئدی ائنن اولارا دئقّت ائنن باخدی.
6آمّا پطروس اونا ددی: «منئم گوموش و یا قیزیلیم یوخدور، آمّا منده اولانی سنه ورئرم: ناصئرهلی عئسا مسئحئن آدیندا، قالخ و یری!» 7و اونون صاغ الئندن توتوب اونی قالخیزدی. او آندا اونون آیاقلاری و توپوقلاری قووّتلندی. 8و یردن سیچراییب آیاغا دوردی و یرئمهیه باشلادی؛ او یِرئیئب، آتیلیب-دوشوب تارییا حمد الئیه-الئیه اولار ائنان معبده گئردی. 9بوتون خالق اونی گؤردی کی، یرئیئب آتیلیر و تارییا حمد الهیئر، 10و تانیدیلار کی، بو اله او آدام دیر کی معبدئن ’گؤزل دروازاسیندا‘ صدقه ییغماق اوچون اوتوروب؛ پس اونا نه باش وردئیئنی گؤرنده، حیرت و تعجّوبدن دونوب قالدیلار.
پطروسون معبددهکی اعلانی
11او آدام پطروس و یوحنّادان اَل چکمئردی. بوتون خالق حیرت ائچئنده ’سولیمانین ایوانی‘ دیئلن یره قاچیب، اولارین اطرافینا ییغیلدیلار. 12پطروس بونی گؤرن واخت، خالقا خئطاب الهدی: «ای ائسرایئللیلر، نه اوچون بونا تعجّوب الهیئرسئز؟ و یا بئزه اله باخیرسیز کی، گویا بئز اؤز قووّت و یا دئندارلیغیمیز ائنان بو کئشئنئن یرئمهسئنه باعئث اولموشوق؟ 13ائبراهئمئن، ائسحاقین و یعقوبون تاریسی، آتالاریمیزین تاریسی، اؤز قولی عئسایا جلال وردی؛ اله او عئسا کی، سئز اونی تسلئم الهدئز و پئلاط اونون آزاد الهمهسئنه قرار وردئیی حالدا، سئز اونی پئلاطین حوضوروندا داندیز. 14سئز او موقدّس و صالح اولانی دانیب، ائستهدئز کی، بئر قاتئل سئزه باغیشلانسین. 15سئز حیات ریئسئنی اؤلدوردوز؛ آمّا تاری اونی اؤلولردن دئرئلتدی و بونون شاهئدلری بئزئک. 16عئسا آدینا اولان ائمان سایهسئنده، گؤردویوز و تانیدیغیز بو آدامی اونون آدی قووّتلندئردی؛ و عئسانین واسئطهسی ائنن گلن ائمان هامیزین حوضوروندا او آداما بو کامئل صاغلیغی وردی.
17ائندی ای قارداشلار، بئلئرم کی، سئز ده ریئسلرئز کئمی، نادانلیقدان بونی الهدئز. 18آمّا تاری کی، مسئحئن عذاب چکهجهیئنی بوتون پیغمبرلرئن آغزی ائنن قاباقجادان خبر ورمئشدی، سؤزونی بو جور یرئنه یتئردی. 19اونا گؤره تؤوبه الهیئن و تارییا ساری دؤنون کی، گوناهلاریز سئلئنسئن، اله کی، ربّئن حوضوروندان تزهلنمه زامانلاری گلسئن 20و سئزه تعیئن اولونان مسئحی، یعنی عئسانی گؤندَرسئن. 21تارینین قدئمدن بری موقدّس پیغمبرلرئنئن آغزی ائنن ددئیی کئمی، هر شیئن تزلنهجهیی واختا قدر، عئسا گرک گؤیده قالسین. 22موسا پیغمبر دمئشدی؛ ”رب تاریز، قارداشلاریزین آراسیندان سئزه منئم کئمی بئر پیغمبر یوللایاجاق؛ هر ائشده سئزه نه دسه، اونا قولاق آسارسیز. 23و اله اولاجاق کی، او پیغمبره قولاق آسمایان هر کس تارینین خالقی آراسیندان محو اولاجاق.“
24و اِله اوجور ده بوتون پیغمبرلر، سمویئل پیغمبر و اوندان سورا گلنلر، بو گونلرئن بارهسئنده خبر وردئلر. 25سئز پیغمبرلرئن و او عهدئن اوغوللاریسیز کی، تاری آتالاریمیز ائنان باغلاییب، ائبراهئم پیغمبره ددی: ”یرئن بوتون اِللری سنئن نسلئنئن واسئطهسی ائنن برکت تاپاجاقلار.“ 26تاری اؤز اوغلونی اولولردن دئرئلدئب، اوّل سئزئن یانیزا گؤندَردی کی، سئزئن هر بئرئزی شر یوللاریزدان دؤندَرمک ائنن سئزه برکت ورسئن.»
Currently Selected:
حوارئلرئن ائشلری 3: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
