۲قورئنتلیلره 3
3
1مگر اؤزوموزی گئنه تعرئف الهمهیه باشلاییریق؟ و یا بعضئلر کئمی سئزه یا دا سئزدن تؤوصئیه نامهلره احتئیاجیمیز وار؟ 2بئزئم نامهمئز سئز اؤزوزسوز کی، اورَکلرئمئزده یازیلیب و بوتون ائنسانلار طرفئندن تانینیب و اوخونوب. 3سئز گؤرسدئرسئز کی، بئزئم خئدمتئمئزئن سایهسئنده مسئحئن نامه سیسئز؛ مورکّب ائنن یازیلمیش یوخ، بلکی دئری تارینین روحی ائنن، داش لؤوحهلری اوستونده یازیلمیش یوخ، بلکی ائنسان اورهیئنئن لؤوحهلری اوستونده.
4و مسئحئن واسئطهسی ائنن بئزئم تارییا بله بئر اعتئمادیمیز وار. 5اونا گؤره یوخ کی، گویا بئزده اله بئر قابئلئیّت وار کی، بئزدن بئر شی عمله گلسئن. یوخ، بلکی بئزئم قابئلئیّتئمئز تاریداندیر. 6او بئزی تزه عهدئن قابئلئیّتلی خئدمتچئسی الهدی؛ یازیلی سؤزلره یوخ، بلکی تارینین موقدّس روحونا. چونکی یازیلی سؤزلر اؤلدورور، آمّا روح یاشادیر.
تزه عهدئن شؤوکتی
7ائندی اگر او خئدمت کی اؤلوم گتئرئردی و حرفلری داش لؤوحهلرده حکّ اولونموشدی، او قدر شؤوکت ائنن گلدی، اله کی، موسانین اوزوندهکی شؤوکت فانی اولان حالدا، ائسرایئل اوغوللاری اونون اوزونه باخا بئلمئردئلر، 8بس نجه تارینین روحونون خئدمتی اوندان داها چوخ شؤوکتلی اولمایاجاق؟! 9چونکی اگر محکومئیّت گتئرن خئدمتئن شؤوکتی وار، صالحلئک گتئرن خئدمتئن داها چوخ شؤوکتی اولاجاق. 10اونا گؤره کی، او شیی کی بئر زامان شؤوکتی وار ائدی، شؤوکتده اونی قاباغلایان شیئن یانیندا شؤوکتی اولماز. 11چونکی اگر او فانی اولان، شؤوکت ائنن دئر، نهقدر چوخ باقی اولان شؤوکت ائنن اولاجاق.
12بونا گؤره بله بئر اومئدئمئز اولاندا، بؤیوک جسارت ائنن دانیشیریق. 13بئز موسا کئمی دیئلئک؛ او، اوزونه اؤرتوک چکدی کی، ائسرایئل اوغوللاری کچئب-گدن شؤوکتئن آخیرینی گؤرمهسئنلر. 14آمّا اولارین ذهئنلری کور اولوب، چونکی بو گونه کئمی قدئم عهد اوخوناندا همن اؤرتوک گؤتورولمهمئش قالیر. چونکی بو اؤرتوک مسئحده گؤتورولور. 15حتّا بو گونه کئمی بله، موسانین یازیلاری اوخونان زامان، اولارین اورَکلری اوستونه بئر اؤرتوک چکئلئر. 16آمّا نه زامان کی، بئری ربّه دؤنور، بو اؤرتوک آرادان گؤتورولور. 17رب موقدّس روحدور؛ ربّئن روحی هاردا اولسا، آزادلیق دا اوردادیر. 18آمّا بئز هامیمیز، آچیق اوز ائنن ربّئن شؤوکتئنه آینایا باخان کئمی باخیریق و شؤوکتدن شؤوکته کچئب، اِله او شکئله ده تبدئل اولونوروق. بو دا ربدندئر کی، موقدّس روحدور.
Currently Selected:
۲قورئنتلیلره 3: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
