۲قورئنتلیلره 12
12
پولوسون رؤیاسی
1فخر الهمک فایدالی اولماسا دا، لازیمدیر؛ آمّا من ائندی ربدن گلن رؤیالار و وحیلردن دانیشاجاغام. 2مسئحه عایید اولان بئر آدامی تانیییرام کی، اون دؤرد ائل بوندان قاباق-بئلمئرم بدنده یا دا بدندن خارئج، تاری بئلئر-اوچونجی گؤیه آپاریلدی. 3و بئلئرم کی، نجه بو آدام-بئلمئرم بدنده یا دا بدندن خارئج، تاری بئلئر - 4جنّته آپاریلدی و دمهملی سؤزلر اشئتدی کی، اولاردان دانیشماق ائنسانا قدغندئر. 5بله بئر آدامین حاقّیندا فخر الئیه بئلرم؛ آمّا اؤزوم حاقّیندا ضعئفلئکلرئمدن باشقا هچ بئر شیه فخر الئیه بئلمهرم. 6اگر من فخر الهمک ائستهسم ده، عاغیلسیز اولمارام؛ چونکی حقئقتی دمئش اولارام. آمّا احتئیاط الهیئرم کی، اولمایا بئر کس منئم بارهمده، منده گؤردویوندن و مندن اشئتدئکلرئندن آرتیق دوشونسون.
7جئسمئمه ده بئر تئکان سانجیلیب کی، وحیلرئن چوخ بؤیوک اولماسیندان کئبئرلَنمهیئم؛ بئر شیطان ملهیی، اله کی منه عذاب ورئب قویماسین کی، من اؤزومی بؤیوکلندئرئم. 8بو بارهده اوچ دفه ربّه یالواردیم کی، اونی مندن گؤتورسون. 9و رب منه ددی: «منئم فیضئم سنه بسدئر، چونکی منئم قودرتئم ضعئفلئکده کامئللَشئر.» بونا گؤره، داها چوخ اؤز ضعئفلئکلرئمده فخر الئیهجهیم کی، مسئحئن قودرتی منده ساکئن اولسون. 10بو سببدن ده مسئحئن خاطئری اوچون ضعئفلئکلره، تحقئرلره، احتئیاجلارا، عذابلارا و چتئنلئکلره راضییام، چونکی ضعئف اولدوغوم زامان، قووّتلییَم.
پولوسون قورئنتلی لر اوچون نئگارانلیغی
11من عاغیلسیز اولموشام! سئز منی بونا مجبور الهدئز. اصلئنده سئز گرک منی تعرئفلهیئردئز، چونکی بؤیوک ساییلان حوارئلردن هچ بئر شیده اسکئک دیئلدئم، حتّا اگر هچ ساییلسام دا. 12دوغری بئر حوارئنئن علامتلری سئزئن آرازدا بوتون صبر ائنن، علامتلر، عجایئبلر و مؤجوزهلر واسئطهسی ائنن ظاهئر اولدی. 13من اؤزومی سئزه بئر یوک اله مهدئم، بوندان باشقا مگر سئز ائنن اله بئر رفتار اولدی کی، گویا او بئری کئلئسالاردان آشاغیسیز؟ بو سهوئم اوچون منی باغیشلایین!
14ائندی بو اوچونجی دفهدئر کی، سئزئن یانیزا گلمهیه حاضیرام و سئزه یوک اولمایاجاغام. چونکی سئزئن مالیزی یوخ، بلکی اؤزوزی آختاریرام. چونکی اوشاقلار والئدینلر اوچون یوخ، بلکی والئدینلر اوشاقلار اوچون مال-مولک ییغمالیدیرلار. 15چوخ دا شادلیق ائنان سئزئن جانیز اوچون خرجلهیئب، خرج اولوناجاغام. اگر من سئزی چوخ سوئرم، گرک سئزئن طرفئزدن آز سوئلم؟!
16آمّا حتّا اگر قبول الئیه سئز کی من اؤزومی سئزه یوک اله مهدئم، حتمن دیئرسئز کی کلکباز بئر آدام اولدوغوم اوچون سئزی حئیله ائنن اَله گتئرمئشم. 17مگر سئزئن یانیزا گؤندَردئیئملرئن واسئطهسی ائنن سئزدن اؤز منفعتئم اوچون بئر ائستئفاده الهدئم؟ 18تئطوسا یالواردیم، اونونان بئر قارداش دا گؤندَردئم. مگر تئطوس اؤز منفعتی اوچون سئزدن هچ بئر ائستئفاده الهدی؟! مگر بئز همن روحدا، همن قدملرده رفتار الهمهدئک؟!
19بوتون بو زامان، آیا بونی دوشونورموشسوز کی، بئز سئزئن قاباغیزدا اؤزوموزدن دئفاع الهیئرئک؟ بئز تارینین گؤزی قاباغیندا مسئحه عایید اولان آداملار کئمی دانیشیریق و بوتون بولار، ای عزئزلر، سئزی بئنا الهمک اوچوندور. 20چونکی قورخورام کی، یانیزا گلدئیئم واخت، سئزی ائستهدئیئم کئمی گؤرمه یم و سئز ده منی ائستهدئیئز کئمی گؤرمه یه سئز. قورخورام کی، آرازدا داعوالار، پاخیلّیق، غضب، چکئشمه، ائفتئرالار، قیبت، کئبئر و فئتنهلر گؤرم. 21قورخورام کی، گلدئیئم واخت، تاریم منی سئزئن قاباغیزدا اوتاندیرسین و او آداملار اوچون یاس توتوم کی، کچمئشده گوناها باتیب و الهدئکلری ناپاکلیق، زئنا و شهوتدن تؤوبه اله مهیئبلر.
Currently Selected:
۲قورئنتلیلره 12: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
