۲قورئنتلیلره 11
11
پولوس و یالانچی حوارئلر
1کاشکی بئر آز عاغیلسیزلیقدا منه دؤزسیدئز، آمّا دوغرودان دا منه دؤزورسوز! 2چونکی سئزئن حاقّیزدا تارینین قیرتی ائنن قیرتلییَم. چونکی سئزی تک بئر اَره، یعنی مسئحه آداخلی اله دئم، اله کی سئزی مسئحه پاک بئر باکئره قیز کئمی تقدئم الهیئم. 3آمّا قورخورام کی، نجه ائلان حوّانی اؤز حؤقّهبازلیغی ائنن آلداتدی، سئزئن ده فئکئرلرئز مسئحده اولان صافلیق و پاکلیقدان اوزاق دوشسون. 4چونکی اگر بئری گلئب، بئزئم اعلان الهمهدئیئمئز بئر عئسانی اعلان الهیئر و یا آلدیغیز روحدان باشقا بئر روحی آلیرسیز، و یا قبول اله دئیئز ائنجئلدن آیری بئر ائنجئلی قبول الهیئرسئز، بونا راضیلیق ائنان دؤزورسوز. 5آمّا گومان اله مئرم کی هچ شیده منئم او بؤیوک حوارئلردن اَسکئیئم اولا. 6حتّا اگر نوطقده مهارتسئز اولسام دا، معرئفتده الهدیئلم؛ آمّا هر حالدا بئز بونی هر شیده سئزه آشکار الهدئک.
7و یا مگر گوناه الهدئم کی، سئزی اوجالتماق اوچون اؤزومی آلچالتدیم، چونکی تارینین ائنجئلئنی سئزه موفته اعلان الهدئم؟ 8سئزه خئدمت الهمک اوچون آیری کئلئسالاری سویوب، اولاردان موزد آلدیم. 9و یانیزدا اولان زامان احتئیاجدا اولاندا دا هچ کسه یوک اولمادیم. چونکی قارداشلار مقدونئیّه منطقه سئندن گلنده احتئیاجیمی تامامن رفع الهدئلر. و هر شیده اؤزومی ساخلادیم کی، اولمایا کی سئزه بئر یوک اولوم و بله الهمهیه ده داوام ورهجهیم. 10مسئحئن منده اولان حقئقتئنه آند اولسون، اَخایئه منطقهلرئنده هچ کس منی بو ائفتئخاریمدان محروم اله مئیهجک. 11نه اوچون؟ سئزی سِومهدئیئمه گؤره؟ تاری بئلئر کی سئزی سِوئرم! 12آمّا الهدئیئمه داوام ورهجهیم کی، فخر الهدئکلری خوصوصدا بئز ائنن برابر ساییلماق اوچون فورصت آختارانلارا فورصت ورمهیئم.
13چونکی بله آداملار، یالانچی حوارئلر و حؤقّهباز ائشچئلردئرلر کی، اؤزلرئنی مسئحئن حوارئلرئنه اوخشادیرلار. 14بو دا تعجّوبلی دیئل؛ چونکی شیطان دا اؤزونی بئر نور ملهیئنه اوخشادیر. 15اونون اوچون ده تعجّوبلی دیئل کی، اونا خئدمت الهینلر اؤزلرئنی صالحلئک خئدمتکارلارینا اوخشاتسینلار. اولارین آخیری عمللرئنه گؤره اولاجاق.
پولوسون فخر الهمهسی
16گئنه دیئرم؛ هچ کس گومان اله مهسئن کی، من عاغیلسیزام. آمّا اگر بلهدئرسه ده، منی آغیلسیز کئمی قبول الهیئن کی، من ده بئر آز فخر الهیئم. 17اوندا کی بله ائطمئنان ائنان اؤز فخرئمدن دیئرم، ربّئن دئیهجهیی کئمی دیئل، بلکی آغیلسیز بئری کئمی دیئرم. 18ائندی کی، بئر چوخلاری جئسمه گؤره فخر الهیئر، من ده فخر الئیهجهیم. 19چونکی سئز عاغیلّی اولدوغوز حالدا، عاغیلسیزلارا شادلیق ائنان دؤزورسوز. 20چونکی اگر بئر کس سئزی قول الهسه، مالیزی یِسه، اؤز منفعتی اوچون سئزدن ائستئفاده الهسه، اؤزونی بؤیوکلندئرسه، اوزووزه وورسا، اونا دؤزورسوز. 21بونی خجالت ائنن دمهلئیم کی، بئز ضعئف عمل اله مئشئک!
آمّا اگر بئر کس جورعت الهیئب بئر شِیه فخر الهسه - عاغیلسیز کئمی دانیشیرام - من اؤزوم ده جورعت الهیئب اونا فخر الئیهجهیم. 22آیا اولار عئبرانیدئرلر؟ من ده عئبرانییَم. ائسرایئللیدئرلر؟ من ده ائسرایئللییَم. ائبراهئم پیغمبرئن نسلئندندئرلر؟ من ده. 23مسئحئن خئدمتچئلریدئرلر؟ دلی بئر آدام کئمی دانیشیرام، من اولاردان داها چوخ؛ لاپ چوخ زحمت چکمئشم، لاپ چوخ زئندانلاردا اولموشام، ساییسیز-حسابسیز دؤیولموشم، چوخ واخت دا اؤلوم خطرئنه دوشموشم. 24بش دفه یهودئلردن قیرخدان بئر اَسکئک شالّاق یمئشم. 25اوچ دفه ال آغاجی ائنن وورولموشام، بئر دفه داشا باسیلمیشام، اوچ دفه گمئم سینیب؛ بئر گجه-بئر گوندوز درئن دهنزده کچئرتمئشم. 26چوخ دفه سفرلرده چایلارین خطرلرئنده، اوغرولارین خطرلرئنده، هموطنلرئمئن خطرلرئنده، قیرییهودئلرئن خطرلرئنده، شهرئن خطرلرئنده، چؤلون خطرلرئنده، دهنزئن خطرلرئنده، یالانچی قارداشلارین خطرلرئنده، 27زحمت و مشقّتده، چوخ واخت یوخوسوز، آجلیق و سوسوزلوقدا، چوخ واخت یمکسئز، سویوقلوق و لوتلوکده قالمیشام. 28بو شیلردن باشقا، هر گون منی ازن، او فئکئردئر کی، بوتون کئلئسالار اوچون چکئرم. 29کئم ضعئف اولور و من ضعئف اولمورام؟ کئم گوناها دوشور و من ائچئمده یانمیرام؟!
30اگر لازیم اولسا فخر اله یم، ضعئفلئیئمی گؤرسهدن شیلره فخر الئیه جهیم. 31رب عئسانین آتاسی، او ابدی موتبارک تاری بئلئر کی، یالان دمئرم. 32دَمَشقده آرتاس پادشاهین والئسی، دَمَشقلیلرئن شهرئنی گودوردی کی، منی یاخالاسین. 33آمّا من بئر سبد ائچئنده شهرئن دووارینداکی بئر پنجرهدن اِندئرئلئب، اونون الئندن قاچدیم.
Currently Selected:
۲قورئنتلیلره 11: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
