Psalms 91
91
1အမြင့်ဆုံးသော အရှင်၏ကွယ်ကာရာအရပ်၌ နေသောသူသည် အနန္တတန်ခိုးရှင်၏ အရိပ်ကို ခိုရလိမ့်မည်။ 2“ငါခိုလှုံရာ၊ ငါ၏ရဲတိုက်၊ ငါယုံကြည်ကိုးစားသော ငါ၏ဘုရားရှင်” ဟု ဘုရားရှင်နှင့်ပတ်သက်၍ ငါဆို၏။ 3အမှန်စင်စစ် အရှင်သည် ငှက်မုဆိုး၏ကျော့ကွင်းမှလည်းကောင်း၊ သေစေတတ်သော ကပ်ရောဂါဘေးမှလည်းကောင်း သင့်ကိုကယ်နုတ်တော်မူလိမ့်မည်။ 4အရှင်သည် မိမိ၏အတောင်တောအမွေးဖြင့် သင့်ကိုအုပ်မိုးတော်မူလိမ့်မည်။ သင်သည်လည်း အရှင်၏အတောင်တော်အောက်၌ ခိုလှုံရလိမ့်မည်။ အရှင်၏သစ္စာတော်သည် ဒိုင်းကာနှင့် ဒိုင်းလွှားဖြစ်၏။ 5သင်သည် ညအချိန်၌ဖြစ်တတ်သော ကြောက်မက်ဖွယ်ဘေးကိုလည်းကောင်း၊ နေ့အချိန်၌ လွင့်ပျံသောမြားကိုလည်းကောင်း၊ 6မှောင်ကြီးမည်းကြီးထဲ၌လှည့်လည်တတ်သော ကပ်ရောဂါကိုလည်းကောင်း၊ မွန်းတည့်ချိန်၌ ဖျက်ဆီးတတ်သော ဘေးဥပဒ်ကိုလည်းကောင်း ကြောက်ရွံ့ရလိမ့်မည်မဟုတ်။ 7သင်၏အနီးတွင် လူတစ်ထောင်၊ သင်၏လက်ယာဘက်တွင် လူတစ်သောင်းလဲကျသော်လည်းထိုဘေးတို့သည် သင့်ထံသို့ ရောက်လာမည်မဟုတ်။ 8သင်သည် ဆိုးယုတ်သော သူတို့အပေါ် ကျရောက်ပြစ်ဒဏ်ကို သင့်မျက်စိဖြင့်ကြည့်၍ မြင်ရုံမျှသာဖြစ်လိမ့်မည်။ 9“ဘုရားရှင်သည် ငါ၏ခိုလှုံရာဖြစ်တော်မူ၏” ဟု သင်သည်ဆိုလျက် အမြင့်ဆုံးသောအရှင်ကို သင်၏မှီခိုရာဖြစ်သောကြောင့် 10ဘေးအန္တရာယ်သည် သင့်အပေါ်သို့ကျရောက်မည်မဟုတ်။ ဘေးဒဏသည်လည်း သင်၏တဲအနီးသို့ ချဉ်းကပ်မည်မဟုတ်။ 11အကြောင်းမူကား သင်၏လမ်းခရီးရှိသမျှတို့၌ သင့်တို့စောင့်ရှောက်စေရန် အရှင်သည် မိမိ၏နတ်ဒေဝါတို့ကို သင့်အဖို့မိန့်မှာတော်မူမည်ဖြစ်၍ 12သင်၏ခြေကိုကျောက်နှင့်မထိမခိုက်စေရန် သူတို့သည် သင့်ကိုလက်ဖြင့်ချီပင့်ကြလိမ့်မည်။ 13သင်သည် ခြင်္သေ့နှင့်မြွေဟောက်အပေါ်နင်းသွား၍ ခြင်္သေ့ပျိုနှင့် မြွေနဂါကိုနင်းချေလိမ့်မည်။ 14“သူသည် ငါ့ကိုချစ်သောကြောင့် ငါသည် သူ့ကိုကယ်တင်မည်။ ငါ၏နာမကို သိသောကြောင့် သူ့ကို လုံခြုံစွာစောင့်ရှောက်မည်။ 15သူသည် ငါ့ကို ခေါ်သောအခါ သူ့ကိုငါထူးမည်။ ဆင်းရဲဒုက္ခရောက်သောအခါ သူနှင့်အတူငါရှိမည်။ ငါသည် သူ့ကိုကယ်မ၍ သူ့ကိုဂုဏ်ပြုမည်။ 16ရှည်သောအသက်ဖြင့် သူ့ကို ပြည့်စုံကြွယ်ဝစေ၍ ငါ၏ကယ်တင်ခြင်းကို သူ့အားပြမည်” ဟုမိန့်တော်မူ၏။
Currently Selected:
Psalms 91: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
