Psalms 90
90
1အို ဘုရားရှင်၊ အရှင်သည် မျိုးဆက်အစဉ်အဆက် ကျွန်ုပ်တို့၏မှီခိုရာဖြစ်တော်မူ၏။ 2တောင်များမဖြစ်ပေါ်မီ မြေကြီးနှင့် ကမ္ဘာလောကကို အရှင်ဖြစ်ပွားစေတော် မမူမီ ထာဝရကာလမှ ထာဝရကာလတိုင်အောင် အရှင်သည် ဘုရားရှင်ဖြစ်တော်မူ၏။ 3အရှင်က “အချင်းလူသားတို့၊ ပြန်သွားကြလော့” ဟုမိန့်တော်မူလျက် လူကို မြေမှုန့်သို့ပြန်သွားစေတော်မူ၏။ 4အကြောင်းမူကား အရှင်၏ရှေ့မှောက်တွင် အနှစ်တစ်ထောင်သည် ကုန်လွန်ပြီးသော ယမန်နေ့ကဲ့သို့လည်းကောင်း၊ ညဉ့်ယံတစ်ယံကဲ့သို့လည်းကောင်း ဖြစ်ပါ၏။ 5အရှင်သည် လူတို့ကို လွှမ်းမိုးတိုက်သွားတော်မူ၍ သူတို့သည် အိပ်ပျော်သွားကြရပါ၏။ လူသည် နံနက်အချိန်တွင် ကြီးထွားလာသည့် မြက်ပင်ကဲ့သို့ဖြစ်ပါ၏။ 6မြက်ပင်သည် နံနက်အချိန်တွင် ရှင်သန်ကြီးထွားလာသော်လည်း နေဝင်ချိန်၌ ညှိုး၍ခြောက်သွေ့သွားပါ၏။ 7အမှန်စင်စစ် ကျွန်ုပ်တို့သည် အရှင်၏အမျက်တော်ကြောင့် ပျက်စီးကြရပါ၏။ အရှင်၏အမျက်ဒေါသကြောင့် ထိတ်လန့်ခြင်းရှိကြပါ၏။ 8အရှင်သည် ကျွန်ုပ်တို့၏ ဒုစရိုက်များကို ရှေ့တော်၌လည်းကောင်း၊ ကျွန်ုပ်တို့ဝှက်ထားသောအပြစ်များကို မျက်နှာတော်၏အလင်း၌လည်းကောင်း ချထားတော်မူ၏။ 9အကြောင်းမူကား ကျွန်ုပ်တို့၏နေ့ရက်အားလုံးသည် အရှင်၏အမျက်တော်အောက်၌ ကုန်လွန်သွားကြပါ၏။ ကျွန်ုပ်တို့၏နှစ်ကာလတို့သည် သက်ပြင်းတစ်ချက်အချမှာပင် ကုန်ဆုံးသွားပါ၏။ 10ကျွန်ုပ်တို့၏အသက်တာနှစ်ကာလသည် ခုနစ်ဆယ်ဖြစ်ပါ၏။ ကျန်းမာသန်စွမ်းလျှင် အနှစ်ရှစ်ဆယ်ဖြစ်နိုင်ပါ၏။ သို့သော် ထိုနှစ်ကာလတို့၏ အကောင်းဆုံးအချိန်မှာပင် အခက်အခဲပြဿနာနှင့် ဆင်းရဲဒုက္ခမျှသာ ဖြစ်ပါ၏။ အမှန်စင်စစ် အချိန်တို့သည် လျင်မြန်စွာ ကုန်လွန်၍ ကျွန်ုပ်တို့သည် အဝေးသို့ ပျံသန်းသွားကြပါ၏။ 11အရှင်အမျက်တော်တန်ခိုးကိုလည်းကောင်း၊ အမျက်ထွက်သည့်ပမာဏနှင့်အညီ ကြောက်ရွံ့ရကြောင်းကို လည်းကောင်း မည်သူသိနိုင်ပါသနည်း။ 12ကျွန်ုပ်တို့သည် ဉာဏ်ပညာနှင့်ပြည့်စုံသော စိတ်နှလုံးရှိလာမည့်အကြောင်း ကျွန်ုပ်တို့၏နေ့ရက်များကို မှန်ကန်စွာ ရေတွက်နိုင်ရန် သွန်သင်တော်မူပါ။ 13အို ဘုရားရှင်၊ ပြန်ကြွလာတော်မူပါ။ မည်မျှကြာပါမည်နည်း။ အရှင်အစေခံအပေါ် သနားကရုဏာထားတော်မူပါ။ 14နံနက်အချိန်၌ အရှင်၏မေတ္တာကရုဏာတော်အားဖြင့် ကျွန်ုပ်တို့ကို ပြည့်စုံကြွယ်ဝစေတော်မူပါ။ သို့ပြုလျှင် ကျွန်ုပ်တို့သည် ကျွန်ုပ်တို့၏ အသက်တာ တစ်လျှောက်လုံး ရွှင်လနးစွာသီချင်းဆို၍ဝမ်းမြောက်ရပါလိမ့်မည်။ 15ကျွန်ုပ်တို့ကို နှိမ့်ချတော်မူခဲ့သည့် နေ့ရက်များ ကျွန်ုပ်တို့ ဒုက္ခနှင့်ကြုံတွေ့ခဲ့ရသည့် နှစ်ကာလများနှင့် အမျှ ကျွန်ုပ်တို့ကို ဝမ်းမြောက်စေတော်မူပါ။ 16အရှင်၏ လုပ်ဆောင်တော်မူချက်သည် အရှင်၏အစေခံတို့ထံ၌ လည်းကောင်း၊ အရှင်၏ဘုန်းအာနုဘော်သူတို့၏ သားသမီးတို့ထံ၌လည်းကောင်း ထင်ရှားပါစေသော။ 17ကျွန်ုပ်၏အရှင်ဖြစ်တော်မူသည့် ဘုရားရှင်၏ကျေးဇူးပြုတော်မူခြင်းသည် ကျွန်ုပ်တို့အပေါ်သက်ရောက်ပါစေသော။ ကျွန်ုပ်တို့၏လက်ဖြင့်ပြုသောအမှုတို့ကို ကျွန်ုပ်တို့အတွက် မြဲမြံစေတော်မူပါ။ ဟုတ်ပါ၏။ ကျွန်ုပ်တို့၏လက်ဖြင့် ပြုသောအမှုတို့ကို မြဲမြံစေတော်မူပါ။
Currently Selected:
Psalms 90: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
