Philemon 1
1
1၁ခရစ်တော်၏မင်္ဂလာသတင်းကောင်းကို ဟောပြောသောကြောင့် အကျဉ်းသားဖြစ်ရသူကျွန်ုပ်ပေါလုနှင့် ကျွန်ုပ်၏ညီတိမောသေမှ ချစ်လှစွာသောဖိလေမုန်ထံသို့စာရေးလိုက်ပါသည်။ 2ဤစာသည် ကျွန်ုပ်တို့၏ချစ်ခင်ရသောညီမ အပ္ပိနှင့် ချစ်ခင်ရပါသောရဲဘော်ရဲဘက်အာခိပ္ပုအတွက်လည်း ဖြစ်၏။ သင်၏အိမ်၌ စုဝေးသော အသင်းတော်တို့အတွက်လည်းဖြစ်၏။ 3ကျွန်ုပ်တို့၏အဖဘုရားရှင်နှင့် အရှင်ဖြစ်သောကိုယ်တော်ယေရှုခရစ်တော်ထံတော်မှ ငြိမ်ချမ်းခြင်းအပေါင်းနှင့် ကောင်းကျိုးချမ်းသာမင်္ဂလာအဖြာဖြာတို့သည် သင်တို့အားလုံးအပေါ် သက်ရောက်ပါစေ။ 4ကျွန်ုပ်သည် သင့်အတွက် သတိတရဆုတောင်းသည့်အခါတိုင်းတွင် ကျွန်ုပ်၏ဘုရားရှင်အား အစဥ်အမြဲကျေးဇူးတင်၏။ 5အဘယ်ကြောင့်ဆိုသော် သင်သည် သူ၏မြင့်မြတ်သောလူများအားလုံးအပေါ်၌ထားရှိသော သင်၏မေတ္တာတရားနှင့် အရှင်ဖြစ်သောကိုယ်တော်ယေရှုအပေါ်ထားရှိသော ယုံကြည်ချက်အကြောင်း ကျွန်ုပ်ကြားသိရသောကြောင့်ဖြစ်သည်။ 6ခရစ်တော်၏အကျိုးအတွက် ကျွန်ုပ်တို့မျှဝေပိုင်ဆိုင်သော ကောင်းမွန်သောအရာအလုံးစုံအား သင်တို့နားလည်နိုင်စေရန်နှင့် ယုံကြည်ခြင်းအားဖြင့် သင်နှင့် ကျွန်ုပ်တို့၏မိတ်သဟာယဖွဲ့ခြင်းသည် လေးနက်၍ထိရောက်မှုရှိစေရန် ကျွန်ုပ်ဆုတောင်းပါ၏။ 7ကျွန်ုပ်ညီ၊ သင်သည် အရှင်၏လူအပေါင်းတို့၏စိတ်နှလုံးများအား လန်းဆန်းစေသောကြောင့် သင်၏ချစ်ခြင်းမေတ္တာသည် ကျွန်ုပ်အား အလွန်ရွှင်လန်းဝမ်းမြောက်စေ၍ စိတ်ခွန်အားများဖြစ်ပေါ်စေပါသည်။ 8ထို့ကြောင့် ခရစ်တော်အားဖြင့် ကျွန်ုပ်သည် သင်မည်သည်အား လုပ်ဆောင်ရမည်ကို ရဲဝံ့စွာအမိန့်ပေးနိုင်သော်လည်း၊ 9ချစ်ခြင်းမေတ္တာအားဖြင့်သာ သင့်အား တောင်းပန်လိုပါ၏။ အသက်ကြီးသောသူတစ်ယောက်ဖြစ်ပြီး ယခုတွင် ယေရှုခရစ်တော်ကြောင့် အကျဥ်းသားတစ်ဦးဖြစ်နေသော ကျွန်ုပ်ပေါလုသည် 10အကျဉ်းချခံနေရစဉ်တွင် ကျွန်ုပ်၏သားဖြစ်လာသော ဩနေသိမ်အတွက်လည်း သင့်အား ကျွန်ုပ်တောင်းပန်လို၏။ 11သူသည် ယခင်က သင့်အတွက် အသုံးမဝင်သူဖြစ်သော်လည်း၊ ယခုအခါတွင် သူသည် သင်နှင့် ကျွန်ုပ်နှစ်ဦးစလုံးအတွက် အသုံးဝင်သူဖြစ်လာပါသည်။ 12ကျွန်ုပ်အလေးအနက်ချစ်ခင်ရသောသူ့အား သင့်ထံသို့ ပြန်ပို့လိုက်ပါသည်။ 13ကျွန်ုပ်သည် မင်္ဂလာသတင်းကောင်းအား ဟောပြောသည့်အတွက် အကျဥ်းချခံနေရစဥ်တွင် သင့်ကိုယ်စား ကျွန်ုပ်အားကူညီရန်အတွက် သူ့အား ဤနေရာ၌ ခေါ်ထားလို၏။ 14သို့သော် သင်၏သဘောဆန္ဒမပါဘဲ မည်သည့်အရာကိုမျှ ကျွန်ုပ်မပြုလုပ်လိုပါ။ သို့မှသာ သင်ပေးသောအကူအညီသည် အတင်းအကျပ်ခိုင်းစေသောကြောင့် ကူညီရခြင်းမျိုးမဟုတ်ဘဲ သင်၏ဆန္ဒအရကူညီခြင်းမျိုးသာ ဖြစ်လိမ့်မည်ဖြစ်သည်။ 15သူသည် သင်နှင့်ခဏတာခွဲခွာရခြင်းအကြောင်းမှာ သင်သည်သူ့အား အစဥ်အမြဲပိုင်ဆိုင်နိုင်ရန် ဖြစ်ကောင်းဖြစ်လိမ့်မည်။ 16အစေခံတစ်ယောက်အနေဖြင့် မဟုတ်ဘဲ အစေခံထက်ပို၍သာသော အလွန်ချစ်ခင်ရသောညီအစ်ကိုတစ်ယောက်ကဲ့သို့ဖြစ်သည်။ သူသည် ကျွန်ုပ်အတွက် အလွန်ချစ်ခင်ရသောသူဖြစ်သော်လည်း သင့်အတွက်မှာမူ နောက်လိုက်ကဲ့သို့လည်းကောင်း၊ အရှင့်အားယုံကြည်သောညီအကိုတစ်ဦးကဲ့သို့လည်းကောင်း ပို၍ချစ်ခင်ရသောသူဖြစ်လိမ့်မည်။ 17ထို့ကြောင့် သင်သည် ကျွန်ုပ်အား လုပ်ဖော်ကိုင်ဖက်တစ်ဦးအဖြစ် သတ်မှတ်လျှင် ကျွန်ုပ်အား ကြိုဆိုလက်ခံသကဲ့သို့ သူ့ကိုလည်း ကြိုဆိုလက်ခံပါ။ 18အကယ်၍သူက သင့်အားတစ်စုံတစ်ရာပြစ်မှားခဲ့လျှင်သော်လည်းကောင်း (သို့)ပေးဆပ်စရာ အကြွေးတစ်စုံတစ်ရာရှိခဲ့လျှင် ကျွန်ုပ်တာဝန်ယူပါ၏။ 19သင်၏အကြွေးကိုဆပ်ရမည်ဟု ပြောစရာမလိုဘဲ ကျွန်ုပ်၊ ပေါလုကိုယ်တိုင်ပေးဆပ်ပါမည်ဟု ကျွန်ုပ်၏လက်ဖြင့်ကိုယ်တိုင်ရေးထိုး၍ဝန်ခံပါ၏။ 20ငါ့ညီ၊ အရှင်အားထောက်၍ သင့်ထံမှ အကျိုးကျေးဇူးကို ကျွန်ုပ်ရရှိလိုပါ၏။ ခရစ်တော်အားဖြင့် ငါ့၏စိတ်နှလုံးအား လန်းဆန်းစေပါလော့။ 21သင်သည် ကျွန်ုပ်တောင်းဆိုသည်ကို ဆောင်ရွက်ပေးမည်ဟု ကျွန်ုပ်ယုံကြည်စိတ်ချပါသည်။ ကျွန်ုပ်တောင်းဆိုထားသမျှထက်ပို၍ပင် ဆောင်ရွက်ပေးမည်ဆိုသည်ကိုလည်း ကျွန်ုပ်သိသောကြောင့် သင့်ထံ ကျွန်ုပ်စာရေးလိုက်ပါ၏။ 22တစ်ချိန်တည်းမှာပင် ကျွန်ုပ်တည်းခိုရန်အတွက် အခန်းတစ်ခန်းအဆင်သင့်ပြင်ထားပေးပါဟု မေတ္တာရပ်ခံလိုပါသည်။ အဘယ်ကြောင့်ဆိုသော် သင်တို့ဆုတောင်းသည့်အတိုင်း ငါသည်သင်တို့ထံပြန်လည်ရောက်ရှိလာလိမ့်မည်ဟု ကျွန်ုပ်မျှော်လင့်သောကြောင့်ပင်ဖြစ်သည်။ 23ယေရှုခရစ်တော်အတွက်ကြောင့် ကျွန်ုပ်နှင့်အတူ အကျဉ်းသားဖြစ်နေသူဧပဖြကလည်း သင့်အား နှုတ်ခွန်းဆက်သလိုက်ပါသည်။ 24ကျွန်ုပ်၏လုပ်ဖော်ကိုင်ဖက်များဖြစ်ကြသော မာကု၊ အာရိတ္တာခု၊ ဒေမနှင့် လုကာတို့သည်လည်း သင့်အား နှုတ်ခွန်းဆက်သလိုက်ပါသည်။ 25အရှင်ယေရှုခရစ်တော်၏ ကျေးဇူးတော်သည် သင်တို့၏စိတ်ဝိညာဥ်နှင့်အတူ ရှိပါစေသတည်း။
Currently Selected:
Philemon 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
