Titus 3
3
1အုပ်ချုပ်သူများနှင့် အာဏာပိုင်များကို နာခံကြရန် လူတို့အား သတိပေးလော့။ ထိုသူတို့၏စကားကို နာခံ၍ ကောင်းသောအရာအမျိုးမျိုးကို ပြုနိုင်ရန် အဆင်သင့်ဖြစ်နေရမည်။ 2သူတို့သည် မည်သူ့ကိုမျှ ကုန်းချောစကားမပြောဘဲ ငြိမ်းချမ်းစွာနေထိုင်၍ လူတိုင်းအပေါ် ထောက်ထားညှာတာသော စိတ်နှင့် နူးညံ့သိမ်မွေ့စွာ ဆက်ဆံရမည်။ 3တစ်ချိန်က ကျွန်ုပ်တို့သည်လည်း မိုက်မဲသူ၊ မနာခံသူ၊ လှည့်စားသူ၊ အမျိုးမျိုးသော တပ်မက်ခြင်းနှင့် အပျော်အပါးလိုက်စားခြင်းတို့၌ ကျေးကျွန်ဖြစ်ခဲ့၏။ ဆိုးညစ်သောစိတ်နှင့် မနာလိုသောစိတ်တို့ဖြင့် နေထိုင်သူ၊ လူတို့၏ မုန်းတီးခြင်းကို ခံရသူ၊ အချင်းချင်းမုန်းတီးသူတို့ ဖြစ်ခဲ့ကြ၏။ 4သို့သော် ကျွန်ုပ်တို့၏ ကယ်တင်ရှင်ဖြစ်သော ဘုရားရှင်၏ မဟာဂရုဏာတော်နှင့် ချစ်ခြင်းမေတ္တာတို့ ပေါ်လွင်ထင်ရှားလာသောအခါ 5ကျွန်ုပ်တို့ ပြုသည့်ဖြောင့်မတ်သောအရာတို့ကြောင့် မဟုတ်ဘဲ သနားကြင်နာတော်မူခြင်းကြောင့် ကျွန်ုပ်တို့သည် ကယ်တင်တော်မူခံရခြင်းဖြစ်၏။ ဉာဏ်အလင်းတော်၏ ဆေးကြောပေးခြင်းမှတဆင့် ကျွန်ုပ်တို့ကို အသစ်တစ်ဖန်မွေးဖွားစေခြင်းနှင့် စိတ်သစ်လူသစ်ဖြစ်စေခြင်းအားဖြင့် ကယ်တင်တော်မူ၏။ 6ဘုရားရှင်သည် ကျွန်ုပ်တို့၏ကယ်တင်ရှင်ဖြစ်သော ယေရှုခရစ်တော်အားဖြင့် ထိုဉာဏ်အလင်းတော်ကို ကျွန်ုပ်တို့အပေါ် ရက်ရောစွာ သွန်းလောင်းတော်မူ၏။ 7ဤသည်မှာ ကျွန်ုပ်တို့သည် ကျေးဇူးတော်အားဖြင့် တရားမျှတသည်ဟု သတ်မှတ်ခံရလျက် ကျွန်ုပ်တို့ မျှော်လင့်သည့် နိစ္စထာဝရအသက်ကို အမွေဆက်ခံနိုင်ရန်ဖြစ်၏။ 8ဤစကားသည် သစ္စာစကားဖြစ်၏။ သင်တို့သည် ထိုအရာများကို အထူးဂရုစိုက်၍ တိုက်တွန်းကြရန် ကျွန်ုပ်အလိုရှိ၏။ သို့မှသာ ဘုရားရှင်ကို ယုံကြည်သောသူတို့သည် ကောင်းသောအမှုတို့ကို ပြုရာ၌ အမြဲတစေ ဂရုစိုက်ကြမည်ဖြစ်၏။ အထက်ပါအရာတို့သည် အထူးကောင်းမွန်၍ လူတိုင်းအတွက် အကျိုးပြုသောအရာများဖြစ်၏။ 9သို့သော် မိုက်မဲသောအငြင်းပွားမှုများ၊ ဆွေစဉ်မျိုးဆက်စာရင်းများနှင့် ပညတ်တရားနှင့်ပတ်သက်၍ စကားများခိုက်ရန်ဖြစ်ခြင်းတို့ကို ရှောင်လော့။ အကြောင်းမူကား ထိုအရာများသည် အကျိုးမရှိသကဲ့သို့ အသုံးလည်းမဝင်သောကြောင့်ဖြစ်၏။ 10စိတ်ဝမ်းကွဲစေရန် လုပ်ဆောင်သောသူကို တစ်ကြိမ်၊ နှစ်ကြိမ်အထိ သတိပေးပြီးလျှင် ထိုသူနှင့် မည်သို့မျှအဆက်အဆံမပြုလေနှင့်။ 11ထိုသို့သောသူတို့သည် အကျင့်စာရိတ္တပျက်ပြားပြီး အပြစ်ရှိသူဖြစ်ကြောင်း သင်သိ၏။ သူ၏ အပြစ်များကပင် သူ၌အပြစ်ရှိကြောင်း ဖော်ပြ၏။ 12အာတေမ သို့မဟုတ် တုခိတ်ကို သင့်ထံသို့ ကျွန်ုပ်စေလွှတ်မည်။ ကျွန်ုပ်ရှိရာ နိကောပလိမြို့သို့လာရောက်ရန် ကြိုးစားလော့။ အကြောင်းမူကား ထိုမြို့တွင် ဆောင်းရာသီကို ဖြတ်သန်းရန် ဆုံးဖြတ်ထားပြီးဖြစ်သောကြောင့်ဖြစ်၏။ 13ရှေ့နေဖြစ်သူ ဇေနနှင့် အာပေါလုတို့ ခရီးပြုနိုင်ရန်အတွက် အတတ်နိုင်ဆုံးကူညီ၍ သူတို့လိုအပ်သမျှ အရာအားလုံးကို ဖြည့်ဆည်းပေးလော့။ 14ကျွန်ုပ်တို့၏လူတို့သည် ကောင်းသောအရာများပြုရာ၌ မိမိကိုယ်ကို မြှုပ်နှံကာ လေ့လာသင်ယူကြရမည်။ သို့မှသာ သူတို့သည် အခြားသူများ၏အရေးပေါ်လိုအပ်ချက်များကိုထောက်ပံ့ပေးခြင်းဖြင့် အကျိုးမရှိသောဘဝတွင် မရှင်သန်သောသူဖြစ်ကြလိမ့်မည်။ 15ကျွန်ုပ်နှင့်အတူရှိသောသူအားလုံးသည် သင့်အား နှုတ်ဆက်လိုက်ပါ၏။ ယုံကြည်ခြင်းအားဖြင့် ကျွန်ုပ်တို့ကို ချစ်ကြသောသူများကိုလည်း နှုတ်ဆက်လော့။ ကျေးဇူးတော်သည် သင်တို့အားလုံးအပေါ် သက်ရောက်ပါစေသော။
Currently Selected:
Titus 3: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
