Hebrews 1
1
1ဘုရားရှင်သည် လွန်ခဲ့သော အချိန်ကာလက အရိယာသူတော်စင်များမှတစ်ဆင့် ကျွန်ုပ်တို့၏ ဘိုးဘေးများအား နည်းလမ်းအမျိုးမျိုးဖြင့် စကားပြောတော်မူခဲ့ပါသည်။ 2သို့ရာတွင် နောက်ဆုံးသောနေ့ရက်များ၌ ဘုရားရှင်သည် ကျွန်ုပ်တို့အား သူ၏သားတော်မှတစ်ဆင့် စကားပြောတော်မူခဲ့ပါသည်။ ဘုရားရှင်သည် သားတော်အား အရာအားလုံး၏အမွေဆက်ခံသူအဖြစ် ခန့်အပ်တော်မူပြီး ထိုသားတော်အားဖြင့် စကြာဝဠာအား ဖန်ဆင်းတော်မူသည်။ 3သားတော်သည် ဘုရားရှင်၏ ဘုန်းအသရေတော်တို့နှင့် ထွန်းလင်းတောက်ပလျှက် ရှိသည်။ ကိုယ်ခန္ဒာတော်သည် ဘုရားရှင်၏ ဇာတိ ပုံသဏ္ဌာန်အတိုင်း တိကျမှန်ကန်သော ပုံသဏ္ဌာန် ရှိလျှက် မိမိ၏တန်ခိုးနှင့် ပြည့်စုံသော နှုတ်ကပတ်တော်အားဖြင့် စင်္ကြာဝဠာကိုလည်း တည်နေစေတော်မူသည်။ ကိုယ်တော်သည် လူသားတို့၏ အပြစ်များအတွက် သန့်ရှင်းစင်ကြယ်အောင်ဆောင်ရွက်တော်မူပြီးနောက် နိဗ္ဗာန်ရွှေမြို့တော်ရှိ အနန္တတန်ခိုးတော်ရှင် ဘုရားရှင်၏ လက်ယာဘက်၌ ထိုင်တော်မူလေသည်။ 4သားတော်သည် နတ်ဒေဝါတို့၏ အမည်နာမထက် ကြီးမြတ်သော အမည်နာမအားရရှိတော်မူသည်နှင့်အညီ သားတော်သည်လည်း နတ်ဒေဝါများထက်ပင် သာလွန်ကြီးမြတ်တော်မူပါသည်။ 5ဘုရားရှင်သည် မည်သည့် နတ်ဒေဝါကိုမျှ "သင်သည် ငါ၏သားဖြစ်သည်။ ဤနေ့မှစ၍ ငါသည် သင်၏ဖခမည်းတော်ဖြစ်တော်မူသည်"ဟူ၍ လည်းကောင်း "ငါသည် သူ၏ဖခမည်းတော်ဖြစ်မည်။ သူသည် ငါ၏သားတော်ဖြစ်လိမ့်မည်" ဟူ၍လည်းကောင်း မိန့်ဆိုတော်မူခဲ့ခြင်း မရှိခဲ့ပါ။ 6တစ်ဖန် ဘုရားရှင်သည် မိမိ၏ သားဦးကို လောကသို့စေလွှတ်တော်မူမည်ပြုသောအခါ "ဘုရားရှင်၏ နတ်ဒေဝါအပေါင်းတို့သည် သူ့အား ဝတ်ပြုကိုးကွယ်ကြရမည်" ဟု မိန့်တော်မူလေသည်။ 7ဘုရားရှင်သည် နတ်ဒေဝါများအကြောင်းကို ဖော်ပြရာ၌ “သူသည် မိမိ၏ နတ်ဒေဝါများအားလုံးအား လေကဲ့သို့ဖြစ်စေတော်မူပြီး မိမိ၏အစေခံများအား မီးလျှံများကဲ့သို့ဖြစ်စေတော်မူသည်” ဟု မိန့်တော်မူလေသည်။ 8သို့ရာတွင် သားတော်အကြောင်း မိန့်တော်မူသောအခါ၌ ဘုရားရှင်သည် "အို ဘုရားရှင် ကိုယ်တော်၏ရာဇပလ္လင်သည် ထာဝစဉ်တည်လိမ့်မည်။ ကိုယ်တော်၏နိုင်ငံတော်သည် မိမိ၏ လူစုတော်အား တရားမျှတစွာအုပ်စိုးသော နိုင်ငံဖြစ်ပါသည်။ 9ကိုယ်တော်သည် ဖြောင့်မတ်ခြင်းအား နှစ်သက်တော်မူပြီး တရားမဲ့ခြင်းကို ရွံ့မုန်းတော်မူသည်။ ထို့ကြောင့် ကိုယ်တော်၏ဘုရားတည်းဟူသော ဘုရားရှင်သည် ကိုယ်တော်၏အပေါင်းအဖော်များထက် ကိုယ်တော်အားရွေးချယ်၍ ပိုမိုချီးမြှင့်ကာ ရွှင်လန်းဝမ်းမြောက်ခွင့်ကို ပေးတော်မူပေသည်" ဟု မိန့်တော်မူလေသည်။ 10ထို့အပြင် ဘုရားရှင်သည် "အို အရှင် ကိုယ်တော်သည် အစဦး၌ပင် ကမ္ဘာမြေကြီးကို ဖန်ဆင်းတော်မူပါ၏။ ကိုယ်တော်၏ လက်တော်ဖြင့် မိုးကောင်းကင်ကိုလည်း ဖန်ဆင်းတော်မူပါသည်။ 11ထိုအရာတို့သည် ပျက်စီးယိုယွင်းသွားကြမည် ဖြစ်သော်လည်း ကိုယ်တော်ရှင်မှာမူ အမြဲတည်ရှိနေတော်မူလိမ့်မည်။ ထိုအရာအားလုံးတို့သည် အဝတ်အထည်များကဲ့သို့ ဟောင်းနွမ်းကြလိမ့်မည်။ 12ကိုယ်တော်သည် ဝတ်ရုံကို ခေါက်တော်မူသကဲ့သို့ ကောင်းကင်နှင့်မြေကြီးကို ခေါက်တော်မူလိမ့်မည်။ ထိုအရာများသည်လည်း အဝတ်အထည်များကဲ့သို့ ပြောင်းလဲတော်မူလိမ့်မည်။ သို့ရာတွင် ကိုယ်တော်မူကား ပြောင်းလဲတော်မူခြင်း မရှိပါ။ အသက်တော်သည်လည်း ကုန်ဆုံးလိမ့်မည် မဟုတ်ပါ" ဟု မိန့်တော်မူလေသည်။ 13ဘုရားရှင်သည် "သင်၏ရန်သူများကို သင်၏ခြေဖဝါးအောက်သို့ ငါမရောက်ခိုင်းမှီ ကာလအတွင်း ငါ၏လက်ယာဘက်တွင် ထိုင်နေလော့"ဟု မည်သည့် နတ်ဒေဝါကိုမျှ မိန့်တော်မူခဲ့ဖူးခြင်း မရှိပါ။ 14ထိုသို့ဖြစ်ပါမူ နတ်ဒေဝါများသည် ကယ်တင်ခြင်းအမွေဆက်ခံရမည့်သူများကို ကူညီမစရန် ဘုရားရှင်စေလွှတ်တော်မူသည့် အစေခံဝိညာဉ်များ ဖြစ်ကြသည်မဟုတ်ပါလော။
Currently Selected:
Hebrews 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
