Hebrews 9
9
1ပထမ ပဋိညာဉ်တွင်လည်း ဝတ်ပြုခြင်းဆိုင်ရာစည်းမျဉ်းများနှင့် လောကနှင့်ဆိုင်သော သန့်ရှင်းရာဌာနတော်ပါရှိသည်။ 2တဲတော်တွင် အခန်းနှစ်ခန်းပါရှိပြီး သန့်ရှင်းရာဌာနတော်ဟုခေါ်သော အပြင်တဲတော်တွင် ဆီမီးခုံကိုလည်းကောင်း၊ ဘုရားရှင်အားဆပ်ကပ်ထားသော မုန့်များတင်ထားသည့် စားပွဲကိုလည်းကောင်း တွေ့ရသည်။ 3ဒုတိယကန့်လန့်ကာ၏ အနောက်တွင်မူကား အလွန်သန့်ရှင်းရာဌာနတော်ဟု ခေါ်သော တဲတော်ရှိသည်။ 4ထိုထဲတွင် နံ့သာပေါင်းကို မီးရှို့ရာရွှေပလ္လင်နှင့် ရွှေဖြင့်မွမ်းမံထားသည့် ပဋိညာဉ်သေတ္တာတော်ရှိသည်။ ထိုသေတ္တာတော်အတွင်း၌ မန္နမုန့်ထည့်ထားသည့်ရွှေအိုး၊ အဖူးအညွှန့်ထွက်သည့် အာရုန်၏တောင်ဝှေးနှင့် ပဋိညာဉ်ကျောက်ပြားနှစ်ပြားရှိသည်။ 5ထိုသေတ္တာပေါ်တွင် ဘုန်းအသရေရှိသော ခေရုဗိမ်ရုပ်များရှိသည်။ ခေရုဗိမ်တို့သည် သူတို့၏အတောင်ပံများကိုဖြန့်၍ အပြစ်ဖြေရာပလ္လင်ကို အုပ်မိုးထားသည်။ သို့သော် ထိုအရာများကို ယခုအသေးစိတ်ဖော်ပြရန်မလိုပေ။ 6ဤအရာများကို ပြင်ဆင်ပြီးသောအခါ ပုရောဟိတ်တို့သည် ဝတ်ပြုခြင်းအမှုများကို ဆောင်ရွက်ရန် အပြင်တဲတော်ထဲသို့ နေ့စဉ်ဝင်ကြရသည်။ 7သို့ရာတွင် အကြီးဆုံးပုရောဟိတ်တစ်ပါးတည်းသာလျှင် အတွင်းတဲတော်သို့ ဝင်ရပေသည်။ သူသည် ထိုသို့ဝင်ရသည်မှာလည်း တစ်နှစ်လျှင် တစ်ကြိမ်သာဖြစ်ပြီး မိမိ၏အတွက်သော်လည်းကောင်း၊ လူတို့မသိနားမလည်ဘဲ ကျူးလွန်မိသည့် အပြစ်များအတွက်သော်လည်းကောင်း ပူဇော်ရန် သွေးကိုယူဆောင်၍ ဝင်ရလေသည်။ 8ဤစည်းမျဉ်းအရ အပြင်တဲတော်တည်ရှိနေသမျှ ကာလပတ်လုံး အလွန်သန့်ရှင်းရာဌာနတော်ဖြစ်သည့် အတွင်းတဲတော်သို့ ဝင်ရန် လမ်းသည် ပိတ်လျက်ပင်ရှိမည်ဖြစ်ကြောင်း ဉာဏ်အလင်းတော်က ဖော်ပြတော်မူသည်။ 9ဤအရာတို့သည် မျက်မှောက်ခေတ်အား ညွှန်ပြနေသည့် ပုံဥပမာဖြစ်သည်။ ပူဇော်သော ပူဇော်သကာများသည် ဝတ်ပြုသောသူ၏ စိတ်နှလုံးကို ဖြုစင်သန့်ရှင်းအောင်ပြုပြင်၍မပေးနိုင်။ 10ထိုအရာတို့သည် အစားအသောက်များ၊ သန့်စင်ခြင်းမင်္ဂလာအမျိုးမျိုးနှင့်ဆိုင်သည်။ ယင်းတို့သည် အပြင်ပိုင်းနှင့်ဆိုင်သည့် စည်းမျဉ်းများဖြစ်၍ ခပ်သိမ်းသောအရာတို့ကို ဘုရားရှင်အသစ်ပြုပြင်တော်မူမည့်ကာလတိုင်အောင်သာလျှင် တည်ရှိနေကြသည်။ 11သို့ရာတွင် ခရစ်တော်သည် ယခုကျွန်ုပ်တို့ခံစားရကြသည့် ကောင်းမြတ်သည့်အရာများနှင့်သက်ဆိုင်သော အကြီးဆုံးပုရောဟိတ်အဖြစ်ဖြင့် ကြွလာတော်မူလေပြီ။ ကိုယ်တော်အမူတော်ဆောင်ရာတဲတော်သည် ပိုမို၍ကြီးမြတ်ပြီးပြည့်စုံလင်ပေသည်။ ထိုတဲတော်ကား လူတို့လက်ဖြင့်တည်ဆောက်သော တဲတော်မဟုတ်။ ဤအဖန်ဆင်းခံလောကနှင့်မသက်ဆိုင်။ 12ကိုယ်တော်သည် အလွန်သန့်ရှင်းရာဌာနတော်ထဲသို့ တစ်ကြိမ်တည်းအပြီးအပိုင်ဝင်တော်မူသောအခါ ပူဇော်ရန်ဆိတ်သွေး၊ နွားသငယ်၏သွေးနှင့်ဝင်တော်မမူ။ မိမိကိုယ်တော်တိုင်၏သွေးနှင့်ဝင်တော်မူ၍ ကျွန်ုပ်တို့အား ထာဝရကယ်တင်ခြင်းကို ပေးတော်မူသည်။ 13ဆိတ်သွေး၊ နွားထီး၏သွေး၊ နွားမကလေးတို့၏ပြာတို့ကို ညစ်ညမ်းသူတို့အပေါ် ပက်ဖျန်းသဖြင့် အညစ်အကြေးများကို ဆေးကြောသုတ်သင်ကာ လူတို့အားသန့်စင်နိုင်စွမ်းရှိပါလျှင်၊ 14ခရစ်တော်သည် ထာဝရဝိညာဉ်တော်အားဖြင့် အပြစ်အနာအဆာကင်းသော မိမိကိုယ်ကိုယ် ဘုရားရှင်အား ပူဇော်ဆက်သတော်မူသည်။ ခရစ်တော်၏သွေးတော်သည် အသက်ရှင်သောဘုရားရှင်၏အမှုတော်ကို ဆောင်ရွက်နိုင်ကြစေရန် ကျွန်ုပ်တို့၏အသိစိတ်ကို သေခြင်းသို့ပို့ဆောင်ပေးသော အပြစ်မှ ကျွန်ုပ်တို့၏စိတ်ကို မည်မျှပို၍ ကြည်လင်စေတော်မူလိမ့်မည်နည်း။ 15ထို့ကြောင့် ဘုရားရှင်ရွေးကောက်တော်မူခြင်းကိုခံရသူတို့သည် ဘုရားရှင်ကတိထားတော်မူသော ထာဝရအမွေကို ရရှိနိုင်ကြစေရန် ခရစ်တော်သည် ပဋိညာဉ်သစ်ကို စီမံပေးတော်မူသည်။ အကြောင်းမှာ ပထမပဋိညာဉ်၏လက်အောက်တွင်ရှိစဉ်အခါက လူတို့ကျူးလွန်ခဲ့သည့်အပြစ်များကို ဖြေလွတ်ပေးရန် အသေခံသူပေါ်ပေါက်ခဲ့ခြင်းကြောင့်ဖြစ်ပေသည်။ 16သေတမ်းစာအတည်ဖြစ်နိုင်ရန် သေတမ်းစာအား ရေးသားခဲ့သူသည် အမှန်ပင်သေပြီဖြစ်ကြောင်း အထောက်အထားပြရပေသည်။ 17အဘယ်ကြောင့်ဆိုသော် သေတမ်းစာရေးသူအသက်ရှင်နေစဉ် သူ၏ သေတမ်းစာသည် အတည်မဖြစ်။ ထိုသူသေလွန်ပြီးမှသာလျှင် အတည်ဖြစ်သည်။ 18ထို့ကြောင့် ပထမပဋိညာဉ်ပင်လျှင် သွေးဖြင့်အတည်ဖြစ်သည်။ 19မောရှေသည် ပညတ်တရားတွင်ပါရှိသည့် ပညတ်ချက်တို့ကို လူအပေါင်းတို့အား ကြေညာပြီးသောအခါ နီမြန်းနေသောသိုးမွေးနှင့်ဟုဿုပ်ပင်၏အညွန့်ကို အသုံးပြုကာ ရေနှင့်ရောသော နွားသငယ်၏သွေး၊ ဆိတ်သွေးဖြင့် ကျမ်းစာလိပ်ကိုလည်းကောင်း၊ လူအပေါင်းတို့ကိုလည်းကောင်း ပတ်ဖျန်းလေသည်။ 20ထို့နောက် မောရှေက “ဤသွေးသည် သင်တို့လိုက်နာရန် ဘုရားရှင်ပညတ်တော်မူသော ပဋိညာဉ်ကို အတည်ဖြစ်စေ၏” ဟု ဆိုလေသည်။ 21ထိုနည်းအတိုင်းပင် မောရှေသည် တဲတော်နှင့်တကွ ဝတ်ပြုကိုးကွယ်ရာတွင်အသုံးပြုသည့် အသုံးအဆောင်အားလုံးကိုလည်း သွေးဖြင့်ပတ်ဖျန်းလေသည်။ 22ပညတ်တရားအရ အရာအားလုံးနီးပါးသည် သွေးအားဖြင့်သန့်စင်မှုကိုရရှိကြသည်။ သွေးသွန်းလောင်းခြင်းမရှိလျှင် အပြစ်ခွင့်လွှတ်ခြင်းမရှိ။ 23အဆိုပါနည်းအားဖြင့် ရွှေမြို့တော်တွင်ရှိသည့်အရာတို့၏ပုံတူများကို စင်ကြယ်စေရသည်။ သို့သော် ရွှေမြို့တော်တွင်ရှိသည့်အရာတို့ကို သန့်စင်စေရန်မှာမှု ထိုအရာများထက်သာလွန်မွန်မြတ်သော ပူဇော်ခြင်းဖြင့် စင်ကြယ်စေရသည်။ 24စစ်မှန်သောသန့်ရှင်းရေးဌာနတော်၏ပုံတူဖြစ်သော လူတို့လက်ဖြင့်တည်ဆောက်သည့် သန့်ရှင်းရာဌာနတော်သို့ ခရစ်တော်သည် ဝင်တော်မူသည်မဟုတ်ဘဲ ကျွန်ုပ်တို့ကိုယ်စား ဘုရားရှင်၏ ရှေ့တော်၌ ထင်ရှားတော်မူရန် ရွှေမြို့တော်သို့ဝင်တော်မူသည်။ 25အကြီးဆုံးပုရောဟိတ်သည် မိမိ၏သွေးမဟုတ်သောသွေးကိုယူ၍ နှစ်စဉ်နှစ်တိုင်း အလွန်သန့်ရှင်းရာဌာနတော်သို့ဝင်ရသကဲ့သို့ ကိုယ်တော်သည် ရွှေမြို့တော်သို့ဝင်ရောက်၍ မိမိကိုယ်ကို ကြိမ်ဖန်များစွာ ပူဇော်ရန်မလိုအပ်ပေ။ 26ထိုသို့ပူဇော်ရမည်ဆိုပါက ကမ္ဘာလောကကို ဖန်ဆင်းတော်မူခဲ့သည့် အချိန်မှအစပြု၍ ကြိမ်ဖန်များစွာ ဒုက္ခခံရမည်သာ ဖြစ်ပေသည်။ ယခုမူကား ကိုယ်တော်သည် ကမ္ဘာကုန်ဆုံးခါနီးအချိန်၌ အပြီးအပိုင်တစ်ကြိမ်တည်း ပေါ်ထွန်းတော်မူလာ၍ မိမိအသက်ကို ပူဇော်ကာ အပြစ်ဒုစရိုက်ကို သုတ်သင် ဖယ်ရှားတော်မူလေသည်။ 27လူသည် တစ်ကြိမ်တည်းသာသေရပြီးနောက် တရားစီရင်တော်မူခြင်းကို ခံရသည်။ 28ထိုနည်းတူစွာ ခရစ်တော်သည်လည်း လူအများအပြား၏ အပြစ်ကိုဖြေလွတ်ရန်အတွက် မိမိကိုယ်ကိုယ် တစ်ကြိမ်တည်းသာ ပူဇော်တော်မူသည်။ ထို့နောက် အပြစ်ဒုစရိုက်ကို သုတ်သင် ဖယ်ရှားရန်အတွက် မဟုတ်ဘဲ မိမိကိုစောင့်မျှော်နေသူတို့အား ကယ်တင်တော်မူရန် ကိုယ်တော်သည် ဒုတိယအကြိမ် ပေါ်ထွန်းတော်မူလိမ့်မည်။
Currently Selected:
Hebrews 9: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
