Hebrews 8
8
1ယခု ကျွန်ုပ်တို့ပြောဆိုခဲ့ပြီးသော အကြောင်းအရာများတွင် အဓိကအချက်မှာ ထိုသို့သောအကြီးဆုံးပုရောဟိတ်တစ်ဦးသည် ကျွန်ုပ်တို့တွင် ရှိခြင်းပင်ဖြစ်သည်။ သူသည် ရွှေမြို့တော်ရှိ ဘုန်းကြီးသောတန်ခိုးရှင်၏ပလ္လင်တော်လက်ယာဘက်၌ ထိုင်နေတော်မူသည်။ 2ကိုယ်တော်သည် အလွန်သန့်ရှင်းရာဌာနတည်းဟူသော တဲတော်၌ အမူတော်ထမ်းဆောင်နေသူဖြစ်သည်။ ထိုတဲတော်ကား လူတို့တည်ဆောက်သော တဲတော်မဟုတ်ဘဲ ဘုရားရှင်တည်ဆောက်တော်မူသော စစ်မှန်သောတဲတော်ဖြစ်သည်။ 3အကြီးဆုံးပုရောဟိတ်တိုင်းသည် ပူဇော်စရာများကို ဘုရားရှင်ထံ ပူဇော်ရန် ခန့်ထားခြင်းခံသူဖြစ်သည်။ သို့ဖြစ်၍ ကျွန်ုပ်တို့၏အကြီးဆုံးပုရောဟိတ်သည်လည်း ဆက်သပူဇော်ရန် ပူဇော်စရာ တစ်စုံတစ်ခုရှိရမည်ဖြစ်သည်။ 4ကိုယ်တော်သည် ကမ္ဘာလောကတွင် ရှိနေတော်မူမည်ဆိုပါလျှင် ပုရောဟိတ်လုံးဝဖြစ်နိုင်လိမ့်မည်မဟုတ်ပေ။ အဘယ့်ကြောင့်ဆိုသော် ပညတ်တရားအရ ပူဇော်စရာများကို ဆက်သပူဇော်ရသော ပုရောဟိတ်များသည် ရှိနေပြီဖြစ်သောကြောင့်ပင်ဖြစ်သည်။ 5ပုရောဟိတ်များပြုသောအမှုအရာများသည် ရွှေမြို့တော်ရှိအမူအရာများ၏ နမူနာပုံရိပ်မျှသာဖြစ်သည်။ မောရှေပြုခဲ့သည့်အမှုအရာများသည်လည်း ဤနည်းအတိုင်းပင်ဖြစ်သည်။ အဘယ့်ကြောင့်ဆိုသော် သူသည် တဲတော်ကိုတည်ဆောက်မည်ပြုသောအခါ ဘုရားရှင်က “တောင်ပေါ်တွင် သင့်အား ငါပြခဲ့သည့်ပုံစံအတိုင်း အလုံးစုံတို့ကို ပြုလုပ်ရန်သတိမမေ့နှင့်” ဟု ညွှန်ကြားတော်မူခဲ့သောကြောင့်ပင်ဖြစ်သည်။ 6သို့သော် ဘုရားရှင်နှင့် လူများအကြားတွင် ကိုယ်တော်ယေရှုစီစဉ်ပေးသည့် ပဋိညာဉ်သစ်သည် ပို၍ကောင်းမွန်သောကတိတော်များအပေါ်တွင် အခြေခံသဖြင့် ပဋိညာဉ်ဟောင်းထက် ပိုမိုကောင်းမြတ်သကဲ့သို့ ကိုယ်တော်ယေရှုထမ်းဆောင်ရသည့် ပုရောဟိတ်တာဝန်သည် ယခင်ပုရောဟိတ်များ ထမ်းဆောင်ရသော တာဝန်များထက် သာလွန်ကြီးမြတ်ပေသည်။ 7အကယ်၍ ပထမပဋိညာဉ်တော်တွင် အပြစ်ဆိုစရာရှိပါမူ ဒုတိယပဋိညာဉ်တော်ကို ပြုတော်မူရန် လိုအပ်မည်မဟုတ်။ 8သို့ရာတွင် ဘုရားရှင်သည် မိမိလူတို့အား အပြစ်တင်တော်မူလျက် မိန့်တော်မူသည်မှာ “အစ္စရေးလူမျိုးနှင့်လည်းကောင်း၊ ဂျူးလူမျိုးနှင့်လည်းကောင်း ပဋိညာဉ်သစ်ကို ငါပြုရမည့် နေ့ရက်များသည် ကျရောက်လာတော့မည်။ 9ဤပဋိညာဉ်သည် သူတို့၏ဘိုးဘေးများအား လက်ဆွဲ၍ အီဂျစ်ပြည်မှ ငါထုတ်ဆောင်လာစဉ်အခါက သူတို့နှင့်ပြုခဲ့သည့် ပဋိညာဉ်နှင့်တူလိမ့်မည်မဟုတ်။ ထိုအခါက ငါနှင့်ပြုခဲ့သည့် ပဋိညာဉ်အား သူတို့ချိုးဖောက်ခဲ့ကြသဖြင့် ငါသည် သူတို့အား လျစ်လျူရှုထားခဲ့၏။” ဟု ထာဝရဘုရား မိန့်တော်မူသည်။ 10ဘုရားရှင်မိန့်တော်မူသည်မှာ “နောင်အခါ၌ အစ္စရေးလူမျိုးတို့နှင့် ငါသည် ပဋိညာဉ်ဖွဲ့မည်။ ငါဘုရားရှင်သည် ငါ့ပညတ်တရားကို သူတို့၏စိတ်နှလုံးထဲသို့ ထည့်သွင်းမည်။ သူတို့၏နှလုံးသားပေါ်မှာ ရေးသားမည်။ငါသည် သူတို့၏ဘုရားဖြစ်ပြီး သူတို့သည်လည်း ငါ၏လူများဖြစ်ကြလိမ့်မည်။ 11မည်သူမျှ မိမိ၏အိမ်နီးချင်းကိုသော်လည်းကောင်း၊ မိမိ၏ညီအစ်ကိုအချင်းချင်းကိုသော်လည်းကောင်း၊ ‘ထာဝရဘုရားအားသိလော့’ ဟု သွန်သင်ပေးရန်လိုမည်မဟုတ်။ အဘယ့်ကြောင့်ဆိုသော် လူအပေါင်းတို့သည် အငယ်ဆုံးသောသူမှစ၍ အကြီးဆုံးသောသူတိုင်အောင် ငါ့အား သိကြလိမ့်မည်ဖြစ်သောကြောင့်ပင်ဖြစ်သည်။ 12ငါသည် သူတို့၏မတရားမှုများကို ခွင့်လွှတ်၍ သူတို့၏အပြစ်များကို မေ့ပစ်မည်” ဟု မိန့်တော်မူသည်။ 13ဘုရားရှင်သည် ဤသို့ပဋိညာဉ်သစ်အကြောင်းကို မိန့်တော်မူသောအားဖြင့် ပထမပဋိညာဉ်ကို ဟောင်းနွမ်းစေတော်မူသည်။ ဟောင်းနွမ်းလာသောအရာသည်လည်း မကြာမီပျောက်ကွယ်သွားလိမ့်မည်။
Currently Selected:
Hebrews 8: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
