Hebrews 7
7
1ဤမေလခိဇေဒက်သည် ရှာလင်မြို့၏ဘုရင်ဖြစ်၍ အမြင့်မြတ်ဆုံးသော ဘုရားရှင်၏ပုရောဟိတ်ဖြစ်၏။ အာဗြဟံသည် ဘုရင်လေးပါးကို အနိုင်ရ၍ပြန်လာသောအခါ သူသည် အာဗြဟံအား ခရီးဦးကြိုပြု၍ ကောင်းချီးပေးလေသည်။ 2သို့ဖြစ်၍ အာဗြဟံသည် မိမိသိမ်းယူရရှိခဲ့သည့် ဥစ္စာပစ္စည်းများ၏ဆယ်ပုံတစ်ပုံကို သူ့အားပေးလှူ၏။(မေလခိဇေဒက်ဟူသောနာမည်၏ အနက်အဓိပ္ပာယ်မှာ “ဖြောင့်မတ်ခြင်း၏ဘုရင်” ဟူ၍ဖြစ်၏။ သူသည် ရှာလင်မြို့၏ဘုရင်လည်းဖြစ်သဖြင့် သူ၏နာမည်သည် “ငြိမ်းချမ်းရေး၏ဘုရင်”ဟုလည်း အနက် အဓိပ္ပာယ်ရလေသည်။) 3သူ၏မိဘဘိုးဘေးတို့အကြောင်းမှတ်တမ်းကိုလည်းကောင်း၊ သူမွေးဖွားသည့်အကြောင်းနှင့် ကွယ်လွန်သည့်အကြောင်း မှတ်တမ်းတို့ကိုလည်းကောင်းမတွေ့ရှိရပေ။ သူသည် ဘုရားရှင်၏သားတော်နှင့်တူ၍ ပုရောဟိတ်အရာကို ထာဝရရရှိထားသူဖြစ်သည်။ 4ကျွန်ုပ်တို့၏ဘိုးဘေးအာဗြဟံသည် စစ်ပွဲမှ မိမိသိမ်းယူရရှိခဲ့သည့် ဥစ္စာပစ္စည်းများ၏ဆယ်ပုံတစ်ပုံကို မေလခိဇေဒက်အား ပေးလှူခဲ့သည်ဖြစ်ရာ ထို့သို့ပေးလှူခြင်းခံရသူသည် မည်မျှကြီးမြတ်မည်ဖြစ်ကြောင်းကို ဆင်ခြင်ကြလော့။ 5လေဝိအနွယ်မှ ပုရောဟိတ်အရာကိုရရှိကြသော သူတို့သည် အာဗြဟံ၏မျိုးဆက်များပင်ဖြစ်သော်လည်း မိမိတို့၏လူမျိုးဖြစ်သော အစ္စရေးတို့ထံမှ ဆယ်ဖို့တစ်ဖို့သောအလှူကို ပညတ်တရားအရ ကောက်ယူခွင့်ရှိကြသည်။ 6ဤမေလခိဇေဒက်သည် လေဝိအနွယ်ဝင်မဟုတ်သော်လည်း အာဗြဟံထံမှ ဆယ်ဖို့တစ်ဖို့အလှူကို ခံယူလျက် ဘုရားရှင်၏ကတိတော်အား ရရှိထားသူ အာဗြဟံကို ကောင်းချီးပေးခဲ့သည်။ 7ငယ်သောသူသည် ကြီးမြတ်သူထံမှ ကောင်းချီးမင်္ဂလာခံယူရစမြဲဖြစ်သည်ကို ငြင်းဆိုဖွယ်မရှိ။ 8ဆယ်ဖို့တစ်ဖို့အလှူကိုခံယူသော လေဝိအနွယ်ဝင် ပုရောဟိတ်တို့သည် သေမျိုးဖြစ်သောလူများဖြစ်ကြသော်လည်း ဆယ်ဖို့တစ်ဖို့ကိုခံယူသော ဤမေလခိဇေဒက်မူကား အသက်ရှင်သူအနေဖြင့် သက်သေခံထားသည်။ 9ဆယ်ဖို့တစ်ဖို့အလှူကို ခံယူသူလေဝိသည် အာဗြဟံမှတစ်ဆင့် မေလခိဇေဒက်အား ဆယ်ဖို့တစ်ဖို့ပေးလှူသည်ဟုပင်ဆိုနိုင်သည်။ 10အဘယ်ကြောင့်ဆိုသော် အာဗြဟံထံမှ ဆယ်ဖို့တစ်ဖို့ကို မေလခိဇေဒက်ခံယူစဉ်တွင် လေဝိသည် သူ၏ဘိုးဘေးကိုယ်၌ ရှိနေသည်ဟု ဆိုနိုင်သောကြောင့်ဖြစ်သည်။ 11အစ္စရေးလူမျိုးတို့၏ပညတ်တရားကို ပေးအပ်ရာ၌ လေဝိအနွယ်ဝင်ပုရောဟိတ်များကို အခြေခံ၍ ပေးအပ်ခြင်းဖြစ်သည်။ အကယ်၍ လေဝိအနွယ်ဝင်ပုရောဟိတ်တို့သည် ပြီးပြည့်စုံအောင် ဆောင်ရွက်နိုင်ကြပါမူ အာရုန်၏ အရိုက်အရာအစား မေလခိဇေဒက်၏အရိုက်အရာကို ဆက်ခံသူ အခြားပုရောဟိတ်တစ်ပါးပေါ်ထွန်းလာရန် မည်သည့်အတွက်ကြောင့် လိုအပ်ပါသေးသနည်း။ 12အဘယ်ကြောင့်ဆိုသော် ပုရောဟိတ်မျိုးရိုးကို ပြောင်းလဲလိုက်သောအခါတွင် ပညတ်တရားကိုလည်း ပြောင်းလဲရန် လိုအပ်လာသောကြောင့်ပင်ဖြစ်သည်။ 13ဤတွင် ကျွန်ုပ်တို့ပြောဆိုနေသော ပုရောဟိတ်မှာ အခြားသောအနွယ်ဝင်ထဲမှဖြစ်ပြီး လေဝိအနွယ်ဝင်မဟုတ်ပေ။ ထိုအမျိုးအနွယ်ထဲမှ မည်သူမျှ ပုရောဟိတ်အဖြစ် ပလ္လင်၌ မဆောင်ရွက်ခဲ့ဖူးပေ။ 14ကိုယ်တော်သည် ဂျူးလူမျိုးတို့မှ ဆင်းသက်တော်မူသည်မှာ သိသာထင်ရှား၏။ ပုရောဟိတ်အရာသည် ဂျူးလူမျိုးတို့နှင့်ပတ်သက်ကြောင်းကို မောရှေသည် မည်သည့်အခါမျှမပြောခဲ့ပေ။ 15မေလခိဇေဒက်နှင့်တူသော ပုရောဟိတ်တစ်ပါး ပေါ်ထွန်းလာလျှင် ကျွန်ုပ်တို့ပြောဆိုသည့် ပုရောဟိတ်မျိုးရိုး ပြောင်းလဲသည်မှာ ပိုမိုသိသာထင်ရှားလာသည်။ 16ထိုသူသည် ပုရောဟိတ်အရိုက်အရာကို လူတို့ချမှတ်ထားသည့် စည်းမျဉ်းဉပဒေများအရ ခံယူရရှိထားသည်မဟုတ်။ မည်သည့်အခါ၌မျှ မကုန်မဆုံးနိုင်သည့် အသက်၏တန်ခိုးတော်အရ ခံယူရရှိထားခြင်းဖြစ်သည်။ 17အဘယ့်ကြောင့်ဆိုသော် ကျမ်းစာ၌ “သင်သည် မေလခိဇေဒက်၏အရိုက်အရာအား ဆက်ခံသူ ထာဝရပုရောဟိတ်ဖြစ်လိမ့်မည်” ဟု ဖော်ပြထားသောကြောင့်ဖြစ်သည်။ 18ယခင်ပညတ်တရားသည် အားနည်း၍ အသုံးမဝင်သောကြောင့် ဖျက်သိမ်းခြင်းကိုခံရသည်။ 19အကြောင်းမူကား မောရှေ၏ပညတ်တရားသည် မည်သည့်အရာကိုမျှ ပြီးပြည့်စုံအောင် မလုပ်နိုင်သောကြောင့်ဖြစ်သည်။ ယခုအခါ၌ ကျွန်ုပ်တို့သည် ထိုပညတ်တရားထက် ပိုမိုကောင်းမွန်သည့် မျှော်လင့်ချက်ရှိလာပြီဖြစ်သဖြင့် ထိုမျှော်လင့်ချက်အားဖြင့် ဘုရားရှင်ထံတော်သို့ ချဉ်းကပ်ကြသည်။ 20ထိုပြင် ကိုယ်တော်ယေရှု၏ပုရောဟိတ်အရိုက်အရာသည် တိုင်တည်သစ္စာဆိုခြင်းမရှိဘဲ ဖြစ်လာသည်မဟုတ်ပေ။ အခြားသူတို့၏ပုရောဟိတ်အရိုက်အရာမှာမူ တိုင်တည်သစ္စာဆိုခြင်းမပါရှိချေ။ 21ဘုရားရှင်သည် ကိုယ်တော်ယေရှုအား ပုရောဟိတ်အဖြစ် ခန့်ထားတော်မူသောအခါ၌ “‘သင်သည် ထာဝရပုရောဟိတ်ဖြစ်ရလိမ့်မည်’ ဟု ထာဝရဘုရား တိုင်တည်သစ္စာပြုတော်မူသည်ဖြစ်သည့်အတွက်ကြောင့် မိမိ၏စိတ်တော်အား ပြောင်းလဲတော်မူလိမ့်မည်မဟုတ်”ဟူ၍ ကိုယ်တော်အား မိန့်တော်မူသည်။ 22ဤသို့တိုင်တည်သစ္စာပြုခြင်းကြောင့် ကိုယ်တော်ယေရှုသည် ပိုမိုကောင်းမြတ်သည့် ပဋိညာဉ်၏အာမခံဖြစ်လာသည်။ 23ပုရောဟိတ်တို့သည် သေရသောကြောင့် သူတို့သည် အမှုတော်အား အစဉ်အမြဲမထမ်းဆောင်နိုင်ကြပေ။ သို့ဖြစ်၍ များစွာသောသူတို့သည် ပုရောဟိတ်ဖြစ်လာကြသည်။ 24သို့သော် ကိုယ်တော်ယေရှုမှာမူ ထာဝရအသက်ရှင်တော်မူသောကြောင့် သူ၏ပုရောဟိတ်အရိုက်အရာသည် မည်သည့်အခါမျှ ပြောင်းလဲခြင်းမရှိပါ။ 25ထို့ကြောင့် ကိုယ်တော်သည် မိမိအားအမှီပြု၍ ဘုရားရှင်ထံတော်သို့ ချဉ်းကပ်ကြသူအပေါင်းတို့အား အပြည့်အဝ ကယ်တင်တော်မူနိုင်သည်။ အဘယ့်ကြောင့်ဆိုသော် ကိုယ်တော်သည် ထိုသူတို့အတွက် ဘုရားရှင်ထံတော်တွင် အသနားခံရန် ထာဝရအသက်ရှင်လျက်ရှိတော်မူသောကြောင့်ပင်ဖြစ်သည်။ 26ထိုသို့သောအကြီးဆုံးပုရောဟိတ်သည် မြင့်မြတ်၍ အပြစ်ကင်းသူ၊ ဖြူစင်သူ၊ အပြစ်ဒုစရိုက်သမားများနှင့်ခြားနားသူ၊ ရွှေမြို့တော်၌ အကြီးမြတ်ဆုံးသောနေရာသို့ ချီးမြှောက်ခြင်းကို ခံရသူဖြစ်သောကြောင့် ကျွန်ုပ်တို့၏လိုအပ်ချက်နှင့် သင့်လျော်သော အကြီးဆုံးပုရောဟိတ်မျိုးဖြစ်သည်။ 27အခြားသောအကြီးဆုံးပုရောဟိတ်များသည် ဦးစွာပထမ မိမိတို့၏အပြစ်များအတွက်လည်းကောင်း၊ လူတို့၏အပြစ်များအတွက်လည်းကောင်း နေ့တိုင်းပူဇော်ကြရလေသည်။ ကိုယ်တော်မူကား ဤသို့ပြုရန်မလိုအပ်ပေ။ အဘယ့်ကြောင့်ဆိုသော် ကိုယ်တော်သည် မိမိအသက်ကိုပူဇော်စဉ်အခါက တစ်ကြိမ်တည်းအပြီးအပိုင် ပူဇော်ခဲ့ပြီးဖြစ်သောကြောင့်ပင်ဖြစ်သည်။ 28အကြောင်းမူကား ပညတ်တရားအရခန့်အပ်ထားသော အကြီးဆုံးပုရောဟိတ်သည် လူသားဖြစ်၍ အားနည်းချက်ရှိသည်။ သို့သော် ပညတ်တရားနောက်၌လာသည့် တိုင်တည်သစ္စာပြုခြင်းအားဖြင့် ခန့်အပ်ထားသောသားတော်မှာမူ ထာဝရပြီးပြည့်စုံတော်မူလေသည်။
Currently Selected:
Hebrews 7: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
