Hebrews 6
6
1သို့ဖြစ်၍ ကျွန်ုပ်တို့သည် ခရစ်တော်နှင့်ဆိုင်သော အခြေခံသွန်သင်ချက်ကို ချန်ထား၍ ရင့်ကျက်ခြင်းသို့ တက်လှမ်းကြကုန်စို့။ သေခြင်းသို့ပို့ဆောင်ပေးသော အကျင့်များမှနောင်တရခြင်း၊ ဘုရားရှင်အားယုံကြည်ခြင်း၊ 2ရေနှစ်မင်္ဂလာပေးခြင်း၊ လက်တင်မင်္ဂလာပေးခြင်း၊ သေရာမှပြန်လည်အသက်ရှင်ခြင်းနှင့် ထာဝရတရားစီရင်တော်မူခြင်း စသည့် အခြေခံသွန်သင်ချက်များအား ထပ်မံ၍အခြေမပြုဘဲ နေကြကုန်စို့။ 3ဘုရားရှင်ခွင့်ပြုတော်မူလျှင် ကျွန်ုပ်တို့သည် ရှေ့သို့တက်လှမ်းကြမည်ဖြစ်သည်။ 4မိမိတို့၏ယုံကြည်မှုကိုစွန့်သောသူတို့အား နောက်တစ်ဖန် မည်သို့နောင်တရစေနိုင်မည်နည်း။ တစ်ချိန်က ထိုသူတို့သည် ဘုရားရှင်၏ဉာဏ်အလင်းကိုရ၍ ကောင်းကင်ဆုကျေးဇူးကို မြည်းစမ်းရပြီးလျှင် ဉာဏ်အလင်းတော်ကိုခံယူခဲ့ကြဖူးလေပြီ။ 5ထိုသူတို့သည် ဘုရားရှင်၏နှုတ်ကပတ်တော်ကောင်းမြတ်ပုံကိုလည်းကောင်း၊ အနာဂတ်ကာလ၏တန်ခိုးများကိုလည်းကောင်း မြည်းစမ်းခဲ့ရသူများဖြစ်ကြသည်။ 6ထို့နောက် သူတို့သည်နောက်ပိုင်းတွင် သူတို့၏ယုံကြည်မှုကိုစွန့်ကြလေသည်။ သူတို့သည် ဘုရားရှင်၏သားတော်ကို လက်ဝါးကပ်တိုင်တွင် တစ်ဖန်တင်၍ လူအများရှေ့တွင် အရှက်ရစေသောသူများဖြစ်သောကြောင့် သူတို့အား နောက်တစ်ဖန် နောင်တရစေရန်မှာ မဖြစ်နိုင်ပေ။ 7မြေကြီးသည် မိမိအပေါ် အဆက်မပြတ်ရွာသွန်းသည့်မိုးရေကို သောက်သုံး၍ လယ်သမားတို့အဖို့ အသုံးဝင်သောအသီးအနှံများကို ဖြစ်ထွန်းစေပါက ထိုမြေကြီးသည် ဘုရားရှင်ထံမှ ကောင်းချီးကိုခံရသည်။ 8သို့သော် အကယ်၍ ထိုမြေကြီးသည် ဆူးပင်အမျိုးမျိုးတို့ကိုသာလျှင် ပေါက်ပွားစေလျှင် ထိုမြေကြီးသည် အသုံးမဝင်ဘဲ ကျိန်ဆိုခြင်းသာခံရ၍ နောက်ဆုံးတွင် မီးရှို့ဖျက်ဆီးခြင်းကိုခံရပေလိမ့်မည်။ 9ချစ်ရသောသူတို့၊ ကျွန်ုပ်တို့သည် ဤသို့ပြောဆိုသော်လည်း သင့်တို့အတွက်မူကား ကယ်တင်ခြင်းနှင့်ဆိုင်သည့် သာ၍ကောင်းမွန်သည့်အရာများ ရှိကြသည်ကို ကျွန်ုပ်တို့အခိုင်အမာယုံကြည်ကြသည်။ 10ဘုရားရှင်သည် တရားမျှတမှုမရှိသော အရှင်မဟုတ်။ သင်တို့ဆောင်ရွက်ခဲ့သည့် အမှုအရာကိုလည်းကောင်း၊ မြင့်မြတ်သောသူတို့အား ယခင်ကကူညီမစသကဲ့သို့ ယခုဆက်လက်၍ ကူညီမစရာတွင်ထားသော သင်တို့၏ချစ်ခြင်းမေတ္တာအား မေ့လျော့တော်မူမည်မဟုတ်။ 11သင်တို့မျှော်လင့်သောအရာများ ပြည့်ဝစွာ အကောင်အထည်ပေါ်လာနိုင်ရန် သင်တို့တစ်ဦးစီတိုင်းသည် အဆုံးထိတိုင်အောင် မိမိတို့၏စိတ်အားထက်သန်မှုအား ယခုအတိုင်းပြသနိုင်ရန် ကျွန်ုပ်တို့အလိုရှိသည်။ 12ကျွန်ုပ်တို့သည် သင်တို့အား ပျင်းရိသောသူများမဖြစ်စေလိုပါ။ ကတိထားတော်မူသော ယုံကြည်ခြင်းနှင့် စိတ်ရှည်ခြင်းအားဖြင့် အမွေခံရသောသူတို့အား အတုယူရန်ဖြစ်သည်။ 13ဘုရားရှင်သည် အာဗြဟံအား ကတိထားတော်မူသောအခါ တိုင်တည်၍ကျိန်ဆိုရန် မိမိထက်ကြီးမြတ်သူမရှိသဖြင့် မိမိကိုယ်ကိုတိုင်တည်တော်မူပေသည်။ 14“ငါသည် သင့်အား အမှန်ပင်ကောင်းချီးပေးမည်။ သင်၏မျိုးဆက်များအား တိုးပွားများပြားစေမည်” ဟု မိန့်တော်မူ၏။ 15ဤသို့ဖြင့် အာဗြဟံသည် စိတ်ရှည်စွာစောင့်ဆိုင်းနေခဲ့သဖြင့် ကတိတော်အတိုင်း ခံစားရလေသည်။ 16လူတို့သည် မိမိတို့ထက် ကြီးမြတ်သူတစ်ဦးတစ်ယောက်ကို တိုင်တည်၍သစ္စာဆိုတတ်ကြ၏။ ထိုသို့တိုင်တည်သစ္စာဆိုခြင်းသည် လူအချင်းချင်းအငြင်းပွားမှုအား ရပ်စဲစေတတ်လေသည်။ 17ဘုရားရှင်သည် မိမိအကြံအစည်တော်ကို ပြောင်းလဲတော်မူမည်မဟုတ်ကြောင်းကို ကတိတော်ကို အမွေဆက်ခံသူများအား ပွင့်လင်းထင်ရှားစွာ ဖော်ပြရန် တိုင်တည်သစ္စာဆိုခြင်းအားဖြင့် အာမခံတော်မူခြင်းဖြစ်သည်။ 18ထို့ကြောင့် ဘုရားရှင်၏ ကတိတော်နှင့်တိုင်တည်တော်မူခြင်းတို့သည် ပြောင်းလဲ၍ မရနိုင်သောအရာနှစ်ခုဖြစ်ကြသည်။ ထိုအရာနှစ်ခုနှင့်ပတ်သတ်၍လည်း ကိုယ်တော်သည် မုသားစကားကိုသုံးတော်မမူနိုင်။ ထို့ကြောင့် ဘုရားရှင်ထံတော်၌ ခိုလှုံလျက်ရှိကြသော ကျွန်ုပ်တို့သည် မိမိတို့အား ဘုရားရှင်ပေးတော်မူသည့် မျှော်လင့်ချက်ကို စွဲမြဲစွာခံယူထားရန် စိတ်အားတက်ကြွ၍လာကြ၏။ 19ထိုမျှော်လင့်ချက်သည် ကျွန်ုပ်တို့စိတ်ဝိညာဉ်အတွက် ချထားသည့် လုံခြုံခိုင်ခန့်သော ကျောက်ဆူးကဲ့သို့ဖြစ်ပြီး ဗိမာန်တော်ကန့်လန့်ကာကို ထိုးဖောက်ကာ အလွန်သန့်ရှင်းရာဌာနတော်ထဲသို့ ဝင်လေသည်။ 20ကိုယ်တော်ယေရှုသည် မေလခိဇေဒက်ကဲ့သို့ပင် ထာဝရအကြီးဆုံးပုရောဟိတ်ဖြစ်လာသည်။ ကိုယ်တော်သည် ရှေ့တော်ပြေးဖြစ်တော်မူပြီး ကျွန်ုပ်တို့ကိုယ်စား အလွန်သန့်ရှင်းရာဌာနတော်ထဲသို့ ဝင်လေသည်။
Currently Selected:
Hebrews 6: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
