Hebrews 5
5
1လူတို့ထဲမှ ဘုရားရှင်ရွှေးချယ်ထားသော အကြီးဆုံးပုရောဟိတ်မည်သည်ကား အပြစ်ဖြေရာယဇ်နှင့်် ပူဇော်သကာများကို ဆက်သရန်အတွက် လူတို့၏ကိုယ်စား ဘုရားရှင်အားပူဇော်ရန် ခန့်ထားခြင်းခံရသူဖြစ်သည်။ 2သူကိုယ်တိုင်၌ပင်လျှင် အားနည်းချက်အမျိုးမျိုးရှိသဖြင့် အသိပညာကင်းမဲ့၍ မှားယွင်းသူတို့အား ကိုယ်ချင်းစာတရားထားနိုင်သည်။ 3ထို့ကြောင့် သူသည် လူတို့၏အပြစ်အတွက်သာမက မိမိ၏အပြစ်အတွက်လည်း ယဇ်ပူဇော်ရသည်။ 4အဘယ်သူမျှ မိမိကိုယ်ကို အကြီးဆုံးပုရောဟိတ်အဖြစ်ဖြင့် မရယူနိုင်ပေ။ ဘုရားရှင်သည် အာရုန်အား အကြီးဆုံးပုရောဟိတ်အဖြစ် ခန့်ထားတော်မူသကဲ့သို့ ရွေးကောက်ခန့်ထားခြင်းခံရမှသာလျှင် အကြီးဆုံးပုရောဟိတ်ဖြစ်နိုင်ပေသည်။ 5ထိုနည်းတူစွာ ခရစ်တော်သည်လည်း အကြီးဆုံးပုရောဟိတ်၏ဂုဏ်ပုဒ်ကို မိမိအလိုအလျောက်ခံယူတော်မူသည်မဟုတ်။ ဘုရားရှင်က ကိုယ်တော်အား၊ “သင်သည်ငါ၏သားဖြစ်သည်။ ယနေ့ပင်လျှင် ငါသည်သင်၏ဖခမည်းတော်ဖြစ်လာသည်” ဟူ၍လည်းကောင်း 6အခြားကျမ်းချက်တွင်လည်း “သင်သည်မေလခိဇေဒက်၏ အရိုက်အရာကိုဆက်ခံသူ ထာဝရပုရောဟိတ်ဖြစ်လိမ့်မည်” ဟူ၍လည်းကောင်း မိန့်တော်မူပေသည်။ 7ခရစ်တော်သည် လူ့ဇာတိနှင့်သက်တော်ထင်ရှားရှိစဉ်အခါက မိမိအားသေခြင်းမှ ကယ်တင်တော်မူနိုင်သော ဘုရားရှင်ထံတော်သို့ ကြွေးကြော်ကာမျက်ရည်ကျလျက် အသနားခံတောင်းလျှောက်တော်မူသည်။ ဘုရားရှင်သည်လည်း ကိုယ်တော်၏ဆုတောင်းချက်များကို နားဆင်တော်မူခဲ့သည်။ အဘယ့်ကြောင့်ဆိုသော် ကိုယ်တော်သည် စိတ်နှလုံးနှိမ့်ချလျက် ဘုရားရှင်၏အလိုတော်ကို ဝန်ခံတော်မူသောကြောင့်ပင်ဖြစ်သည်။ 8ကိုယ်တော်သည် ဘုရားရှင်၏သားတော်ပင်ဖြစ်သော်လည်း ဆင်းရဲဒုက္ခများကိုခံခြင်းအားဖြင့် နာခံတတ်ရန် သင်ယူတော်မူသည်။ 9ကိုယ်တော်သည် ပြီးပြည့်စုံခြင်းသို့ရောက်သောအခါ မိမိအား နာခံသောသူအပေါင်းတို့၏ ထာဝရကယ်တင်ခြင်းပေးတော်မူသော အရှင်ဖြစ်လာတော်မူသည်။ 10ဘုရားရှင်သည် ကိုယ်တော်အား မေလခိဇေဒက်ကဲ့သို့ပင် ပုရောဟိတ်အကြီးအကဲအဖြစ် ခန့်အပ်တော်မူလေသည်။ 11ဤအကြောင်းနှင့်ပတ်သတ်၍ ကျွန်ုပ်တို့သည် ပြောဆိုစရာများစွာရှိသည်။ သို့ရာတွင် သင်တို့သည် နားလည်ရန်မကြိုးစားကြသောကြောင့် သင်တို့အား ရှင်းလင်းဖော်ပြရန်ခက်ပေသည်။ 12သင်တို့သည် အချိန်ကာလအရ ဆရာများဖြစ်သင့်သော်လည်း ဘုရားရှင်၏နှုတ်ကပတ်တော်နှင့်ဆိုင်သော အခြေခံအမှန်တရားများကို တစ်စုံတစ်ယောက်မှ သင်တို့အား သင်ကြားပေးရန် လိုနေသေးပါသည်။ သင်တို့သည် မာသောအစားအစာအား မစားနိုင်ကြသေးဘဲ နို့ကိုသာလျှင် သောက်နိုင်ကြသေးသည်။ 13နို့ကိုသာ သောက်သုံးနိုင်သောသူများသည် နို့စို့သူငယ်သာဖြစ်သောကြောင့် အမှန်နှင့်အမှားကို သိရှိနားလည်သူမဟုတ်ပေ။ 14မာသောအစားအစာသည်ကား အရွယ်ရောက်ပြီး သူတို့အတွက်ဖြစ်သည်။ သူတို့သည်လေ့ကျင့်မှုအားဖြင့် အကောင်းနှင့််အဆိုးကို ပိုင်းခြားသိရှိသူများဖြစ်ကြသည်။
Currently Selected:
Hebrews 5: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
