Hebrews 4
4
1ထို့ကြောင့် ဘုရားရှင်၏စံမြန်းနားခိုရာသို့ ဝင်ရမည့်ကတိတော်ရှိနေသေးလျက်နှင့်ပင် သင်တို့ထဲမှ မည်သူတစ်ဦးတစ်ယောက်မျှ မဝင်လိုက်ရဘဲနေမည်ကို သတိပြုကြလော့။ 2အကြောင်းမူကား ကျွန်ုပ်တို့သည် ထိုသူတို့နည်းတူ မင်္ဂလာသတင်းကောင်းကိုကြားကြရသည်။ သို့ရာတွင် ထိုသူတို့ကြားရသည့် မင်္ဂလာသတင်းကောင်းသည် သူတို့အတွက်အကျိုးမရှိချေ။ အဘယ့်ကြောင့်ဆိုသော် သူတို့သည် မင်္ဂလာသတင်းကောင်းကို ကြားရသော်လည်း ယုံကြည်ခြင်းဖြင့်လက်မခံကြသောကြောင့်ဖြစ်သည်။ 3သို့ဖြစ်၍ ယုံကြည်သူကျွန်ုပ်တို့သည် ဘုရားရှင်ကတိထားတော်မူသော ဘုရားရှင်၏စံမြန်းနားခိုရာသို့ ဝင်ကြရသည်။ ဘုရားရှင်က “ထို့ကြောင့် ငါသည်အမျက်ထွက်ကာ ‘သူတို့သည် ဘယ်သောအခါမျှ ငါ၏စံမြန်းနားခိုရာသို့ ဝင်ကြရလိမ့်မည်မဟုတ်’ ဟု တိုင်တည်လျက်ပြောဆို၏” ဟု မိန့်တော်မူခဲ့သည့်အတိုင်းပင်ဖြစ်သည်။ လောကကိုဖန်ဆင်းတော်မူချိန်မှစ၍ ကိုယ်တော်သည် မိမိလုပ်ဆောင်ရန်အမှုကိစ္စများ ပြီးဆုံးသွားသော်လည်း ဤစကားကိုမိန့်တော်မူပေသည်။ 4အကြောင်းမူကား ကျမ်းစာတော်တွင် ခုနှစ်ရက်မြောက်သောနေ့နှင့််ပတ်သတ်၍ “ဘုရားရှင်သည် သတ္တမနေ့၌ မိမိပြုစရာရှိသမျှသော အမှုကိစ္စများပြီးစီး၍ အနားယူတော်မူသည်” ဟု ဖော်ပြထားသောကြောင့်ဖြစ်သည်။ 5တစ်ဖန် ဤအကြောင်းအရာနှင့််ပတ်သတ်၍ “သူတို့သည် ဘယ်သောအခါမျှ ငါ၏စံမြန်းနားခိုရာသို့ ဝင်ကြရလိမ့်မည်မဟုတ်” ဟု ဖော်ပြထားပြန်သည်။ 6ထို့ကြောင့် မင်္ဂလာသတင်းကောင်းကို ဦးစွာပထမကြားရသော်လည်း ထိုသတင်းကောင်းကို မယုံကြည်ကြသဖြင့် ဘုရားရှင်၏စံမြန်းနားခိုရာသို့ ဝင်ခွင့်မရကြချေ။ သို့သော် အခြားသူတို့မှာမူ ထိုစံမြန်းရာနေရာသို့ ဝင်ခွင့်ရှိသေးသည်။ 7ဘုရားရှင်သည် စံမြန်းနားခိုရာသို့ဝင်ခွင့်ပေးရန်အတွက် “ယနေ့”ဟု နာမည်တွင်သော နေ့ရက်တစ်ရက်ကို ဘုရားရှင်သတ်မှတ်ပေးတော်မူသည့် အချက်က သက်သေပြသည်။ ကိုယ်တော်သည် ကျမ်းစာတော်တွင်ဖော်ပြပြီးသည့်အတိုင်း နှစ်ပေါင်းများစွာကြာသောအခါ ဒါဝိဒ်မင်းမှတစ်ဆင့် ထိုနေ့ရက်ကိုအကြောင်းပြု၍ “သင်တို့သည် ဘုရားရှင်၏အသံတော်ကို ယနေ့ကြားရလျှင်ခေါင်းမမာကြနှင့်” ဟု မိန့်တော်မူသည်။ 8အကယ်၍ ယောရှုပေးသည့်စံမြန်းရာနေရာမှာ ဘုရားရှင်ကတိထားတော်မူသည့် စံမြန်းရာနေရာဖြစ်ပါမူ ဘုရားရှင်သည် အခြားနေ့ရက်တစ်ရက်အကြောင်းအား မိန့်ကြားတော်မူမည်မဟုတ်။ 9သို့ဖြစ်၍ သတ္တမနေ့၌ ဘုရားရှင်သည် အနားယူတော်မူသကဲ့သို့ ဘုရားရှင်၏လူတို့အတွက် စံမြန်းနားခိုရာရှိသေးသည်။ 10အဘယ်ကြောင့်ဆိုသော် ဘုရားရှင်ကတိထားတော်မူသော စံမြန်းရာနေရာသို့ ဝင်သောသူတို့သည် ဘုရားရှင်နည်းတူ မိမိအလုပ်မှ အနားယူရမည်ဖြစ်သောကြောင့်ပင်ဖြစ်သည်။ 11ထို့ကြောင့် ကျွန်ုပ်တို့သည် ထိုစံမြန်းရာနေရာသို့ ဝင်ရောက်နိုင်ရန် အစွမ်းကုန်ကြိုးစားကြစို့။ သို့မှသာ မနာခံသောသူတို့၏စံနမူနာကိုလိုက်၍ မည်သူတစ်ဦးတစ်ယောက်မျှ ပျက်စီးခြင်းမရှိကြမည်ဖြစ်သည်။ 12ဘုရားရှင်၏နှုတ်ကပတ်တော်သည် သက်ဝင်လှုပ်ရှား၍ သန်လျက်တကာတို့ထက် ထက်သည်။ ထိုနှုတ်ကပတ်တော်သည် အသက်နှင့်ဝိညာဉ်တွေ့ဆုံရာအထိလည်းကောင်း၊ အရိုးဆစ်နှင့်ခြင်ဆီတွေ့ရာအထိလည်းကောင်း ထိုးဖောက်ကာ ပိုင်းခြားနိုင်သည်။ လူတို့၏ စိတ်နှလုံး၏စဥ်းစားဆင်ခြင်မှုနှင့် သဘောထားတို့ကိုလည်း စစ်ဆေးတတ်သည်။ 13ဘုရားရှင်၏မျက်မှောက်၌ မထင်ရှားသောအရာဟူ၍ တစ်စုံတစ်ရာမျှမရှိ။ ဖန်ဆင်းတော်မူသောအရာအားလုံးတို့သည် မျက်မှောက်တော်၌ ထင်ရှားလျက်ရှိသည်။ ကျွန်ုပ်တို့အားလုံးသည် မိမိတို့ပြုသမျှအတွက် ထိုအရှင်ထံ၌ ဝန်ခံကြရမည်ဖြစ်သည်။ 14သို့ဖြစ်၍ ကျွန်ုပ်တို့သည် ကျွန်ုပ်တို့ဝန်ခံခဲ့သောယုံကြည်မှုအား မြဲမြံစွာစွဲကိုင်ထားကြစို့။ အဘယ်ကြောင့်ဆိုသော် ကျွန်ုပ်တို့၌ ရွှေမြို့တော်သို့ တက်ကြွသွားသော ဘုရားရှင်၏သားတော် ကိုယ်တော်ယေရှုတည်းဟူသော အကြီးဆုံးပရောဟိတ်ရှိသောကြောင့်ပင်ဖြစ်သည်။ 15ကျွန်ုပ်တို့၏အကြီးဆုံးပရောဟိတ်သည် ကျွန်ုပ်တို့၏ အားနည်းချက်များအား စာနာထောက်ထားခြင်းမရှိသူမဟုတ်။ ကျွန်ုပ်တို့နည်းတူ ဖြားယောင်းသွေးဆောင်ခြင်းအမျိုးမျိုးကို ခံခဲ့ရသူဖြစ်တော်မူသည်။ သို့ရာတွင် ကိုယ်တော်သည် အပြစ်ဒုစရိုက်နှင့် ကင်းလွတ်တော်မူသည်။ 16သို့ဖြစ်၍ ကျွန်ုပ်တို့သည် ကရုဏာတော်နှင့်ကျေးဇူးတော်ကိုခံစားလျက် လိုအပ်သည့်အချိန်၌ ကူညီမစခြင်းခံရရန် ကျေးဇူးတော်ရှိရာ ဘုရားရှင်၏ ရာဇပလ္လင်တော်သို့ ရဲဝံ့စွာ ချဉ်းကပ်ကြစို့။
Currently Selected:
Hebrews 4: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
