Hebrews 3
3
1ထို့ကြောင့် ဘုရားရှင်ရွေးချယ်ခေါ်ယူတော်မူခြင်းကို ခံရသော မြင့်မြတ်သောညီအစ်ကိုမောင်နှမတို့၊ ကျွန်ုပ်တို့၏အကြီးဆုံးပုရောဟိတ်နှင့် သာဝကအဖြစ် ကျွန်ုပ်တို့ယုံကြည်ဝန်ခံသည့် ကိုယ်တော်ယေရှုအကြောင်းကို စဉ်းစားဆင်ခြင်ကြလော့။ 2မောရှေသည် ဘုရားရှင်၏အိမ်တော်တစ်ခုလုံးအပေါ်တွင် သစ္စာစောင့်သိသကဲ့သို့ ကိုယ်တော်ယေရှုသည်လည်း မိမိအား ဤအလုပ်တာဝန်ကို ပေးအပ်တော်မူသော ဘုရားရှင်အား သစ္စာစောင့်သိတော်မူ၏။ 3အိမ်တစ်ဆောင်ကိုတည်ဆောက်သူသည် အိမ်ထက်ပို၍ ဂုဏ်ပြုချီးမြှင့်ခြင်းကို ခံထိုက်သကဲ့သို့ ကိုယ်တော်ယေရှုသည်လည်း မောရှေထက်ပို၍ ချီးမြှင့်ခြင်းကိုခံထိုက်ပေသည်။ 4အကြောင်းမူကား အိမ်တိုင်းအား တစ်စုံတစ်ယောက်မှ တည်ဆောက်သော်လည်း ဘုရားရှင်သည် အရာအားလုံးတို့အား တည်ဆောက်သောသူဖြစ်တော်မူသည်။ 5မောရှေသည် အစေခံအနေဖြင့် ဘုရားရှင်၏အိမ်တော်တွင် သစ္စာစောင့်သိပြီး အနာဂတ်ကာလ၌ ဘုရားရှင်မိန့်ကြားတော်မူမည့်အရာများကို ပြောကြားပေးသော သက်သေခံတစ်ဦးဖြစ်သည်။ 6သို့သော် ခရစ်တော်မူကား ဘုရားရှင်၏အိမ်တော်ကို အစိုးရသောသားတော်အနေဖြင့် သစ္စာစောင့်သိတော်မူ၏။ ကျွန်ုပ်တို့သည်ရဲစွမ်းသတ္တိရှိ၍ မိမိတို့မျှော်လင့်သည့်အရာကို ယုံကြည်စိတ်ချမှုရှိပါလျှင် ကျွန်ုပ်တို့သည် ကိုယ်တော်၏အိမ်တော်ဖြစ်ကြသည်။ 7ထို့ကြောင့် ဉာဏ်အလင်းတော်မှ အောက်ပါအတိုင်းမိန့်တော်မူသည်မှာ “ဘုရားရှင်၏အသံတော်ကို ယနေ့ကြားလျှင် 8ခေါင်းမမာကြနှင့်။ သင်တို့ဘိုးဘေးများသည် ကိုယ်တော်အားပုန်ကန်၍ တောကန္တာရတွင် ကိုယ်တော်ကို စမ်းသပ်ကြသည်။ သူတို့ခေါင်းမာကြသကဲ့သို့ သင်တို့ခေါင်းမမာကြနှင့်။ 9သင်တို့၏ဘိုးဘေးများသည် အနှစ်လေးဆယ်တိုင်တိုင် ငါပြုတော်မူသောအမှုကို တွေ့မြင်ခဲ့သော်လည်း ငါ့အားဆန့်ကျင်၍ စမ်းသပ်ကြသည်။ 10သို့ဖြစ်၍ ငါသည် ထိုမျိုးဆက်အား အမျက်ဒေါသထွက်တော်မူသဖြင့် ‘သူတို့၏စိတ်နှလုံံးများသည် အစဉ်လမ်းလွဲ၍ ငါ၏လမ်းစဥ်ကို မသိကြ’ ဟု ငါဆိုခြင်းဖြစ်သည်။ 11ထို့ကြောင့် ငါသည် အမျက်ဒေါသထွက်၍ ‘သူတို့သည် ဘယ်သောအခါမျှ ငါ၏စံမြန်းနားခိုရာသို့ ဝင်ကြရလိမ့်မည်မဟုတ်’ ဟု ငါတိုင်တည်ခဲ့သည်။” ဟူ၍ဖြစ်သည်။ 12ယုံကြည်သူညီအကိုမောင်နှမတို့၊ အသက်ရှင်တော်မူသော ဘုရားရှင်ကို ကျောခိုင်းသွားသည့်တိုင်အောင် ဆိုးညစ်ယုံမှားတတ်သူတစ်စုံတစ်ယောက်မျှ သင်တို့တွင်မရှိစေရန် သတိပြုကြလော့။ 13သို့သော် သင်တို့သည် အပြစ်ဒုစရိုက်၏လှည့်စားမှုကြောင့် ခေါင်းမာသူများမဖြစ်ကြစေရန် ‘ယနေ့’ ဟုခေါ်သော နေ့ရက်တွင် နေ့စဉ်နေ့တိုင်း အချင်းချင်း အားပေးတိုက်တွန်းကြလော့။ 14ကျွန်ုပ်တို့၏ မူလခံယူချက်အား အဆုံးတိုင်အောင် ခိုင်မြဲစွာစွဲကိုင်ထားလျှင် ကျွန်ုပ်တို့သည် ခရစ်တော်နှင့် သက်ဆိုင်သူများဖြစ်ကြသည်။ 15ကျမ်းစာ၌၊ “သင်တို့သည် ယနေ့ ဘုရားရှင်၏အသံတော်ကို ကြားရလျှင် သင်တို့၏ဘိုးဘေးများ ပုန်ကန်စဉ်အခါက ခေါင်းမာကြသကဲ့သို့ ခေါင်းမမာကြနှင့်” ဟု ဖော်ပြထားသည်။ 16ဘုရားရှင်၏အသံတော်ကို ကြားလျက် ဘုရားရှင်ကို ပုန်ကန်ကြသူများကား မည်သူတို့နည်း။ ထိုသူတို့ကား အီဂျစ်ပြည်မှ မောရှေခေါ်ထုတ်လာသော သူအပေါင်းတို့မဟုတ်လော။ 17နှစ်ပေါင်းလေးဆယ်တိုင်တိုင် ဘုရားရှင်၏အမျက်တော်ကို ခံရသူတို့ကား မည်သူတို့နည်း။ အပြစ်ဒုစရိုက်ပြုမိသဖြင့် တောကန္တာရတွင် သေဆုံးသောသူများမဟုတ်လော။ 18ဘုရားရှင်သည် “သူတို့သည် ဘယ်သောအခါမျှ ငါ၏စံမြန်းနားခိုရာသို့ ဝင်ကြရလိမ့်မည်မဟုတ်” ဟု မည်သူတို့အား တိုင်တည်တော်မူပါသနည်း။ ကိုယ်တော်၏စကားကို နာခံခြင်းမရှိသောသူများပင်မဟုတ်ပါလော။ 19သို့ဖြစ်၍ သူတို့သည်မယုံကြည်ကြသောကြောင့် ဘုရားရှင်၏စံမြန်းနားခိုရာသို့ ဝင်ကြရလိမ့်မည်မဟုတ် သည်ကို ကျွန်ုပ်တို့သိကြသည်။
Currently Selected:
Hebrews 3: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
