Hebrews 2
2
1ထို့ကြောင့် ကျွန်ုပ်တို့ကြားနာရသမျှတို့ကို ပို၍ပင် အာရုံစိုက်နားထောင်ပြီး ထိုအရာနှင့် ကင်းကွာသွားခြင်း မဖြစ်ကြပါစေနှင့်။ 2နတ်ဒေဝါများမှတစ်ဆင့် ပြောကြားတော်မူသော သတင်းစကားများသည် မှန်ကန်သောသတင်းစကားများဖြစ်သဖြင့် ထိုသတင်းစကားများကို နာခံခြင်း မရှိသောသူများသည် ထိုက်သင့်သော အပြစ်ဒါဏ်များကို စီရင်ခြင်းခံကြရလိမ့်မည်။ 3ဤမျှထူးမြတ်သည့် ကယ်တင်ခြင်းသတင်းစကားအား ကျွန်ုပ်တို့ဂရုစိုက်ခြင်းမပြုဘဲနေကြပါက ကျွန်ုပ်တို့သည် အပြစ်ဒဏ်စီရင်ခြင်းနှင့် မည်သို့ကင်းလွတ်နိုင်ကြပါမည်နည်း။ ထိုကယ်တင်ခြင်းသတင်းစကားကို ဘုရားရှင်ကိုယ်တော်တိုင် ဦးစွာပထမဟောကြားတော်မူ၍ ကြားနာရသူတို့က ကျွန်ုပ်တို့အား ထိုသတင်းစကားမှန်ကန်ကြောင်းကို အတည်ပြုပေးခဲ့ကြသည်။ 4တစ်ချိန်တည်း၌ပင် ဘုရားရှင်သည် နိမိတ်လက္ခဏာများ၊ အံ့ဩဖွယ်ရာများနှင့် အံ့ဖွယ်တန်ခိုးအမျိုးမျိုးတို့အား ပြတော်မူခြင်းအားဖြင့်လည်းကောင်း၊ ဉာဏ်အလင်းတော်သည် မိမိအလိုတော်အတိုင်း ဆုကျေးဇူးများအား ဝေမျှတော်မူခြင်းအားဖြင့်လည်းကောင်း ထပ်လောင်းသက်သေပြတော်မူသည်။ 5ဘုရားရှင်သည် ကျွန်ုပ်တို့ပြောဆိုနေသော နောင်အခါတည်ရှိမည့်ကမ္ဘာသစ်အား အုပ်စိုးရန် နတ်ဒေဝါများကို ပေးအပ်တော်မမူပေ။ 6သို့သော် ကျမ်းစာတစ်နေရာတွင် တစ်စုံတစ်ယောက်သည်၊ "လူသည် မည်သို့သောသူဖြစ်ပါ၍ ကိုယ်တော်သည် သူ့အား သတိရတော်မူပါမည်နည်း။ သာမန်လူသားသည် မည်သို့သောသူဖြစ်၍ ကိုယ်တော်သည် သူ့အား ဂရုပြုတော်မူရပါမည်နည်း။ 7ကိုယ်တော်သည် သူ့အား ကာလအနည်းငယ်မျှ နတ်ဒေဝါတို့ထက် နိမ့်ကျစေတော်မူ၍ ဘုန်းအသရေ၊ ဂုဏ်ကျက်သရေနှင့်ပြည့်ဝစေတော်မူပါသည်။ 8အရာအားလုံးတို့အား ကိုယ်တော်၏ခြေဖဝါးအောက်၌ ချထားတော်မူသည်" ဟု ဖော်ပြထား၏။ 'အရာအားလုံးတို့အား ကိုယ်တော်၏ခြေဖဝါးအောက်၌ ချထားတော်မူသည်' ဟုဆိုရာ၌ သူ၏စိုးမိုးခြင်းအား မခံရသည့်အရာ တစ်စုံတစ်ခုမျှမရှိပေ။ သို့ရာတွင် ယခုအခါ၌ သူသည် အရာအားလုံးတို့အား စိုးမိုးခွင့်ရကြောင်း ကျွန်ုပ်တို့မတွေ့မမြင်ကြရသေးပေ။ 9သို့သော် ကျွန်ုပ်တို့တွေမြင်ကြရသူကား ဘုရားရှင်၏ကျေးဇူးတော်အားဖြင့် လူအပေါင်းတို့အတွက် အသက်တော်ကိုစွန့်တော်မူနိုင်ရန် ကာလအနည်းငယ်မျှ နတ်ဒေဝါများထက် နှိမ့်ချမှုကိုခံရသည့် ကိုယ်တော်ယေရှုပင်ဖြစ်တော်မူသည်။ ထိုအရှင်သည် အသေခံတော်မူခဲ့သည့်အတွက် ဘုန်းအသရေ၊ ဂုဏ်အသေရေနှင့်ပြည့်ဝလျက်ရှိတော်မူသည်ကို ယခုအခါ ကျွန်ုပ်တို့တွေ့မြင်ကြရသည်။ 10အရာအားလုံးတို့အား ဖန်ဆင်းပြုပြင်ထိန်းသိမ်းစောင့်ရှောက်တော်မူသော ဘုရားရှင်သည် မိမိ၏သားသမီးများစွာတို့အား ဘုန်းအသရေခံစားခွင့်ပေးတော်မူနိုင်ရန် ဆင်းရဲဒုက္ခကိုခံစေခြင်းအားဖြင့် ကိုယ်တော်ယေရှုအား ပြည့်ဝစုံလင်စေတော်မူသည်။ ဤသို့ဘုရားရှင်ပြုတော်မူသည်မှာ လျော်ကန်သင့်မြတ်လှပေသည်။ အဘယ့်ကြောင့်ဆိုသော် ကယ်တင်ခြင်းရရှိကြစေရန် ထိုသူတို့အားပို့ဆောင်သူမှာ ကိုယ်တော်ယေရှုပင်ဖြစ်သောကြောင့်တည်း။ 11ကိုယ်တော်ယေရှုသည် လူတို့အားအပြစ်များမှ သန့်စင်စေတော်မူသည်။ ကိုယ်တော်နှင့်ကိုယ်တော်သန့်စင်စေတော်မူသောသူတို့တွင် ဖခမည်းတော်တစ်ဦးတည်းရှိသဖြင့် ကိုယ်တော်သည် ထိုသူတို့အား မိမိ၏ညီအစ်ကိုမောင်နှမများဟု ခေါ်ဆိုရန်ရှက်တော်မမူပေ။ 12ကိုယ်တော်ယေရှုသည် "ကျွန်ုပ်သည် ကျွန်ုပ်၏ညီအစ်ကိုမောင်နှမတို့ထံ ကိုယ်တော်၏နာမတော်အား ပြောကြားပါမည်။ စုဝေးကြသောလူများအလယ်၌ ကိုယ်တော်အား သီချင်းဆို၍ ချီးမွမ်းပါမည်"ဟု ဘုရားရှင်အား မိန့်တော်မူသည်။ 13တစ်ဖန် ကိုယ်တော်သည် "ကျွန်ုပ်သည် ဘုရားရှင်အား ယုံကြည်ကိုးစားမည်" ဟူ၍လည်းကောင်း၊ ထို့နောက်တစ်ဖန် "ကြည့်လော့။ ကျွန်ုပ်သည် ကျွန်ုပ်အား ဘုရားရှင်ပေးအပ်ထားသည့် သားသမီးများနှင့်အတူ ဤနေရာ၌ရှိသည်" ဟူ၍လည်းကောင်း မိန့်တော်မူလေသည်။ 14ထိုသားသမီးများသည် အသွေးအသားရှိသူများဖြစ်ကြသဖြင့် ကိုယ်တော်ယေရှုသည် ထိုသူတို့နည်းတူ အသွေးအသားရှိသူအဖြစ်အား ခံယူတော်မူသည်။ ထိုသို့ခံယူတော်မူခြင်းမှာ သေခြင်းကိုအစိုးရသည့် မာရ်နတ်၏တန်ခိုးကို ချိုးနှိမ်ပစ်ရန်ပင်ဖြစ်သည်။ 15ဤနည်းအားဖြင့် သေခြင်းကိုကြောက်သဖြင့် တစ်သက်လုံးကျွန်ကဲ့သို့ နေထိုင်ကြရသောသူတို့ကို လွတ်မြောက်စေတော်မူပေသည်။ 16အမှန်စင်စစ် ကိုယ်တော်သည် နတ်ဒေဝါများအား ကူညီမစတော်မူမည်မဟုတ်ဘဲ အာဗြဟံ၏မျိုးဆက်များအား ကူညီမစတော်မူမည်ဖြစ်ကြောင်း သိသာထင်ရှားပေသည်။ 17ထို့ကြောင့် ကိုယ်တော်သည် လူတို့၏အပြစ်များကို ဖြေလွှတ်အံ့သောငှာ ကရုဏာနှင့်သစ္စာရှိသော အကြီးဆုံးပုရောဟိတ်အဖြစ်ဖြင့် ဘုရားရှင်၏အမူတော်ကို ဆောင်ရွက်နိုင်ရန် အရာရာတိုင်း၌ မိမိ၏ညီအစ်ကိုမောင်နှမများနှင့် တူညီရပေသည်။ 18အဘယ်ကြောင့်ဆိုသော် ကိုယ်တော်သည် ဖြားယောင်းသွေးဆောင်ခြင်းအားခံရသောအခါ၌ မိမိကိုယ်တိုင်ဆင်းရဲဒုက္ခကိုခံခဲ့ရသဖြင့် ဖြားယောင်းသွေးဆောင်ခြင်းခံရသူတို့အား ကူညီနိုင်တော်မူလေသည်။
Currently Selected:
Hebrews 2: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
