2 Peter 1
1
1ကျွန်ုပ်သည် ယေရှုခရစ်တော်၏ အစေခံနှင့် သာဝကဖြစ်သူ ရှိမုန်ပေတရုဖြစ်သည်။ ကျွန်ုပ်တို့၏ဘုရားရှင်နှင့် ကယ်တင်ရှင်ဖြစ်တော်မူသော ယေရှုခရစ်တော်၏ ဖြောင့်မတ်ခြင်းတရားကြောင့် ခံယူရရှိသည့် ယုံကြည်ခြင်းတရားကြောင့် အဖိုးထိုက်သည့် ယုံကြည်ခြင်းကို ခံယူထားသည့် သင်တို့ထံသို့ စာရေးလိုက်သည်။ 2ဘုရားရှင်နှင့် အရှင်ယေရှုကို သိကျွမ်းရခြင်းအားဖြင့် သင်တို့သည် ကျေးဇူးတော်နှင့်ငြိမ်ချမ်းခြင်းတို့ကို အပြည့်အဝခံစားကြရပါစေသတည်း။ 3အသက်ရှင်ခြင်းနှင့်တကွ ဘာသာတရားကိုင်းရှိုင်းခြင်းတို့နှင့်ဆိုင်သော လိုအပ်သည့်အရာအားလုံးတို့အား ကိုယ်တော်သည် မိမိ၏ဘုရားတန်ခိုးတော်ဖြင့် ကျွန်ုပ်တို့အား ပေးတော်မူသည်။ ဘုန်းအသရေနှင့် ကောင်းမြတ်တော်မူခြင်းကို ခံစားရစေရန် ကျွန်ုပ်တို့အား ရွှေးကောက်တော်မူသောအရှင်အား သိခြင်းအားဖြင့် ဤအရာအားလုံးအား ကျွန်ုပ်တို့လက်ခံရရှိကြသည်။ 4ကိုယ်တော်သည် ထိုဘုန်းအသရေတော်နှင့် ကောင်းမြတ်တော်မူခြင်းတို့အားဖြင့် အဖိုးတန်၍ကြီးမြတ်သော ကတိတော်ကို ကျွန်ုပ်တို့အား ပေးတော်မူသည်။ ထိုကတိတော်အားဖြင့် သင်တို့သည် ဤလောကတွင် ဖောက်ပြန်ပျက်ဆီးတတ်သော ကိလေသာအညစ်အကြေးများမှ လွတ်မြောက်နိုင်ပြီး ဘုရားရှင်နှစ်သက်တော်မူသော အမှုတော်တွင် ပါဝင်စေရန်ဖြစ်သည်။ 5ဤအကြောင်းကြောင့် သင်တို့သည် မိမိတို့၏ယုံကြည်ခြင်းကို ကောင်းမှုပြုခြင်းကိုလည်းကောင်း၊ ကောင်းမှုပြုခြင်း၌ အသိပညာအားဖြင့်လည်းကောင်း 6အသိပညာ၌ မိမိကိုယ်ကိုယ် ချုပ်တည်းခြင်းဖြင့်လည်းကောင်း၊ မိမိကိုယ်ကိုယ်ချုပ်တည်းခြင်း၌ သည်းခံခြင်းကိုလည်းကောင်း၊ သည်းခံခြင်း၌ ဘုရားဝတ်၌မွှေလျော်ခြင်းဖြင့်လည်းကောင်း၊ 7ဘုရားဝတ်၌ မွေ့လျော်ခြင်းကို ညီအစ်ကိုမောင်နှမ ချစ်ခြင်းကိုလည်းကောင်း၊ ညီအစ်ကိုမောင်နှမချစ်ခြင်း၌ ချစ်ခြင်းမေတ္တာဖြင့်လည်းကောင်း ထပ်လောင်းဖြည့်စွက်ပေးရန် အစွမ်းကုန်ကြိုးစားကြပါ။ 8ဤသို့သောအရည်အချင်းများသည် သင်တို့ထံ၌ တိုးပွားလာပါက သင်တို့သည် ကျွန်ုပ်တို့၏အရှင် ယေရှုခရစ်တော်ကို သိကျွမ်းရာ၌ တိုးပွား၍အကျိုးဖြစ်ထွန်းလိမ့်မည်။ 9ဤအရည်အချင်းများနှင့် ကင်းသူသည် အမြင်ကျဉ်း၍ မျက်စိကန်းသူဖြစ်သည်။ သူသည် ယခင်ကမိမိ၏အပြစ်များမှ ပြေလွတ်ခွင့်ရရှိသည်ကို မေ့လျော့လေပြီ။ 10ထို့ကြောင့် ကျွန်ုပ်၏ညီအစ်ကိုမောင်နှမတို့၊ သင်တို့ကို ဘုရားရှင်ခေါ်ယူရွေးချယ်တော်မူခြင်းကို တည်တံ့ ခိုင်မြဲစေရန် ပို၍ကြိုးစားကြလျှင် သင်တို့သည် မည်သည့်အခါမျှ မိမိတို့၏ယုံကြည်ခြင်းကို စွန့်လွတ်ကြလိမ့်မည် မဟုတ်။ 11ဤနည်းအားဖြင့် သင်တို့သည် ကယ်တင်ရှင်ဖြစ်တော်မူသော ယေရှုခရစ်တော်၏ ထာဝရနိုင်ငံတော်သို့ဝင်နိုင်ရန် အခွင့်အရေး အပြည့်အဝကိုရရှိကြလိမ့်မည်။ 12ထို့ကြောင့်သင်တို့သည် ဤအကြောင်းအရာများကို သိရှိနားလည်လျက် မိမိတို့ခံယူရရှိထားသည့် သမ္မာတရားတော်တွင် အခိုင်အမာ ယုံကြည်နေပြီဖြစ်သော်လည်း ကျွန်ုပ်သည် သင်တို့အား ထိုအကြောင်းကို အမြဲတမ်းသတိပေးလိုပါသည်။ 13ကျွန်ုပ်အသက်ရှင်လျက်ရှိနေသမျှကာလပတ်လုံး ထိုအကြောင်းကို သင်တို့အား သတိပေးနှိုးဆော်လျက်နေသင့် သည်ဟု ယူဆသည်။ 14အဘယ်ကြောင့်ဆိုသော် ကျွန်ုပ်သည် မကြာမီပင် ဤပျက်စီးတတ်သည့် ခန္ဓာကိုယ်ကို စွန့်ပစ်ရမည်ဖြစ်ကြောင်း သိသောကြောင့်ဖြစ်ပေသည်။ ကျွန်ုပ်တို့အရှင်ဖြစ်သော ယေရှုခရစ်တော်ကလည်း ထိုကဲ့သို့ဖြစ်မည်ဟု ကျွန်ုပ်အား အတိအလင်းမိန့်ကြားထားသည်။ 15ထို့ကြောင့် ကျွန်ုပ်မရှိသည့်နောက် သင်တို့သည် ဤအကြောင်းအရာများကို အစဉ်သတိရနေစေရန်ကျွန်ုပ်သည် အစွမ်းကုန် ကြိုးစားအားထုတ်ပါမည်။ 16ကျွန်ုပ်တို့အရှင်ဖြစ်သော ယေရှုခရစ်တော်သည် တန်ခိုးတော်နှင့် ကြွလာတော်မူခြင်းအကြောင်းကို သင်တို့အားပြောပြရာ၌ ကျွန်ုပ်တို့သည် ဒဏ္ဍာရီပုံပြင်များကို ပြောကြားနေခြင်းမဟုတ်။ ကျွန်ုပ်တို့ကိုယ်တိုင် ကိုယ်တော်၏ကြီးမြတ်သော တန်ခိုးတော်ကို ဖူးမြင်ခဲ့ကြရသည်များကို ပြောပြနေခြင်းဖြစ်ပါသည်။ 17အကြီးမြတ်ဆုံးသော ဘုန်းအသရေထဲမှ “ဤသူကား ငါနှစ်သက်မြတ်နိုးသော ငါ၏ချစ်သားဖြစ်၏” ဟူသော အသံတော်မိန့်တော်မူသော အချိန်၌ အဖဘုရားရှင်ထံမှ ကိုယ်တော်သည် ဂုဏ်အသရေတော်နှင့် ဘုန်းအသရေတော်ကို ခံယူတော်မူခဲ့သည်။ 18ထိုအချိန်က ကျွန်ုပ်တို့ကိုယ်တိုင်ပင်လျှင် မြင့်မြတ်သောတောင်ပေါ်တွင် ကိုယ်တော်နှင့်အတူရှိနေစဥ် ရွှေမြို့တော်မှ ထွက်ပေါ်လာသော အသံတော်ကို ကြားရပေသည်။ 19သို့ဖြစ်၍ ကျွန်ုပ်တို့သည် အရိယာသူတော်စင်များ ကြေညာသည့် ဗျာဒိတ်ကို ပို၍ စိတ်ချယုံကြည်ကြသည်။ ထိုဗျာဒိတ်ကို ဂရုပြုကြလော့။ အဘယ်ကြောင့်ဆိုသော် ထိုဗျာဒိတ်သည် သင်တို့စိတ်နှလုံးထဲတွင် မိုးသောက်ကြယ်ပေါ်ထွက်ချိန်မတိုင်မှီ အမှောင်ထဲတွင် ထွန်းလင်းလျက်နေသည့် မီးခွက်နှင့်တူသည်။ 20သို့ရာတွင် မည်သူမျှ မိမိအလိုအလျောက် အရိယာသူတော်စင်၏ ဟောပြောချက်အနက်အဓိပ္ပာယ်ကို ပြန်ဆို၍ မရနိုင်ကြောင်း သင်တို့ အထူးမှတ်ယူကြပါ။ 21အဘယ်ကြောင့်ဆိုသော် မည်သည့် ရှေ့ဖြစ်ဟောပြောချက်မျှ မိမိ၏ အလိုဆန္ဒအရ ပေါ်ပေါက်လာခြင်းမဟုတ်။ ဉာဏ်အလင်းတော်၏ နှိုးဆော်ခြင်းကိုခံရသောသူတို့သည် ဘုရားရှင်၏ထံတော်မှ လာသော ဗျာဒိတ်ကို ဟောပြောခြင်းဖြစ်သည်။
Currently Selected:
2 Peter 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
