2 Peter 2
2
1သို့ရာတွင် အစ္စရေးလူမျိုးတို့တွင် အရိယာသူတော်စင်အတုအယောင်များ ပေါ်ခဲ့သည့်နည်းတူ သင်တို့ထံသို့လည်း ဆရာအတုအယောင်များ ရောက်လာကြပါလိမ့်မည်။ ထိုသူတို့သည် ဖျက်ဆီးတတ်သော မိစ္ဆာအယူဝါဒတို့ကို သင်တို့ထံသို့ လျှို့ဝှက်စွာ ယူဆောင်လာလိမ့်မည်။ မိမိတို့အား အပြစ်ကျေးကျွန်ဘဝမှ ရွေးနှုတ်ကယ်တင်တော်မူသော ကိုယ်တော်ယေရှုကိုပင် ပစ်ပယ်ကြလိမ့်မည်။ ထိုအကြောင်းကြောင့် သူတို့သည် မိမိတို့အပေါ်တွင် လျင်မြန်စွာ ပျက်စီးခြင်းသို့ ရောက်ကြလိမ့်မည်။ 2မြောက်များစွာသောလူတို့သည် ထိုသူတို့၏ ဆိုးယုတ်သောလမ်းစဉ်ကို လိုက်နာကြပြီး သမ္မာတရားလမ်းကိုပင် ပုတ်ခတ်စော်ကား ပြောဆိုလာကြလိမ့်မည်။ 3ထိုသူတို့သည် လောဘကြီးသူများဖြစ်သည့်အလျှောက် သင်တို့အား လိမ်ညာလှည့်ဖြားပြီး အမြတ်ထုတ်ကြလိမ့်မည်။ သို့ရာတွင် သူတို့အား စီရင်တော်မူမည့်အရှင်သည် အိပ်မောကျ၍ နေမည်မဟုတ်။ 4ဘုရားရှင်သည် အပြစ်ကျူးလွန်တတ်သော နတ်ဒေဝါများကိုပင် ပြစ်ဒဏ်စီရင်တော်မူတတ်သည်။ ထိုနတ်ဒေဝါများကို ငရဲထဲသို့ပစ်ချ၍ အပြစ်ဒဏ်စီရင်တော်မူသောနေ့ထိတိုင် အမှောင်ထဲ၌ သံကြိုးများနှင့် ချည်နှောင်ကာ ထိန်းသိမ်းထားလိမ့်မည်။ 5ရှေးခေတ်လောကီသားများကိုလည်း ဘုရားရှင်သည် ထိုနည်းတူ အပြစ်စီရင်တော်မူခဲ့လေသည်။ ထိုအချိန်အခါက ဘုရားရှင်သည် ဘုရားရှင်ကို မရိုသေသူတို့အားလုံးကို ရေဖြင့်လွမ်းမိုးခဲ့ပြီး၊ ဖြောင့်မတ်ခြင်းတရားအား ဟောပြောသူ နောဧ နှင့် အခြားသူခုနစ်ယောက်ကို ကယ်တင်တော်မူခဲ့လေသည်။ 6ဘုရားရှင်သည် သောဒုံနှင့်ဂေါမာရမြို့တို့ကိုလည်း ပြာပုံဖြစ်သည့်အထိ မီးလောင်ကျွမ်းစေကာ ပြစ်ဒဏ်စီရင်တော်မူသည်။ ဤနမူနာသည် နောင်တစ်ချိန်တွင် ဘုရားရှင်အားမယုံကြည်သူတို့ မည်သို့ခံစားရမည်ကို ဖော်ပြခြင်းဖြစ်သည်။ 7သို့သော် ဘုရားရှင်သည် တရားမဲ့သောသူတို့၏ ကာမဂုဏ်လိုက်စားသော ပြုမူနေထိုင်မှုကြောင့် စိတ်ပျက်နေသော ဖြောင့်မတ်သူ လောတကိုမူ ကယ်တင်တော်မူခဲ့သည်။ 8ထိုဖြောင့်မတ်သူလောတသည် တရားမဲ့သောသူများကြားထဲတွင် အတူနေထိုင်စဥ်တွင် ထိုသူတို့၏ ဆိုးးသွမ်းမိုက်မဲမှုများကို နေ့စဥ်ရက်ဆက်တွေ့မြင်ရ၍ အလွန်စိတ်ဒုက္ခ ရောက်ခဲ့ရသည်။ 9အရှင်သည် ယခင်က ထိုသို့ပြုမူသောကြောင့် ဘုရားတရားကိုင်းရှိုင်းသူတို့ကို ဆင်းရဲဒုက္ခထဲမှ မည်သို့ကယ်တင်ရမည်ကိုလည်းကောင်း၊ မဖြောင့်မတ်သောသူတို့ကို တရားစီရင်တော်မူသောနေ့၌ မည်သို့အပြစ်ပေးရမည်ကိုလည်းကောင်း သိတော်မူသည်။ 10အထူးသဖြင့် မိမိတို့၏ သွေးသားကာမဂုဏ်အာရုံနောက်သို့ လိုက်ပါတတ်သောသူတို့သည် ဘုရားရှင်၏အုပ်စိုးခြင်းကို မထီမဲ့မြင် ပြုတတ်ကြသည်။ ထိုသူတို့သည် အတင့်ရဲသူများ၊ ထင်ရာစိုင်းသူများဖြစ်ပြီး တန်ခိုးကြီးသောသူတို့ကို စော်ကားပြောဆိုတတ်ကြသည်။ 11ထိုသူတို့ထက် များစွာတန်ခိုးကြီးသည့် နတ်ဒေဝါများသည်ပင် ဘုရားရှင်၏ ရှေ့တော်မှောက်တွင် ထိုဘုန်းတန်ခိုးကြီးသူတို့အား မစော်ကားဝံ့ကြပေ။ 12သူတို့သည် ဖမ်းဆီးသတ်ဖြတ်ခြင်းခံရရန်အတွက် ပေါက်ဖွားလာကြသည့် အသိဉာဏ်ကင်းမဲ့သော တိရိစ္ဆာန်များနှင့်တူသည်။ သူတို့သည် မိမိတို့မသိနားမလည်သော အရာများကို ကဲ့ရဲ့ပြောဆိုတတ်ကြသည်။ သူတို့သည် အသိဉာဏ်ကင်းမဲ့သော တိရိစ္ဆာန်များကဲ့သို့ပင် ပျက်စီးခြင်းသို့ရောက်ကြလိမ့်မည်။ 13သူတို့၏ မှားယွင်းသော ဒုစရိုက်အပြစ် အကျိုးကို သူတို့ခံစားရပေမည်။ သူတို့သည် နေ့အချိန်၌ သောက်စားမူးယစ် ပျော်ပါးရခြင်းကို ပျော်ရွှင်မှု ဟု ထင်မှတ်နေကြသည်။ သူတို့သည် သင်တို့နှင့်အတူ စားပွဲတွင်ထိုင်၍ စားသောက်လျက် သင်တို့၏ဂုဏ်သိက္ခာကို ညစ်နွမ်းစေတတ်ကြသည်။ သူတို့သည်လှည့်စားမှုကို နှစ်သက်ကြသည်။ 14သူတို့၏မျက်စိသည် ဖောက်ပြန်လိုသောဆန္ဒနှင့် ပြည့်နှက်နေ၍ အပြစ်မကျူးလွန်ဘဲ မနေနိုင်ကြချေ။ ထိုသူတို့သည် ယုံကြည်ခြင်း၌ တည်ငြိမ်ရင့်ကျက်မှု မရှိသေးသော သူတို့ကို ဆွဲဆောင်တတ်ကြသည်။ သူတို့သည် လောဘကျူးလွန်ရာတွင်ကျင်လည်၍ ဘုရားရှင်၏ကျိန်စာသင့်သောသူများဖြစ်ကြသည်။ 15သူတို့သည် ဖြောင့်တန်းသောလမ်းကို စွန့်ခွာ၍ သွေဖီကာ၊ မတရားမှုမှရရှိသော အခကြေးငွေကို နှစ်သက်သည့် ဗောသော်၏သား ဗာလမ်၏လမ်းစဥ်သို့ လိုက်ကြလေသည်။ 16သို့သော် ဗာလမ်သည် မိမိကျူးလွန်သောအပြစ်အတွက် ဆုံးမခြင်းကိုခံရသည်။ စကားမပြောတတ်သော မြည်းတစ်ကောင်က လူစကားပြော၍ ထိုအရိယာသူတော်စင်၏မိုက်မဲမှုကို တားမြစ်လေသည်။ 17ထိုသူတို့သည် ရေခမ်းခြောက်သွားသည့် စမ်းချောင်းကဲ့သို့လည်းကောင်း၊ လေမုန်တိုင်းတိုက်၍ လွင့်ပါသွားသည့် မိုးတိမ်ကဲ့သို့လည်းကောင်း ဖြစ်ကြသည်။ သူတို့အတွက် အလွန်မှောင်မိုက်သည့်နေရာကို သီးသန့်ထားတော်မူသည်။ 18အကြောင်းမူကား ထိုသူတို့သည် အကျိုးမဲ့အချဉ်းနှီးသော မုသားစကားကို ပြောဆိုကာ ကြွားလုံးထုတ်တတ်ကြသည်။ ထိုသူတို့သည် မှားယွင်းခြင်း၌ အသက်ရှင်နေထိုင်သောသူတို့ထဲမှ လွတ်မြောက်ခါစသူတို့အား ကာမဂုဏ်လိုက်စားခြင်းများဖြင့်သွေးဆောင်ကာ လမ်းလွဲစေတတ်ကြသည်။ 19သူတို့သည် လူတို့အား လွတ်မြောက်ခွင့်ရမည်ဟု ကတိပေးကြသော်လည်း သူတို့ကိုယ်တိုင်မှာမူ ပျက်စီးခြင်း၏ကျေးကျွန်များဖြစ်နေကြသည်။ အကြောင်းမူကား လူသည် တစ်စုံတစ်ခု၏ လွမ်းမိုးချုပ်ကိုင်ခြင်းကို ခံရလျှင် ထိုအရာ၏ကျေးကျွန်ပင်ဖြစ်သည်။ 20ဖြောင့်မတ်ခြင်းလမ်းစဥ်အား သိရှိလာပြီးနောက် မိမိတို့ခံယူရရှိထားသည့် မြင့်မြတ်သောပညတ်တော်ကို စွန့်လွှတ်လိုက်ကြသည်ထက် ထိုတရားလမ်းကို မသိခဲ့ခြင်းက သူတို့အတွက် ပို၍ပင်ကောင်းသည်။ 21ထို့ကြောင့် ထိုသူတို့သည် သန့်ရှင်းမြင့်မြတ်သည့် သမ္မာလမ်းစဉ်ကို သိပြီးနောက် ထို လမ်းစဉ်ကို စွန့်လွှတ်လိုက်ခြင်းသည် ထို သမ္မာလမ်းစဉ်ကို အစကတည်းက မသိဘဲနေခြင်းကသူတို့အတွက် ပို၍ပင်ကောင်းသေး၏။ 22“ခွေးသည် မိမိအန်ဖတ်ကို ပြန်၍စားတတ်သည်” ဆိုသောဆိုရိုးစကားသည်လည်းကောင်း၊ “ဝက်ကို ရေချိုးပေးသော်လည်း ရွှံ့အိုင်ထဲတွင်ပြန်၍လူးတတ်သည်” ဟူသော ဆိုရိုးစကားသည် ထိုသူတို့အတွက် ရည်ညွှန်း ပြောဆိုခဲ့ခြင်းဖြစ်သည်။
Currently Selected:
2 Peter 2: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
