2 Corinthians 9
9
1ယုံကြည်သူတို့ကိုထောက်ပံ့ခြင်းအမှုနှင့်ပတ်သက်၍ အကျွန်ုပ်သည် သင်တို့ထံသို့အထူးရေးသားရန်မလိုအပ်ပေ။ 2လှူဒါန်းလိုသော သင်တို့၏စေတနာစိတ်ကို အကျွန်ုပ်သိသည်။ ထိုသို့စေတနာစိတ်ရှိကြောင်းကို မာကေဒေါနိပြည်သားတို့အား “အခါယပြည်၌ရှိသော ညီအစ်ကိုတို့သည် လွန်ခဲ့သောနှစ်ကတည်းကပင် လှူဒါန်းရန်အသင့်ရှိကြပြီ” ဟုဂုဏ်ယူဝင့်ကြွားစွာ အကျွန်ုပ်ပြောပြထားသည်။ ထိုအခါ သင်တို့၏ စေတနာစိတ်သည် သူတို့အားလုံးနီးနီးကိုနှိုးဆော်စေခဲ့သည်။ 3သို့ရာတွင်သင်တို့အကြောင်း အကျွန်ုပ်တို့ကြွားဝါပြောဆိုခဲ့သမျှတို့သည်မှန်ကန်ကြောင်းသိသာစေရန် ဤညီအစ်ကိုများကို သင်တို့ထံသို့စေလွှတ်လိုက်သည်။ အကျွန်ုပ်ဖော်ပြခဲ့သည်အတိုင်း သင်တို့၏အလှူကိုအသင့်ပြင်ဆင်ထားကြလော့။ 4ထိုသို့မဟုတ်ဘဲ မာကေဒေါနိပြည်သားတချို့သည် အကျွန်ုပ်နှင့်အတူ သင်တို့ထံရောက်လာ၍ သင်တို့၌ အသင့်ပြင်ဆင်ထားခြင်းမရှိသည်ကိုတွေ့ရလျှင် သင်တို့သာမက ဤအမှု၌ သင်တို့ကို စိတ်ချယုံကြည်ထားသော အကျွန်ုပ်တို့သည်လည်း အရှက်ကွဲရကြလိမ့်မည်ဖြစ်သည်။ 5သို့ဖြစ်၍သင်တို့ကတိပြုခဲ့သည့်အတိုင်းဤ အလှူကိုပြင်ဆင်နိုင်ရေးအတွက် ဤညီအစ်ကို တို့အားသင်တို့ထံသို့ကြိုတင်စေလွှတ်ရန် လိုအပ်သည်ဟုအကျွန်ုပ်ထင်မှတ်သည်။ အကျွန်ုပ်ရောက်ရှိလာသောအခါအလှူအသင့်ပြင်ဆင်ထားပြီးဖြစ်၍ သင်တို့ကဝတ္တရားအရပေးလှူသည်မဟုတ်ဘဲစေတနာအရပေးလှူကြောင်းပေါ်လွင်စေလိမ့်မည်ဖြစ်သည်။ 6မျိုးစေ့အနည်းငယ်သာကြဲသောသူသည် အနည်းငယ်သာရိတ်သိမ်းရလိမ့်မည်ဖြစ်သည်။ များစွာကြဲသောသူသည် များစွာရိတ်သိမ်းရလိမ့်မည်ဟူသောအချက်ကိုသတိပြုလော့။ 7လူတိုင်း မိမိ၏စိတ်ထဲ၌လှူဒါန်းရန် ဆုံးဖြတ်ထားသည့်အတိုင်းလှူဒါန်းသင့်ပေသည်။ နှမြောသောစိတ်ဖြင့် သော်လည်းကောင်း၊ ဝတ္တရားအရဖြင့်သော်လည်းကောင်းမလှူဒါန်းရ။ ဘုရားရှင်သည် စိတ်စေတနာဖြင့် ရက်ရောစွာလှူဒါန်းသောသူကို နှစ်သက်တော်မူသည်။ 8ဘုရားရှင်သည် သင်တို့အတွက်ကျေးဇူးတော်တိုင်းကိုကြွယ်ဝစွာပေးသနားရန်တတ်နိုင်တော်မူသည်။ ဤသည်မှာ လိုအပ်သောအရာများကို အစဉ်ရရှိခြင်းအားဖြင့် သင်တို့သည်ကောင်းမှုတိုင်းတွင် ကူညီမစနိုင်ရန် ဖြစ်သည်။ 9ကျမ်းစာထဲတွင် “သူသည်ဆင်းရဲသူတို့အားရက်ရောစွာ ပေးကမ်းစွန့်ကြဲသည်။ သူသည်သနားကြင်နာမှုသည်ထာဝစဉ်တည်သည်” ဟုရေးသားထားသည့်အတိုင်းဖြစ်သည်။ 10မျိုးကြဲသူအားမျိုးစေ့နှင့်အစာရေစာကိုပေးတော်မူသောရှင်သည် အကျွန်ုပ်တို့လိုသမျှသောမျိုးစေ့ကိုလည်းပေး၍ အပင်ပေါက်ရှင်သန်စေတော်မူလိမ့်မည်။ သင်တို့၏ရက်ရောသောစိတ်စေတနာမှအသီးအပွင့်များကိုလည်းဖြစ်ထွန်းစေတော်မူလိမ့်မည်။ 11သင်တို့သည်အခါခပ်သိမ်းရက်ရောစွာပေး လှူနိုင်ကြစေရန်ကိုယ်တော်သည်သင်တို့အား အစဉ်ချမ်းသာကြွယ်ဝစေတော်မူလိမ့်မည်။ အကျွန်ုပ်တို့မှတစ်ဆင့်သင်တို့ပေးလှူသောအလှူငွေများကိုခံယူရရှိသော သူတို့သည် ဘုရားရှင်၏ကျေးဇူးတော်ကိုချီးမွမ်းကြလိမ့်မည်။ 12သင်တို့၏လှူဒါန်းခြင်းအမှုသည် ယုံကြည်သူတို့၏လိုအပ်ချက်များကို ဖြည့်ဆည်းပေးသည်သာမက ဘုရားရှင် ကိုကျေးဇူးတင်သူများလည်းတိုးပွားလာစေသည်။ 13သင်တို့၏ လှူဒါန်းခြင်းအမှုကြောင့် လက်ခံရရှိသောသူတို့သည် ဘုရားရှင်ကိုချီးမွမ်းကြလိမ့်မည်။ သူတို့မှစ၍ ယုံကြည်သူအပေါင်းတို့အား ရက်ရောစွာလှူဒါန်းခြင်းသည် ယေရှုခရစ်တော်၏ မင်္ဂလာသတင်းကောင်းကို သင်တို့နာခံကြောင်သက်သေပြပေလိမ့်မည်။ 14သင်တို့သည်ထူးကဲသောကျေးဇူးတော်ကိုခံစားရကြသဖြင့် သူတို့သည်သင်တို့ကိုအလွန်ချစ်ခင်မြတ်နိုးလျက်သင်တို့အတွက် ဆုတောင်းပေးကြလိမ့်မည်ဖြစ်သည်။ 15ငါတို့သည်တန်ဖိုးမဖြတ်နိုင်သောဆုကျေးဇူးတော်အတွက်ဘုရားရှင်၏ကျေးဇူးတော်ကိုချီးမွမ်းကြပါစို့။
Currently Selected:
2 Corinthians 9: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
