2 Corinthians 8
8
1အကျွန်ုပ်တို့ညီအစ်ကိုမောင်နှမတို့၊ မာကေဒေါနိပြည်ရှိအသင်းတော်တို့အား ဘုရားရှင်ပေးသနားတော်မူသောကျေးဇူးတော်အကြောင်းကိုသင်တို့အား အကျွန်ုပ်ပြောပြလိုပါသည်။ 2ထိုအသင်းတော်တို့သည်ဆင်းရဲဒုက္ခများကိုအလူးအလဲခံခဲ့ကြရသည်။ သို့သော်လည်း လွန်စွာရွှင်လန်းဝမ်းမြောက်လျက်ပင်ရှိရကား သူတို့သည်အလွန်ဆင်းရဲကြသော်လည်းပေးကမ်းစွန့်ကြဲမှုတွင်အတိုင်းထက်အလွန်ရက်ရောကြသည်။ 3သူတို့သည်တတ်နိုင်သမျှ ပေးကမ်းသည်သာမက မိမိတို့၏ဆန္ဒအလျောက်ထက်ပင်ပို၍ပေးကမ်းကြကြောင်း အကျွန်ုပ်သက်သေခံသည်။ 4သူတို့သည် ဂျေရုဆလင်မြို့ရှိယုံကြည်သူတို့အားပေးကမ်းသည့်အမှုတွင်ပါဝင်ခွင့်ရရန် အကျွန်ုပ်တို့အား အနူးအညွတ်မေတ္တာရပ်ခံကြသည်။ 5သူတို့သည် အကျွန်ုပ်တို့မျှော်လင့်သည်ထက်ပိုပြီး ဦးစွာဘုရားရှင်ထံ မိမိကိုယ်ကိုယ်ဆက်ကပ်လှူဒါန်းပြီးနောက် ဘုရားရှင်၏အလိုတော်အားဖြင့် အကျွန်ုပ်တို့ထံ၌လည်းဆက်ကပ်လှူဒါန်းကြသည်။ 6ထို့ကြောင့် တိတုသည် သင်တို့အထဲ၌ ဤလှူဒါန်းခြင်းကိုစတင်ဆောင်ရွက်ခဲ့သည့်အားလျော်စွာ ပြီးမြောက်အောင်ဆောင်ရွက်နိုင်ရန်သူ့အား အကျွန်ုပ်တို့တိုက်တွန်းခဲ့သည်။ 7သင်တို့သည်ယုံကြည်ခြင်း၊ ဟောပြောခြင်း၊ အသိပညာရှိခြင်း၊ စိတ်အားထက်သန်မှုအပြည့်ရှိခြင်းနှင့် သင်တို့အထဲ၌ အကျွန်ုပ်တို့လှုံ့ဆော်ပေးခဲ့သောချစ်ခြင်းစသည့်အချက်တို့၌ကြွယ်ဝကြသကဲ့သို့ ဤလှူဒါန်းခြင်း၌လည်းကြွယ်ဝကြပါစေ။ 8ဤသည်မှာ အကျွန်ုပ်သည် သင်တို့ကိုအမိန့်ပေးနေခြင်းမဟုတ်ပေ။ သို့သော် သင်တိုေ၏ ချစ်ခြင်းမေတ္တစစ်မှန်မှုကို အခြားသူတို့၏စိတ်အားထက်သန်မှုနှင့်နှိုင်းယှဉ်၍ စစ်ဆေးခြင်းသာဖြစ်သည်။ 9သင်တို့သည်အကျွန်ုပ်တို့၏အရှင်ဖြစ်တော်မူသောယေရှုခရစ်တော်၏ကျေးဇူးတော်ကိုသိရှိကြသည်။ ကိုယ်တော် သည်ကြွယ်ဝတော်မူသော်လည်း သင်တို့၏အကျိုးငှာဆင်းရဲခံတော်မူသည်။ ဆင်းရဲခံတော်မူရခြင်းမှာသင်တို့ကြွယ်ဝလာစေရန်အတွက်ပင်ဖြစ်ပေသည်။ 10ဤကျေးဇူးပြုခြင်းအမှုနှင့်ပတ်သက်၍ သင်တို့အားအကြံတစ်ခုကို အကျွန်ုပ်ပေးမည်။ ဤအကြံကား လွန်ခဲ့သောနှစ်ကတည်းက ဤအမှုကိုအစပြုခဲ့သည်သာမက ပြုလုပ်ရန်လည်းဆန္ဒရှိကြသောသင်တို့အတွက်အကျိုးရှိသည်။ 11သို့ဖြစ်၍ သင်တို့အစပြုခဲ့သည့်အရာကိုပြီးမြောက်အောင်ဆောင်ရွက်ကြလော့။ ဆောင်ရွက်ရန် ဆန္ဒပြင်းပြခဲ့ကြသကဲ့သို့ ဆောင်ရွက်ရာတွင်လည်းစေတနာစိတ်ရှိကြလော့။ သင်တို့တတ်နိုင်သမျှကို လှူဒါန်းကြလော့။ 12သင်တို့လှူဒါန်းရန် စိတ်စေတနာရှိလျှင် ဘုရားရှင်သည် သင်တို့၌မရှိသောအရာကို မထောက်ဘဲ ရှိသောအရာကိုသာထောက်၍ သင်တို့၏လှူဒါန်းခြင်းကိုလက်ခံတော်မူလိမ့်မည်။ 13သင်တို့၏လှူဒါန်းခြင်းသည် အခြားသူတို့အတွက်သက်သာစေ၍ သင်တို့အတွက်မှာမူခက်ခဲစေရန် အကျွန်ုပ်မဆိုလိုပါ။ တန်းတူညီမျှဖြစ်စေရန်သာဆိုလိုသည်။ 14ယခုအချိန်တွင် သင်တို့၏ကြွယ်ဝမှုဖြင့် သူတို့၏လိုအပ်မှုကိုဖြည့်ဆည်းပေးလျှင် သူတို့၏ကြွယ်ဝမှုသည်လည်း သင်တို့၏လိုအပ်မှုကို ဖြည့်ဆည်းပေးကြလိမ့်မည်။ 15ကျမ်းစာတွင် “များများရသောသူလည်းမပို၊ နည်းနည်းရသောသူလည်းမလို” ဟုရေးသားထားသည့်အတိုင်းပင် ဖြစ်သည်။ 16သင်တို့အပေါ် အကျွန်ုပ်ထားရှိသော စိတ်အားထက်သန်မှုမျိုးကို တိတု၏စိတ်နှလုံးထဲ၌ထည့်သွင်းပေးတော်မူသော ဘုရားရှင်၏ကျေးဇူးတော်ကို အကျွန်ုပ်ချီးမွမ်းပါသည်။ 17တိတုသည် အကျွန်ုပ်တို့၏တိုက်တွန်းမှုကိုလက်ခံသည်သာမက အလွန်ထက်သန်သောစိတ်ရှိ၍ မိမိစိတ်ဆန္ဒအလျောက်သင်တို့ထံသို့လာခြင်းဖြစ်သည်။ 18တိတုနှင့်အတူ အခြားသောညီအစ်ကိုတစ်ဦးကိုလည်း အကျွန်ုပ်တိုစေလွှတ်လိုက်ပါသည်။ ထိုညီအစ်ကိုသည် မင်္ဂလာသတင်းကောင်းကို ဟောပြောရာတွင် အသင်းတော်တို့၏ချီးမွမ်းခြင်းကိုခံရသောသူပင်ဖြစ်သည်။ 19ထို့ပြင်အကျွန်ုပ်တို့ကောက်ခံနေသော အလှူငွေကိုသယ်ယူပို့ဆောင်ပေးသည့်အမှုတော်၌ အကျွန်ုပ်တို့နှင့်အတူ ခရီးသွားရန် အသင်းတော်များ၏ ရွေးချယ်ခန့်အပ်ထားခြင်းကိုခံရသူလည်းဖြစ်သည်။ ဤအလှူငွေကောက်သည့်အမှုတော်မှာ ဘုရားရှင်၏ ဘုန်းတော်ကိုထင်ရှားစေရန်နှင့် အကျွန်ုပ်တို့၏ စိတ်စေတနာကိုပြသရန်ဖြစ်သည်။ 20ဤသို့ရက်ရောစွာလှူဒါန်းကြသော အလှူငွေကိုကိုင်တွယ်စီမံခြင်းနှင့်ပတ်သက်၍ အကျွန်ုပ်တို့ကိုမည်သူမျှ အပြစ်မတင်စေရန် အကျွန်ုပ်တို့သတိနှင့် ဆောင်ရွက်လျက်ရှိကြသည်။ 21အဘယ်ကြောင့် အကျွန်ုပ်တို့သည် ဘုရားရှင်ရှေ့တော်၌သာမက အခြားသောသူတို့၏ရှေ့၌လည်း မှန်သောအရာကိုလုပ်ဆောင်ရန်ရည်ရွယ်ကြသည်။ 22ထိုသူတို့နှစ်ယောက်နှင့်အတူ နောက်ထပ်ညီအစ်ကိုတစ်ဦးကိုလည်း အကျွန်ုပ်တို့စေလွှတ်လိုက်သည်။ ထိုသူအား အကြိမ်ကြိမ်စိစစ်ကြည့်ရာ သူသည်ကူညီရန်အစဉ်စိတ်အားထက်သန်ကြောင်း အကျွန်ုပ်တို့တွေ့ရှိ ရသည်။ သူသည် သင်တို့အပေါ်ယုံကြည်မှုရှိသောကြောင့် ယခုပို၍ပင် စေတနာစိတ်အားထက်သန်လျက်ရှိသည်။ 23တိတုနှင့်ပတ်သက်၍ဖော်ပြရမည်ဆိုသော် သူသည်သင်တို့၏အမှုကိစ္စများတွင် အကျွန်ုပ်နှင့်အတူဝိုင်းဝန်းကူညီပေးသော အကျွန်ုပ်၏လုပ်ဖော်ကိုင်ဘက်ဖြစ်သည်။ သူနှင့်အတူလိုက်ပါလာကြ သောအခြားညီအစ်ကိုများမှာ အသင်းတော်တို့၏ကိုယ်စားလှယ်များဖြစ်ကြသည်။ 24ထို့ကြောင့် သင်တို့၏ချစ်ခြင်းမေတ္တာနှင့် သင်တို့အကြောင်း အကျွန်ုပ်တို့ကြွားဝါထားသောအရာတို့ကို အသင်းတော်များရှေ့မှောက်၌ သူတို့အားသက်သေပြကြလော့။
Currently Selected:
2 Corinthians 8: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
