1 Timothy 6
6
1ဘုရားရှင်၏ နာမတော်နှင့် ကျွန်ုပ်တို့၏သွန်သင်ချက်များကို စော်ကားပြောဆိုခြင်းမခံရစေရန် အစေခံတံပိုးအောက်၌ရှိသမျှသောသူတို့သည် မိမိတို့၏ သခင်များကို အလွန်အမင်းရိုသေထိုက်သူများဟု မှတ်ယူသင့်၏။ 2သခင်သည် ယုံကြည်သူဖြစ်လျှင် ယုံကြည်သူအချင်းချင်းဖြစ်သည်ဟုဆိုကာ မထီလေးစား မပြုစေနှင့်။ ထိုအစား မိမိအစေခံသောသူမှာ ချစ်ခင်ရသည့် ယုံကြည်သူပင် ဖြစ်သောကြောင့် ပို၍ ကောင်းစွာ အစေခံရမည်။ သင်သည် ဤအရာများကို သွန်သင်၍ တိုက်တွန်းနှိုးဆော်ကြလော့။ 3တစ်စုံတစ်ယောက်သည် ကျွန်ုပ်တို့၏အရှင်ဖြစ်သော ယေရှုခရစ်တော်၏ မှန်ကန်သောစကားတို့နှင့်လည်းကောင်း၊ ဘုရားတရားကိုင်းရှိုင်းခြင်းနှင့်ဆိုင်သော သွန်သင်မှုတို့နှင့်လည်းကောင်း ဆန့်ကျင်လျက် ကွဲလွဲသည့် ဩဝါဒများကိုသွန်သင်လျှင် 4ထိုသူသည် မာနကြီးလျက် မည်သည့်အရာကိုမျှ နားမလည်သူဖြစ်၏။ သူတို့သည် အငြင်းပွားခြင်းနှင့် စကားလုံးအသုံးအနှုန်းများအပေါ် ငြင်းခုံရခြင်းတို့၌သာ စွဲလမ်းနေသူဖြစ်၏။ ထိုအကြောင်းကြောင့် တစ်ဦးနှင့်တစ်ဦး မနာလိုခြင်း၊ ပဋိပက္ခဖြစ်ခြင်း၊ စော်ကားပြောဆိုခြင်း၊ ဆိုးရွားသောသံသယစိတ်ရှိခြင်းတို့ ဖြစ်လာစေ၏။ 5ထို့ပြင် အသိစိတ်ဖောက်ပြန်ပြီး သမ္မာတရားဆုံးရှုံးကာ ဘုရားတရားကိုင်းရှိုင်းလျှင် အကျိုးစီးပွားဖြစ်သည်ဟု ထင်မှတ်ကြသူတို့အကြားတွင် အဆုံးမသတ်နိုင်သော အငြင်းပွားမှုများ ဖြစ်စေတတ်၏။ 6သို့သော် ရောင့်ရဲသောစိတ်ဖြင့် ဘုရားတရားကိုင်းရှိုင်းခြင်းသည် ကြီးမားသောအကျိုးစီးပွားပင် ဖြစ်၏။ 7အကြောင်းမူကား ကျွန်ုပ်တို့သည် ဤကမ္ဘာလောကသို့ လက်ဗလာဖြင့် ရောက်လာပြီး လက်ဗလာဖြင့်ပင် ပြန်လည်ထွက်ခွာ သွားရမည်ဖြစ်သောကြောင့်ဖြစ်၏။ 8သို့ဖြစ်၍ စားစရာနှင့် ဝတ်စရာ ရှိလျှင် ထိုအရာတို့နှင့် ရောင့်ရဲတင်းတိမ်ကြရမည်။ 9ချမ်းသာလိုသောသူတို့သည် ဖြားယောင်းသွေးဆောင်ခံရခြင်း၊ ထောင်ချောက်မိခြင်း၊ မိုက်မဲ၍ အန္တရာယ်ရှိသော တပ်မက်ခြင်းစသည်တို့ထဲသို့ ကျရောက်တတ်၏။ ထိုအရာများသည် လူတို့ကို အကြွင်းမဲ့ ပျက်စီးဆုံးရှုံးစေ၏။ 10အကြောင်းမူကား ငွေကို တပ်မက်ခြင်းသည် မကောင်းမှုအမျိုးမျိုး၏ အရင်းအမြစ်ဖြစ်၏။ လူတချို့သည် ငွေကို တပ်မက်သောကြောင့် ယုံကြည်ခြင်းနှင့်လမ်းလွဲကာ အလွန်ဝမ်းနည်းပူဆွေးခြင်းတို့ဖြင့် မိမိကိုယ်ကို ထိုးဖောက်နာကျင်စေ၏။ 11သို့သော် ဘုရားရှင်၏လူတို့၊ ထိုအရာအားလုံးမှ ရှောင်ကြဉ်လော့။ ဖြောင့်မတ်ခြင်း၊ ဘုရားတရားကိုင်းရှိုင်းခြင်း၊ ယုံကြည်ခြင်း၊ ချစ်ခြင်းမေတ္တာ၊ သည်းခံခြင်း၊ နူးညံ့သိမ်မွေ့ခြင်းတို့ကို လက်ကိုင်ပြုလော့။ 12ယုံကြည်ခြင်းဆိုင်ရာ တိုက်ပွဲကောင်းကို တိုက်လော့။ နိစ္စထာဝရအသက်ကို အရယူလော့။ ထိုအသက်အတွက် ဘုရားရှင်သည် သင့်အားခေါ်တော်မူသည်ဖြစ်၍ သင်သည် များစွာသော သက်သေတို့ရှေ့တွင် ထိုကောင်းမွန်သောသက်သေခံချက်ကို ပေးလေပြီ။ 13အရာအားလုံးအား အသက်ရှင်စေတော်မူသည့်ဘုရားရှင်၏ ရှေ့တော်၌လည်းကောင်း၊ ပုန္တိပိလတ်ရှေ့၌ ကောင်းသောဝန်ခံချက်ဖြင့် သက်သေခံတော်မူသော ယေရှုခရစ်တော်၏ ရှေ့တော်၌လည်းကောင်း သင့်ကို ကျွန်ုပ်မှာကြား၏။ 14သင်သည် ကျွန်ုပ်တို့၏အရှင်ဖြစ်သော ယေရှုခရစ်တော် ပေါ်ထွန်းတော်မူသည့်အချိန်အထိ အစွန်းအထင်းကင်းကင်းနှင့် အပြစ်ဆိုဖွယ်မရှိစေရန် ဘုရားရှင်၏ ပညတ်တော်ကို လိုက်နာလော့။ 15အချိန်တန်သောအခါ ဘုရားရှင်သည် ယေရှုခရစ်တော်ကို ပေါ်ထွန်းစေတော်မူလိမ့်မည်။ ဘုရားရှင်သည် ကောင်းကြီးပေးတော်မူသည့် တစ်ဆူတည်းသောအုပ်ချုပ်သူ၊ ဘုရင်တကာတို့၏ ဘုရင်၊ အရှင်တကာတို့၏ အရှင်ဖြစ်ပြီး 16အရှင်တစ်ပါးတည်းသာလျှင် ထာဝရအသက်ရှင်လျက် မည်သူမျှ မချဉ်းကပ်နိုင်သည့် အလင်း၌ ကိန်းဝပ်စံမြန်းတော်မူ၏။ ထိုအရှင်ကို မည်သူမျှ မမြင်ဖူးသကဲ့သို့ မြင်လည်း မမြင်နိုင်။ ထိုအရှင်၌ ရိုသေလေးမြတ်ခြင်းနှင့် ထာဝရဘုန်းတန်ခိုးတော်တို့ ရှိတော်မူပါစေသော။ အာမင်။ 17ဤကမ္ဘာလောက၌ ချမ်းသာကြွယ်ဝသူတို့ကို မာနမကြီးစေရန်နှင့် မမြဲသည့်စည်းစိမ်ချမ်းသာတို့အပေါ် မျှော်လင့်ချက်မထားရှိရန် မိန့်ကြားလော့။ သို့သော် ကျွန်ုပ်တို့ကို ဝမ်းမြောက်ပျော်ရွှင်စေရန်အတွက် အရာအားလုံးကို ရက်ရောစွာ ပေးသနားတော်မူသည့် ဘုရားရှင်အပေါ်၌သာ မျှော်လင့်ချက်ထားရှိရန် မိန့်ကြားလော့။ 18ထိုသူတို့ကို ကောင်းသောအရာများပြုရန်၊ ကောင်းသောအကျင့်များဖြင့်ကြွယ်ဝရန်၊ ရက်ရောစွာ ပေးကမ်းစွန့်ကြဲရန်နှင့် မျှဝေလိုစိတ်ရှိရန် မိန့်ကြားလော့။ 19ဤသို့ဖြင့် သူတို့သည် နောင်ကာလအတွက် ခိုင်မာသောအခြေခံအုတ်မြစ်တည်းဟူသော ဘဏ္ဍာတိုက်တွင် မိမိတို့အတွက် စုဆောင်းလျက် စစ်မှန်သောအသက်ရှင်နေထိုင်ကို ရရှိကြလိမ့်မည်။ 20တိမောသေ၊ သင့်ထံ အပ်နှင်းထားသည့်အရာကို စောင့်ရှောက်လော့။ ဘုရားတရားမဲ့ဖြစ်သည့် အကျိုးမရှိသောစကားများနှင့် အသိပညာဟု လွဲမှားစွာ ခေါ်ဝေါ်သည့် ဆန့်ကျင်ဘက်အယူအဆများကို ရှောင်ကြဉ်လော့။ 21လူအချို့တို့သည် ထိုအရာတို့နောက်သို့လိုက်ကာ ယုံကြည်ခြင်းလမ်းမှ လွဲချော်သွားကြပြီ။ ကျေးဇူးတော်သည် သင်တို့အပေါ် သက်ရောက်ပါစေသော။
Currently Selected:
1 Timothy 6: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
